WuSpiritu Walala—Munateli Kwikala Ñahi AwuSpiritu?

KAPOSTOLU Pawulu wasonekeli nindi: “Yitoñojoka yachisemwa chaheseki hikufwa, ilaña yitoñojoka yaSpiritu hiwumi nikuwunda.” (Aroma 8:6) Kutalisha kunawa mazu, kapostolu watalishili mukwila nindi, kwikala muntu wawuspiritu kwabadika hakufuukula hohu kwikala muntu wawuspiritu hela hayililu yamuntu. Chalala chidi chakwila nawu, chabombelamu wumi nikufwa. Hela chochu, munjilanyi muntu wawuspiritu munatwesheliyi kutambwila “wumi nikuwunda”? Kwesekeja nachahosha Bayibolu, muntu yeniwu wadiluñishaña kuwunda hayinu mpinji—yomweni ninaNzambi—nawa wakatambwila wumi wahaya nyaka kumpinji yakumbidi. (Aroma 6:23; Afwilipi 4:7) Dimuloña wahosheleliyi Yesu nindi: “Atuzweñi muspiritu anakooleki.”—Matewu 5:3.

Chineli wunakutaña iyi magazini chinakumwekesha nawu wakeña yuma yakuspiritu, nawa diyi njila yayiwahi. Dichi yitoñojoka yawantu hansañu yawuspiritu yekala yamboka-mboka nankashi, hamwaha wunateli kudihula neyi: ‘Komana wuspiritu walala hichumanyi? Nawa muntu natweshi kwikala ñahi wawuspiritu?’

“Yitoñojoka yaKristu”

Kubombela hamazu alema nihankisu yafumaña mukwikala nayitoñojoka yawuspiritu, kapostolu Pawulu wadiñi nayuma yayivulu yakuhosha kutalisha hachalumbuluka wuspiritu walala. Kutalisha hadi eniKristu amumusumba waKorinda wakunyaka, Pawulu walumbulwili chambu chekala hakachi kamuntu wachisemwa, chinakulumbulula muntu wafwilaña yuma yakumunjimba, namuntu wawuspiritu, muntu walemesha yuma yakuspiritu. Pawulu wasonekeli nindi: “Hakwinza muntu wachisemwa hatambulaña yuma yaspiritu yaNzambuku, muloña yena wukuyimona nindi wusupi.” Munjila yikwawu, Pawulu walumbulwili nindi muntu wawuspiritu amwilukilaña hakwikala ‘nayitoñojoka yaKristu.’—1 Akorinda 2:14-16.

Kwikala ‘nayitoñojoka yaKristu’ chalumbuluka kwikala ‘nayitoñojoka yadiñayi nayu Yesu Kristu.’ (Aroma 15:5; Afwilipi 2:5) Munjila yikwawu, muntu wawuspiritu himuntu watoñojokaña neyi chatoñojokañayi Yesu nawa wembujolaña mumahaji indi. (1 Petulu 2:21; 4:1) Neyi yitoñojoka yamuntu yisweja kudifwana nayaKristu, wuspiritu windi waswejelañaku nawa wekalaña kukamwihi chikupu nakutambula “wumi nikuwunda.”—Aroma 13:14.

Chakwiluka “Yitoñojoka yaKristu”

Hela chochu, hakwikala nayitoñojoka yaKristu, twatela kwiluka chatoñojokañayi. Dichi, chuma chatachi chakeñekaña hakwikala muntu wawuspiritu hikwiluka chatoñojokañayi Yesu. Hanu dinu, wunateli kwiluka ñahi yitoñojoka yamuntu wadiña hanu hamaseki hayaaka 2,000 yinahitihu? Chakutalilahu, wadizili ñahi hansañu yanyaka yawantu amwituña denu? Chakubula nikujinooka hikuhitila mukutaña nsañu hadi wena. Chochimu, kutaña nsañu yanyaka yaYesu hinjila yalema yakwilukilamu yitoñojoka yaKristu.—Yowanu 17:3.

Kutalisha hadi Yesu, kwekala nsañu yiwana yanyaka yasonekawu yatiyakana nawa yakunama—Nsañu Yayiwahi, yasonekeluwu kudi Matewu, Maku, Luka niYowanu. Kutaña nsañu yeniyi nakashinshi chikukukwasha kwiluka chatoñojokañayi Yesu, chatiyañayi mumuchima windi nichuma chamuleñelaña kukalakala nyidimu yindi. Neyi wikala nampinji yakutoñojoka chikupu hayuma yiwatañaña hadi Yesu, wukutachika kufwikija chadiñayi muntu yeniwu. Hela chakwila waditenaña kwikala kambanji kaKristu, kutaña hayuma yeniyi nikutoñojokahu kukutukwasha ‘kutwalekahu kukula muluwi nimukumwiluka Mwanta wetu nawa Chamwinu Yesu Kristu.’—2 Petulu 3:18.

Nayitoñojoka yeniyi, lekenu tushinshiki hayikunku yimu yamuNsañu Yayiwahi kulonda  twiluki chamuleñeleli Yesu kwikala muntu wawuspiritu. Dichi dihuli eyaweni chiwunateli kwimbujola chakutalilahu chemikiliyi.—Yowanu 13:15.

Wuspiritu ‘niNyikabu yaSpiritu’

Luka wasonekeli Nsañu Yayiwahi wahosheli nindi, spiritu yajila yaNzambi ayichilili hadi Yesu hampinji yachipapatishu chindi nawa Yesu ‘wenzeli naspiritu yajila.’ (Luka 3:21, 22; 4:1) Dichi, Yesu wakonkomweneni atumbanji twindi kulema kwakulombolewa naspiritu yajila yaNzambi hela ‘ñovu yazatikaña.’ (Kutachika 1:2; Luka 11:9-13) Muloñadi chumichi chichalemena? Muloña spiritu yaNzambi yikweti ñovu yakubalumuna yitoñojoka yamuntu, kulonda kudifwana nayitoñojoka yaKristu. (Aroma 12:1, 2) Spiritu yajila yaleñelaña muntu kwikala nayililu yidi neyi “kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.” Bayibolu yatenaña yililu yeniyi nawu “nyikabu yaspiritu”—yamwekeshaña wuntu walala wawuspiritu. (Aŋalija 5:22, 23) Mumazu amakwawu muntu wukweti yitoñojoka yawuspiritu, himuntu walombolewaña naspiritu yaNzambi.

Yesu wamwekesheli nyikabu yaspiritu mumudimu windi wakushimwina kufumisha kutachi nakushika nikunsa. Yililu yidi neyi kukeña, luwi nikuwaha ayimweni chikupu munjila yazatilileñayi namazaza awantu yamweneñawu nawu hiyalemaku. (Matewu 9:36) Chakutalilahu, shinshikenu hayuma yamwekeni yalumbulwiliyi kapostolu Yowanu. Twatañañahu nawu: “Chadiñi nakuhitayi [Yesu], hakumona iyala wadiñi mputamesu kufumisha havwalikiliyi.” Atumbanji twaYesu niwena amumweni iyala yeniwu, ilaña amumweni neyi himukwakuvulumuna. Ehwili nawu, “wavulumwini hinyi, iwu iyala, tahindi anvwali jindi?” Antuñi yaniwu iyala niwena amumweneña, ilaña wejima wawu amumweneña neyi wadiñi mukwakulomba lomba. Ahosheli nawu, “Hidiyi washakaminaña nakulombaku?” Hela chochu, Yesu wamumweni mputamesu yeniwu hamu neyi muntu wakeñeleña wukwashu. Wahosheli namputamesu yeniwu nawa wamukili.—Yowanu 9:1-8.

Indi ichi chuma chamwekeni chinateli kukudizisha chumanyi kutalisha hayitoñojoka yaKristu? Chatachi, Yesu hadiwili antu abula kulemaku, ilaña wayitiyilili wushona waweni. Chamuchiyedi, wadikeñeleleña kukwasha antu amakwawu. Komana wunakutoñojoka neyi wunakulondela chakutalilahu chemikiliyi Yesu? Komana wamonaña antu neyi chayimweneñayi Yesu, kuhitila mukuyikwasha hayuma yakeñañawu kulonda kuwahisha chihandilu chawu nikuyikwasha kulonda ekali nakuchiñeja kwakuwahi kwampinji yakumbidi? Indi kwiji, wakeñaña kukwasha antu aya mpuhu nakudiwulu abula kuya mpuhu? Neyi wamonaña antu neyi chayimweneñayi Yesu, dikwila nawu wunakulondela chakutalilahu chaYesu.—Masamu 72:12-14.

Wuspiritu niKulomba

Nsañu Yayiwahi yamwekeshaña nawu kakavulu Yesu wadiñi nakulomba kudi Nzambi. (Maku 1:35; Luka 5:16; 22:41) Hampinji yakalakeleñayi mudimu windi hanu hamaseki, Yesu wekalileñaku nampinji yakulomba. Kambanji Matewu wasonekeli nindi: “Chaneliyi nendeshi dehi mazaza, [Yesu] hakukanduka hampidi kwakadi antu, nakulomba.” (Matewu 14:23) Hampinji jeniji jahanjekeleñayi naTata yindi wamwiwulu wumweneni, Yesu wadiña nakukoleshewa. (Matewu 26:36-44) Makonu, antu akweti yitoñojoka yawuspiritu walala niwena ekalañaku nampinji yakuhanjeka naNzambi, muloña eluka nawu ichi chikukolesha wubwambu wawu naNleñi nikuyikwasha kwikala nayitoñojoka neyi yaKristu.

Kakavulu Yesu wadiñi nakulomba mpinji yeneni. (Yowanu 17:1-26) Chakutalilahu, henohu Yesu kanda yatondi amayala 12 ekalili apostolu jindi, Yesu ‘hakuya hampindi nakulomba, hakuchiisha nakulomba kudi Nzambi wufuku wejima.’ (Luka 6:12) Hela chakwila hiyachiishaña wufuku wejima nakulomba kudi Nzambuku, antu akweti yitoñojoka yawuspiritu walala alondelaña chakutalilahu chaYesu. Henohu kanda afuukuluhu hayuma yalema muwumi wawu, ekalañaku nampinji yeneni yakulomba kudi Nzambi kulonda kukeña wunlomboli waspiritu yajila hakusakulahu kunateli kutwala wuspiritu wawu hambidi.

Mukulomba kwindi, Yesu wamwekesheli kashinshi kitwatela kwimbujola mukulomba kwetu.  Toñojokenu hansañu yasonekeliyi Luka kutalisha hanjila yalombelelumu Yesu namelela henohu kanda yafwi. “Hakulwisha nankashi, hakusweja kulomba; masulwilindi hiyakwila kafwampi neyi malekileki amashi aweni hiyakuholokela hamaseki.” (Luka 22:44) Yesu walombeluhu dehi chasweja, ilaña haniyi mpinji, wamweni kweseka kweneni nankashi muwumi windi waheseki, dichi ‘waswejesheli’ kulomba—nawa kulomba kwindi akwakwili. (Aheberu 5:7) Antu ekala nayitoñojoka yawuspiritu walala embujolaña chakutalilahu chaYesu. Neyi anatalañani nakweseka kwasweja, ‘aswejeshaña’ kumulomba Nzambi kulonda yayinki spiritu yajila, niwunlomboli niwukwashu.

Chineli Yesu walombeleña kakavulu, hichuma chakuhayamisha kudi atumbanji twindi nawu akeñeleña kumwimbujola muniyi njilaku. Dichi, amwilili nawu: “Mwanta tuleji kulomba.” (Luka 11:1) Hohamu nimakonu, owu ekala nawuspiritu walala nawa akeñaña kulombolewa naspiritu yajila yaNzambi, alondelaña chakutalilahu chaYesu hakulomba kudi Nzambi. Wuspiritu walala nikulomba jendelaña hamu.

Wuspiritu niKushimwina Nsañu Yayiwahi

MuNsañu Yayiwahi yaMaku, twawanañamu nsañu yaYesu yokiliyi antu amavulu adiñi akata, nakushika nimpinji yawufuku. Hampinji yadiñayi nakulomba nkawindi nabudidi, apostolu indi enjili nakumuleja nawu antu amavulu amukeñeleña, hekwawu akeñeleña nawu yayuuki. Hela chochu, Yesu wayilejeli nindi: ‘Tuyenu kunyikala yacheñi yidi kwakwihi, nishimuni nikwenoku nawa.’ Dichi Yesu hakulumbulula nindi: “Muloña dichi chinenjilili.” (Maku 1:32-38; Luka 4:43) Hela chakwila kuuka antu chadiñi chalema kudi Yesu, ilaña kushimwina nsañu yayiwahi yaWanta waNzambi diwu mudimu wadiñi wabadika kulema.—Maku 1:14, 15.

 Makonu kuleja antu haWanta waNzambi, chichidi chinjikijilu chawantu akweti yitoñojoka neyi yaKristu. Yesu wakonkomweneni antu ejima anakukeña kwikala atumbanji twindi nindi: “Dichi yenu mwakelishi atumbanji munyuza yejima, . . . mwakayileji kuhemba yuma yejima yinayilejenu.” (Matewu 28:19, 20) Yesu washimwineñahu dehi cheñi nindi: “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.” (Matewu 24:14) Chineli Izu daNzambi damwekeshaña nawu mudimu wakushimwina wunakukoñewa naspiritu yajila, kukalakala mudimu weniwu neyena hichinjikijilu chakwikala nawuspiritu walala.—Yililu 1:8.

Kushimwina nsañu yaWanta kudi antu ekala mukaayi kejima chakeñekaña yihita yawantu kunuñañana kuhitila mukuzata nañovu. (Yowanu 17:20, 21) Antu azataña mumudimu weniwu hiyakeñekaña hohu kwikala nayitoñojoka yawuspiritu walala hohuku, ilaña atela kwikala anuñañana chachiwahi mukaayi kejima. Komana, wunateli kwiluka antu anakulondela mumahaji aKristu nawa anakushimwina nsañu yayiwahi yaWanta mukaayi kejima?

Komana Wunakushikija Yuma Yakeñekaña Hakwikala Muntu wawuSpiritu?

Kafwampi, kwekala yililu yikwawu yakwilukilaku muntu wawuspiritu walala, ilaña wunateli kushikija ñahi iyi yuma yakeñekaña yitwahanjekahu dehi? Hakwila nawu wiluki, dihuli eyaweni neyi, ‘Komana, natañaña Izu daNzambi Bayibolu mpinji yejima nikutoñojokahu chikupu hayuma yinatañaña? Komana namwekeshaña nyikabu yakuspiritu munshakaminu yami? Komana nalombaña mpinji yejima? Komana nakeñaña kudikunda nawantu anakukalakala mudimu wamukaayi kejima wakushimwina nsañu yayiwahi yaWanta waNzambi?’

Kudishinshika eyaweni chikupu kunateli kukukwasha kwiluka wuspiritu weyi. Tunakukoleshi kukalakela hayuma yakeñekaña katataka kulonda ‘wumi nikuwunda’ kusweji kwikali naneyi.—Aroma 8:6; Matewu 7:13, 14; 2 Petulu 1:5-11.

[Chikasha/Nyevulu yidi hefu 5]

YINJIKIJILU YAWUSPIRITU

◆ Kukeña Izu daNzambi

◆ Kumwekeshaña nyikabu yakuspiritu

◆ Kulombaña kudi Nzambi mpinji yejima nawa namuchima wejima

◆ Kushimwina nsañu yayiwahi yaWanta kudi antu amakwawu