Tunateli Kuhetelamu muKumika Makabi

‘Twatenaña antu omikaña, netu akooleka.’—YAKOBA 5:11.

1, 2. Chumanyi chamwekeshaña nawu Yehova hakeñeleña nindi muntu akabakaneñaku?

 KWOSI muntu wakeñaña kuyanda; hela tuhu Nleñi yetu, Yehova Nzambi hakeñaña antu kuyandaku. Twelukaña mwenimu neyi tutaña Izu dindi donenewa nakumona chuma chamwekeni chelili naleñi dehi iyala namumbanda. Chatachi, Nzambi waleñeli iyala. “Yehova Nzambi wawumbili muntu nalunkuñu lwamaseki, woneni mumazulu indi muuya wawumi, muntu hakwikala mumi.” (Kutachika 2:7) Adama wadiña wawanina kumujimba nimuyitoñojoka, dichi hateleli kukata hela kufwaku.

² Indi chihandilu chaAdama chadiña ñahi? “Yehova Nzambi watumbili itempa kumusela, muEdeni; mwomwashiliyi muntu wawumbiliyi. Yehova Nzambi wabalwishili hamaseki nyitondu yejima yikweti lubanji kuyitala, yayiwahi nikuyidya.” (Kutachika 2:8, 9) Eñañi, Adama wadiña namukala wawuwahi chikupu. MuEdeni himwadiña makabiku.

3. Chikuhwelelwinyi chadiña nawantu ayedi akusambila?

³ HaKutachika 2:18 hatulejaña nawu: “Yehova Nzambi welili nindi, Hichinawahi iyala kushakama kanka winduku; nukumwilila nkwashi wamutelela.” Dichi Yehova wamuleñeleli Adama mumbanda wawanina, nakuletesha nshakaminu yachisaka kwikala yamuzañalu. (Kutachika 2:21-23) Bayibolu yatulejaña cheñi nawu: “Nzambi wayikiswilili nkisu, Nzambi hakuyila nindi, Semununenu, muvuleña, muwanini heseki, mudovwahishi.” (Kutachika 1:28) Antu akusambila ayedi adiña nakukooleka kweneni kwakutohesha Paradisa yaEdeni mukuhita kwampinji, sampu iseki dinawanini, nakwilisha kaayi kejima kwikala paradisa. Nawa adiña nakukooleka kwakuvwala anyana amuzañalu, akabulaña kukabakana. Ichi chihandilu chadiña nantachikilu yayiwahi nankashi.—Kutachika 1:31.

Kutachika kwaMakabi

4. Kufuma tuhu kushankulu, yumanyi yinakumwekena muchidi wamuntu?

⁴ Neyi tukushinshika hachihandilu chawantu kufuma tuhu kushankulu, chinamwekani hatooka to-o nawu kudi chuma chinakojeji yuma kutaminaku nankashi. Yuma yatama yinakumwekana, nawa antu anakumona kalula chikupu. Hadi yaaka  yayivulu, antu ejima afuma kudi Adama niEvu akataña, ashinakajaña, nawa afwaña. Iseki dichidi kwakulehi chikupu nakwikala paradisa yenzala nawantu amuzañalu. Yuma yinakumwekana anayilumbululi chiwahi haAroma 8:22 nawu: “Kuleña kwejima kwaabaña nakufunyisha hamu, nikulelu.”

5. Indi anvwali jetu atachi aleteli ñahi makabi hadi antu?

⁵ Yehova hidiyi wunakukojeja makabi asweja anashimbuli nankashuku. (2 Samweli 22:31) Nyiloña yikwawu twatela kutwika antu. “Anakoñi nyidimu yatama nankashi; kwosi welaña chachiwahuku.” (Masamu 14:1) Anvwali jetu atachi ayinkeli yuma yayiwahi yejima yakuyitiyisha kuwaha. Hakwila nawu atwalekuhu kuhanda chachiwahi ateleleli kumwovwahila Nzambi, ilaña Adama niEvu afuukwiluhu kudimena chakadi Yehova. Chelili anvwali jetu akusambila amukaanini Yehova, hiyatwalekeluhu kwikala aloña cheñiku. Atachikili kukabakana sampu nichafwiliwu. Ninetu nawa twaswana kubula kuloña.—Kutachika 3:17-19; Aroma 5:12.

6. Chumanyi cheliliyi Satana hakuleta makabi?

⁶ Mukwawu cheñi wadibombelelumu mukuleta makabi ejima hichileñaleña chakuspiritu wenjili nakwikala Satana Diyabolu. Iwu chileñaleña amwinkeli wuswa wakudifuukwila. Ilaña, wazatishili chatama wuswa wakudifuukwila muloña wakeñeleña nindi amulombaña. Henohu twatela kudifukula hohu kudi Yehova, bayi kuyileñaleña yinduku. Satana diyi waletesheli Adama niEvu akeñeña kudambula kudi Yehova, neyi kwiji akutwesha ‘kwikala neyi chadiyi Nzambi, nakwiluka yayiwahi niyatama.’—Kutachika 3:5.

Yehova Hohu Diyi Wukweti Ñovu yaKuyula

7. Indi yuma yatama yinakufuma mukudikaña naYehova yinakumwekeshadi?

⁷ Yuma yatama yinakufuma mukudikaña yinakumwekesha nawu Yehova hohu, Mwanta Wakuleña Kwejima, diyi watela kuyula nawa kuyula kwindi hohu dikwaloña. Yaaka yayivulu yinahituhu yinamwekeshi nawu Satana, wekalili “mwanta wayulaña mpata yamunu mwishina,” naleti chiyulu chatama, chakubula kuloña, nawa chamadombu chabula kutelela chikupu. (Yowanu 12:31) Chiyulu chawantu chayihuñu chinakutwalekahu chidi mumakasa aSatana nichena chinamwekeshi nawu antu hiyakweti wuswa wakuyula mwaloñaku. (Yeremiya 10:23) Dichi, chiyulu chidi chejima chikutondawu antu neyi akaana wunlomboli waYehova chakañanyaña chikupu. Nsañu yanyaka yakuhanda kwawantu yinamwekeshi chikupu nawu antu anakañanyi kudiyula.

8. Indi Yehova wukweti nkeñelwinyi kutalisha kunyichidi yejima yachiyulu chawantu, nawa wakashikija ñahi iyi nkeñelu?

⁸ Chineli Yehova neteji makombakaji ayaaka kuhitahu kulonda antu eseki chiyulu chakadi yena, ichi dinu nateli kufumishahu yiyulu yejima hamaseki nakusinsishahu nfulumendi yindi yomweni. Wuprofwetu wahosha haniyi nsañu nawu: ‘Hamafuku amba kekala anyantowu [kuyula kwawantu] Nzambi wamwiwulu wamba kaloñesha wanta [nfulumendi yindi yamwiwulu yidi mumakasa aKristu] wakabula kukisañanawu. . . . Wakahumona puchi puchi nakuyinoñesha mawanta ejima awa, wena nkawawu wakemana mbe haya nyaka.’ (Danyeli 2:44) Kuyula kwawandemoni niantu kwakamana, chiña hohu Wanta waNzambi wamwiwulu diwukekalaku nawa wakayula iseki dejima. Kristu diyi wakekala Mwanta, nawa wakekala nawa 144, 000 akayulayi nawu antu ashinshika afumishawu hamaseki.—Chimwekeshu 14:1.

Makabi Anateli Kuleta Nkisu

9, 10. Indi Yesu wahetelelumu ñahi muyuma yakabakeniyi?

⁹ Chikuwaha nankashi kushinshika hayuma yakeñekaña kudi antu akayulilaña muWanta wamwiwulu. Chatachi, Kristu Yesu wamwekesheli chamuletesheli yena kushikahu hachifulu chindi chakwikala Mwanta. Washakamini nyaka yakadi kuchinda hamu  naYehova nakwila nkeñelu yaTata yindi, neyi ‘mukalawenu’ Windi. (Yishimu 8:22-31) Hampinji yakeñeliyi Yehova nindi Yesu yenzi hanu hamaseki, mukudikeñela Yesu wetejeli. Hampinji yadiñayi hamaseki Yesu washindameneni hakuleja antu hachiyulu chaYehova niWanta windi. Yesu watwimikila wejima wetu chakutalilahu chachiwahi nankashi chakwovwahila chikupu iwu wanta.—Matewu 4:17; 6:9.

¹⁰ Yesu amuyandishili, nkumininaku amujahili. Hampinji yakalakeleñayi mudimu windi, Yesu watwesheli kumona yihuñu yejima yamweneñawu antu. Komana wahetelelumu hakumona yihuñu yamweneñawu antu nichakabakeniyi yomwenindi? Eña. Aheberu 5:8 yashimuna nawu: “Hela wadiñi Mwana [kaNzambi], wadizili kwovwahila nayuma yakabiliyi.” Yuma yamweniyi Yesu henohu wuchidi hamaseki yamwilishili kusweja kwikala naluwi niwushona chikupu. Wadimweneni namesu kapu kutama kwachihandilu chawantu. Watwesheli kutiyila antu akabakeneña luwi nawa akeñeleña kuyikwasha. Talenu chakonkomweneniyi kapostolu Pawulu hanichi chikuma mumukanda waAheberu: “Dichi chamuwahilili yena kwikala neyi ana kwindi muyuma yejima, kulonda ekali kapristu muneni waluwi nakashinshi kunsañu yaNzambi; ekali ifutu danyiloña yawantu. Chakabiliyi yomweni nakumweseka, yena natweshi kukwasha antu akwesekawu.” “Muloña tukweti kapristu muneni watweshaña kutiya wushona chitwazeyazeyañetu, niyena amwesekeli muyuma yejima neyi chatwesekañawu etu, ilaña mudi yena nshidi nehi. Dichi tukundamenu kwakwihi netanda daluwi chakadi woma, tutambuli kwanakena, tumoni luwi lwakutukwasha hitukumona kukala.”—Aheberu 2:17, 18; 4:14-16; Matewu 9:36; 11:28-30.

11. Indi yuma yamweniwu anyanta akumbidi niatupristu hamaseki yikayikwasha ñahi hamu neyi anyuli?

¹¹ Dichitwatela kuhosha nihadi 144,000, “akuuliluwu” hamaseki kulonda akayulili hamu naKristu Yesu muWanta wamwiwulu. (Chimwekeshu 14:4) Wonsu wawu avwalikilili hamaseki, nikukula akulilili mwituña mudi yihuñu, niwena amweni yihuñu. Amavulu ayiyandishili, amakwawu niwena ayijahili muloña wakwikala ashinshika kudi Yehova nikufwila kumulondela Yesu. Ilaña ‘hiyatiyili nsonyi yakushimuna hadi Mwanta wawuku, akuminineña dakumona kukala hamuloña wansañu yayiwahi.’ (2 Timotewu 1:8) Yuma yamwenuwu hamaseki yinayileteshi kwikala ashikahu kusompesha antu kufuma kwiwulu. Anadizi kutiyila antu wushona chikupu niluwi, nawa anakufwila kuyikwasha.—Chimwekeshu 5:10; 14:2-5; 20:6.

Muzañalu Wukwetiwu Antu Adi naChikuhwelelu Chakushakama haMaseki

12, 13. Indi antu adi nakuchiñeja kwakushakama hamaseki ahetelañamu ñahi mumakabi?

¹² Komana makabi anakumonawu makonu  anateli kuhetesha antu adi nachikuhwelelu chakushakama haya nyaka muparadisa heseki mwakabula yikatu, kuneña, nikufwa? Kukata niyihuñu yitwamonaña hamuloña wamakabi hiyatwitiyishaña kuwahaku. Ilaña neyi tumika makabi amuchidiwu, yililu yetu yayiwahi yawahilañaku nawa twekalaña namuzañalu.

¹³ Talenu chahoshaña Izu daNzambi donenewa haniyi nsañu: “Neyi mukumona yihuñu hansañu yakuloña, munakooleki.” “Neyi akuyisawula hansañu yejina daKristu, munakooleki.” (1 Petulu 3:14; 4:14) “Neyi akayihosha chatama, nakuyikabisha, nakuyituñula mazu atama ejima, nikuyitwambila hansañu yamami, munakooleki. Zañalalenu, luñenu chacheni, muloña akayisomona masomu amaneni mwiwulu.” (Matewu 5:11, 12) ‘Muntu womikaña chamonañayi kweseka, nakooleki; muloña neyi anamutompi dehi wakatambula chibaaba chawumi.’—Yakoba 1:12.

14. Munjilanyi makabi muyanateli kuzañaleshela akwakudifukula aYehova?

¹⁴ Bayi neyi makabi yitwamonaña diwu atuleteshaña kwikala namuzañaluku. Twazañalalaña nikutiya kuwaha hakwiluka netu tunakukabakana muloña wakwila nkeñelu yaYehova nawa tunakulondela chakutalilahu chaYesu. Chakutalilahu, muyaaka nkulakaji yatachi, apostolu amakwawu ayikasili mukaleya, kufumahu ayileteli muchota cheneni chawaYudeya nawa ayihosholeli muloña wakushimwina hadi Yesu Kristu. Ayihumpwili, nkumininaku ayumbiluku. Indi yitoñojoka yawu yadiña ñahi? Bayibolu yahoshaña nawu ‘afumini muSanihedilini, nakuzañalala nanochu chanayifuukwiluwu kutela kusawuka kukoola ijina dindi.’ (Yililu 5:17-41) Bayi neyi azañaleli hamuloña wakuyihumpula hela yivuku yatiyileñawuku, ilaña azañaleli hakwiluka nawu chumichi chamwekeni muloña adiña ashinshika kudi Yehova nawa alondeleleña mumahanji aKristu.—Yililu 16:25; 2 Akorinda 12:10; 1 Petulu 4:13.

15. Indi neyi tumika makabi makonu tunateli kuhetelamu ñahi kumbidi?

¹⁵ Neyi tukumika ikañesha nimakabisha namuzañalu, chikutukwashaku kutatakena. Ichi chikutukwashaku kumika makabi akumbidi. Twatañaña nawu: “Enu ana kwami, tiyenu kuwaha nankashi chimukushika mukweseka kweñi nakweñi; muloña muneluki kutompa kwatompañawu kukuhwelela kwenu kukuleta [kumika.]” (Yakoba 1:2, 3) Munjila yoyimu, Aroma 5:3-5 yatulejaña nawu: ‘Tuzañalalenu nawa nimulukadi lwetu; muloña tuneluki netu lukadi lwaletaña kumika; kumika kwaletaña kwilukamu; kwilukamu kwaletaña kuchiñeja; kuchiñeja hikwatiyishaña nsonyuku.’ Dichi neyi makonu tumika chikupu kweseka muloña wakwikala eniKristu, dikwila nawu tunadiloñeshi kumika kweseka kukwawu kwamudinu ituña datama.

Yehova Wakatusomwena

16. Chumanyi Yehova chakayililayi anyanta niatupristu akumbidi hakuyisomwena muloña wakukabakana kwawu?

¹⁶ Hela chakwila tukujimbesha maheta etu muloña wakutuyandisha hela ikañesha ditunakumona muloña wakukakela kunjila yawiniKristu, tunateli kuzañalala hakwiluka netu Yehova wakatusomwena chikupu. Chakutalilahu, kapostolu Pawulu wasonekeli hadi antu adi nachikuhwelelu chakuya kwiwulu nindi: “Chayibuwiluwu mahetenu kudi antu, mwovwahililumu nakuzañalala, nakwiluka enu aweni nenu mukweti iheta dabadika kuwaha dakakumaña” neyi anyuli muWanta waNzambi. (Aheberu 10:34) Nawa toñojokenu hamuzañalu wukatiyawu hampinji  yikayilombolawu kudi Yehova niKristu hakuyinka antu akashakamaña hamaseki nkisu yasweja kuwaha mwituña dadiha daheseki. Mazu akapostolu Pawulu asonekeleliyi eniKristu ashinshika alala chikupu akwila nawu: “Nafuukuli nami makabi akatataka hiyanateli kweseka nakulema kwamba kamwekana kudetuku.”—Aroma 8:18.

17. Indi Yehova wakayililadi antu akweti chikuhwelelu chakushakama hamaseki anakumukalakela nakashinshi makonu?

¹⁷ Munjila yoyimu, hela chakwila antu akweti chikuhwelelu chakushakama hamaseki anakujimbesha hela akuhana yuma yawu mukudikeñela hamuloña wakumukalakela Yehova, wakayisomwena yuma yayivulu nankashi yakakoñayi kumbidi. Wakayinka wumi waloña, wahaya nyaka muparadisa heseki. Mudina ituña dadiha, Yehova “wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.” (Chimwekeshu 21:4) Yuma yinatukaniwu okuwaha! Kwosi chuma chitukuhana mukanu kaayi mukudikeñela hela chakubula kudikeñela muloña wankeñelu yaYehova chikwesekana nawumi wawuwahi wudi hambidi, wukayinkayi antu jindi ashinshika anakumika makonu.

18. Chikaninwinyi chakukundeja chinatwinkiyi Yehova Mwizu dindi?

¹⁸ Makabi ejima yitukomikaña hiyakatwesha kukañesha muzañalu wawumi wahaya nyaka wutukekala nawu mwituña daNzambi dadihaku. Yuma yayiwahi nankashi yikekala mwituña dadiha yikasinsa hamakabi ejima yitunakumona. Isaya 65:17, 18 yatulejaña nawu: “Yuma yakusambila hiyakayanuka nawaku, hiyakenza nikumuchimaku. Ilaña tiyenu kuwaha nakuzañalala haya nyaka nayuma yinukuleña.” Ichi chamuletesheli mana kwa Yesu wakuwanamu Yakoba kuhosha nindi: ‘Twatenaña antu omikaña netu akooleka.’ (Yakoba 5:11) Eñañi, neyi tukumika makabi yitunakumona makonu, tukuhetelamu katataka nimpinji yakumbidi.

Mukwakula Nenudi?

• Indi antu atachikili ñahi kuyanda?

• Indi makabi anateli kuleta nkiswinyi kudi anyuli akumbidi nikudi antu akashakama hamaseki?

• Muloñadi chitwatela kuzañalala makonu hela chakwila tunakuyanda?

[Malwihu aKuzatisha haKudiza]

[Mwevulu wudi hefu 18]

Anvwali jetu akusambila adi kushakamaña chiwahi kumbidi

[Mwevulu wudi hefu 20]

Kumona chakabakeneñawu antu chamukwashili Yesu kwikala Mwanta wamuwahi nawa Kapristu Muneni

[Mwevulu wudi hefu 22]

Apostolu ‘azañaleli nanochu chayifuukwililuwu kutela kusawuka’ kukoola chikuhwelelu chawu