Dizishenu Anyanenu Kumukeña Yehova

‘Chekalaña nsewu muchikasa chachilobu, dichi chaduwu nianyana akuvwalayi mukwenzi.’—MASAMU 127:4.

1, 2. Indi anyana anateli kwikala ñahi neyi “chekalaña nsewu muchikasa chachilobu”?

 MUKWAKWASA nawuta wamukunji wadiloñeshaña chikupu kwevula nsewu yindi kulonda kwasa kanyama. Wapachikijaña nsewu chiwahi hawuta wamukunji, nakuwevula nañovu yejima. Hela chakwila wawevulaña nañovu yejima, wawundishaña mumesu nakwinyika nsewu yindi hakanyama. Nkumininaku wayisobolaña. Komana nsewu yikukwata kanyama? Chuma chikufumamu chikushindamena hayuma yayivulu, yidi neyi kukuluka yitembi kwamukwakwasa nawuta wamukunji, chidi mpepela ninsewu yayeni chiyidi.

² Mwanta Solomoni wesekejeli anyana ‘kunsewu yidi muchikasa chachilobu.’ (Masamu 127:4) Shinshikenu njila yimwatelela kuzatishila ichi chakutalilahu. Mukwakwasa nawuta wamukunji wekalaña nansewu muwuta windi hakapinji kantesha hohu. Hakwila nawu yaasi kanyama watela kusobola nsewu yindi chakadi kulabajala. Chochimu, anvwali ekalaña hohu nakapinji kantesha kakudizisha anyanawu kumukeña Yehova namuchima wawu wejima. Nkumininaku, hanyima yakapinji kantesha, anyana akulaña nakutachika kushakama nkawawu. (Matewu 19:5) Komana anvwali akatwesha kudizisha anyana, nawa anyana akatwalekahu kumukeña nikumukalakela Nzambi neyi chakwila atachika kushakama nkawawu? Ñakwilu yikushindamena hayuma yayivulu yamwekanaña. Iyi yuma yisatu yashindamena hakukuluka yitembi kwanvwali, nshakaminu yakulilañamu anyana ninjila yatambwilaña ‘nsewu’ hela mwana kufumba. Lekenu tushinshiki chikupu hachikuma chimu nachimu. Chatachi tukushinshika hayililu yanvwali wakuluka yitembi.

Anvwali Akuluka Yitembi Emikaña Chakutalilahu Chachiwahi

3. Muloñadi nhoshelu yawanvwali chiyatelela kwendela hamu nayililu yawu?

³ Yesu wemikilili anvwali chakutalilahu munjila yakwila wazatileña kwesekeja nayuma yatañisheleñayi. (Yowanu 13:15) Dichi, wayihishili aFwarisi adiña nakuhosha hohu ilaña kukoñahu chuma chidi chejima nehi. (Matewu 23:3) Hakwila nawu asañumuni anyanawu kumukeña Yehova, yililu yawanvwali ninhoshelu yawu yatela kwendela hamu. Nhoshelu yakubula kuzatahu chuma chidi chejima yamukunkulwayi wukwila neyi wuta wamanana wakadi mukunji.—1 Yowanu 3:18.

4. Malwihwinyi yatela kudihulawu anvwali nawa muloñadi?

 ⁴ Muloñadi chakutalilahu chawanvwali chichalemena? Neyi chochinateli kudizawu akulumpi kumukeña Nzambi kuhitila mukwimbujola chakutalilahu chaYesu, anyana niwena anateli kudiza kumukeña Yehova kuhitila mukwimbujola chakutalilahu chachiwahi chawanvwali jawu. Amabwambu jamwana anateli kukolesha hela ‘kutamisha maana amawahi.’ (1 Akorinda 15:33) Mwana washakamaña mpinji yeneni nawanvwali jindi, muloña wanichi nateli kusambula yililu yawanvwali jindi muloña diwu amabwambu adikundañayi nawu chikupu. Dichi anvwali atela kudihula nawu: ‘Komana nekala ibwambu wamuchidinyi? Komana chakutalilahu chami chakoleshaña mwanami kwikala nayililu yayiwahi? Chakutalilahu chamuchidinyi chinamwekeshaña kuyuma yalema yidi neyi kulomba nikudiza kwaBayibolu?’

Anvwali Akuluka Yitembi Alombaña Hamu nawaNyanawu

5. Yumanyi yatela kudizilawu anyana kukulomba kwawanvwali jawu?

⁵ Anyanenu anateli kudiza yuma yayivulu kutalisha hadi Yehova kuhitila mukutiyilila hampinji yimunakulomba. Neyi anyana ayitiyaña munakulomba kudi Nzambi hampinji yakudya, hakudiza kwaBayibolu, chumanyi chinateluwu kukunkululawu? Anateli kwiluka nawu Yehova diyi wahanaña yuma yakumujimba yitwakeñaña—dichi twatela kumuhameka—nawa nawu diyi watudizishaña chalala chamuBayibolu. Iyi hiyuma yalema yitwatela kudiza.—Yakoba 1:17.

6. Indi anvwali anateli kukwasha ñahi anyanawu kwiluka nawu Yehova wayikeña halwawu?

⁶ Dichi neyi mulombaña nachisaka chenu hampinji jikwawu bayi hohu hakudya nihakudiza kwaBayibolu kwachisakaku nawa neyi mukulomba kwenu mutenaña yuma yinayikumi hamu nianyanenu, munateli kuyidizisha jajivulu. Munateli kukwasha anyanenu kwiluka nawu Yehova wekala hakachi kachisaka chenu nawa wayakamenaña chikupu hamuntu hamuntu. (Aefwesesa 6:18; 1 Petulu 5:6, 7) Tata yawantu wumu wahosheli nindi: “Kufuma tuhu havwalikili mwanetu wamumbanda, twalombeleña hamu nindi. Chakuliliyi twadiña nakumulombelaku kutalisha hachatelayi kudikunda nawantu amakwawu niyuma yikwawu yamukumini. Henohu kanda yasumbuki twalombeleña nindi hamu ifuku nifuku.” Komana ninenu mwatela kulombaña hamu nawanyanenu ifuku nifuku? Komana munateli kuyikwasha anyanenu kumwiluka Yehova hamu neyi Ibwambu wabulaña kuhana hohu yuma yakumujimba niyakuspiritu, ilaña wayakamenaña nichatiyañawu?—Afwilipi 4:6, 7.

7. Chumanyi chatela kwilukawu anvwali hakwila nawu ateni yuma yatela kulombawu?

⁷ Hakwila nawu muteni yuma yimwatela kulomba, mwatela kwiluka yuma yinakumumwekena mwanenu muwumi windi. Tiyenu chahosheli tata yawantu wumu wadiña nawanyana awambanda ayedi: “Hakumana kwamulungu wudi wejima, nadihwileña malwihu ayedi nami: ‘Yumanyi yaswejawu kwakamena anyanami muwunu mulungu? Nawa yumanyi yayiwahi yayimwekena muchihandilu chawu?’” Anvwali, komana munateli kudihula malwihu amuchidiwu nikutena ñakwilu yamalwihu wenawa hampinji yimunakulomba nawanyanenu? Neyi mukoña mwenimu, himukuyidizisha anyanenu chakulomba hohu kudi Yehova Mukwakutiya kulombaku, ilaña mukuyidizisha cheñi kumukeña Yehova.—Masamu 65:2.

Anvwali Akuluka Yitembi Akoleshaña Kwikala naChaaku Chachiwahi chaKudiza

8. Indi anvwali anateli ñahi kukwasha anyanawu kwikala nachaaku chakudiza Izu daNzambi?

⁸ Indi yililu yawanvwali kutalisha hakudiza  Bayibolu yinateli kukuma ñahi wubwambu wamwana naNzambi? Hakwila nawu wubwambu wudi wejima wutwalekuhu, ebwambu namuntu hiyatela kuhanjekaña hohuku, ilaña chiña aditiyililaña. Njila yimu yitwatiyililaña kudi Yehova hikudiza Bayibolu kuhitila mukuzatisha nyikanda yaloñeshaña ‘nduñu wakashinshi.’ (Matewu 24:45-47; Yishimu 4:1, 2) Dichi, hakwila nawu akwashi anyanawu kutwalekahu kwikala nawubwambu naYehova, anvwali atela kukolesha anyanawu kwikala nachaaku chakudiza Izu daNzambi.

9. Indi anyana anateli kuyikwasha ñahi kwikala nachaaku chachiwahi chakudiza?

⁹ Munjilanyi anyana muyanateleli kuyikwasha kwikala nachaaku chachiwahi chakudiza? Njila yayiwahi yatela kudizishilamu nvwali hikuhitila muchakutalilahu chindi. Komana anyanenu ayimonaña nawu mwadiluñishaña hakudiza hela kutaña Bayibolu? Mwalala, mukweti mudimu wakwakamena anyanenu, nawa munateli kujinooka neyi chakwila munateli kuwana mpinji yakutaña nikudiza nawu Bayibolu. Dichi mwatela kudihula nenu, ‘Komana anyanami amonaña kakavulu nakutala chisanji chanyivwimbimbi?’ Neyi dimu, komana himunateli kwikala nampinji yeniyi kulonda kuyimikila anyanenu chakutalilahu chachiwahi kutalisha hakudiza kwahalwenuku?

10, 11. Muloñadi anvwali chiyatelela kwikala nakudiza kwaBayibolu kwachisaka mpinji yejima?

¹⁰ Njila yikwawu yayiwahi yatelelawu anvwali kudizishilamu anyanawu kumutiyilila Yehova, hikuhitila mukuhanjeka nsañu yamuBayibolu mpinji yejima muchisaka. (Isaya 30:21) Amakwawu anateli kwihula nawu, ‘Muloñadi anyana chiyatela kwikalila nakudiza kwamuchisaka henohu ayaña nawanvwali jawu mpinji yejima kukupompa kwachipompelu?’ Kwekala yuma yayivulu yayiwahi yatelelawu anvwali kwila mwenimu. Yehova wayinka anvwali mudimu walema wakudizisha anyanawu. (Yishimu 1:8; Aefwesesa 6:4) Kudiza kwaBayibolu kwachisaka kwadizishaña anyana nawu kudifukula bayi neyi hichaaku chakwilila hohu kumesu awantuku, ilaña himbadi yamuchihandilu chachisaka.—Kuhituluka 6:6-9.

¹¹ Kubombelahu, kulombola chiwahi kudiza kwachisaka kunateli kuleñela anvwali kwiluka yitoñojoka yawanyanawu kutalisha hayuma yakuspiritu nihayililu yawu. Chakutalilahu, neyi anyana achidi anyanya, anvwali atela kuzatisha mukanda wudi neyi Learn From the Great Teacher. * Mumaparakalafu amavulu aniwu mukanda wakudiza Bayibolu, mudi malwihu anakwihula anyana chatela kuhosha chakufuma kumuchima hansañu yanakudizawu. Kuhitila mukutoñojoka hajinsona jidi mumukanda, anvwali anateli kukwasha anyanawu kwikala nayitoñojoka, ‘yakwambula yayiwahi nayatama.’—Aheberu 5:14.

12. Indi anvwali anateli kuhimpa ñahi kudiza kwachisaka kwesekeja nayuma yinakukeña mwana nawa yumanyi yimunamoni yinateli kuyikwasha muniyi njila?

¹² Neyi anyanenu anakuli dehi, mwatela kuhimpa kudiza kwesekeja nayuma yinakukeñeka.  Shinshikenu njila yimu yazatishiluwu adisumbula kulonda kukwasha anyanawu achidi atunkaña akeñeleña kuya nakuhañana hashikola kutoñojokahu chikupu. Tata yawantu wahosheli nindi: “Twalejeli anyanetu netu hampinji yakudiza kwachisaka kukalondelahu, ami nimwinikwami tukahema heluña dawanyana, anyanetu akekala neyi anvwali. Dichi anyana afuukwiluhu watela kwikala Tata yawantu hela Mama yawantu, ilaña ateleleli kuzatila hamu kulonda kusandujola hansañu yeniyi nikuhana wunlomboli wawuwahi kutalisha hansañu yakuhañana hashikola.” Chumanyi chafuminumu? Tata yawantu watwalekeluhu nindi, “Twahayamini hakumona anyanetu awambanda chiyatwesheli kwambula yayiwahi niyatama (muchibalu chahemeneñawu hamu neyi anvwali) hampinji yatulejeleñawu (hamu neyi anyana) yitoñojoka yawu yashindamena haBayibolu chichabulila kutelela kuya nakuhañana. Chuma chikwawu chatuzañalesheli chadiña kutalisha hayikuma yahosheluwu yinateli hohu kuyileñela kuya kuniyi yisela. Yuma yeniyi yatuleñeleleli kwiluka chikupu chatoñojokeleñawu niyuma yakeñeleñawu.” Mwalala, chakeñekaña kwikala nanyikoyi nikutoñojoka chikupu hakwila nawu mutwalekihu kudiza kwachisaka mpinji yejima nawa kwatela kwesekana nayuma yakeñekaña muchisaka, hela chochu, nkisu jafumañamu jekala jajiwahi chikupu—Yishimu 23:15.

Keñenu Njila Yakutiyañenamu muChisaka

13, 14. (a) Indi anvwali anateli kukeña ñahi njila yakutiyañenamu muchisaka? (b) Yumanyi yayiwahi yinateli kufumamu neyi avwali eteja nawu niwena elaña yiluwa?

¹³ Nsewu yinateli kukwata kanyama neyi mukwakwasa nawuta wamukunji yayevula nikuyisobola chiwahi. Chochimu, anyana anateli kudiza kumukeña Yehova neyi anvwali akeña njila yakutiyañenamu muchisaka. Yakoba wasonekeli nindi, “Antu awunda akuwaña kuwunda, aañulaña kuloña.” (Yakoba 3:18) Indi anvwali anateli ñahi kukeña njila yakutiyañenamu muchisaka? Adisumbula atela kutwalekahu kwikala nawubwambu wakola. Eyala namumbanda adikeña nawa adilemashaña, anateli kudizisha anyanawu kukeña nikulemesha antu amakwawu, nikumukeña Yehova. (Aŋalija 6:7; Aefwesesa 5:33) Kukeña nikalemesha jaletaña kuwunda. Adisumbula atiyañanaña anatweshi kushinda kukala kudi kwejima kunateli kumwekana muchisaka.

¹⁴ Chakubula nikujinoka, chineli kwosi mawulu amaninina, dikwila nawu makonu kwosi chisaka chamaninina hanu hamaseki. Mpinji jikwawu anvwali anateli kukañanya kumwekesha nyikabu yakuspiritu hampinji yinakufumbawu anyanawu. (Aŋalija 5:22, 23) Chumanyi chatela kwilawu anvwali neyi anyana akañanya kumwekesha nyikabu yakuspiritu? Neyi anvwali etejaña nawu elaña yiluwa, kamona anyana akuleka kuyilemesha? Shinshikenu chakutalilahu chakapostolu Pawulu. Wadiña neyi nvwali wakuspiritu kudi antu amavulu. (1 Akorinda 4:15) Ilaña, wetejeli hatooka nindi welaña yiluwa. (Aroma 7:21-25) Hela chochu, kudikehesha kwindi nikuhosha walala kwatuleñelaña  kumulemesha chikupu chatela kumudiwula. Hela chakwila wadiña nakwila yiluwa, Pawulu wasonekeleli chipompelu chadiña muKorinda chakadi kujinooka nindi: “Ikalenu akwakuñimbujola ami, neyi chinelaña ami nawa nembujolaña Kristu.” (1 Akorinda 11:1) Anvwali, ninenu neyi mwiteja nenu mwelaña yiluwa, anyanenu anateli kudiwula yiluwa yenu.

15, 16. Muloñadi anvwali chiyatelela kudizishilawu anyanawu kukeña amana kwawu niahela awiniKristu, nawa chumichi chinateli kuzatika ñahi?

¹⁵ Chumanyi chikwawu chatela kwilawu anvwali hakwila nawu akeñi njila yayiwahi yakwila anyanawu akuli saña amukeñelawu Yehova? Kapostolu Yowanu wasonekeli nindi: “Muntu wukwila nindi, Ami nakeña Nzambi; iku saña ahelelayi mana kwindi, hintwambi; muloña muntu wukubula kukeña mana kwindi anamoniyi, hakutwesha kukeña Nzambi anabuli kumonayuku.” (1 Yowanu 4:20, 21) Dichi, neyi mudizisha anyanenu kukeña amana kwetu niaheletu awiniKristu, dikwila nawu munakuyidizisha kukeña Nzambi. Anvwali atela kudihula nawu, ‘Komana nhoshelu yami kutalisha hachipompelu yekala yakukolesha tahindi yakukeña nyiloña mudi amana kwetu?’ Munateli kwiluka ñahi? Mwatela kusha kashinshi kudi anyanenu kulonda mwiluki yuma yahoshañawu kutalisha hakupompa nihadi antu amuchipompelu. Munateli kutiya yuma yimwahoshaña hampinji yinakuhoshawu.

¹⁶ Chumanyi chatela kwilawu anvwali hakwila nawu akwashi anyanawu kukeña amana kwawu akuspiritu? Tata yawantu wejina daPeter wukweti anyana ayedi atumpululu, wahosheli nindi: “Kufuma tuhu hampinji yachidiñawu anyanetu atwansi, mpinji yejima twatambikileña amana kwetu niaheletu akuspiritu apama kwitala detu, kulonda kwinza nakudya nikuhanjeka nawu hamu nawa twadiña nakudiluñisha chikupu. Anyanetu anakuli nakudikunda nawantu amukeña Yehova, ichi anamoni nawu kumukalakela Nzambi hichuma chachiwahi nankashi muchihandilu.” Dennis tata yawantu wukweti anyana awambanda atanu wahosheli nindi, “Twakolesheli anyanetu kukwata wubwambu nawapayiniya anashimbuli muchipompelu, nawa kakavulu twamwekesheleña chisambu kudi ankoñi endeña hamu niañodijawu.” Komana ninenu munateli kuwana njila yakukwashilamu anyanenu kumona chipompelu neyi himbadi yachisaka chenu?—Maku 10:29, 30.

Chuma Chatela Kwilawu Anyana

17. Chumanyi chiyatela kufuukulahu anyana?

¹⁷ Shinshikenu cheñi chakutalilahu chamukwakwasa nawuta wamukunji. Hela chakwila nateli kwikala wakuluka yitembi, nateli kukañanya kwasa kanyama neyi chakwila nsewu yinakusowayi yaheña. Mwalala, anvwali anateli kuzata nañovu hakwila nawu ololi nsewu yaheña kuhitila mukuzata nañovu kulonda kolola yitoñojoka yaheña yamwana. Nkumininaku anyana atela kufuukulahu aweni neyi chakwila akukeña kuluwañeshewa nayililu yamukaayi hela kwiteja Yehova ‘kwolola njila jawu.’—Yishimu 3:5, 6; Aroma 12:2.

18. Kufuukula kwamwana kunateli kukuma ñahi antu amakwawu?

¹⁸ Hela chakwila anvwali akweti mudimu weneni wakukulisha anyanawu “nakuyibabesha nikuyikonkomwena mudi Mwanta,” kufuukulahu kwakukumishaku hachatela kwikalayi mwana neyi nakuli, kwashindamena hadi yomweni mwana. (Aefwesesa 6:4) Dichi anyana atela kudihula nawu, ‘Komana netejaña kufumba kwakuwahi kwanfumbañawu anvwali jami?’ Neyi mwiteja, dikwila nawu munatondi njila yayiwahi chikupu muwumi wenu. Mwakazañalesha anvwali jenu chikupu. Chabadika nankashi, mukazañalesha muchima waYehova.—Yishimu 27:11.

[Tumazu twaheshina]

Munakwanuka?

• Indi anvwali anateli kwimika ñahi chakutalilahu chachiwahi kutalisha hakulomba nikudiza kwaBayibolu?

• Anvwali anateli kukeña ñahi njila yakutiyañenamu hetala?

• Anyana atalañanaña nakufuukulanyi, nawa kunateli kukuma ñahi antu amakwawu?

[Malwihu aKuzatisha haKudiza]

[Mwevulu wudi hefu 30]

Komana mwemikila mwanenu chakutalilahu chachiwahi chakudiza kwahalwenu?

[Mwevulu wudi hefu 31]

Kutiyañana muchisaka kwaletaña muzañalu