‘Fwomonenuña Yatama naYayiwahi’

‘Kutama bayi kuyimika mushinduku; fwomonenu yatama nayayiwahi.’—AROMA 12:21.

1. Muloñadi wutunateleli kukuhwelela netu tunateli kufwomona yuma yatama?

 KOMANA chekala chaswayi kushinda antu adimbululaña kudifukula kwalala? Komana chaswayi kushinda ñovu yafwilaña kutwikokola kulonda kufunta kuyililu yamukaayi yabulaña kumulemesha Nzambi? Ñakwilu yanawa malwihu ejima yidi nawu, eña! Muloñadi chitunahosheli ichi? Himuloña wamazu ahosheliyi kapostolu Pawulu mumukanda wayisonekeleliyi Aroma. Wasonekeli nindi: “Kutama bayi kuyimika mushinduku; fwomonenu yatama nayayiwahi.” (Aroma 12:21) Neyi tumukuhwelela Yehova nakufwila chikupu netu kaayi kabuli kutufwomona, yuma yatama hiyikutufwomonaku. Cheñi nawa, nhoshelu yakwila nawu ‘fwomonenuña yatama’ yamwekesha nawu tunateli kushinda yuma yatama neyi tutwalekahu kuzata nañovu kulonda kukañesha kutama. Antu abulaña kutona hohu nakuleka kulwa diwu ashindañawu kudi akanu kaayi katama nimwanta wakanu kaayi, Satana Diyabolu.—1 Yowanu 5:19.

2. Muloñadi yitukushinshikila hawunsahu wamuwumi waNehemiya?

² Mukuhita kwayaaka 500 henohu mpinji yaPawulu kanda, kambuña Nzambi washakamineña muYerusalema wamwekesheli walala wamazu aPawulu kutalisha hakulwisha kutama. Muntu waNzambi yeniwu, Nehemiya hashindili hohu ikañesha kudi antu abula kumulemesha Nzambuku, ilaña wafwomweni yatama nayayiwahi. Kukalanyi kwamweniyi Nehemiya? Chumanyi chamukwashili kushinda iku kukala? Tunatweshi kwimbujola ñahi chakutalilahu chindi? Hakwakula awa malwihu, lekenu tushinshiki wunsahu wamuwumi waNehemiya. *

3. Indi nshakaminu yaNehemiya yadiña yamuchidinyi, nawa mudimwinyi wazatiliyi?

 ³ Nehemiya wadiña nakuzatila muchipañu chaMwanta Aratasheshe wakuPeresi. Hela chakwila Nehemiya wadiña nakushakama nawantu abula kwitiya, hekalili ‘mukwakulondeja mwelileñawu antu amunana mafukuku.’ (Aroma 12:2) Hampinji yikwadiña kukankila muYuda, washiyili nshakaminu yindi yayiwahi nakwenda lwendu lwakala lwakuya kuYerusalema nakukalakala mudimu weneni wakutuñulula mpwembu yamusumba. (Aroma 12:1) Hela tuhu wadiña ñuvulu wamuYerusalema, Nehemiya wazatileña mafuku ejima nawakwawu aIsarela “kufumisha hankunku yakucha kushika nihamwekanaña tutumbwa.” Muloña wanichi, mudimu wejima awumanishili mutukweji tuyedi hohu. (Nehemiya 4:21; 6:15) Iwu wadiña himudimu wakuhayamisha, muloña hampinji yatuñileñawu, aIsarela atalañeni nekañesha dashiyashana. Indi akwankunyi naNehemiya adiña anyi, nawa nkeñelu yawu yadiña yakwiladi?

4. Indi akwakunyi naNehemiya afwilileña kwiladi?

⁴ Akwakunyi aweni adiña aSambalati, Tobiya niGeshemi antu adiña nañovu ashakamineña kwakwihi naYuda. Chineli adiña ayilumbu jawantu jaNzambi, “hiyakutiya kutama nankashi nanochu chikunenzi [Nehemiya] wakukeña nindi anyana kaIsarela amoni kuwaha.” (Nehemiya 2:10, 19) Ayilumbu jaNehemiya afwilileña chikupu kulekesha mudimu waNehemiya wakutuña, nawa afukwiluhu tufuta twatama. Komana Nehemiya, ‘wetejeli kumufwomona nakutama’?

‘Kuzuwa naKutiya kuMuchima Kutama’

5, 6. (a) Chumanyi chakoñeli ayilumbu jaNehemiya kutalisha hamudimu wakutuña? (b) Muloñadi Nehemiya chabulilyi kuyichina akwakunyi nindi?

⁵ Nehemiya wayikonkomweneni antu jindi nawulobu nindi: ‘Twayenu tutuñululenu mpwembu yaYerusalema.’ Amwakwili nawu: “Tutuñenu.” Nehemiya wahosheli nindi: “Hiyakukolesha makasawu kumudimu owu wawuwahi,” ilaña akwakunyi “hiyakutuseha nankashi nikutudiwula, nawu, Chumichi chimudi nakwila hichumanyi? Keña mudikañi namwanta tahindi?” Nehemiya hatiyili woma nakuseha kwawu nichayinkeluwu muloña wakutwambaku. Wayilejeli akwakunyi nindi: “Nzambi wewulu diyi wukutuwahishila mudimu. Dichi etu ambuñindi tukunyamuka, tukutuñaña kwetu.” (Nehemiya 2:17-20) Nehemiya wafukwiluhu chikupu kutwalekahu ‘namudimu wawuwahi.’

⁶ Wumu hadana akwakunyi, Sambalati, ‘wazuwili nakutiya kumuchima kutama’ nakuswejesha kutuboka. Wayisupishili nindi, “Awa aYudeya akadi ñovu adi nakwila ñahi?” “Asañuli malola adi munyilumba yanswadi ochawu dehi, tahindi?” Tobiya hakudibombamu nakuyisupisha nindi: “Neyi mumbu wukuyaku wukuhumuna mpwembu yawu yamalola.” (Nehemiya 4:1-3) Indi Nehemiya weliluhu hodi?

7. Mujinjilanyi Nehemiya mwakoñeleliyi nanyiloña yamutwikiluwu kudi akwankunyi nindi?

⁷ Nehemiya wakuminini dakudiwula kuna kusupisha. Wovwahilili nshimbi yaNzambi nawa hakeñeli kufuntisha katama nakatamaku. (Alevi 19:18) Ilaña washili kukala kweniku mumakasa aYehova nakulomba nindi: “Eyi Nzambi yetu tiyaku, anatudiwuli. Yilubwili hanyitu yawu kusawula kwanatusawuluwu.” (Nehemiya 4:4) Nehemiya wakuhweleleli muchikaninu chaYehova chakwila nawu: “Nikutenda, yami; nikufweta, yami.” (Kuhituluka 32:35) Cheñi nawa, Nehemiya niantu jindi ‘atwalekeluhu kutuña mpwembu.’ Hiyetejeli kuyiluwañeshaku. Kafwampi, “mpwembu yejima yinuñañana nikunuñañana, yishika nihakachi kamuwuzandamu, muloña antu adiñi namuchima wakukalakala.” (Nehemiya 4:6) Ayilumbu jawakwakudifukula kwakala akañenyi kulekesha mudimu wakutuña! Tunatweshi ñahi kumwimbojola Nehemiya?

8. (a) Tunateli kumwimbujola ñahi Nehemiya neyi akwankunyi atwitwambila? (b) Shimunenu chakuhumañana chimwamweni hela chimwatiyili chamwekeshaña maana akubula kufuntisha katama nakatama.

⁸ Makonu, akwakunyi netu hashikola, kumudimu hela mukachi kachisaka anateli kutusupisha nakututwika nyiloña. Hela chochu, kakavulu nyiloña yamuchidiwu yakutwamba twayimanishaña kuhitila mukuzatisha nshimbi yamuNsona yakwila nawu: ‘Kwekala . . . mpinji yakumwena.’ (Mukwakutaŋisha 3:1, 7) Dichi, kufwana Nehemiya twatondolwelaña kufuntisha katama nakatama namazu akutiyisha kumuchima kutama. (Aroma 12:17) Twamulombaña Nzambi nakukuhwelela watwikana  nindi: “Yami nukufweta.” (Aroma 12:19; 1 Petulu 2:19, 20) Muniyi njila, hitwetejaña akwakunyi kutuluwañeshela mudimu wakuspiritu wunakukalakewa makonuku—wakushimwina nsañu yayiwahi yaWanta waNzambi nikwilisha atumbanji. (Matewu 24:14; 28:19, 20) Mpinji yejima yitwakalakalaña mumudimu wakushimwina nikukaana kutwiluwañesha nekakeja, twamwekeshaña chikuhwelelu chadifwana nachamwekesheliyi Nehemiya.

‘Tukayijaha’

9. Indi ayilumbu jaNehemiya azatishili ikañesha damuchidinyi, nawa Nehemiya wazatiluhu chumanyi?

⁹ Chatiyiluwu akwankunyi jawakwakudifukula kwalala amumpinji yaNehemiya nawu “mudimu wakutuñulula mpwembu jaYerusalema hiwukuya kumbidi,” anoneli mpoku jawu jakabali kulonda “akalwi naYerusalema.” Iyi nsañu yayineñesheli aYudeya. Kukabeta kaluwunda kwadiñi aSamariya, kumusela kwadiña aAmoni, kukabeta kambwela kwadiña aArabiya, nawa kumujika kwadiña eniAshidodi. Yerusalema amunyeñumukili; akwakutuña amwekeni neyi adi mukakosi. Chumanyi chadi kwilawu? Nehemiya nindi, “Etu hitukulomba kudi Nzambi yetu.” Ayilumbu jawu ayitiyishili woma nawu: ‘Tukuyijaha, nakulekesha nimudimu.’ Nehemiya wazatiluhu chuma chimu kuhitila mukuyinka akwakutuña mudimu wakukiña musumba “nampoku jawu jatubali, namayoñawu, nimatawu anyikunji.” Chalala, kwesekeja nammwenu yawuntu, izaza danyanya dawaYudeya hidadi kushinda mashidika amavulu awayilumbu jawuku, ilaña Nehemiya wayikonkwomweneni nindi: ‘Bayi muyitiya womaku; anukenu Yehova, himuneni, Wakutiya woma nankashi.’—Nehemiya 4:7-9, 11, 13, 14.

10. (a) Chumanyi chaletesheli yuma kuhimpika mukunyakashana hakachi kawayilumbu jaNehemiya? (b) Indi Nehemiya weliluhu hodi?

¹⁰ Dichi yuma yahimpikili mukunyakashana. Ayilumbu alekeli kuyilukuka. Muloñadi? Nehemiya nindi, “Nzambi [walala] nabayishi dehi mpuña yawu.” Hela chochu, Nehemiya welukili nindi ayilumbu achidiña nakuyichinisha. Dichi mukubabala wahimpili njila yakuzatilamu nawakwakutuña. Kufuma hayina mpinji, “adiñi nakuditwika wejima wawu, elili chikasa chimu chidi nakukalakala mudimu, chikwawu chinakwati chitwa chindi.” Nehemiya wenkeli muntu mudimu wakwila neyi chilumbu nalukuki watela “kwimba mpuña” kulonda kusoñamisha akwakutuña. Chuma chasweja kulema, Nehemiya wayikanini antu nindi: “Nzambi yetu wakatulwila.” (Nehemiya 4:15-20) Akwakutuña atwalekeluhu kuzata muloña akolesheweli nawa adiña adiloñesha kutalañana nakukala. Chumanyi chitunateli kudizila kuniyi nsañu?

11. Chumanyi chayikwashaña eniKristu alala kushinda yatama mumatuña mwalekeshawu mudimu waWanta, nawa munjilanyi mwafwomwenañawu yatama nayayiwahi?

¹¹ Mpinji jikwawu eniKristu alala atalañanaña nekañesha datama. Kafwampi mumatuña amakwawu akwankunyi atama awakwakudifukula alala atuñaña izaza dawayilumbu. Kwesekeja nammwenu yawuntu, akwetu akakwitiya amunana matuña hiyakweti ñovu jakulwaku. Ilaña aYinsahu wenawa akuhwelela nawu ‘Nzambi wukayilwila.’ Chalala ana anakukabishawu kukola chikuhwelelu chawu, kapampa kakavulu amona dehi nawu Yehova nakwakula kulomba kwawu ‘nakubayisha mpuña’ yawayilumbu akweti ñovu. Hela tuhu mumatuña mwalekeshawu mudimu waWanta, eniKristu awanaña jinjila jakutwalekelamu kushimwina nsañu yayiwahi. Neyi chochahimpiluwu akwakutuña muYerusalema jinjila jakuzatilamu mudimu wawu, hohamu aYinsahu jaYehova makonu ahimpaña mukubabala jinjila jakushimwinamu neyi anayilekeshi kushimwina. Hela chochu, hiyazatishaña yitwa yayenuku. (2 Akorinda 10:4) Hela kuyichinisha kuhitila mukuyikatisha hichayileñelaña kuleka mudimu wakushimwinaku. (1 Petulu 4:16) Ilaña awa amana kwetu niaheletu abula woma ‘atwalekañahu kufwomona yatama nayayiwahi.’

“Twaya Tubulakani”

12, 13. (a) Tufutanyi twazatishiluwu ayilumbu jaNehemiya? (b) Muloñadi wakanininiyi Nehemiya mutambikewa wakuya nakudibulakana nawakwakunyi nindi?

¹² Hanyima yakwila ayilumbu jaNehemiya aneluki dehi nawu anakañanyi kuyilukuka hatooka, atachikili kutuña tufuta twakala kwiluka. Kafwampi esekeli tufuta tusatu. Twadiña tufutanyi?

 ¹³ Chatachi, ayilumbu jaNehemiya esekeli kumudimba. Amulejeli nawu: “Twaya tubulakani mumukala wumu wamuchana chaOno.” Chana chaOno chadiña hakachi kaYerusalema naSamariya. Dichi ayilumbu afukwiluhu nawu Nehemiya yadibulakani nawu hakachi nakachi kulonda amanishi kukala kwawu. Nehemiya wadi kutoñojoka nindi: ‘Chumichi chachiwahi. Chachiwahi kuhosha kubadika kulwa.’ Ilaña Nehemiya wakanini. Walumbulwili muloña wakanininiyi nindi: “Komana atoñojoka dehi jakuñila chatama.” Welukili chikupu kafuta kawu nawa hiyamudimbiluku. Wayilejeli akwankunyi mapampa kawana nindi: “Hinukutwesha kukunkumuka okuku. Mudimu wimani tuhu, ami niwushiyi tuhu, nikunkumuki oku kudenu?” Ayilumbu akeñeleña kumukwata Nehemiya kulonda kutiyañana akañenyi. Washindameneni hamudimu windi wakutuña.—Nehemiya 6:1-4.

14. Indi Nehemiya wazatiluhu chumanyi nawakwankunyi nindi akutwamba?

¹⁴ Chamuchiyedi, ayilumbu jaNehemiya afukwiluhu kutandisha mbonji yakutwamba nakumwinka Nehemiya muloña nawu “natoñojoki dehi jakudikaña” naMwanta Aratasheshe. Nehemiya amulejeli cheñi kapampa kakwawu nawu: “Twaya tukwati mpuña.” Nehemiya wakanini cheñi, muloña welukili yitoñojoka yawayilumbu. Nehemiya walumbulwili nindi: “Wejima wawu akeñeli kututiyisha woma, nawu, Makasawu azeyi, ze-ke-li, akañanyi kwila mudimu.” Hela chochu, iyi mpinji Nehemiya wakanini hatooka muloña wawa yilumbu jindi nakuhosha nindi: “Oyu yuma yiwukuhosha hidiyuku, wudi nakuyifwikija mumuchima weyeyi aweni.” Hela chochu, Nehemiya wabalumukili kudi Yehova nakulomba wukwashu nindi: “Nkolesheli makasami.” Wakuhweleleli nindi nawukwashu waYehova watela kufwomona yitoñojoka yatama nakutwalekahu namudimu wakutuña.—Nehemiya 6:5-9.

15. Kufumbanyi kwalejeliyi kaprofwetu wakutwamba, nawa muloñadi Nehemiya chabuliliyi kwiteja iku kufumba?

¹⁵ Chamuchisatu, ayilumbu jaNehemiya azatishili nfukeji, kaIsarela Shemaya kulonda kumwilisha Nehemiya yafumpi Nshimbi yaNzambi. Shemaya wamulejeli Nehemiya nindi: “Twakabulakeni mwitala daNzambi, mukachi katembeli, twakenzeli yenzelu yatembeli, muloña akenza nakukujaha.” Shemaya wamulejeli Nehemiya nindi anakukeña kumujaha, dichi watela kupulwisha wumi windi kuhitila mukuswama mutembeli. Hela chochu, Nehemiya hadiña kapristuku. Wadi kuvulumuna hakuswama mwitala daNzambi. Komana Nehemiya wadi kufumpa Nshimbi yaNzambi kufwila kupulwisha wumi windi? Nehemiya wakwili nindi: “Iyalanyi wudi neyi ami wukwiñila mutembeli apulwishi wumi windi? Ami kwami hinukwiñila mwokuku.” Muloñadi Nehemiya chabuliliyi kufwa mumuhetu wamutililuwu? Muloña welukili nindi hela chakwila Shemaya wadiña mukwawu kaIsarela, ‘hiyamutemesheli kudi Nzambuku.’ Kafwampi kaprofwetu walala hanateli kumuleja kufumpa Nshimbi yaNzambuku. Cheñi, Nehemiya hetejeli kumufwomona kudi akwakunyi atamaku. Chimwahitili mpinji yantesha wahosheli nindi: “Dichi mpwembu yamanini mwifuku damakumi ayedi nakatanu dakakweji kaEluli, mumafuku makumi atanu namafuku ayedi.”—Nehemiya 6:10-15; Kuchinda 1:51; 18:7.

16. (a) Munjilanyi mutwatelela kukalakala nawamabwambu akutwamba, akwakutwitwambila, niamana kwetu akutwamba? (b) Munjilanyi mumwamwekeshelaña nawu mwakanaña kufumpa nshimbi hetala, kushikola, hela kumudimu?

 ¹⁶ Kufwana Nehemiya, ninetu tunateli kutalañana nawakwankunyi anateli kwikala amabwambu akutwamba, atwitwambilaña, nianateli kutwamba neyi ana kwetu. Kuhosha muchifwikija, antu amakwawu anateli kututambika kulonda kubulakana nawu hakachi nakachi. Anateli kutushinjila nawu neyi tumukalakela Yehova namuzañalu wantesha, tunateli kushikija yikonkwanyi yamukaayi hampinji yoyimu. Hela chochu, chineli twatwamijañaku Wanta waNzambi muwumi wetu, hitwetejañaku. (Matewu 6:33; Luka 9:57-62) Cheñi akwankunyi atandishaña nyiloña yakutwitwambila. Mumatuña amakwawu atutwikaña muloña nawu tunakuchinisha Ituña, neyi chochamwinkeluwu Nehemiya muloña nawu wadikañileña namwanta. Nyiloña yikwawu ayimanishaña chiwahi muyota yakusompela. Ilaña hichikweti muloña nayakufumamu hamuntu himuntuku, twalombaña nachikuhwelelu netu Yehova wakalombola nsañu kwesekeja nankeñelu yindi. (Afwilipi 1:7) Ikañesha datela cheñi kufuma kudi antu atwambaña kumukalakela Yehova. Neyi chochesekeliyi mukwawu kaYudeya kumushinjila Nehemiya kufumpa Nshimbi yaNzambi kulonda kupulwisha wumi windi, akwakusekesha adiña aYinsahu anateli kutweseka kulonda kufumpa nshimbi munjila yashiyashana. Hela chochu, twayikanaña akwakusekasha muloña tweluka netu wumi wetu awipulwishaña bayi neyi kuhitila mukufumpa nshimbi jaNzambuku, ilaña kuhitila mukujovwahila. (1 Yowanu 4:1) Chalala, tunateli kufwomona kutama kudi kwejima kuhitila muwukwashu waYehova.

Kushimwina Nsañu Yayiwahi Hela Chakwila Tunakumona Yuma Yatama

17, 18. (a) Indi Satana niantu jindi anakufwila kwiladi? (b) Chumanyi chimwafwilaña kwila, nawa muloñadi?

¹⁷ Izu daNzambi dahosha kutalisha hadi amana kwaKristu awayishewa nawu: “Hiyakumwimika [Satana] mushindu . . . namazu ashimwinuwu.” (Chimwekeshu 12:11) Dichi, hadi kutiyañana kwakweni hakachi kakumwimika Satana mushindu—nsulu yakutama—nikushimwina nsañu yaWanta. Dimuloña waweni Satana chabulilañayi kuleka kulukuka wejima wawu ashalahu awayishewa ‘niezaza deneni’ kuhitila mukuleta ikañesha.—Chimwekeshu 7:9; 12:17.

¹⁸ Neyi chitunadizi, ikañesha datela kwinza kuhitila mumahosha, kuchinisha kuhitila mukukatisha lwakumujimba, hela mutufuta twatuvulu twakala. Muyuma yejima, nkeñelu yaSatana yoyimu—yakukeña kulekesha mudimu wakushimwina. Hela chochu, wakakañanya chikupu, muloña kuhitila mukwimbujola Nehemiya wakunyaka, antu jaNzambi anakufwila chikupu ‘kufwomona yatama nayayiwahi.’ Akatwalekahu kwila mwenimu kuhitila mukushimwina nsañu yayiwahi kushika tuhu nihakahoshelayi Yehova nindi mudimu wunakumi!—Maku 13:10; Aroma 8:31; Afwilipi 1:27, 28.

[Tumazu twaheshina]

Munakwanuka?

• Ikañeshanyi damwenuwu antu jaNzambi kunyima nawa dinakumonawu eniKristu makonu?

• Indi nkeñelu yawayilumbu jaNehemiya yadiña yankahi, nawa nkeñelu yawayilumbu jaNzambi makonu yakwiladi?

• Munjilanyi mutwafwomwenaña yatama nayayiwahi makonu?

[Malwihu aKuzatisha haKudiza]

[Chikasha/Mwevulu wudi hefu 31]

Yuma Yitwatela Kudizila muMukanda waNehemiya

Antu jaNzambi atalañanaña

• nakuyiseha

• kuyichinisha

• kuyitwambila

Kutwamba akwizatishaña kudi

• amabwambu akutwamba

• akwankunyi netu

• amana kwetu akutwamba

Antu jaNzambi afwomonaña yatama kuhitila

• mukukakela mudimu wayinkawu kudi Nzambi

[Mwevulu wudi hefu 32]

EniKristu alala ashimwinaña nsañu yayiwahi chakubula woma