Komana ‘Mwaheta Kumesu aNzambi’?

‘Chochakekala muntu wadilumbikilaña maheta amavulu, nindi indi yomweni hohu hekalaña namaheta kumesu aNzambuku.’—LUKA 12:21.

1, 2. (a) Indi antu amavulu akeñaña kudihana chikupu kuyumanyi? (b) Kukalanyi nawa wubanjinyi wunateli kumonawu eniKristu?

 KUKEÑA MAHETA bayi neyi hichisela chakeñaña kuhemawu anyana hohuku. Ilaña hichuma chamwekanaña kakavulu muwumi wawantu muchihandilu chawu nawa chazatikaña mumatuña amavulu. Chakutalilahu, muyaaka yamuma 1800, muAustralia, South Africa, Canada, nimuUnited States mwadiña maheta nankashi chakwila akwokweli antu akumaluña amalehi adihanini kushiya nyikala yawu niantaña jawu kulonda kuya nakukeña maheta kumatuña acheñi, mpinji jikwawu mumatuña wenawa mwadiña mwakala. Chalala, antu amavulu adikeñelaña kudiñija muwubanji weneni nawa anakudihana chikupu kulonda kuwana maheta akeñaña nyichima yawu.

 ² Hela chakwila antu amavulu makonu hiyanakukeña maheta chachenuku, atela kuzata nañovu kulonda amoni kuhanda. Kuwana mwakuhandila mukanu kaayi kamakonu hichuma chakala chikupu. Chaswayi kwakamena nankashi hayakudya, yakuvwala, nihakukaama chakwila tunateli nikudiwula hela kujimbala yuma yalema chikupu. (Aroma 14:17) Yesu wahanini chakutalilahu hela chishimu chalumbulula ichi chaaku chawantu. Chishimu chenichi chekala haLuka 12:16-21.

3. Shimunenu mukwihihisha chakutalilahu chaYesu chasonekawu haLuka 12:16-21.

³ Yesu waheni chakutalilahu chenichi hampinji yahosheleñayi kutalisha hakulema kwakudihemba kulwisu, lutwahanjekeluhu chikupu muchibaba chinafumuhu. Hanyima yakusoñamisha halwisu, Yesu wahosheli hadi samaheta wabulili kuzañalala nayuma yayiwahi yenzesheliyi mujinkalaña ilaña wakeñeleña kujisanda nakutuña jamaneni kulonda kuhembelamu yuma yayiwahi yayivulu. Hampinji yatoñojokeleñayi nindi nakukeña kunooka nikudiluñisha wumi, Nzambi wamwilili nindi wumi windi wunakukuma, nawa yuma yayiwahi yejima yahembeliyi yikwikala yamuntu wacheñi. Yesu wabombeleluhu mazu akukunkulula nindi: “Chochakekala muntu wadilumbikilaña maheta amavulu, nindi indi yomweni hohu, hekalaña namaheta kumesu aNzambuku.” (Luka 12:21) Chumanyi chitwatela kudizilaku kunichi chishimu? Tunateli kuzatisha ñahi chishimu chenichi muwumi wetu?

Muntu Wadiña naKukala kwaKuhayamisha

4. Indi muntu yalumbululawu muchishimu chaYesu, tunateli kuhoshahu netu wadiña muntu wamuchidinyi?

⁴ Chakutalilahu chaheniyi Yesu chelukewa chikupu. Tunamoni netu Yesu watachikili nsañu nakuhosha nindi: “Maha amukwakuheta wumu aswejeli kusoña nankashi.” Yesu wahosheli nindi, muntu yeniwu haheteli kuhitila mukuzatisha kafuta hela njila yabula kwitejewaku. Mumazu amakwawu hiyamulumbulwili neyi muntu watamaku. Kafwampi kwesekeja nachahosheliyi Yesu, chikwikala chachiwahi kutoñojoka netu muntu yalumbululawu muchishimu wazatili nañovu. Chatela kuhoshewa nawu iwu muntu wafuukwiluhu nikuhemba yuma yakuzatisha kumbidi, hekwawu wadiña nakutoñojoka hanshakaminu yachisaka chindi. Dichi kwesekeja nammwenu yawuntu, muntu yeniwu anateli kumulumbulula nawu himuntu wazataña nañovu nawa wakalakalaña nyidimu yindi chikupu.

5. Kukalanyi kwamweniyi muntu wamuchishimu chaYesu?

⁵ Munjila yikwawu, Yesu wateneni iwu muntu wamuchishimu nindi samaheta, chinakulumbulula muntu wadiña dehi namaheta amawahi nawa amavulu. Hela chochu, neyi chalumbulwiliyi Yesu, iwu samaheta wadiña nakukala. Iha dindi daswejeli kusoña nankashi kubadika chakuhweleleliyi, kubadika yakeñeleñayi hela yatela kuhembayi. Chumanyi chateleleli kwilayi?

6. Ambuña aNzambi amavulu atalañanaña nakufuukula kwamuchidinyi makonu?

⁶ Ambuña aYehova makonu amonaña kukala kwadifwanaku chikupu neyi kwamweniyi ona samaheta. EniKristu alala afwilaña kwikala ashinshika, akwakuzata nañovu nawa akwakukalakala nyidimu chiwahi. (Akolose 3:22, 23) Hela chakwila ayiñija nyidimu hela adizatilaña, akalakalaña chiwahi nyidimu yawu yakoñañawu. Neyi ayinka chifulu chahewulu hela mudimu wakulanda nakulandulula wawuha, atela kufuukulahu. Komana anateli kwiteja mudimu weniwu kulonda kwikala namali amavulu? Chochimu, aYinsahu amavulu achidi atwansi azataña chiwahi kushikola. Muloña wanichi, anateli kuyinka yawana hela kuyifwetela shikola yahewulu, hajishikola jatiyakana chikupu. Komana atela kulondela njila yinakwilawu antu amavulu nikwiteja yawana yinayinkuwu?

7. Indi muntu wamuchishimu chaYesu wamanishili ñahi kukala kwindi?

⁷ Neyi kufunta kuchakutalilahu chaYesu, chumanyi cheliliyi samaheta hampinji yaswejeli kusoña iha dindi chakwila wakañenyi hakwinka mbutu yañwiliyi? Wafuukwiluhu kusanda jinkalaña jadiñayi naju nakutuña jeneni kulonda kuhembelamu mbutu yejima niyuma yayiwahi yahambakeni. Iku kufuukula kwamwinkeli  yitoñojoka yakuwunda nimuzañalu chakwila watoñojokeli nindi: “Nili wumi wami nami, Eyi wumi wami, wunalumbiki dehi maheteyi amavulu anyaka yayivulu; nookaku kweyi; dyaña, nwaña, luñaña.”—Luka 12:19.

Muloñadi Iwu Muntu Chamutenenenuwu Nawu “Chisupi”

8. Chumanyi chalema chadiwiliyi iwu muntu wamuchishimu chaYesu?

⁸ Hela chochu, neyi chahosheli Yesu, kufuukula kwasamaheta kwamwekesheli hohu yitoñojoka yakutwamba yakwikala nambidi yayiwahi. Hela chakwila kufuukula kwindi kwamwekeni neyi kwalema, mukufuukula kwindi mwashalili chuma chimu chalema nankashi—nkeñelu yaNzambi. Iwu muntu watoñojokeleña chakudakamena hohu yomweni, chatela kudizañaleshayi, nikudya, nikunwa, nikudiluñisha. Watoñojokeli nindi neyi wukudilumbikila ‘maheta amavulu,’ nateli kushakama cheñi “nyaka yayivulu.” Chawushona, yuma hiyazatikili neyi chatoñojokeleñayuku. Neyi chahosheliyi Yesu hakusambila, “muloña wumi wamuntu hiwekalaña kukuvula kwamahetinduku.” (Luka 12:15) Hawufuku weniwu, yuma yejima yazatiliyi iwu muntu yakumini chakukasumwisha, muloña Nzambi wamwilili nindi: “Eyi chisupi, anakeñi kutambula wumi weyi wufuku owu, indi iyi yuma yiwunaloñeshi yikushala nanyi?”—Luka 12:20.

9. Muloñadi muntu wamuchishimu chamutenenenuwu nawu chisupi?

⁹ Tunashiki dehi hachikuma chalema chidi muchakutalilahu chaYesu. Nzambi wamuteneni iwu muntu nindi chisupi. Mukanda wumu walumbulula nyichidi yezu dachiGriki yazatishañawu nawu, ‘mpinji yejima yalumbulula kubula maana.’ (Exegetical Dictionary of the New Testament) Iwu mukanda wahosha nawu munichi chishimu, Nzambi amulumbulula neyi nakuzatisha izu kulonda kumwekesha ‘kubula kulema kwayitoñojoka yamaheta akumbidi.’ Izu denidi hidatalisha kudi muntu wabula maanaku, ilaña kudi ‘muntu wakanaña kushindamena hadi Nzambi.’ Chamulumbulwiluwu iwu samaheta kudi Yesu chatwanukishaña mazu alejeliyi chipompelu chawiniKristu chamuyaaka nkulakaji yakusambila chaLayodikeya, muAsia Minor nindi: “Chiwuneli neyi, Nimukwakuheta, nadiheteshi dehi, hinabuli chumaku; komana jakukuma dehi, wumulanda, wukazweñi, wumputamesu, wudi nawuvu.”—Chimwekeshu 3:17.

10. Muloñanyi kuheta ‘maheta amavulu’ chikwabulilaña kuhana chikuhwelelu chakwikala ‘nanyaka yayivulu’?

¹⁰ Twatela kutoñojoka chikupu hachuma chitwatela kudizila kunichi chishimu. Komana twatela kwikala neyi muntu wamuchishimu tuzata nañovu kulonda kwikala ‘namaheta amavulu,’ ilaña tukañanya kwila chuma chalema kulonda kuheta kuchiñeja kwakwikala ‘nanyaka yayivulu’? (Yowanu 3:16; 17:3) Bayibolu yahosha nawu: “Maheta hiyakakwasha muntu hefuku dandombuku,” nawa “muntu wakuhwelelaña mahetindi wakadimbuka.” (Yishimu 11:4, 28) Dichi Yesu wabombeleli kuchishimu naniku kukonkomwena kwakukumisha nindi: “Chochakekala muntu wadilumbikilaña maheta amavulu, nindi indi yomweni hohu, hekalaña namaheta kumesu aNzambuku.”—Luka 12:21.

11. Muloñadi chichekalila chamukunkulwayi kushindamesha kuchiñeja nimbidi mumaheta akumujimba?

¹¹ Chahosheliyi Yesu nindi “chochakekala,” washimwineña hachuma chamumwekeneni samaheta wamuchishimu nindi chinateli nikumwekena antu ashindamesha kuchiñeja kwawu niwumi wawu nimbidi yawu chikupu mumaheta  akumujimba. Chiluwa hichekala ‘mukudilumbikila mahetaku,’ ilaña mukukañanya kwikala ‘waheta kumesu aNzambi.’ Kambanji Yakoba waheni kukonkomwena kwadifwanaku hakusoneka nindi: “Ehe-e! Enu mwelaña nenu, Hela lelu, hela kumadiki tukuya kumukala wakampanda, twakashakamaku mwaka wumu, twakalandujola nakuhetelaku; kutoña yimukumona kumadiki himunayilukuku.” Chumanyi chatela kwilawu? ‘Chachiwahi kwila nenu, Neyi Yehova neteji tukuhanda, tukwila mwenimu hela mwenomu.’ (Yakoba 4:13-15) Hichikweti muloña namaheta akwetiyi muntu hela kuvula kwayuma yakwetiyuku, yuma yejima yikwikala yamukunkulwayi neyi haheta kumesu aNzambuku. Hanu dinu kuheta kumesu aNzambi chalumbululadi?

Kwikala Aheta Kumesu aNzambi

12. Chumanyi chitwatela kwila hakwila nawu tuheti kumesu aNzambi?

¹² Mumazu aYesu, kwikala aheta kumesu aNzambi chinambuki nakudilumbikila maheta, hela kuheta yuma yakumujimba. Kafwampi Yesu wahosheleña nindi chuma chitwatela kwakamena muwumi hichatela kwikala chakudilumbikila maheta akumujimba hela kudizañalesha nayuma yitunateli kuhetaku. Ilaña twatela kuzatisha mahetetu munjila yatela kuwahisha hela kukolesha wulunda wetu naYehova. Kwila mwenimu chikutuleñela kwikala aheta kumesu aNzambi. Muloñanyi? Muloña kwaletaña nkisu jajivulu kufuma kudi Nzambi. Bayibolu yatulejaña nawu: “Nkisu yaYehova yaheteshaña muntu, habombelañaku kukalaku.”—Yishimu 10:22.

13. Indi nkisu yaYehova “yaheteshaña” munjilanyi?

¹³ Neyi Yehova yakiswili antu jindi, wayinkaña yuma yayiwahi mpinji yejima. (Yakoba 1:17) Chakutalilahu hampinji yayinkeliyi Yehova aIsarela iluña dakushakamamu, dadiña “ituña datuloña twamayeli nawuchi.” Hela chakwila ituña daEjipitu nidena adilumbulwili muniyi njila, ituña dayinkeliyi Yehova aIsarela dadiña dambukaku munjila yimu yalema nankashi. Mosi wayilejeli aIsarela nindi, dadiña “hiituña dakuhemba kudi Yehova Nzambi yeyi.” Mumazu amakwawu, adi kuheta muloña Yehova wadiña nakuyihemba. Hampinji yatwalekeluhu aIsarela kwikala ashinshika kudi Yehova, wayikiswilili chikupu nawa ahandileña chihandilu chachiwahi kubadika chanyuza yejima yayinyeñumukili. Mwalala nkisu yaYehova diyi “yaheteshaña”!—Kuchinda 16:13; Kuhituluka 4:5-8; 11:8-15.

14. Chumanyi chadiluñishañawu antu aheta kumesu aNzambi?

¹⁴ Antu aheta yuma yakumujimba kakavulu ashaña maana hachiyatela kumwekanawu kumesu awantu. Kakavulu chumichi chamwekenaña munshakaminu yawu. Akeñaña kutiyisha antu kuwaha nachuma chatenañawu muBayibolu nawu “kudisamba kwamukunkulwayi kwawumi wunu.” (1 Yowanu 2:16) Kwambukaku, antu aheta kumesu aNzambi adiluñishaña wuselewa waNzambi, niluwi lwasweja nawa ekalaña nawubwambu wakola naNzambi. Kwikala nanshakaminu yayiwahi yamuchidiwu chayileñelaña kwikala namuzañalu nawa akiñewa kubadika chuma chidi chejima chinateli kuleta maheta akumujimba. (Isaya 40:11) Lwihu ludi lwakwila nawu, Chumanyi chitwatela kwila hakwila nawu twikali aheta kumesu aNzambi?

Kuheta Kumesu aNzambi

15. Chumanyi chitwatela kwila hakwila nawu tuheti kumesu aNzambi?

¹⁵ Muchakutalilahu chaYesu, ona muntu wafukwiluhu kuzata nañovu kulonda kuheta yomweni, nawa amuteneni nawu chisupi. Hela chochu, hakwila nawu twikali aheta  kumesu aNzambi twatela kufwila kuzata nañovu nikukalakala chikupu munyidimu yalema kumesu aNzambi. Hakachi kaniyi nyidimu hadi chuma chalejeliyi Yesu nindi: “Dichi yenu mwakelishi atumbanji munyuza yejima.” (Matewu 28:19) Hitwatela kuzatisha mpinji yetu, niñovu yetu, niyawaana yatwinkawu munjila yakuwahisha chihandilu chetuku, ilaña twatela kuyizatisha mumudimu wakushimwina Wanta nikwilisha atumbanji, chumichi chinateli kwesekejewa nakuhemba maheta. Antu akoña mwenimu awana maheta amavulu akuspiritu, neyi chinamwekeshuwu muyakuhumañana yinalondeluhu.—Yishimu 19:17.

16, 17. Yakuhumañananyi yimwatela kushimuna yinakumwekesha nshakaminu yaheteshaña muntu kumesu aNzambi?

¹⁶ Shinshikenu nsañu yeyala wumu mwiniKristu wadiña namudimu wamali amavulu waloñesheleña jikompyuta. Hela chochu, mudimu windi wamumanishilileña mpinji yindi yejima nakumuleñela kwikala nawuzweñi wakuspiritu. Nkumininaku, chatela yayiluku hambidi namudimu windi, walekeli nakutachika mudimu wakwilisha ice cream nakuyilandishaña hamukwakwa kulonda kwikala nampinji yeneni yakwakamena kukankila kwindi kwakuspiritu ninyidimu yindi. Antu yazatileñayi nawu hakusambila adiña nakumuseha, hanu dinu chumanyi chafuminumu? Wahosheli nindi, “Nakwatileña mali amavulu kubadika hampinji yinazatileña najikompyuta. Chanleñela kwikala wazañalala muloña hinidi nachikela hela kwakamena neyi chinadiña hamudimu wami wawukuluku. Nawa chuma chasweja kulema, natiyaña neyi nakundama kwakwihi chikupu naYehova.” Iku kuhimpa mudimu kwamukwashili iwu mwiniKristu kwiñila mudimu wakushimwina mpinji yejima, nawa chayinu mpinji nakuzatila hakasanji kamutayi kawaYinsahu jaYehova mwituña dawu. Chalala nkisu yaYehova “yaheteshaña.”

¹⁷ Chakutalilahu chikwawu chamumbanda wakulilili muchisaka mwalemesheluwu shikola nankashi. Watañilili hajiyunivesiti muFrance, muMexico nimuSwitzerland nawa wadiña nakukuhwelela kwiñila mudimu wawuwahi. Wahosheli nindi, “Nadiña namuzañalu; Anlemesheli nawa anyinkeli nyidimu yalema, ilaña mumuchima mwenzeli chineñi chikupu.” Dichi wadizili hadi Yehova. Kufumahu wahosheli nindi: “Chinelukili yuma yakuspiritu, mpwila yami yakumuzañalesha Yehova nikukeña kumufuntishila yuma yantesha yanyikeliyi yankwashili kumona chiwahi njila yinatela kwendamu—kumukalakela mumudimu wampinji yejima.” Walekeli mudimu windi nawa wapapatisheweli chakubula kunata mpinji. Nakalakali namuzañalu mumudimu wakushimwina mpinji yejima hadi yaaka 20. Wahosheli nindi, “Antu amakwawu atoñojokaña nawu nomba mudimu wami mumenji, ilaña eluka nawu nidi wamuzañalu, nawa alemesha nshimbi yalombolaña wumi wami. Mafuku ejima nalombaña kudi Yehova kulonda yankwashi kwikala wadizoza kulonda nikali nawuselewa windi.”

18. Kufwana Pawulu, tunateli kwikala ñahi aheta kumesu aNzambi?

¹⁸ Sawulu wekalili kapostolu Pawulu, wadiña namudimu wawuwahi. Hela chochu, mukuhita kwampinji wasonekeli nindi: “Nafuukulaña yuma yejima nami yakujimbañesha hohu, nanochu chasweja kuwaha kumwiluka Kristu Yesu, Mwanta wami.” (Afwilipi 3:7, 8) Kwesekeja naPawulu, maheta aheteliyi kuhitila mudi Kristu abadikili yuma yejima yamukaayi. Chochimu, kuhitila mukuleka nyidimu yakumujimba nakwikala nanshakaminu yakwakama Nzambi, ninetu tunateli kudiluñisha wumi wamaheta kumesu aNzambi. Izu daNzambi datwikana nawu: “Wuloku wakudizoza niwakumwakama Yehova himaheta nikulema niwumi.”—Yishimu 22:4.

Munateli Kulumbulula?

• Indi muntu wamuchishimu chaYesu wamweni kukalanyi?

• Muloñadi muntu wamuchishimu chamutenenenuwu nawu chisupi?

• Indi kuheta kumesu aNzambi chalumbulukadi?

• Tunateli kwikala ñahi aheta kumesu aNzambi?

[Malwihu aKuzatisha haKudiza]

[Mwevulu wudi hefu 28, 29]

“Nkisu yaYehova —yaheteshaña muntu”