“Twambuka Nyichidi Ilaña Twanuñañana muKukeña”

Kupuluka. Kufuma Muwuduñu. Wamwinu. Hayaaka nkulakaji yinahitihu, antu akeñaña kuyamwina kuyisenda nikukala. Munjilanyi mutunatwesheli kumika nakukala? Komana kupuluka kwakekalaku? Niyi kwakekalaku, munjilanyi?

IYI diyi nyitu yakupompa kwankambi kwamafuku asatu kuyaloñesheluwu kudi aYinsahu jaYehova, kutachika muMay 2006. Mutu wahosheleña nawu “Kupuluka Kudi Mukamwihi!”

Yihita yawañeji kufuma kumatuña amboka mboka awanikili kukupompa kwankambi kutanu nakuwana. Kwadiñaku mukakwenji kaJuly niAugust 2006, munawa matuña, muPrague musumba waCzech Republic, nimuBratislava musumba waSlovakia, nimuChorzow, niPoznan, niPoland; * nimumbaka jitanu jaGerman—Dortmund, Frankfurt, Hamburg, Leipzig, niMunich. Kuchinda kwejima kwaniku kupompa kwabadikili ha 313,000.

Hispiritu yamuchidinyi yamwekesheluwu haniku kupompa kwankambi? Nsañu yamuchidinyi yatambwililuwu? Indi antu awanikili kukupompa atiyili ñahi hanyima yakupompa kweniku?

Kudiloñesha

Kwadiña kutalila kweneni kudi enyi niaYinsahu amudina iluña muloña elukili nawu kupompa kwankambi hichawija chakwanuka yuma yakuspiritu. Kwadiña mudimu weneni nankashi wakuloñeshela enyi mwakukama. Chakutalilahu kupompa kwankambi kwadiña muChorzow, aYinsahu akwituña daPoland adihanini nakuhana matala awu kudi enyi akushika ku 13,000 afumini kumatuña akuMusela waEurope. Enyi enjili kukupompa kwankambi afumini kuArmenia, Belarus, Estonia, Georgia, Kazakhstan, Kyrgyzstan, Latvia, Lithuania, Moldova, Russia, Tajikistan, Turkmenistan, Ukraine, United States, nikuUzbekistan.

Enyi amavulu atachikili kudiloñesha lwendu lwawu lwakuya kukupompa henohu kuchidi tukweji twatuvulu. Tatiana, mukwakushimwina wampinji yejima wakuKamchatka, iluña dekala muRussian kukabeta kamusela wakuJapan, watachikili kudiloñesha henohu kuchidi chaaka chimu. Wendeli 10,500 km. Chatachi watukili mundeki hadi mawola 5, cheñi wakandamini mumasuwa nakwenda hadi mafuku asatu, kufumahu wakandamini basi nakushakamamu maora 30 hakwila nawu yashiki kuChorzow.

Makombakaji awamana kwetu nahela adihanini kumudimu henohu kupompa kanda, kulonda kuloñesha  chiwahi maluña akudifukwila. (Kuhituluka 23:14) Chakutalilahu chimu, aYinsahu amwiluña daLeipzig azatili mudimu wawuwahi chikupu wakuloñesha iluña dakupompela, nawa akanini kuzata cheñi hanyima yakupompa. Chafuminimu mukulumpi weluña denidi dakupompela walekesheli kufwetesha mali akeñekeleña kuzatishewa kukuwahisha iluña.

Kutambikewa

Yipompelu kunyeñumuka kaayi kejima yashimwinini kwejima kutalisha hakupompa kwankambi kwadiña nakwila nawu “Kupuluka Kudi Mukamwihi!” Antu ayileña kukupompa kweniku, adibombeli muniyi kampeni namuzañalu waweni. Atwalekeluhu kushimuna kutalisha hakupompa kweniku nakushika nikumelela henohu ifuku dakupompa kanda. Komana mukuzata kwawu nañovu mwafumini yuma yayiwahi?

Chinsahu wakuPoland wejina daBogdan, wahumañeni mukulumpi weyala wakeñeleña kuwanika kukupompa kwankambi, ilaña wahosheli nindi wadiña namali antesha hiyateleli kushika kuChorzow kwadiñi kuleha kwakushika ku 120 km. Yuma yahimpili muloña kwadiñi chitwamu chakabula muntu mubasi yafweteleluwu kudi chipompelu chamwiluña dawu. Dichi Bogdan wahosheli nindi: “Twamulejeli iyala yeniwu netu nateli kuya nanetu chakubula kufweta neyi yenza heluña dakukandamina nampinji ya 5:30.” Iyala yeniwu wetejeli mutambikewa nawa wawanikili kukupompa. Mukuhita kwampinji wasonekeleli amana kwetu nindi: “Hanyima yakuwanika kukupompa kweniku, nakufwila kuhimpa.”

Mwituña daPrague iyala washakamineña hetala damapumwinu diyazatisheleñawu kudi enyi afumini kwituña daBritain, walejeli awanikili kukupompa nindi wawanikiluku ifuku dimu. Chumanyi chamuleñeleleli kuwanika kuniku kupompa? Iyala yeniwu wahosheli nindi hanyima yakutambula tuyipapilu twakutambikilahu antu kukupompa mutunjila twamumbaka kudi akwakushimwina ikumi, watoñojokeli kuwanewaku. Wazañaleli chikupu nawa wadiña nampwila yakudizilaku jajivulu.—1 Timotewu 2:3, 4.

Progiramu yaNshimbi yamuBayibolu yaKuhetesha

Progiramu yahosheli hachakuzata namakabi amboka-mboka. Kufumba kwamuNsona kwatiyakana kwalumbulwili hachakumanisha kukala nichakumika naku.

Antu anakukabakana nawushinakaji, kukatakata, kufwisha antu akeñawu, hela kukala kukwawu kwamonañawu, atambwilili kukoleshewa kwakuwahi kwamuBayibolu kulonda kuyikwasha kwikala nakuchiñeja kwakuwahi muwumi. (Masamu. 72:12-14) Adisumbula nianvwali atiyili kufumba kwamuBayibolu hachiyatela kuzañalalawu mumaluwi nichiyatela kukulishawu anyanawu munjila yayiwahi. (Mukwakutaŋisha 4:12; Aefwesesa 5:22, 25; Akolose 3:21) Atwansi awiniKristu—amonaña kukala hashikola kwakukeña kulondela mwelañawu akwawu, ilaña atambwilaña kufumba kwakuwahi kwekala Mwizu daNzambi kumatalawu nikuchipompelu kulonda kwiluka chakuzata nakukala kweniku ‘nikutemuka kukufwila kwatama kwawukwenzi.’—2 Timotewu 2:22.

Wumana kwetu Walala waMukaayi Kejima

Mpinji yejima aYinsahu jaYehova atambwilaña nshimbi jajiwahi jamuNsona  hampinji yapompañawu. (2 Timotewu 3:16) Kafwampi chuma chaleñeleli kupompa kweniku kwikala kwabukaku, hikunuñañana kwayililu yawu. Kupompa kwankambi kwejima kwadiña namaprogiramu akuspiritu wowamu munyichidi yamboka-mboka. Ifuku nifuku, amana kwetu Ezaza Dalombolaña dawaYinsahu jaYehova ahanineña jimpanji, nimalipoti kufuma kumatuña amakwawu, yumiyi yaleteli muzañalu hakupompa. Jimpanji jeniji nimalipoti ayibalumwini kulonda mazaza amakwawu mumadimi amboka kuhetelamu.

Enyi afwilileña kubulakana nawamana kwawu niahela kufuma kumatuña acheñi. Mwenyi wumu wahosheli nindi, “Kwabuka kwanyichidi hikwaleteluhu kukala kudi kwejimaku.” “Munjila yikwawu kwaleteli muzañalu kukupompa kweniku. Añenji afumini kuyisemwa yamboka-mboka, ilaña adiña anuñañana nachikuhwelelu chimu.” Antu apompeli mumusumba waMunich ahosheli nawu: “Twambuka nyichidi ilaña twanuñañana mukukeña.” Hichidi namuloña nakuyafumawu hela idimi dawuku, ejima awanikili kukupompa elukili nawu adiña hakachi kawamabwambu alala—amana kwawu niahela akuspiritu.—Zekariya 8:23.

Mazu Akuhameka

Mpepela yadiñaku hampinji yakupompa kwankambi mwituña daPoland yesekeli yililu nikumika kwawenyi. Bayi neyi yanokeli neyi chiyanokaña mpinji yejimaku, ilaña kwatutili chikupu—kututa kwakushika ku 14°C. Mana kwetu wafumini kuUnited States wahosheli nindi: “Kwadiñi mpepela nankashi nawa kwatutili nankashi chakwila kanda nikwitiyeñahu dehi hakupompa kwankambi, nawa natiyili yuma yantesha kumaprogiramu. Ilaña kunuñañana kwachihayamisha, niyililu yayiwahi, nichisambu chadiñahu kwawahishili yuma yejima. Kupompa kweniku nakakwanukaña hohu.”

Chuma chadiña chakubula kujimbala kudi antu apompeli ahoshaña idimi damuPoland, kwadiña kubidika hamukanda waInsight on the Scriptures wedikili mwidimi dachiPolish, iwu wadiña wuloku wawuwahi hakumika kwawu kumashika ninvula. Kwidika kwamukanda wawuha waLive With Jehovah’s Day in Mind waleteli muzañalu haKupompa kwejima kwa “Kupuluka Kudi Mukamwihi!”

Amavulu awanikiluku akanukaña kupompa kweniku hayuma yikwawu. Kristina, muhela wakwituña daCzech wadibombeli nezaza dadiña mubasi dafumini kwituña decheñi wahosheli nindi: “Hampinji yakudishalisha muhela wumu wantwalili kumbadi nakukumbata nawa wahosheli nindi: ‘Wañakameneni chikupu. Watuleteleleña yakudya hayitwamu hitwashakamineña nikutuletela menji akunwa. Amavulu anakuhameki chikupu hakumwekesha kukeña.’” Wateneneña hayakudya yahachayili yaloñesheleluwu enyi afumini kwacheñi. Mana kwetu wumu wahosheli nindi: “Wadiña mudimu wutwabulili kwiluka hakutachika. Mudimu weniwu wabombelelumu kutwiletelaña yakudya yahachayili yakushika ku 6,500 ifuku dejima. Chadiña chakuzañalesha hakumona amavulu niatwansi chiyadihaninuwu nakukwasha.”

Muhela wafumini kwituña daUkraine nakuya kuChorzow kukupompa kwankambi wahosheli nindi: “Twazañaleli hakukeña, nikwakamena nichisambu chamwekesheluwu akwetu akakwitiya. Tunakañanyi kwiluka mazu akuzatisha hakuhameka.” Annika wudi nayaaka yitanu nayisatu wafumini kwituña daFinland wasonekeleli kasanji kawaYinsahu jaYehova kakwituña dakuPoland nindi: “Kupompa kwawahili chikupu kubadika chinatoñojokeleña. Chachiwahi kwikala mukuloñesha kwaYehova, muloña muntu wumu wudi nawamabwambu mukaayi kejima.”—Masamu 133:1.

 Mazu ahosheli antu amweneña

Henohu kupompa kwankambi kanda, aloñesheleli chadimu akwakuyihitañeshamu enyi afumini kwacheñi. Maluña amwituña daBavarian, enyi emeni Hetala daWanta, nawa aYinsahu amudina iluña ayishikijili chikupu. Izaza dimu dabulili kwikala dawaYinsahu denjili nakutala iluña dazañaleli chikupu hakukeña kwamwekesheluwu amana kwetu. Mwenyi wumu wahosheli nindi, “Hampinji yitwafuntileña nabasi kwitala damapumwinu, muntu watuhitañeshelumu wahosheli nindi twadiñi twambukaku chikupu namazaza amakwawu ahitañeneñamu. Twavwalili chiwahi nawa twadiña nakutiyiñana nanowu adiña nakulombola izanvu detu. Hikwadiñahu kudihoshola hela kuluwañeshaku. Wahayamini hakumona enyi abula kudiluka hiyakwikala alunda amawahi mukampinji kantesha hohu.”

Mana kwetu wazatileleña kuDipatimenti yatalaña haNsañu yaMudimu hakupompa mwituña dakuPrague wahosheli nindi: “Hamulungu nantetemena mukulumpi wawakapokola yatemesheluwu hakupompa watuhempwili. Wahosheli nindi hadiña kuwunda nawa hadiña namudimu wakuzataku. Wahosheli cheñi nindi antu ashakamaña kukamwihi nembulu amwihwili kutalisha haprogiramu yeniyi. Chateneniyi aYinsahu jaYehova antu ejima ahayamini, dichi mukulumpi wawakapokola wayilejeli nindi: ‘Neyi antu ejima adiña nayililu neyi yawaYinsahu jaYehova, chiña akapokola kwekala kwosi.’”

Amavulu Anayipulwisha Dehi!

Izu daNzambi, Bayibolu didi neyi hichawu hakachi kayisemwa, dinakuleta eniKristu hamu mukuwunda nikunuñañana. (Aroma 14:19; Aefwesesa 4:22-24; Afwilipi 4:7) Kupompa kwa “Kupuluka Kudi Mukamwihi!” kwamwekesheli wunsahu weniwu. A Yinsahu jaYehova anayipulwisha dehi kuyipupu yayivulu yinakukabisha antu amukaayi. Kuhelañana, kudijaha, nichambu chanyichidi—kutena hohu kukala kwantesha kudi mukaayi—hiyekala hakachi kawaYinsahuku nawa anakutalila mpinji yakumbidi yakamanishawu kukala kwejimiku mukaayi.

Antu awanikili kukupompa kweniku amweni kunuñañana kwekala hakachi kawaYinsahu afumaña kumatuña amboka niyisemwa. Chumichi chamwekeni hakukunkulula kupompa kwejima. Ejima adiña nakusakilila, kudikumbata nawamabwambu jawu amaha, nikudikwata nyevulu yakukumishaku. (1 Akorinda 1:10; 1 Petulu 2:17) Adiña namuzañalu nawa elukili chikupu nawu kupuluka kufuma kukukala kwejima nikukiñewa kudi mukamwihi, nawa enyi afuntileña kumatalawu nikuyipompelu yawu nayitoñojoka yakufwila kutwalekahu kukwatisha chikupu ‘kwizu dawumi’ daNzambi.—Afwilipi 2:15, 16.

[Tumazu twaheshina]

[Chikasha/Mwevulu wudi hefu 10]

Nyichidi Makumi Ayedi Nayitanu naWumu Ahoshaña Idimi Dimu

Kupompa kwankambi kutanu nakuwana progiramu ayihosheleña mwidimi damunodi iluña. Kupompa kwadiña mwituña daGermany, jimpanji ajihosheli mumadimi 18. Mwituña daDortmund jimpanji ajihosheli munawa madimi muArabic, Farsi, Portuguese, Spanish, niRussian; muFrankfurt muEnglish, French, niSerbian/Croatian; muHamburg niDanish, Dutch, Swedish, niTamil; muLeipzig niChinese, Polish, niTurkish; nawa muMunich Greek, Italian, niMwidimi Dawatumama damuchiGerman. Kupompa kwadiña mwituña daPrague jimpanji jejima ajihosheli mwidimi dachiCzech, niEnglish, nimuchiRussian. Mwituña daBratislava progiramu ayihosheli mwidimi daEnglish, Hungarian, Slovak, niSlovakian Idimi Dawatumama. Mwituña daChorzow azatishili iyi nyichidi Polish, Russian, Ukrainian, niMwidimi Dawatumama damuPolish. Mwituña daPoznan jimpanji ajihosheli muchiPolish nimuFinnish.

Yejima hamu yadiña nyichidi makumi ayedi nayitanu nawumu. Mwalala, apompeli adiña ambuka munyichidi ilaña anuñañana mukukeña.

[Mwevulu wudi hefu 9]

Enyi ahoshaña muchidi waCroatian mwituña daFrankfurt azañaleli hakutambwila Bayibolu “yaNew World Translation” mwidimi dawu