Komana ‘Mukutwalekahu Kwenda Chakuyendesha Kudi Spiritu’?
Komana ‘Mukutwalekahu Kwenda Chakuyendesha Kudi Spiritu’?
‘Endenuña chakuyendesha kudi spiritu, kulonda mubuli kwila yafwilaña chisemwa chaheseki.’—AŊALIJA 5:16.
1. Twatela kukañesha ñahi kwakama kwakwila netu tukuvulumuna spiritu?
KUDI njila yitwatela kukañeshelamu kwakama kwakwila netu hadaha tukuvulumuna spiritu yaYehova yajila. Iyi njila yekala yakwila chuma chahosheli kapostolu Pawulu nindi: ‘Endenuña chakuyendesha kudi spiritu, kulonda mubuli kwila yafwilaña chisemwa chaheseki.’ (Aŋalija 5:16) Neyi twiteja spiritu yaNzambi kutwilombola, kufwila kwachisemwa kwabula kutelela hikwatela kutwishindaku.—Aroma 8:2-10.
2, 3. Tukuhetelamu ñahi neyi spiritu yitwalekahu kutwendesha?
2 ‘Chiyakutwendeshaña kudi spiritu,’ ñovu yaNzambi yazatikaña yikutwisañumuna kumwovwahila Yehova. Tukumwekeshaña yililu yaNzambi mumudimu wetu wakushimwina, muchipompelu, hamatala etu, nikudi kwejima. Nyikabu yaspiritu yikumwekenaña munzatilu yetu naweni kwetu, anyanetu, nawakwetu akakwitiya, niamakwawu.
3 Kuhanda ‘muspiritu kwesekeja nachamonañayi Nzambi’ kwatwikwashaña kuleka nshidi. (1 Petulu 4:1-6) Neyi spiritu yikutwilombolaña, hitunateli kukoña nshidi yakadi kwanakenaku. Hanu dinu munjilanyi yikwawu yayiwahi yitukuhetelamu neyi tutwalekahu kutwendesha kudi spiritu?
Kundamenu Chikupu Kudi Nzambi niKudi Kristu
4, 5. Indi kutwendesha kudi spiritu kwatukwashaña ñahi chitwamumonaña Yesu?
4 Muloña wakutwendesha kudi spiritu yajila, tunateli kuhemba wubwambu wawuwahi naNzambi niMwanindi. Hakusoneka hayawaana yakuspiritu, Pawulu walejeli anakwindi akakwitiya amuKorinda nindi: ‘Nakeñi enu [mwadiña nakulomba akishi] mwiluki muntu wukuhosha nindi Yesu washiñewa, hahoshaña mudi spiritu yaNzambuku. Muntu wukuhosha nindi Yesu diyi Mwanta, kuchihosha chiña mudi spiritu yajila.’ (1 Akorinda. 12:1-3) Spiritu yaleñelaña antu kushiña Yesu yafumaña kudi Satana Diyabolu. Hamu neyi eniKristu anakwendeshawu kudi spiritu yajila, tuneluki chikupu netu Yehova wamusañwili Yesu kufuma mudi afu nawa wamutuumbakesheli kubadika yileñaleña yejima. (Afwilipi 2:5-11) Twakuhwelela ifutu danyiloña daKristu nawa tweteja netu Yesu diyi Mwanta watwitondelawu kudi Nzambi.
5 Antu amakwawu aditeneneña kwikala eniKristu amuyaaka nkulakaji yatachi C.E. akaanini nawu Yesu henjili mumujimbaku. (2 Yowanu 7-11) Muloña wakwiteja ayina nsañu yakutwamba kwaleñeleli amakwawu kukaana ntañishilu yalala hadi Yesu, Mesiya. (Maku 1:9-11; Yowanu 1:1, 14) Kutwendesha kudi spiritu yajila kwatwijikililaña kubula kwiteja nsañu yakasekesha. Kuhitila hohu mukwikala atona lwakuspiritu dihitwatela kutwalekahu kutambwila luwi lwaYehova ‘nakutwalekahu kwenda mwaya nsañu yalala.’ (3 Yowanu 3, 4) Dichi tufwilenu kukaana kasekesha kejima kulonda tutwalekuhu kwikala nawubwambu wakola naTata yetu wamwiwulu.
6. Yililwinyi yasoñaña spiritu yaNzambi mudi antu endeshañawu kudi spiritu?
6 Pawulu wachindilili yuma yakisañanaña chikuhwelelu hamu ‘nanyidimu yachisemwa chaheseki’ yidi neyi wuvumbi nikufwila yatama. Ilaña walumbulwili nindi: ‘Antu ambala aKristu Yesu apopela dehi chisemwa chaheseki [hamutondu wakuyandishila] niyuma yatiyaña chisemwa kuwaha, niyafwilañayi. Neyi tukuhanda chakutuhandisha kudi spiritu, twendenuña nawa chakutwendesha kudi spiritu.’ (Aŋalija 5:19-21, 24, 25) Yililwinyi yasoñaña ñovu yaNzambi yazatikaña mudi antu ahandaña nawa anakwendeshawu kudi spiritu? Pawulu wasonekeli nindi, “nyikabu ya[s]piritu yowu kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.” (Aŋalija. 5:22, 23) Tushinshikenu haniyi yililu yanyikabu yaspiritu.
“Tukeñañani”
7. Indi kukeña hichumanyi, nawa kwelañadi?
7 Kukeña—hichililu chimu chanyikabu yaspiritu—kakavulu chabombelamu kukeña chikupu nikwakamena amakwawu nankashi, kushilahu niwubwambu wawuwahi nawena. Nyikanda yahosha nawu “Nzambi diyi kukeña” muloña diyi chakutalilahu wanichi chililu. Kukeña kwaNzambi kwabadika nikwaMwanindi kwamwekena mwifutu danyiloña damulambu waYesu Kristu. (1 Yowanu. 4:8; Yowanu 3:16; 15:13; Aroma 5:8) Hakwikala atumbanji twaYesu, atwilukilaña kukukeña kutwadikeña wumu namukwawu. (Yowanu 13:34, 35) Nawa, atuleja nawu “tukeñañani.” (1 Yowanu 3:23) Cheñi Pawulu wahosheli nindi, kukeña kwadiwunjikaña kukweti luwi. Hikwahetaña ichimaku, nawa hikwadinkaña wantaku, hikwelaña chuma chabula kutelaku, hela hikwakokwelaña kwindi hohuku. Kukeña hikwanyakalaña kuzuwa hela kufuukwila mukwawu chuma chatamaku. Kwazañalalaña nansañu yalala, bayi nayuma yabula kuloñaku. Kukeña kwovwahilaña, kwetejaña, kwachiñejaña, nawa kwatatakenaña mwahita yuma yejima. Kubombelahu, kukeña hikwakañanyañaku.—1 Akorinda 13:4-8.
8. Muloñadi wutwatela kumwekesha kukeña kudi akwetu akwakudifukula aYehova?
8 Neyi twiteja spiritu yaNzambi kusoña kukeña mudetu, ichi chililu chikamwekena muwubwambu wetu naNzambi ninawantuñi netu. (Matewu 22:37-39) Kapostolu Yowanu wasonekeli nindi, ‘Muntu wabulaña kukeña washakamaña mukufwa. Muntu wahelaña mana kwindi himbanji; muneluki dehi nenu mbanji hakweti wumi wahaya nyakaku.’ (1 Yowanu 3:14, 15) Mbanji wapulukilileña mumukala wakubatama muIsarela neyi chakwila muntu wunajahiyi hamukwatilili nkunyiku. (Kuhituluka 19:4, 11-13) Neyi spiritu yajila yinakutwilombola, tukumwekesha netu twamukeña Nzambi, akwetu akwakudifukula, niantu amakwawu.
“Muzañalu waYehova Diyi Ñovu Yenu”
9, 10. Indi muzañalu hichumanyi, nawa yumanyi yatela kutwizañalesha?
9 Muzañalu hikutiya kuwaha chikupu. Yehova ‘hiNzambi wamuzañalu.’ (1 Timotewu 1:11; Masamu 104:31) Mwana watiyaña kuwaha kwila nkeñelu yaTata yindi. (Masamu 40:8; Aheberu 10:7-9) Nawa “muzañalu waYehova diyi ñovu [yetu.]”—Nehemiya 8:10.
10 Muzañalu wafumaña kudi Nzambi watwitiyishaña kuwaha chikupu neyi twila nkeñelu yaNzambi nihampinji yitukumona kukala, kuneña, hela hampinji yakutuyandisha. ‘Kumwiluka Nzambi’ kwatwiletelaña muzañalu chikupu! (Yishimu 2:1-5) Wubwambu wetu wawuwahi naNzambi washindamena hakwiluka kwalala nikumukuhwelela nihamulambu waYesu wefutu danyiloña. (1 Yowanu 2:1, 2) Kwikala hakachi kawumana kwetu walala hohu wamukaayi kejima nikwena kwaletaña muzañalu. (Zefwaniya 3:9; Hagayi 2:7) Kuchiñeja kwetu kwaWanta nimudimu wawuwahi wakushimwina nsañu yayiwahi kwatwizañaleshaña. (Matewu 6:9, 10; 24:14) Kuchiñeja kwawumi wahaya nyaka nikwena kwatwizañaleshaña. (Yowanu 17:3) Chineli tukweti kuchiñeja kwakuwahi kwamuchidiwu, twatela ‘kuzañalala chikupu.’—Kuhituluka 16:15.
Ikalenu Awunda niKukaba kabe-e
11, 12. (a) Indi kuwunda mwatela kukwilumbulula ñahi? (b) Indi kuwunda kwafumaña kudi Nzambi kwatwikwashaña ñahi?
11 Kuwunda—hichililu chikwawu chamukabu waspiritu—hikwikala wamwena nikubula kwakama. Tata yetu wamwiwulu hiNzambi wakuwunda, nawa atwikana nawu: “Yehova wukuyikiswila antu indi nkisu nakuyinka kuwunda.” (Masamu 29:11; 1 Akorinda 14:33) Yesu walejeli atumbanji twindi nindi: “Kuwunda nayishiyili; kuwunda kunawundañami nayinki.” (Yowanu 14:27) Indi chumichi chatela kuyikwasha ñahi atumbanji twindi?
12 Kuwunda kwayinkeliyi Yesu atumbanji twindi kwawundishili nyichima yawu niyitoñojoka nawa hiyaswejeli kwakamaku. Ekalili nakuwunda chikupu hampinji yiyatambwilili spiritu yajila yayikaniniwu. (Yowanu 14:26) Makonu, muloña wawukwashu waspiritu nikwakula kulomba kwetu, twadiluñishaña “kuwunda kwaNzambi” kwabadika, kwawundishaña muchima wetu niyitoñojoka. (Afwilipi 4:6, 7) Kubombelahu, spiritu yaYehova yatwikwashaña kushakama awunda nawakwetu akwakwitiya ninawantu acheñi.—Aroma 12:18; 1 Atesalonika 5:13.
13, 14. Indi kukaba kabe-e kwalumbulukadi, nawa muloñadi chitwatela kukwimwekeshela?
13 Kukaba kabe-e kwendelaña hamu nakuwunda, muloña dikudiwunjika kutomikaña neyi atwiluwañesha hela atwivulumuna nakukuhwelela netu yuma yikwikala chiwahi. Nzambi wadiwunjika. (Aroma 9:22-24) Yesu niyena wamwekesheli kudiwunjika. Ninetu tunateli kumwekesha ichi chililu, muloña Pawulu wasonekeli nindi: “Hansañu iyi antiyilili luwi, kulonda mudami nabadika, Yesu Kristu amwekeshi mwejima mwadiñi nakudiwunjikayi [kukaba kabe-e], niikali wakutalilahu antu akumukuhwelelaña, atambuli wumi wahaya nyaka.”—1 Timotewu 1:16.
14 Chililu chakudiwunjika chatwikwashaña kumika neyi akwetu ahosha hela atwila katama hela yuma yabula kushikila. Pawulu wakolesheli akwawu eniKristu nindi: ‘kuminenu dakudiwunjika nawantu ejima.’ (1 Atesalonika 5:14) Chineli wonsu wetu hitwawaninaku nawa twaluwañeshaña, mwalala tunakukeña antu kudiwunjika nanetu, kwikala adiwunjika neyi tuluwañesha hakutiyañana nawu. Komana tufwilenu “kudiwunjika namuzañalu.”—Akolose 1:9-12.
Mwekeshenu Luwi niKuwaha
15. Lumbululenu luwi, nawa shimunenu yakutalilahu yakumwekesha luwi.
15 Twamwekeshaña luwi hampinji yitunakwakamena amakwawu kuhitila mumazu akuyikwasha nimuyililu yawubwambu nimunzatilu. Yehova niMwanindi akweti luwi. (Aroma 2:4; 2 Akorinda 10:1) Ambuña aNzambi niKristu atela kwikala naluwi. (Mika 6:8; Akolose 3:12) Hela tuhu antu abula wubwambu naNzambi niwena anamwekeshi “luwi nankashi.” (Yililu 27:3; 28:2) Mwalala, tunateli kumwekesha luwi neyi “akutwendesha kudi spiritu.”
16. Yumanyi yatela kutwileñela kumwekesha luwi?
16 Twatela kumwekesha luwi hela chakwila kudi chinatuleñeli kuhila hadaha muntu wahosha mazu atama hela nakoñi yuma yabula kutelela. Pawulu wahosheli nindi, ‘Zuwenu kuzuwa kwakadi kuvulumuna, bayi muhumisha itañwa iku saña mwahililaku. Bayi mumushila Diyabolu hakushakamaku. . . . Dikokwejenu muntu namukwawu; ikalenu namuchima wawushona; danakenenu muntu namukwawu neyi chayanakenenuwu kudi Nzambi mudi Kristu nawa.’ (Aefwesesa 4:26, 27, 32) Chachiwahi kutiyila luwi antu anakwesekawu. Ilaña dinu, eluda wawiniKristu wukukañanya kumwekesha luwi neyi wukubula kuhana kufumba kwamuNsona muloña wakuchina kuneñesha muntu wunelukiyi chikupu nindi watela kuleka njila “yayiwahi yaloña nawa yalala, NW.”—Aefwesesa 5:9.
17, 18. Indi kuwaha anakwilumbululi ñahi, nawa ichi chililu chazataña mudimwinyi muwumi wetu?
17 Kuwaha hikuloña, chililu chachiwahi, hela kwikala wamuwahi. Nzambi wamuwahi chikupu. (Masamu 25:8; Zekariya 9:17) Yesu waloña nawa wukweti chililu chachiwahi. Ilaña, wakaanini nkumbu yakwila nawu ‘Wamuwahi’ hampinji yamutenenuwu nawu “Eyi Nkuluñaña wamuwahi.” (Maku 10:17, 18) Mwalala ichi chamwekeni muloña welukili nindi Nzambi diyi chakutalilahu chabadika chakuwaha.
18 Wuswa wetu wakwila yayiwahi awikañeshaña muloña wanshidi yitwaswana. (Aroma 5:12) Hela chochu, twatela kumwekesha ichi chililu neyi tulomba netu Nzambi ‘yatwidizishi kuwaha.’ (Masamu 119:66) Pawulu walejeli akwawu akwakwitiya muRoma nindi: “Enu ana kwami, hansañu yenu neluki chikupu nami mwasweja kuwaha munyichima, mwasweja nimaana ejima.” (Aroma 15:14) Nkoñi wawiniKristu watela kwikala “wakeña yayiwahi.” (Titusa 1:7, 8) Neyi atwilombolaña kudi spiritu yaNzambi, akutwilukila kuyuma yayiwahi, nawa Yehova ‘wukatwanukila kuyuma yayiwahi yitwelaña.’—Nehemiya 5:19; 13:31.
“Kukuhwelela Kwakadi Kudimbana”
19. Lumbululenu chikuhwelelu kwesekana naAheberu 11:1.
19 Chikuhwelelu—nichena hichililu chanyikabu yaspiritu—kukuhwelela ‘yowu kwiluka chalala netu yuma yitwachiñejaña yidi kwoku, yowu kumona yuma yakadi kumonewa.’ (Aheberu 11:1) Neyi tukweti chikuhwelelu, tukwiluka netu yuma yejima yakanayi Yehova yikashikijewa. Wunsahu waweni wayuma yakadi kumonewa walala chikupu nawa chikuhwelelu achitena nawu chesekana nawunsahu wamuchidiwu. Chakutalilahu, yileñaleña yitwamonaña yatwileñelaña kwiteja netu Nleñi wekala koku. Ichi dichikuhwelelu chitukumwekesha neyi tutwalekahu kwenda chakutwendesha kudi spiritu.
20. ‘Nshidinyi yanyakalaña kutulamata,’ nawa twatela kuyitondolwela ñahi hamu ninyidimu yachisemwa chaheseki?
20 Kubula chikuhwelelu diyi “nshidi oyu yanyakalaña kutulamata.” (Aheberu 12:1) Twatela kushindamena haspiritu yaNzambi kulonda kutondolwela nyidimu yachisemwa chaheseki, kufwila maheta, nintañishilu yakutwamba yatela kukisañana chikuhwelelu. (Akolose 2:8; 1 Timotewu 6:9, 10; 2 Timotewu 4:3-5) Spiritu yaNzambi yasoñaña chikuhwelelu mudi ambuña aYehova makonu kufwana chikuhwelelu chawayinsahu akusambila henohu eniKristu kanda niamakwawu asonekawu muBayibolu. (Aheberu 11:2-40) Nawa ‘kukuhwelela kwetu kwakadi kudimbana’ kwatela kukolesha kukuhwelela kwawamakwawu.—1 Timotewu 1:5; Aheberu 13:7.
Mwekeshenu Kwovwaha niKudihemba
21, 22. Indi kwovwaha anakwilumbululi ñahi, nawa muloñadi chitwatela kukwimwekeshela?
21 Kwovwaha hikudiwunjika mumuchima nimuyililu. Kwovwaha hichililu chekala hayililu yaNzambi. Tweluka mwenimu muloña Yesu, wadiña muntu wovwaha, wamwekesheli chachiwahi yililu yaYehova. (Matewu 11:28-30; Yowanu 1:18; 5:19) Hanu dinu, chumanyi chakeñekaña kudi etu ambuña aNzambi?
22 Hamu neyi eniKristu, twatela kwikala ‘amwovu nankashi kumesu awantu ejima.’ (Titusa 3:2) Twamwekeshaña kwovwaha mumudimu wetu wakushimwina. Antu ashikahu lwakuspiritu ayileja kufumba mwiniKristu wunaluwañeshi “naspiritu [yakwovwaha].” (Aŋalija. 6:1) Wonsu wetu twatela kukolesha kunuñañana kwawiniKristu nikuwunda kuhitila mukumwekesha “kudizoza nakwovwaha.” (Efwesesa 4:1-3) Twatela kumwekesha kwovwaha neyi tutwalekahu kwenda chakutwendesha kudi spiritu nikudihemba.
23, 24. Indi kudihemba hichumanyi, nawa kwatwikwashaña ñahi?
23 Kudihemba kwatwileñelaña kutondolwela yitoñojoka nhoshelu, niyililu yaheña. Yehova ‘watwalekelihu kumwena zo-o’ naweniBabiloni akisañeni Yerusalema. (Isaya 42:14) Mwanindi ‘watushila chakutalilahu’ kuhitila mukudiwunjika hampinji yakabakeneñayi. Kapostolu Petulu niyena wafumbili akwawu eniKristu nindi, ‘mukwiluka avulishimu kudihemba.’—1 Petulu 2:21-23; 2 Petulu 1:5-8.
24 Aeluda awiniKristu atela kwikala adihemba. (Titusa 1:7, 8) Mwalala, antu ejima alombolewaña naspiritu yajila atela kudihemba nawa atela kutondolwela yililu yatama, nhoshelu yatama, hela yuma yidi yejima yatela kuleñela kubula kutambwila wuselewa waYehova. Neyi twiteja spiritu yaNzambi kumwekesha kudihemba mudetu, chikumwekana kudi antu amakwawu muloña wanhoshelu yetu niyililu.
Twalekenu Kwenda chaKuyendesha Kudi Spiritu
25, 26. Indi kutwendesha kudi spiritu kukukwasha ñahi kudikunda kwetu makonu nikuchiñeja kwetu kwakumbidi?
25 Neyi akutwendeshaña kudi spiritu, tukwikala akwakushimwina aWanta adikita. (Yililu 18:24-26) Tukutiyañanaña chachiwahi nawakwetu, sweje-e antu amwakama Nzambi akutiyaña kuwaha kudikunda nanetu. Hamu neyi antu alombolewaña naspiritu yajila, tukwikala cheñi akwakukolesha akwetu akwakudifukula aYehova lwakuspiritu. (Afwilipi 2:1-4) Komana hidichi chinakukeña eniKristu ejima kwikala akwakukolesha akwawuku?
26 Mukanu kaayi kanakuyulewa naSatana, hichidi chapela kutwendesha kudi spirituku. (1 Yowanu 5:19) Hela chochu, yihita yawantu makonu anakuyendesha kudi spiritu. Neyi tukuhwelela Yehova namuchima wetu wejima, tukudiluñisha wumi makonu nawa tukutwesha kutwalekahu kwenda haya nyaka munjila jaloña jaMukwakuhana spiritu yajila wukweti kukeña.—Masamu 128:1; Yishimu 3:5, 6.
Mukwakula Nenudi?
• Indi ‘kutwendesha kudi spiritu’ kwakwashaña ñahi wubwambu wetu naNzambi niMwanindi?
• Indi nyikabu yaspiritu yajila yikweti yililwinyi?
• Munjilanyi jikwawu mutwatela kumwekeshela nyikabu yaspiritu yaNzambi?
• Indi kutwendesha kudi spiritu kwakwashaña ñahi wumi wetu wamakonu nikuchiñeja kwetu kwakumbidi?
[Malwihu aKuzatisha haKudiza]
[Mwevulu wudi hefu 13]
Mwekeshenu luwi kuhitila mumazu akukwasha nimunzatilu