Komana Munayivulumuni Spiritu Yajila?

“Kudi nshidi yashikaña nikukufwa.”—1 YOWANU 5:16.

1, 2. Tuneluki ñahi netu chaswayi kuvulumuna spiritu yaNzambi yajila?

 “N AKABAKANI nankashi nayitoñojoka yakwila nami navulumuni spiritu yajila.” Awa mazu ayisonekeli kudi mumbanda wumu wakuGermany, hela chakwila wamukalakeleleña Nzambi. Komana mwiniKristu nateli kuvulumuna spiritu yaNzambi yajila, hela ñovu yazatikaña?

² Eña, muntu nateli kuvulumuna spiritu yaYehova yajila. Yesu Kristu wahosheli nindi: ‘Nyiloña yejima nimatuka akutuka Nzambi ejima, akayanakena antu; hakwila matuka akutuka spiritu hiyakayanakenaku.’ (Matewu 12:31) Anatusoñamishi nawu: “Neyi tukuvulumuna chakukeñamu, iku tweluka dehi nsañu yalala, hikunashali chimuna chikwawu chakuketwila nyiloñaku; kunashali kwawoma waweni wakutalila kusompesha.” (Aheberu 10:26, 27) Kapostolu Yowanu niyena wasonekeli nindi: “Kudi nshidi yashikaña nikukufwa.” (1 Yowanu 5:16) Komana chashalilaña kudi muntu wunavulumuni  chikupu kulonda yeluki neyi navulumuni “nshidi yashikaña nikukufwa”?

Kubalumuka Kwaleñelaña Kwanakena

3. Neyi tuneña nankashi hanshidi yitunakoñi, chikumwekesha chumanyi?

³ Yehova diyi Mukwakusompesha antu atama wakukumishaku. Eñañi, wonsu wetu twakalumbulula kudi Yehova, nawa welaña mwaloña mpinji yejima. (Kutachika 18:25; Aroma 14:12) Yehova yomweni diyi wafuukulaña neyi chakwila tunavulumuni nshidi yabulaña kwanakenawu, nawa diyi watela kutwitambula spiritu yindi. (Masamu 51:11) Hela chochu, neyi tuneña nankashi hanshidi yitunakoñi, chikumwekesha chikupu nawu tunabalumuki mumuchima. Indi kubalumuka kwalala hichumanyi?

4. (a) Indi kubalumuka mumuchima kwalumbulukadi? (b) Muloñadi mazu añimbi yamasamu adi haMasamu 103:10-14 chiyekalila akutukundeja?

⁴ Kubalumuka mumuchima kwalumbuluka nawu tunahimpi yililu yetu yitwakoñeli kunyima hela yuma yatama yitunakukeña kwila. Kwalumbululaña nawu tunaheli hela tunatiyi kutama nakuleka kwila yuma yatama. Neyi tunavulumuni chikupu nawa tunalondeli njila jatelela jikumwekesha nawu tunabalumuki chikupu, mazu ahosheli ñimbi yamasamu anateli kutukundeja chikupu: “[Yehova] hanatwili mwesekena nshidi jetuku, hela kutwinka muloña wesekana nakuluwa kwetuku. Chimwaleha [mw]iwulu nahanu heseki, dimu mwashika niluwi lwindi kutoha lwaanakenañayi awa amwakamaña. Nafumishi nyiloña yetu, nayitwali kwakulehi neyi kufumisha kumusela nakushika kumujika. Chatiyilañayi tata yawantu anyanindi wushona, dichi chatiyilañayi Yehova awa amwakamaña wushona. Muloña yena weluka nyijimba yetu, waanukaña kwindi nindi hilunkuñu hohu.”—Masamu 103:10-14.

5, 6. Shimunenu chikuma cheneni chidi ha 1 Yowanu 3:19-22, nawa lumbululenu mwatalisha mazu akapostolu.

⁵ Mazu akapostolu Yowanu niwena atukundejaña, wahosheli nindi: “Kweniku diku kutukwilukila netu tudi akwansañu yalala, diku kutukudikoleshela munyichima yetu kumesu indi mwejima mukututanyishila nyichima yetu; muloña Nzambi wabadika nyichima yetu, weluka yuma yejima. Enu akwetu twakeña, neyi nyichima yetu yikubula kututanyisha, hitukwikala nawoma kumesu aNzambuku; niyejima yitukulomba tukuyitambula kudi yena, muloña twelaña mwatulejeliyi, twelaña yuma yamutiyishaña kuwaha.”—1 Yowanu 3:19-22.

⁶ ‘Tuneluki netu tudi akwansañu yalala’ muloña twamwekeshaña kukeña kudi amana kwetu nawa hitwekala nachaaku chakuvulumunaku. (Masamu 119:11) Neyi tukuditanyisha muloña wayiluwa yitunakoñi, twatela kwanuka netu “Nzambi wabadika nyichima yetu, weluka yuma yejima.” Yehova watutiyilaña luwi muloña weluka nindi ‘twayikeña ana kwetu chakadi kudimbana,’ ninjita yitwalwaña nanshidi, niñovu jetu jakwila nkeñelu yindi. (1 Petulu 1:22) Neyi tumukuhwelela Yehova, tukeña ana kwetu, nikubula kwikala namuloña wakukoña nshidi mumushikila, muchima wetu ‘hiwukutanyishaku.’ ‘Hitwakekala nawoma wakuhosha kumesu aNzambi’ mukulombaku, nawa wukwakula kulomba kwetu muloña twahembaña nshimbi jindi.

Yakutalilahu yaWantu Avulumwini Spiritu

7. Chumanyi chamwekeshaña nawu nshidi anateli kuyanakena hela nehi?

⁷ Nshidi yamuchidinyi yabulaña kwanakenawu? Hakwila nawu twakuli ilu lwihu, tusambilenu kutala hayakutalilahu yamuBayibolu. Iyi yakutalilahu yikutukwashaku neyi tunabalumuki mumuchima ilaña tuchidi aneña nankashi muloña wayiluwa yamaneni yitwakoñeli. Tukumona netu hakwila twiluki netu nshidi yetu anateli kuyanakena, hichashindamena hohu hanshidi  yinakoñiyi muntuku; ilaña chashindamena hachuma chaletesha kukoña chiluwa, chidi muchima, nichipimu chakuvulumuna mumushikila dichamwekeshaña nawu nshidi atela kuyanakena hela nehi.

8. Indi akulumpi jansakililu awaYudeya amuyaaka nkulakaji yatachi avulumwini ñahi spiritu yajila?

⁸ Akulumpi jansakililu awaYudeya amuyaaka nkulakaji yatachi amukaanini Yesu Kristu munjila yawukatu adiña nakuvulumuna spiritu yajila. Amweneña spiritu yaNzambi chiyazatikileña mudi Yesu hampinji yakoñeleñayi yihayamisha yakumuhameka nachu Yehova. Ilaña ayilumbu jaKristu nawu ñovu yazatishileñayi yafumineña kudi Satana Diyabolu. Kwesekeja namazu aYesu, antu atukili spiritu yaNzambi yajila adiña nakuvulumuna nshidi yakubula kwanakena ‘hela makonu, nikunyaka yamba kenza.’—Matewu 12:22-32.

9. Indi matuka hichumanyi, nawa Yesu wahosheli nindidi?

⁹ Kutukana hihoshelu yafwana, yatama, hela yakasawuntu. Chineli spiritu yajila Yafumaña kudi Nzambi, kuhosha yuma yatama hadi spiritu yindi chochimu nakumuhoshola Yehova. Muntu neyi yatwalekahu kuzatisha nhoshelu yamuchidiwu hiyatela kumwanakenaku. Nsañu yinaleteshi Yesu yahoshi mazu amuchidiwu yinamwekeshi nawu Yesu nakutena antu akaanaña mumushikila kuzatika kwaspiritu yajila yaNzambi. Muloña wakwila aFwarisi amweneña chazatikileña spiritu yaYehova mudi Yesu ilaña wena nawu hiñovu yaDiyabolu, avulumwini nakutuka spiritu. Dichi, Yesu wahosheli nindi: ‘Muntu wukutuka spiritu yajila, hamba kamona kumwanakenaku, nahi namuloña wahaya nyaka.’—Maku 3:20-29.

10. Muloñadi Yesu chamuteneneniyi Yudasi nindi ‘mwana kakunoña’?

¹⁰ Talenu cheñi nsañu yaYudasi Isakaroti. Hadiña muntu washinshikaku, weyileña mali munjeki yamwinkeluwu kuhemba. (Yowanu 12:5, 6) Nkumininaku, Yudasi wayili kudi anyuli jawaYudeya nakumufukejela Yesu namali asiliva 30. Eña, Yudasi welukili nindi wavulumwini cheliliyi namufukejeli dehi, ilaña hadanakeneni  nshidi yakoñeliyi mumushikilaku. Dichi, Yudasi hanashikilumu kusañukaku. Yesu wamuteneni nindi ‘mwana kakunoña.’—Yowanu 17:12; Matewu 26:14-16.

Yakutalilahu yaWantu Abulili Kuvulumuna Spiritu

11-13. Indi Mwanta Davidi wavulumwini ñahi naBatisheba, nawa wukwashinyi wutukuwana munjila Nzambi yazatililimu nawu?

¹¹ Mpinji yikwawu, eniKristu ashimunaña nshidi yeneni yinakoñiwu kudi aeluda muchipompelu nawa anakwashiwu kwikala nawubwambu wawuwahi naYehova anateli kuneña cheñi hamuloña wanshimbi jaNzambi jafumpiluwu. (Yakoba 5:14) Neyi tunakukabakana muniyi njila, dikwila nawu tukuhetelamu chitukudiza haNsona yahoshaña hadi antu anakenenuwu nshidi jawu.

¹² Mwanta Davidi wavulumwini chikupu naBatisheba, ñoda Uriya. Chadiñayi hewulu dachipañu chindi wamweni mumbanda walubanji nakuwela, Davidi watemesheli kañanda nakumuleta kuchipañu chindi nawa wakamini nindi. Nkumininaku chamulejeluwu nawu Batisheba wudi nevumu, Davidi wakwatili kafuta kakuleta nfumwindi Uriya, nindi yakaami nindi kulonda yabuti nyiloña yawuvumbi. Chelili kafuta kanafuñunuki dehi, mwanta waloñesheli kulonda Uriya amujahi kunjita. Kulondelahu, Batisheba wekalili ñoda Davidi nawa wavweli nindi mwana wafwili.—2 Samweli 11:1-27.

¹³ Yehova wamanishili muloña waDavidi niBatisheba. Nzambi wamwanakeneni Davidi, hadaha watoñojokeli hayuma yidi neyi kudanakena kwindi nichitiyañenu chaWanta chatiyañeniyi nindi. (2 Samweli 7:11-16; 12:7-14) Chakadi kujinoka Batisheba niyena wadanakeneni, muloña wadiña nakukooleka kwakwikala mama yaMwanta Solomoni nawa cheñi wekalili nkakulula wamumbanda waYesu Kristu. (Matewu 1:1, 6, 16) Neyi tunavulumuni, twatela kwanuka netu Yehova wamonaña yililu yetu yakubalumuka.

14. Indi kwanakena kwaNzambi anakwimwekeshi ñahi munsañu yaMwanta Manase?

¹⁴ Kwanakena kwaYehova anakumwekeshi cheñi munsañu yaMwanta Manase wamuYuda. Welileña chatama kumesu aYehova. Manase watuñilili Bayali tumeña, ‘wadifukwileña kuyileñaleña yamwiwulu yejima,’ watuñilili cheñi anzambi akutwamba tumeña muyipañu yiyedi yatembeli. Wahitishileña anyanindi mukesi, wapandilaña, nawa wakojejeli antu amuYuda niYerusalema ‘kwila chatama chakubadika nyuza yajilumwiniyi Yehova kumesu awanyana kaIsarela.’ Mazu akusoñamisha ashimwineñawu kudi atuprofwetu aNzambi hiyayitiyiluku. Mukuhita kwampinji, mwanta wawaAshuri wamutwalili Manase muwunkoli. Chadiñayi muwunkoli, Manase wadanakeneni nakutwalekahu kudihomba hakulomba kudi Nzambi. Nawa Nzambi wamwanakeneni nakumufuntisha hawanta muYerusalema, mwatiyakesheliyi kudifukula kwalala.—2 Kushindulula 33:2-17.

15. Chumanyi chamwekeni mukuhanda kwaPetulu chinakumwekesha nawu Yehova wanakenaña “nankashi”?

¹⁵ Chimwahitili yaaka yayivulu, kapostolu Petulu wavulumwini chikupu kuhitila mukumukaana Yesu. (Maku 14:30, 66-72) Ilaña Yehova wamwanakeneni Petulu “nankashi.” (Isaya 55:7) Muloñadi? Muloña Petulu wadanakeneni chikupu. (Luka 22:62) Chimwahitili mafuku 50 hefuku daPentekosta, wunsahu walumbuluka wakwanakena kwaNzambi wamwekeni. Petulu amwinkeli kukooleka kweneni kwakuhana wunsahu hadi Yesu chakadi woma. (Yililu 2:14-36) Kudihu wunsahu wunakumwekesha nawu nimakonu Nzambi nateli kwanakena eniKristu anadanakeni chikupu? Ñimbi yamasamu wembili nindi: “Neyi eyi Yehova wukushinshika mwaluwañawu antu, hinyi wukwimana, eyi Mwanta? Ilaña kudeyi kwekala kwanakena.”—Masamu 130:3, 4.

Kubula Kusweja Kwakama Netu Tunavulumuni Spiritu Yajila

16. Yumanyi yaleñeshaña Nzambi kwanakena?

¹⁶ Yakutalilahu yitunahanjekihu yatela kutukwashaku kubula kwakama netu tunavulumuni spiritu yajila. Iyi yakutalilahu yinamwekeshi nawu Yehova wanakenaña akwakuvulumuna adanakenaña. Kulomba kudi Nzambi namukoyi dichuma chasweja kulema. Neyi tunavulumuni, tunateli kulemba kulonda atwanakeni  kushindamena hefutu danyiloña damulambu waYesu, luwi lwaYehova, nshidi yetu yitwaswana, ninyidimu yetu yakashinshi. Kwiluka luwi lwaYehova lwasweja, tunateli kulomba kwanakena nakukuhwelela netu akutwanakena.—Aefwesesa 1:7.

17. Chumanyi chitwatela kwila neyi tunavulumuni nawa tunakukeña wukwashu wakuspiritu?

¹⁷ Indi neyi tuvulumuna nakuluwañesha wubwambu wetu naYehova chakwila tunakutiya neyi hitunashikilumu kulomba kudi Nzambuku? Neyi chikala mwenimu, kambanji Yakoba wasonekeli nindi: ‘[Muntu wamuchidowu] atambiki akulumpi achipompelu, amulombeli, amuwayishi manji mwijina daYehova. Kulomba kwakukuhwelela kukuhandisha wakata, niYehova wukumukolesha; neyi navulumuni akumwanakena.’—Yakoba 5:14, 15.

18. Hela chakwila muntu anamuhañi muchipompelu dikwila nawu nshidi yindi hinshidi yakubula kwanakena?

¹⁸ Hela chakwila mukwakutamisha hanadanakeni hanoyu mpinjuku nawa anamuhañi muchipompelu, nshidi yindi bayi neyi hinshidi yakubula kwanakenaku. Hakuhosha hadi mukwakutamisha wawayishewa wahañawu muKorinda, Pawulu wasonekeli nindi: “Owu muntu chanamubabeshuwu dehi kudi amavulu, chinawani dehi. Ichi dinu, balumukenu mumwanakeni nikumukundeja, kuchina muntu wudi ochu kuchikika nehuñu odu danamoniyi.” (2 Akorinda 2:6-8; 1 Akorinda 5:1-5) Hakwila ekali cheñi nawubwambu naYehova, anavulumuni atela kwiteja wukwashu wakuspiritu washindamena haBayibolu wawaeluda awiniKristu nikumwekesha nawu anadanakeni chikupu. Atela ‘kusoña nyikabu yatelela kubalumuka mumuchima.’—Luka 3:8.

19. Chumanyi chikutukwashaku kwikala ‘akola muchikuhwelelu’?

¹⁹ Chumanyi chikuleñela kutoñojoka netu tunavulumuni spiritu yajila? Kusweja kwakama hela yikatu kumujimba yinateli kuleñela. Muniyi njila, kulomba nikunooka kunateli kukwashana. Sweje-e dinu bayi twiteja Satana yatuzeyeshi chakwila tuleki kumukalakela Nzambuku. Chineli Yehova hatiyaña kuwaha nakufwa kwamuntu watamaku, dikwila nawu waneñaña hakujimbesha ambuñindi. Dichi neyi tunakwakamena netu tunayivulumuni spiritu, twatela kutwalekahu nakudya Izu daNzambi, kushilahu ninsañu yakukundeja yidi neyi yamuMasamu. Twatela kutwalekahu kuwanika kukupompa kwachipompelu nikushimwina mumudimu waWanta. Kwila mwenimu kukutukwasha kwikala ‘akola muchikuhwelelu’ nikubula kwakamena netu hadaha tunakoñi nshidi yabulaña kwanakenawu.—Titusa 2:2.

20. Yumanyi yatela kutoñojokahu muntu yikumukwasha kwiluka nindi hanavulumuni spiritu yajilaku?

²⁰ Antu ejima anakutiya woma nawu anavulumuni spiritu yajila atela kudihula nawu: ‘Komana natuki spiritu yajila? Chineli nadanakeneni nshidi yami, komana nahimpi yitoñojoka yami kutalisha haniku kudanakena? Komana nakuhweleli nami Nzambi wanakenaña? Tahindi nidi mukwakusekesha wunakaani chejeji chakuspiritu?’ Hekwawu, antu amuchidiwu akwiluka nawu hiyanatuki spiritu yaNzambi yajilaku, nawa hiyanekali akwakusekeshaku. Anadanakeni, nawa anakuhweleli chikupu nawu Yehova wanakenaña. Neyi chidi mwenimu, hiyanavulumuni spiritu yaYehova yajilaku.

21. Malwihwinyi akakulawu muchibaba chinalondeluhu?

²¹ Okuwaha hakwiluka netu hitunavulumuni spiritu yajilaku! Hela chochu, malwihu yitwakahanjikahu muchibaba chinalondelehu anakundami kuniyi nsañu. Chakutalilahu, twatela kudihula netu: ‘Komana mwalala nakulombolewa naspiritu yaNzambi yajila? Komana nakusoña nyikabu yaspiritu muchihandilu chami?’

Mukwakula Nenudi?

• Muloñadi chitukuhoshela netu chaswayi kuvulumuna spiritu yajila?

• Indi kubalumuka mumuchima kwalumbulukadi?

• Anyi avulumwini spiritu hampinji yadiñayi Yesu hamaseki?

• Munjilanyi mutunateli kushindila kwakamena kwakwila nawu tunavulumuni nshidi yabulaña kwanakenawu?

[Malwihu aKuzatisha haKudiza]

[Mwevulu wudi hefu 8]

Hela chakwila wamukaanini Yesu, Petulu havulumwini nshidi yabulaña kwanakenawuku