Kuchiñeja Ifuku daYehova naKumika

‘Mukukuhwelela kwenu vulishilenumu . . . kumika.’—2 PETULU 1:5, 6.

1, 2. Indi kumika hichumanyi, nawa muloñadi eniKristu chiyatela kumikilawu?

 IFUKU daYehova didi kwakwihi nankashi. (Yoweli 1:15; Zefwaniya 1:14) Hamu neyi eniKristu anafuukulihu kwikala ashinshika kudi Nzambi, twachiñejaña mpinji yakayiñishawu wanta waYehova. Chayinu mpinji, tunakutalañana nakuhelañana, kutwihosha chatama, kukabisha nikufwa kukola chikuhwelelu chetu. (Matewu 5:10-12; 10:22; Chimwekeshu 2:10) Hamuloña wayumiyi chinakukeñeka kumika—wuswa wakushinda kukala. Kapostolu Petulu natukonkomweni nindi: ‘Mukukuhwelela kwenu vulishilenumu . . . kumika.’ (2 Petulu 1:5, 6) Twatela kumika, muloña Yesu nindi: ‘Muntu wukakakela nikunsa diyi wakahanda.’—Matewu 24:13.

 ² Cheñi nawa twakataña, twaneñaña neyi tufwisha nawa twamonaña kukala kwashiyashana. Wenowu muzañalu wukutiyayi Satana neyi tujimbesha chikuhwelelu chetu! (Luka 22:31, 32) Tunateli kumika kweseka kwashiyashana muloña wawukwashu waYehova. (1 Petulu 5:6-11) Talenu yakutalilahu yinakumwekesha nawu tunateli kuchiñeja ifuku daYehova nakumika nichikuhwelelu chakola.

Yikatu Hiyinayikañeshuku

3, 4. Hanenu chakutalilahu chinamwekeshi nawu tunateli kumukalakela Yehova nakashinshi hela tudi muyikatu.

³ Makonu Nzambi hatuukaña muchihayamishaku, ilaña watwinkaña wuswa wakumika yikatu. (Masamu 41:1-3) Sharon wahosheli nindi: “Kufuma tuhu hampinji yatachikili yikatu yami, nazatishaña hohu chitwamu chatufumbu. Kufuma tuhu hakuvwalika, chikatu chacerebral palsy (chikatu chakukisika woñu) chaletesheli kubula kwikala namuzañalu kuwansi.” Chadiziliyi hadi Yehova nihayikaninu yindi, Sharon wekalili nakuchiñeja kwakwikala nachihandilu chachiwahi. Hela chakwila Sharon wakabakanaña hakuhosha nikwenda, ilaña mudimu wawiniKristu wamuletelaña muzañalu. Mu 1993, Sharon wahosheli nindi: “Yikatu yami yinateli kutwalekahu, ilaña kumukuhwelela Nzambi niwubwambu wami nayena diwumi wami. Wenowu muzañalu wunukweti wakwikala hamu nawantu jaYehova nikutambwila wukwashu windi wabulaña kumana!”

⁴ Kapostolu Pawulu wakonkomweneni eniKristu amuTesalonika ‘kukundeja ananeñi.’ (1 Atesalonika 5:14) Yuma yidi neyi kutiyisha nsonyi chikupu yaletaña kudihomba. Mu 1993, Sharon wasonekeli nindi: “Kutoñojoka nami nakañanyaña chikupu, . . . kwaletesheli niikali nachineñi cheneni hadi yaaka yisatu. . . . Aeluda diwu ankundejeli nikunfumba. . . . Kuhitila muKaposhi Kakutalila, Yehova watudizishili kutalisha hakusweja kudihomba. Eñañi, Yehova wakamenaña antu jindi nawa weluka chitwatoñojokaña.”(1 Petulu 5:6, 7. Sharon wuchidi kumukalakela Yehova nakashinshi hampinji yinakuchiñejayi ifuku deneni daYehova.

5. Wunsahwinyi wunakumwekesha nawu eniKristu anateli kumika yineñi yamaneni?

⁵ EniKristu amakwawu aneñaña chikupu muloña wayuma yamweniwu kunyima. Harley wamweni ndombu yeneni yalwiliwu muNjita yaKaayi Kejima yamuchiyedi nawa waloteleña njita hohu. Iku wudi mutulu, wakalukileña nindi: “Babalenu! Soñamenu!” Chikwilayi bajiji-i, nisulwila tupu-u. Hela chochu, Harley watwesheli kwikala nachihandilu chesekana nakufumba kwaNzambi, mukuhita kwampinji, walekeli kulota yilota yamutiyishileña woma yavulileñayi kulota.

6. Indi mwiniKristu wumu watalañeni ñahi nayikatu yamuyitoñojoka?

⁶ MwiniKristu wumu wadiña nachikatu chakuwoñu chamukalileña kushimwina kwitala nikwitala. Hela chochu, watwalekeluhu muniwu mudimu muloña welukili nindi kushimwina hiwumi kudi yena niantu akumutiyilila. (1 Timotewu 4:16) Mpinji jikwawu wakañenyeña nikudondomwena nampwambu yahachisu, ilaña wahosheli nindi: “Mukuhita kwampinji, natwesheli kuyula yitoñojoka yami, nakuya hetala dikwawu, nakweseka cheñi. Chinatwalekeluhu kushimwina, nekalili nachihandilu chachiwahi lwakuspiritu.” Kukala kukwawu kwadiña kwakuwanika kukupompa, ilaña iwu mana kwetu welukili kulema kwakudikunda lwakuspiritu. Dichi, wadishileñaku chikupu kulonda kuwanika kukupompa.—Aheberu 10:24, 25.

7. Hela chakwila amakwawu atiyaña woma wakuhosha hadi antu amavulu hela kuwanika kukupompa, amwekeshaña ñahi kumika?

⁷ EniKristu amakwawu ekala namutentu—kusweja woma wansañu hela yuma yinakumwekana. Chakutalilahu, anateli kutiya woma wakuhosha hadi antu amavulu hela kuwanika kukupompa. Toñojokenu chichayikalilaña kuhoshahu hakupompa kwawiniKristu hela kuhana mpanji muShikola yaMudimu waTeokalatiki! Ilaña anakumika, nawa chatwikoleshaña chikupu neyi awanika kukupompa nikwakulahu.

8. Chumanyi chatela kutwikwasha nankashi hakwila tumiki kukala kwamuyitoñojoka?

⁸ Kunooka nikukama nankashi kunateli kukwasha muntu wudi nakukala kwamuyitoñojoka. Wukwashu wakuchipatela niwena wakeñekaña.  Chuma chikwawu chatela kukwashana nankashi, hikushindamena hadi Nzambi mukulomba. Masamu 55:22 yahoshaña nawu: “Umbilaku chiteli cheyi hadi Yehova, yena wukukukwashaku; hamba kamwitija mukwakuloña kukosomokaku.” Nañovu jeyi jejima, “mukuhweleli Yehova namuchima weyi wejima.”—Yishimu 3:5, 6.

Kumika Chineñi chaKufwisha

9-11. (a) Chumanyi chatela kutukwashaku kumika chineñi neyi muntu yitwakeña nafwi? (b) Indi chakutalilahu chaAna chikutukwashaku ñahi kumika neyi tunafwishi?

⁹ Neyi muntu wamuchisaka yafwa, chumichi chaletaña chineñi cheneni nankashi. Abarahama wadilili nankashi chafwiliyi ñodindi wakeñeliyi, Sara. (Kutachika 23:2) Nimuntu waloña Yesu ‘wadilili’ chafwiliyi ibwambu dindi Lazaru. (Yowanu 11:35) Komana chaluwa wanyi kuneña neyi muntu yitwakeña nafwi. Hela chochu, eniKristu eluka nawu kwakekala kusañuka. (Yililu 24:15) Dichi hiyatiyaña ‘wushona neyi chatiyañawu antu acheñi anabuli kuchiñejaku.’—1 Atesalonika 4:13.

¹⁰ Twatela kumika ñahi neyi muntu yitwakeña nafwi? Hadaha chakutalilahu chikutukwasha. Neyi ibwambu detu nakasi njila hitwaswejaña kuneñaku, muloña tuneluki netu tukamumona cheñi neyi nafunti. Kwikala nayitoñojoka yamuchidiwu neyi mwiniKristu washinshika nafwi kunateli kukehesha chineñi muloña tuneluki netu wudi nachikuhwelelu chakusañuka.—Mukwakutaŋisha 7:1.

¹¹ Kushindamena chikupu hadi “Nzambi wakukundeja kwejima” kukutukwashaku kumika chineñi chakufwisha. (2 Akorinda 1:3, 4) Chuma chikwawu chikutukwasha hikutoñojoka hachuma cheliliyi ntuluwa, Ana. Wekalili ntuluwa chelili nashakami dehi yaaka yitanu nayiyedi hohu mumaluwi. Ilaña watwalekeluhu nakukalakala mudimu wajila kudi Yehova hatembeli nihampinji yadiñayi nayaaka 84. (Luka 2:36-38) Chakadi kujina, kudihana kwamuchidiwu kwamukwashiluku kumika chineñi niwuudi. Kukalakala munyidimu yawiniKristu mpinji yejima, nikushimwina mumudimu waWanta, kunateli kutukwashaku kumika nachineñi chakufwisha.

Kumika Kweseka Kwamboka-mboka

12. Indi eniKristu amakwawu anakumika kukala kwamuchidinyi kwamuchisaka?

¹² EniKristu amakwawu atela kumika kukala kwamuchisaka. Chakutalilahu, neyi wumu wamumaluwi yela wuvumbi, chumichi chaneñeshaña chisaka! Muloña wakuhayama nichineñi,  chikuletesha mukwawu wamumaluwi anavulumuniwu kwikala nachisalala, nikudila chikupu. Kuzata tunyidimu twanyanya kwakalaña chikupu chakwila kwaleñelaña kuluwañesha hela kudikatisha. Wamumaluwi analuwañeshiwu wukuleka kudya, wukukosa, nikuluwankana chikupu. Nawa chikumukalila kuzata nyidimu yawiniKristu. Anyana niwena akuluwankana chikupu.

13, 14. (a) Kukoleshanyi kumwawanaña mukulomba kwaSolomoni hakuhana tembeli? (b) Muloñadi wutwalombelaña spiritu yajila?

¹³ Neyi tumona kukala kwamuchidiwu, Yehova wahanaña wukwashu wutwakeñaña. (Masamu 94:19) Neyi chinamwekeshiwu mukulomba kwaMwanta Solomoni hakuhana tembeli yaYehova, Nzambi watiyaña kulomba kwawantu jindi. Solomoni walombeli kudi Nzambi nindi: “Mwonsu mwakalomba, mwonsu mwakalembelela muntu himuntu mwahitila antu eyi aIsarela ejima, mwakelukilawu yipupu yamunyichima yawu wejima wawu, hiyakolola makasawu nakutalisha kwitalidi; wakatiyaña mwiwulu muwashakama, wakayanakenaña, wakakwatañaku, wakayilaña antu ejima, iwu mwaneliyi, iwu mwaneliyi, yeyi weluka nyichima yawu-muloña eyi, yeyi hohu, weluka nyichima yawanyana kawantu ejima-kulonda akakutiyaña woma mafuku ejima akashakamawu mwituña diwenkeli ankakulula jetu.”—1 Anyanta 8:38-40.

¹⁴ Chikutukwashaku chikupu neyi tutwalekahu kulomba spiritu yajila. (Matewu 7:7-11) Nyikabu yaspiritu yabombelamu yililu yidi neyi muzañalu nikuwunda. (Aŋalija 5:22, 23) Wenowu muzañalu wutwatiyaña neyi Tata yetu wamwiwulu yakula kulomba kwetu—twatiyaña muzañalu bayi chineñuku, nawa kuwunda kwahiñaña hamakabi!

15. Nyikandanyi yikutukwashaku kubula kwakamena nankashi?

¹⁵ Hakumika kukala kweneni kwekalaña kwakamena. Ilaña tunateli kukeheshaku kwakamena kukwawu neyi twanuka mazu ahosheliyi Yesu nindi: “Kwakama wumi wenu nenu tukudyadi? hela nenu tukunwadi? hela mujimba wenu nenu tukuvwaladi? bayi mwakama mwokuku. ... Ilaña sambilenu kukeña wanta windi nikuloña [kwaNzambi], niyuma yejimiyi akayishilaku.” (Matewu 6:25, 33, 34) Kapostolu Petulu watukonkomwena nindi “mutwikenu [Nzambi] kwakama kwenu kwejima, muloña yena wayihembaña.” (1 Petulu 5:6, 7) Komana chachiwahi kuzata nañovu kulonda kumanisha kukala. Neyi tunazati dehi nañovu, kwakamena hikunateli kutukwashaku, ilaña kulomba kunateli kutukwasha. Ñimbi yamasamu wembili nindi: “Kunjikaku njila yeyi kudi Yehova, mukuhweleli, yena wakachimwekesha.”—Masamu 37:5.

16, 17. (a) Muloñadi chitwakamenaña? (b) Chumanyi chitukwikala nachu neyi tuzatisha Afwilipi 4:6, 7?

¹⁶ Pawulu wasonekeli nindi: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Afwilipi 4:6, 7) Anyana kaAdama abula kuwanina hiyatela kushakama chakadi kwakamaku. (Aroma 5:12) Anvwali jaEsawu aIsaka naRebeka amwakamenena Nzambi ‘ayitiyishileña chikela kumuchima’ kudi añodi jaEsawu akuHiti. (Kutachika 26:34, 35) Yikatu yatela yayitiyishileña chikela eniKristu adi neyi Timotewu niTirofwimusa. (1 Timotewu 5:23; 2 Timotewu 4:20) Pawulu wadiña nakwakama hadi akwawu akwakwitiya. (2 Akorinda 11:28) Ilaña ‘Mukwakutiya kulomba’ watiyaña kulomba kwawantu amukeña.—Masamu 65:2.

¹⁷ Hampinji yitunakuchiñeja ifuku daYehova, twatambwilaña wukwashu nikukundeja kudi “Nzambi wakuwunda.” (Afwilipi 4:9) Yehova “wenzala nawushona, watoñaña antu,” ‘himuwahi nawa wanakenaña,’ nawa ‘waanukaña kwindi nindi tudi lunkuñu hohu.’ (Kwidika 34:6; Masamu 86:5; 103:13, 14) Dichi ‘tumulembelelenu yuma yejima yitunakukeña,’ neyi twila mwenimu tukwikala ‘nakuwunda kwaNzambi’—kumwena kwabadika yitoñojoka yawantu.

18. Neyi chinahoshiwu haYoba 42:5, munjilanyi mutunateli ‘kumumwena’ Nzambi?

¹⁸ Neyi kulomba kwetu akwakula, tukeluka netu Nzambi wudi nanetu. Chelili Yoba nomiki dehi kweseka, wahosheli nindi: “Nakutiyili kwamumatu hohu [eyi Yehova], ichi dinu nakumoni namesu ami.” (Yoba 42:5) Namesu akukeña kwiluka, chikuhwelelu, nikusakilila,  tunateli kutoñojoka chatukwashañayi Nzambi nawa tunateli ‘kumumona’ chikupu. Wubwambu wamuchidiwu ochiwawundishaña nyichima yetu niyitoñojoka!

19. Chumanyi chikumwekana neyi ‘tumutwika Yehova kwakama kwetu kwejima’?

¹⁹ Neyi ‘tukumutwika Yehova kwakama kwetu kwejima,’ tunateli kumika kweseka nakuwunda kwamumuchima kwahembaña nyichima yetu niyitoñojoka. Mukachi kamuchima wetu wachifwikija, hitwakakamenaña, nikutiya woma, hela kufwa mutentuku. Yitoñojoka yetu hiyakaluwankana nakukala hela kwakamenaku.

20, 21. (a) Indi nsañu yaSetefwanu yinamwekeshi wunsahu wamuchidinyi wakudiwunjika neyi anakutuyandisha? (b) Shimunenu chakutalilahu chamakonu chakudiwunjika hakumika kweseka.

²⁰ Kambanji Setefwanu wadiwunjikili hakumika kweseka kweneni kwachikuhwelelu chindi. Henohu kanda yashimuni wunsahu wakukumishaku, antu ejima adiña muSanihedilini “hiyakumona kumesu indi kudi neyi kumesu akañelu.” (Yililu 6:15) Ihama dindi dadiña dawunda, neyi dakañelu, kañanda kaNzambi. Cheliliyi Setefwanu nashimuni dehi nyiloña yawu yakujaha Yesu, ansompeshi “chiyitapa nimunyichima, hiyakumusumañena kumaji.” ‘Hakwinzala naspiritu yajila,’ Setefwanu ‘hakutala mwiwulu swi-i, hakumona lubanji lwakulema kwaNzambi, niYesu nemani kuchikasa chaNzambi chachidiilu.’ Chimwenu chamukolesheli, Setefwanu watwalekeluhu nakashinshi ndo-o nikukufwa. (Yililu 7:52-60) Hela chakwila hitwamonaña yimwenuku, neyi atuyandisha twekalaña nakuwunda kwatwinkayi Nzambi.

²¹ Tiyenu mazu ahosheluwu eniKristu amakwawu ayandishiluwu kudi aNazi hampinji yaNjita yaKaayi ya II. Hakushimuna yuma yamweniyi muchota chanyiloña, mwiniKristu wumu wahosheli nindi: “[Ansompeshi] aketwili nyiloña nawu akunjaha. Natiyilili, nawa chelili nahosha dehi nami, ‘Ikalaku washinshika nikukufwa,’ nimazu antesha aMwanta wetu, nomikili. . . . Ilaña bayi mwakamaku. Muloña muchima wami wunawundi, nikudiwunjika chakwila himukutwesha kwiluka chinakutiyaku!” Mukwenzi wawiniKristu wajahileñawu kuhitila mukumuketula mutu wasonekeleli anvwali jindi nindi: “Tunahiti dehi hakachi kawufuku. Mpinji yichidi kwoku yakuhimpa yitoñojoka yami. Yowe-e! neyi nimukaana Mwanta wetu nateli kwikala namuzañalu mukanu kaayi? Inehi! Ilaña ichi mudi nachikuhwelelu nenu nafwi mumuzañalu nawa mukuwunda.” Chakadi kujina Yehova wakwashaña ambuñindi ashinshika.

Munateli Kumika!

22, 23. Chumanyi chimukukuhwelela kutambwila hampinji yimunakuchiñeja ifuku daYehova nakumika?

²² Hekwawu himunateli kumona kukala kudi neyi kutunahanjekuhuku. Ilaña, Yoba wamutiyeleña Nzambi woma wahosheli chachiwahi nindi: “Muntu wakuvwala kudi mumbanda wamafuku antesha kwindi, wamona kwayihuñu.” (Yoba 14:1) Hekwawu mudi anvwali anakuzata nañovu kulonda mukwashi anyanenu lwakuspiritu. Atela kumika kukala hashikola, ilaña mwekalaña namuzañalu neyi anyanenu akakela mbe kudi Yehova nikunshimbi jindi jaloña! Hadaha munakumona kukala nikweseka hamudimu. Hela chochu, tunateli kumika kukala kwamuchidiwu muloña ‘Yehova watusendelaña chiteli hefuku hefuku.’—Masamu 68:19.

²³ Hadaha mwadimonaña neyi mwakehelamu, ilaña anukenu nenu Yehova hamba kavulamena mudimu wenu hela kukeña kumwakeñeli ijina dindi dajilaku. (Aheberu 6:10) Munateli kumika kweseka kwachikuhwelelu nawukwashu windi. Dichi mukulomba nimukufuukula kwenu bombelenumu kwila nkeñelu yaNzambi. Neyi mwila mwenimu, mukukuhwelela kutambwila nkisu yaNzambi niwukwashu windi hampinji yimunakuchiñeja ifuku daYehova nakumika.

Mukwakula Nenudi?

• Muloñadi eniKristu chiyatela kumikilawu?

• Yumanyi yikutukwasha kumika nayikatu nichineñi chakufwisha?

• Indi kulomba kwatukwashaña ñahi kumika kweseka?

• Muloñadi chichinekalili chapela kuchiñeja ifuku daYehova nakumika?

[Malwihu aKuzatisha haKudiza]

[Mwevulu wudi hefu 17]

Kushindamena hadi Yehova kukutukwashaku kumika chineñi chakufwisha