Yehova Walemesha Kwovwahila Kwenu

‘Eyi mwanami, ikalaku mukwamaana, wutiyishaña muchima wami kuwaha.’—YISHIMU 27:11.

1. Spiritu yamuchidinyi yinatandi mudi antu makonu?

 MAKONU spiritu yakudimena niyakudikaña yinatandi mukaayi. Kapostolu Pawulu walumbulwili mumukanda windi wasonekeleliyi eniKristu akuAefwesesa muloña wunaleteshi spiritu yakudikaña kutanda, wasonekeli nindi: ‘Mwadiñi nakwenda nakuhuñumuka mwaya nyaka yamakonu, mwakeña mwanta wamuluzwizu wañovu, yowu Diyabolu [spiritu], wakoñeshaña katataka mudi akwakujikwa.’ (Aefwesesa 2:1, 2) Eñañi, munateli kuhosha nenu Satana Diyabolu, “mwanta wamuluzwizu wañovu,” naluwañeshi chikupu kaayi kejima naspiritu yakudikaña. Satana wadiñi nakuluwañesha muyaaka nkulakaji yatachi, nawa kufuma tuhu hampinji yamunatiluwu mwiwulu kwakwihi nakuvulumuka kwaNjita yaKaayi ya I naswejeshi nikuluwañesha chikupu.—Chimwekeshu 12:9.

2, 3. Yumanyi yikutuletesha kumwovwahila Yehova?

² Hela chochu, hamu neyi eniKristu, twiluka netu Yehova Nzambi diyi wutwatelela kwovwahila chikupu muloña diyi Nleñi yetu, Mukwakuhemba wumi wetu, Mwanta wakukeña, nawa Mukwakupulwisha. (Masamu 148:5, 6; Yililu 4:24; Akolose 1:13; Chimwekeshu 4:11) A Isarela amumafuku aMosi elukili nawu Yehova diyi Mukwakuyinka Wumi nawa Mukwakuyipulwisha. Dichi Mosi wayilejeli nindi: “Mwakashañaku muchima wakwila mwakuyilejayi Yehova Nzambi yenu.” (Kuhituluka 5:32) Eñañi, aIsarela ateleli kumwovwahila Yehova. Ilaña atachikili kudikaña naNzambi yawu.

³ Indi kwovwahila kwetu kudi Nleñi wayuma yejima kwalemenadi? Mpinji yimu Nzambi wamulejeli kaprofwetu Samweli nindi muleji Mwanta Sawulu neyi: ‘Kwovwahila kwabadika  mulambu.’ (1 Samweli 15:22, 23) Muloñadi kwovwahila chikwabadikila mulambu?

Kwovwahila ‘Chikwabadikila Mulambu’

4. Munjilanyi mutunateli kumwinkela Yehova chuma?

⁴ Hamuloña wakwila diyi Nleñi, Yehova wukweti yuma yejima yitukweti yakumujimba. Hela chochu, kudihu chuma chitwatela kumwinka? Eña, twatela kumwinka chuma chasweja kulema. Chumanyi? Ñakwilu tukuyiwana mukufumba kunalondeluhu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” (Yishimu 27:11) Twatela kumwovwahila Nzambi. Hela chakwila yihandilu niyisemwa yetu yashiyashana, kuhitila mukwovwahila, muntu himuntu nateli kwakula mazu akasawuntu ahosheliyi Satana Diyabolu nindi antu neyi ayeseka hiyanateli kutwalekahu kwikala akashinshi kudi Nzambuku. Kwenoku kukooleka kutukweti!

5. Indi kudikaña kwamutiyishaña ñahi Nleñi kumuchima? Shimunenu chakutalilahu.

⁵ Nzambi watiyaña kuwaha nayuma yitwafukulaña. Neyi tudikaña, chamuneñeshaña hama. Munjilanyi? Chamutiyishaña kutama hakumona muntu nakulondela njila yatama. (Masamu 78:40, 41) Twili netu muntu wakata musoñu washunga naleki kudya yakudya yayiwahi yakukwasha mujimba windi yamulejeluwu kudi ndotolu, nakutwalekahu kudya yakudya yikumuletela lukadi. Indi ndotolu yindi wamwakamenaña wukutiya ñahi kumuchima? Tuneluki chikupu netu Yehova chamutiyishaña kutama neyi antu adikaña nindi, muloña weluka yuma yafumaña mukudiwula nshimbi yindi yawumi.

6. Chumanyi chatela kutukwasha kwikala ovwahila kudi Nzambi?

⁶ Chumanyi chikutwikwasha hamuntu hamuntu kwikala ovwahila? Chikuwaha neyi wejima wetu tukumulomba Nzambi “muchima wakwovwahila, NW,” neyi chalombeliyi Mwanta Solomoni. Walombeli muchima wamuchidiwu kulonda ‘kushinshika nimwamuwahi nimwatama’ kulonda kusompesha akwawu aIsarela. (1 Anyanta 3:9) Ninetu nawa twatela kwikala ‘namuchima wakwovwahila’ hakwila twiluki yayiwahi niyatama mwituña dinenzali naspiritu yakudikaña. Nzambi natwinki Izu dindi, nyikanda yatukwashaña kudiza Bayibolu, kupompa kwawiniKristu, niaeluda akamenaña amuchipompelu kulonda twikali ‘namuchima wakwovwahila.’ Komana tunakuzatisha chachiwahi yuma yayiwahi yamuchidiwu yanakutwiloñeshela?

7. Muloñadi Yehova chalemeshelayi nankashi kwovwahila kubadika nyilambu?

⁷ Haniyi nsañu anukenu nenu kunyima, Yehova wayilejeli antu jindi akushankulu nindi kwovwahila kwadiña kwalema nankashi kubadika kuhana nyilambu yawatunyama. (Yishimu 21:3, 27; Hoseya 6:6; Matewu 12:7) Muloñadi kwovwahila chikwekalili kwalema, henohu Yehova diyi wayilejeli antu jindi kuhanaña nyilambu yamuchidiwu? Indi nkeñelu yawunakuhana mulambu yidi ñahi? Komana nakuhana nankeñelu yakumuzañalesha Nzambi? Tahindi nakuhana muloña nakulondela yidika hohu? Neyi mukwakudifukula nakufwila kumuzañalesha Nzambi, watela kwikala nakashinshi kakwovwahila nshimbi jaNzambi jejima. Nzambi hanakukeña nyilambu yawatunyamaku, ilaña kwovwahila dichuma cheneni chitwatela kumwinka.

Chakutalilahu chaKusoñamisha

8. Muloñadi Nzambi chamukaaniniyi Sawulu kwikala mwanta?

⁸ Nsañu yamuBayibolu yaMwanta Sawulu yakonkomwenaña hakulema kwakwovwahila. Sawulu watachikili kuyula neyi mwanta wadizoza nawa walumbuluka, ‘wadimweni yamweni kukeha.’ Mukuhita kwampinji, kudisamba niyitoñojoka yamukunkulwayi yatachikili kuyula kufuukula kwindi. (1 Samweli 10:21, 22; 15:17) Mpinji yimu, Sawulu wateleleli kwasa njita nawaFwilistinu. Samweli wamulejeli mwanta nindi yamuhembeleli kulonda chashikayi yahani mulambu kudi Yehova nawa yamuleji nimwakwilila. Ilaña, Samweli henjili hampinji yadiña nakumutalilawuku, dichi antu atachikili kumwañala. Chamweniyi ichi, Sawulu ‘waheni mulambu wakushita.’ Chumichi chamuneñesheli Yehova. Cheliliyi Samweli nashiki dehi, mwanta watachikili kudibaba, nakuhosha nindi muloña Samweli washimbwili, ‘dichamunkanjikijili’ kulambula mulambu wakushita kulonda yatambwili wuselewa waYehova. Kuhana mulambu dichuma  chaswejeli kulema kudi Mwanta Sawulu kubadika kwovwahila nshimbi yamulejeliwu yakuhembelela Samweli kwinza nakuhana wuna mulambu. Samweli wamulejeli nindi: “Wuneli chuma chawusupi; hiwunahembi mwakulejeliyi Yehova Nzambi yeyuku.” Kudikaña naYehova kwamukojejeli Sawulu kujimbesha wanta windi.—1 Samweli 10:8; 13:5-13.

9. Indi Sawulu wamwekesheli ñahi njila yakudikaña naNzambi?

⁹ Komana mwanta wadizililuku kuchiluwa chindi? Inehi! Mukuhita kwamafuku, Yehova wamulejeli Sawulu nindi yayi nakujilumuna muza wawaAmaleki muloña walukukili aIsarela chakubula muloña. Sawulu wateleleli kujilumuna antu ejima kushilahu niyimuna yawu yejima ji-i. Wamwovwahilili Yehova kuhitila “[mu]kutapa aAmaleki kufumisha kuHavila kushika tuhu nikuShuri.” Chenjiliyi Samweli nakudibulakana nindi, mwanta wazañaleli chikupu muloña wakushinda nawa wahosheli nindi: “Akukiswili nkisu kudi Yehova. Ami nela dehi mwanlejayi Yehova.” Ilaña, hiyalondeleli nshimbi jatiyakana jayilejeluwuku, Sawulu niantu jindi anakeneni Mwanta Agagi “ninyikoku niñombi ninyama jatoha ninyana kanyikoku asweja kuwaha niyuma yayiwahi yejima.” Mwanta Sawulu wadiyiñishili yomwenindi nindi: “Antu anakeneni nyikoku nañombi asweja kuwaha nawu amuketwili Yehova Nzambi yeyi.”—1 Samweli 15:1-15.

10. Indi Sawulu wakañenyi kudiza chumanyi?

¹⁰ Dichi, Samweli wamulejeli Sawulu nindi: “Komana Yehova watiyaña kuwaha nanyilambu yakushita niyimuna yakuketula chakweseka nakwovwahila izu daYehova tahindi? Tiya, kwovwahila kwabadika kuketula yimuna, kutiyilila kwabadika manji ayizamba yanyikoku.” (1 Samweli 15:22) Chineli Yehova wafuukwili nindi atunyama ejima ateleli kuyijaha, dikwila nawu hiyadiña ashikilamu kuyilambula mulambuku.

Ovwahilenu muYuma Yejima

11, 12. (a) Indi Yehova wamonaña ñahi mudimu wetu wakumuzañalesha hakudifukula kwetu? (b) Indi muntu nateli kudidimba ñahi yomweni nakutoñojoka nindi nakwila nkeñelu yaNzambi henohu nakudikaña?

¹¹ Yehova wazañalalaña nankashi hakumona antu jindi ovwahila anakutwalekahu kwikala akola mbe-e hela chakwila anakuyiyandisha, ashimwinaña nsañu yaWanta hela antu anakumwekesha kadiwu. Awanikaña kukupompa kwawiniKristu hela chakwila adi nakukala kwakuwana mwakuhandila. Kwovwahila muyuma yalema yamuchidiwu mukuhanda kwetu kwakuspiritu kwatiyishaña muchima windi kuwaha. Mudimu wetu wakudifukula kudi Yehova wekala walema kudi yena neyi tuwuzata munjila yakukeña. Antu anateli kudiwula mudimu wetu, ilaña Nzambi wamonaña yuma yitwahanaña namuchima wejima nawa wayanukaña.—Matewu 6:4.

¹² Hakwila nawu tumuzañalesheña Nzambi yetu chikupu, twatela kwikala ovwahila muyuma yejima yakuhanda kwetu. Bayi tudidimba etu aweni nayitoñojoka yakwila nawu tunateli kusenuka kunshimbi jaNzambi jikwawu chakala hohu tunakudifukula kudi yena muyuma yikwawu yamukuhanda. Chakutalilahu, muntu nateli kudidimba nayitoñojoka yakwila nawu neyi wukwilahu yuma yikwawu yakudifukula kwahanyivumbu, natweshi kwila wuvumbi hela kwila yuma yikwawu yasweja kutama chakubula kumubabesha. Iku hikudidimba chikupu.—Aŋalija 6:7, 8.

13. Neyi tudi kwakankawetu, kwovwahila kwetu kudi Yehova kunateli kwikala ñahi mukweseka?

¹³ Munjila yoyimu, twatela kudihula etu aweni netu, ‘Komana nakwovwahila Yehova munyidimu yami yamafuku ejima, nimuyuma yahalwami?’ Yesu nindi: “Muntu wukushinshika nakachuma kasweja kukeha, wukushinshika nawa ninayuma yayivulu; muntu wukuheña nakachuma kasweja kukeha, wukuheña nawa ninayuma yayivulu.” (Luka 16:10) Komana ‘tunakwenda namuchima walala,’ hela tudi ‘mwitala detu,’ mwabulaña kutumonawu kudi antu? (Masamu 101:2) Eña, hela chakwila tudi mwitala detu, kashinshi ketu kanateli kwikala mukweseka. Mumatuña amavulu mudi makopyuta hamu neyi yozelu yamwitala, chaswayi kutala nyevulu yatama. Yaaka yantesha yinahituhu, antu hiyatwesheleña kumona nyevulu yamuchidiwu chakadi kuya kumaluña kwatalishañawu yisela yatamaku. Komana tukutiyililaña mazu aYesu akwila nawu: “Muntu wukutala mumbanda namesu akumufwila, neli dehi nindi wuvumbi mumuchima windi”? Komana tukutondolwelaña nikutala nyevulu yatama? (Matewu 5:28; Yoba 31:1, 9, 10;  Masamu 119:37; Yishimu 6:24, 25; Aefwesesa 5:3-5) Indi maprogiramu aha TV amwekeshaña madombu? Komana tunakutiyilila Nzambi yetu, wudi namuchima ‘wahela antu ejima akeña madombu’? (Masamu 11:5) Indi kusweja kunwa walwa kwakankawenu? Bayibolu yahisha kusheta, cheñi nawa yasoñamishaña eniKristu kubula kwikala ‘akwakusweja kunwa walwa.’—Titusa 2:3; Luka 21:34, 35; 1 Timotewu 3:3.

14. Jinjilanyi jikwawu mutwatela kumwekesha kwovwahila kudi Nzambi munsañu jamali?

¹⁴ Mbadi yikwawu kutwatela kwikala asoñama yinakundami kunsañu yakuzatisha mali. Chakutalilahu, komana tunateli kudiñija munyidimu yakukeña kuheta swayi yabombelamu makudi? Komana twekala mukweseka kwakuzatisha njila jabula kwitejewa kulonda tubuleña kufweta nyisoku? Tahindi twashañaku muchima wakwovwahila lushimbi lwakwila nawu “inkenu antu ejima atela kuyinka; akwanyilambu yinkenu nyilambu yawu”?—Aroma 13:7.

Kukeña Kwaleteshaña Kwovwahila

15. Muloñadi chimwovwahilaña nshimbi jaYehova?

¹⁵ Kwovwahila nshimbi jaNzambi kwaletaña nkisu. Chakutalilahu, kuleka kunwa makanya, kushakama nshakaminu yayiwahi, nikulemesha kujila kwamashi, kukutwileñela kutondolwela yikatu yikwawu. Cheñi nawa, kulondela chalala chaBayibolu muyuma yikwawu yamukuhanda kwetu, tunateli kuhetelamu munsañu jamali, nshakaminu, hela muchisaka chetu. (Isaya 48:17) Kukooleka kwamuchidiwu kwamwekanaña namesu twatela kukwimona neyi hinkisu yamwekeshaña kuwaha kwanshimbi jaNzambi. Hela chochu, twamwovwahilaña Yehova muloña twamukeña. Hitwamukalakelaña Yehova muloña wayuma yatwinkayiku. (Yoba1:9-11; 2:4, 5) Nzambi watwinka wuswa wakudifuukwila kwovwahila muntu yitunakukeña kwovwahila. Tunafuukuluhu kumwovwahila Yehova muloña tunakukeña kumuzañalesha nawa twafwilaña kwila yuma yayiwahi.—Aroma 6:16, 17; 1 Yowanu 5:3.

16, 17. (a) Indi Yesu wamwekesheli ñahi kwovwahila kudi Nzambi hamuloña wakusweja kumukeña? (b) Tunateli kumwimbujola ñahi Yesu?

 ¹⁶ Yesu wemika chakutalilahu chachiwahi chakumwovwahila Yehova muloña wakusweja kumukeña. (Yowanu 8:28, 29) Hampinji yadiñayi hamaseki, Yesu “wadizili kwovwahila nayuma yakabiliyi.” (Aheberu 5:8, 9) Munjilanyi? Yesu “hakudizoza, hakwovwahilaña ho-o, ndo nikukufwa, eña kwokufwa [kwahamutondu wakuyandishilahu.]” (Afwilipi 2:7, 8) Hela chakwila Yesu wadiña wovwahila hadiñiyi mwiwulu, kwovwahila kwindi akwesekeli cheñi heseki. Tunateli kukuhwelela netu Yesu nashikuhu chikupu muyuma yejima kwikala Kapristu Muneni wawana kwindi akuspiritu niantu amakwawu anakukuhwelela.—Aheberu 4:15; 1 Yowanu 2:1, 2.

¹⁷ Indochu etu? Tunateli kumwimbujola Yesu kuhitila mukutwamijaku kwovwahila nkeñelu yaNzambi. (1 Petulu 2:21) Tunateli kuwana muzañalu weneni chikupu neyi kumukeña Nzambi kutusañumuna kwila yuma yatulejañayi, hela neyi atukanjikija hela atweseka kwila yuma yatama. (Aroma 7:18-20) Ichi chinabombelumu kwovwahila chikupu mwatulejañawu kudi owu anakulombola mukudifukula kwalala hela chakwila hiyawaninaku. (Aheberu 13:17) Kwovwahila nshimbi jaNzambi munshakaminu yahalwetu kwekala kwalema nankashi kumesu aYehova.

18, 19. Chumanyi chafumaña mukumwovwahila Nzambi chikupu?

¹⁸ Makonu, kumwovwahila Nzambi kunateli kubombelamu kumika makabisha kulonda kutwalekahu kwikala ashinshika. (Yililu 5:29) Cheñi, kwovwahila lushimbi lwaYehova lwakushimwina nikudizisha kwakeñekaña nawu tumiki kushika nikukumisha kwetuña damakonu. (Matewu 24:13, 14; 28:19, 20) Twatela kumika hakwila tutwalekuhu kupompaña hamu nawana kwetu, hela chakwila tunakutalañana nekakeja dakanu kaayi. Nzambi yetu wakukeña neluki chikupu kufwila kwetu kwakwikala ovwahila muyuma yamuchidiwu. Hakwila twovwahili chikupu, twatela kulwisha namujimba wetu wanshidi nikufuma kuyuma yatama iku tunakumwekesha kukeña yuma yayiwahi.—Aroma 12:9.

¹⁹ Neyi tumukalakela Yehova nakukeña ninamuchima wamuzañalu, ‘wasomonaña antu [etu] amukeñakeñaña.’ (Aheberu 11:6) Nyilambu yatelela yakeñekaña nawa yayiwahi, ilaña kwovwahila chikupu hamuloña wakumukeña Yehova dikwamuzañaleshaña nankashi.—Yishimu 3:1, 2.

Mukwakula Nenudi?

• Muloñadi chitukuhoshela netu tukweti chuma chitwatela kumwinka Yehova?

• Yiluwanyi yakoñeliyi Sawulu?

• Munjilanyi mumukumwekeshela nawu mwakuhwelela nenu kwovwahila kwabadika mulambu?

• Chumanyi chayileteshaña kumwovwahila Yehova?

[Malwihu aKuzatisha haKudiza]

[Nyevulu yidi hefu 22]

Komana munakwovwahila Nzambi kwakankawenu mwitala denu?