Yehova Wakeña Wuñaji

“Ami Yehova nakeña wuñaji.”—ISAYA. 61:8.

1, 2. (a) Indi mazu akutena nawu “wuñaji” ‘nikuheña’ alumbulukadi? (b) Indi Bayibolu yahoshaña nawudi hadi Yehova nihachililu chindi chawuñaji?

 WUÑAJI awulumbulula neyi ‘hichililu chakubula kwikala nachaambu, kwikala chiwahi, kuzata yuma munjila yoloka nawa yayiwahi.’ Kuheña hikubula kwikala chiwahi, kwikala nachaambu, kutama, kuyandisha amakwawu chakadi muloña.

² Kwakwihi nayaaka 3,500 yinahituhu, Mosi wasonekeli hadi Yehova, Mwanta Wakuleña Kwejima nindi: “Mwatwalañayi mwejima mwawuñaji hohu; hiNzambi wakashinshi wakadi ninaha haheñelayi.” (Kuhituluka 32:4) Chimwahitili nkulakaji yayaaka yitanu nayiyedi, Nzambi wamoneneni Isaya naspiritu yajila kusoneka awa mazu: “Ami Yehova nakeña wuñaji.” (Isaya 61:8) Cheñi muyaaka nkulakaji yatachi, Pawulu wahosheli nindi: “Nzambi wukweti habulilayi kuloña, tahindi? Chinjila!” (Aroma 9:14) Nawa muyoyina yaaka, Petulu washimwini nindi: “Nzambi haakaminaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.” (Yililu 10:34, 35) Mwalala, “Yehova wakeña wuñaji.”—Masamu 37:28; Malaki 3:6.

Kuheña Kunatandi

3. Indi kuheña kwatachikili ñahi hamaseki?

³ Makonu wuñaji hiwunatandi kwejimaku. Yililu yaheña yinateli kutwimwekena kumaluña ejima kwashakamañawu antu—kunyidimu, hashikola, hakuzata nawakwanfulumendi, nimunjila jikwawu—hela muchisaka. Ilaña, kuheña kwamuchidiwu kwatachikili dehi. Kuheña kwenjili hadi antu hampinji yadikañiliwu anvwali jetu atachi nakwikala akwakuluwa muloña wakuyisañumuna kudi chileñaleña chakuspiritu mukwakudikaña wekalili Satana Diyabolu. Mwalala Adama, Evu, niSatana abalwili nshimbi yawuñaji kuhitila mukuzatisha chatama chawana chachiwahi chakudifuukwila chayinkeluwu kudi Yehova. Yililu yawu yaheña yinaleteshi antu ejima kumona makabi asweja nikufwa.—Kutachika 3:1-6; Aroma 5:12; Aheberu 2:14.

4. Indi kuheña kunashimbuli ñahi mukuhanda kwawantu?

⁴ Yaaka 6,000 yinahitihu kufuma hakudikaña kwamwekeni muEdeni, kuheña kunatwalekuhu munshakaminu yawantu. Nimakonu chinateli kumwekana muloña Satana diyi nzambi yampata yamakonu. (2 Akorinda 4:4) Diyi mukwakutwamba nawa tata yakutwamba, mukwansachi nawa mukwakudimbulula Yehova. (Yowanu 8:44) Yena wakoñaña hohu yuma yasweja kuheña. Chakutalilahu, muloña wakuluwañesha kwatama kwaSatana henohu dibaji damumafuku aNowa kanda, Nzambi wamweni nindi “kutama kwawantu kunatohi hamaseki, nimwafuukwiluwu mwejima nakutoñojoka munyichima yawu munatami hohu bweñi mafuku ejima.” (Kutachika 6:5) Hampinji yadiñayi Yesu hamaseki iku kutama kwatwalekeluhu. Yesu wahosheli nindi: “Kutama kwefuku dimu kunawani,” chinayi mukwila nawu kukala kukumwekana hanodu ifuku kudi neyi kuheña. (Matewu 6:34) Bayibolu yahosha choloka nawu: “Kuleña kwejima kwaabaña nakufunyisha hamu, nikulelu.”—Aroma 8:22.

5. Muloñadi kuheña chikunaswejeli makonu kubadika mpinji yejima?

⁵ Dichi, yuma yatama yinakuletesha kuheña kwasweja yatachikili dehi kumwekana mukuhanda kwawantu kwejima. Makonu dinu chinaswejeliku. Muloñadi? Muloña kanu kaayi kamakonu kabulaña kwakama Nzambi kanashakami ‘mumafuku akukuminina’ hadi  yaaka yayivulu, nakumona “nyaka yakala” chikanakuswila kwakwihi nakukuma. Bayibolu yashimwineñahu dehi nawu munanu mafuku, antu akekala “akwakudikeña, akwakufwila mali, akwakudisamba, akwakudinka wanta, akwakutukana, . . . abulaña kusakilila, abula kujila, abulaña kukeñañana mwasemwakenawu, oma muchima, akwakutuñula akwawu, abulaña kudihemba, asweja kuzuwa, abulaña kukeña yayiwahi, anfukeji, akwakuchinchika, akwakuditohesha.” (2 Timotewu 3:1-5) Yaaku yatama yidi neyi iyi yinakuletesha kuheña kwamboka-mboka.

6, 7. Kutamanyi kwasweja kunayandishi antu makonu?

⁶ Muyaaka nkulakaji yinahituhu kuheña kunaswejeliku chikupu kubadika yaaka yejima. Chuma chimu chinakuleñela, yinu yaaka yinasweji njita chikupu. Chakutalilahu, akwakushimuna nsañu yanyaka amakwawu ashimunaña nawu Munjita hohu yaKaayi kejima ya II, antu afwili adiña hakachi kayihita 50 nakushika kuyihita 60, avulili adiña antu hohu—amayala niambanda nianyana akadi muloña. Kufuma tuhu hakukuma kwayina njita, antu amavulu anayijilumuni munjita jamboka-mboka, chochimu anakufwa antu hohu. Satana diyi wunakuleta kutama kwamuchidiwu muloña wandulu yikwetiyi, chinelukiyi nindi katataka Yehova yamushindi chikupu. Wuprofwetu wamuBayibolu wahosha nawu: “Diyabolu nayisulukili, wudi nandombu yayeni, chanelukiyi nindi kunashali dehi mpinji yindi yantesha hohu.”—Chimwekeshu 12:12.

⁷ Mali anakuzatishawu kudi amashidika mukaayi kejima chayinu mpinji anashiki dehi kwakwihi natililiyoni yimu mali akuAmerica hachaaka hachaaka. Yihita yawantu hiyakweti yuma yakeñañawu muchihandilu chawuku, dichi toñojokenu hamali ejimawa chiyatela kukwashana neyi chakwila ayizatisha kuyuma yayiwahi. Antu akushika kubiliyoni yimu hiyakweti yakudya yayivuluku, ilaña amakwawu akweti yakudya yayivulu. Kwesekeja namukanda wawaUnited Nations, anyana akushika kuyihita yitanu afwaña nachikatu chanzala hachaaka hachaaka. Okutama! Shinshikenu cheñi hadi ankemba amavulu akaadi muloña anakujahawu kuhitila mukufumisha mavumu. Chipimu chawanyana anakujahawu mukaayi kejima chidi hakachi kayihita 40 nakushika kuyihita 60 hachaaka hachaaka! Iku hikutama kwahamesu bwi-i.

8. Indi chiyulu chawuñaji walala chakenza ñahi kumuchidi wamuntu?

⁸ Anyuli awantu anakañanyi kuwana mwakumanishila kukala kwasweja kunakuyandisha antu makonu; hela tuhu akuzata nañovu yuma hiyikuwahaku. Izu daNzambi dashimwineñahu dehi nawu munanu mafuku etu “antu atama niakwakutwamba akuya nakusweja, wena akudimba akwawu, niwena akuyidimba.” (2 Timotewu 3:13) Kutama kunasweji nankashi muchihandilu chetu chefuku nifuku nawa antu hiyanateli kukwifumishahuku. Chiña Nzambi wawuñaji hohu diwatela kukwifumishahu. Nzambi hohu diwatela kumufumishahu Satana, andemoni, niantu atama.—Yeremiya 10:23, 24.

Chaluwa Wanyi Kutoñojoka Hakuheña

9, 10. Muloñadi Asafwi chaneñeleliyi?

⁹ Kunyuma, ansoneki aBayibolu amakwawu adiña nakwihula chabuliliyi Nzambi kudiñijamu munsañu jawantu nakuleta wuñaji walala nikuloña. Chakutalilahu, shinshikenu hadi iyala wumu wakumpinji yakunyima. Tumazu twahewulu twahaMasamu 73 asonekahu ijina daAsafwi, hadaha anatalishi kudi kaLevi wayampuhu mukakwimba hampinji yakuyula kwaMwanta Davidi hela kudi akakwimba mwitala dawankankulu mwadiñayi Asafwi mutu wetala. Asafwi nianyanindi asonekeli tumina twatuvulu tuyazatishileñawu hakudifukula kwawantu amavulu. Mpinji yimu mukuhanda kwindi, nsoneki yanidi isamu waneñeli muspiritu. Wamweni maheta awantu atama, nawa kakavulu wamweni nindi adiña nakudiluñisha muwumi wawu, hiyamweneña kukala kudi kwejimaku.

¹⁰ Twatañaña netu: “Ami nayitiyili asupa  ichima, chinamweni antu atama chakushakamawu chachiwahi. Hiyamonaña nyonji yakufwaku, ñovu yawu yakola ngu. Hiyamonaña kukala kwamonañawu akwawu antuku; hiyamonaña hela yikatu yamonañawu akwawu antuku.” (Masamu 73:2-8) Ilaña chimwahitili mpinji iwu nsoneki waBayibolu welukili nindi yitoñojoka yamuchidiwu yadiña yaheña. (Masamu 73:15, 16) Ñimbi wamasamu wesekeli kuhimpa yitoñojoka yindi, hela chochu, wakañenyi kwiluka chikupu chaleñelaña antu atama kubula kuyibabesha ilaña antu amawahi avula kuyanda.

11. Chumanyi chelukiliyi ñimbi wamasamu Asafwi?

¹¹ Mukuhita kwampinji, iwu muntu wakashinshi wakushankulu welukili chikayimwekena antu atama—nindi Yehova wukolola nsañu chikupu. (Masamu 73:17-19) Davidi wasonekeli nindi: “Muchiñeji Yehova, wulami munjila yindi, wakakutohesha kulonda wuswani ituña. Chiyakayifumishamu antu atama, wakachimona.”—Masamu 37:9, 11, 34.

12. Indi Yehova nafuukuluhu kwiladi kutalisha hakutama nikuheña? (b) Indi njila yakumanishilamu kukala kwakuheña yayitiyishaña ñahi?

¹² Chakadi kujina, nkeñelu yaYehova yidi yakufumishahu kutama nikuheña hanu hamaseki mumpinji yindi yatelela. Ichi dichuma chatela kwanukaña nieniKristu ashinshika mpinji yejima. Yehova wukakisañana ejima abulaña kwila nkeñelu yindi, ilaña wakalambula antu alondelaña nkeñelu yindi. ‘Mesu indi atalaña, nlabu jindi jesekaña anyana kawantu. Yehova wesekaña mukwakuloña; ilaña muchima windi wahelaña niwatama nimuntu wakeña madombu. Hadi antu atama wakanokeshahu nyihetu neyi nvula hohu; . . . nikesi nisawufa nimpepela yasweja kutata neyi kesi. Muloña Yehova waloña kwindi; wakeña mwaloña.’—Masamu 11:4-7.

Ituña Dadiha Mukekala Kuloña

13, 14. Muloñadi kuloña niwuñaji chiwukatandila mwituña dadiha?

¹³ Yehova chakakisañanayi kanu kaayi  katama kadi mumakasa aSatana, wakaleta ituña dadiha dadiwahi chikupu. Akadiyulaña kudi Wanta waNzambi wamwiwulu, wanta walejeliyi Yesu atumbanji twindi kulomba. Kuloña niwuñanji wakahiña hakutama nikuheña, muloña mpinji oyu kulomba kwakwila nawu: “Wanta weyi winzi. Muchima weyi awili hamaseki neyi chawilañawu mwiwulu” akakwakula chikupu.—Matewu 6:10.

¹⁴ Bayibolu yatulejaña chiyulu chitwatela kuchiñeja, chiyulu chachiñejaña antu ejima akweti nyichima yaloña. Dihu hakashikijewa chikupu Masamu 145:16 hahosha nawu: “Wakamununaña [Yehova Nzambi] muchikasa cheyi, yuma yejima yikweti wumi wayiikutishaña nayuma yakeñawu.” Cheñi nawa, Isaya 32:1 yahosha nawu: “Tiyenu mwanta [Kristu Yesu mwiwulu] wakashakama muwanta chaloña atulamba [añimenu jaKristu ahamaseki] akayula mwawuñaji.” Kuhosha hadi Mwanta Yesu Kristu, Isaya 9:7 yashimwineñahu dehi nawu: “Wanta windi nikuwunda kwindi kwakayaña ho-o, kukuma nehi, hetanda daDavidi dawanta, nimumpata yayulañayi, kulonda kushimatishamu, nikukoleshamu nawuñaji nakuloña kufumisha hanu nikwaya nyaka. Iyena dakumuchima waYehova wamazaza dodakakoña chumichi.” Komana mwadimonaña nenu mwakashakama munichiyulu chaloña?

15. Chumanyi Yehova chakakoñelayi antu mwituña dadiha?

¹⁵ Mwituña daNzambi dadiha, hitwamba kahosha cheñi awa mazu ekala haMukwakutaŋisha 4:1: nawu “Hinukuhitamu cheñi nakushinshika makabisha ejima akoñeluwu mwishina detañwa; hinukumona madilu awantu akabishewa, hiyakweti niwakuyikundejaku; ñovu hijidi kudi akwakuyikabisha, hiyakweti niwakuyikundejaku.” Mwalala, hakubula kuwanina, chakala kutoñojoka chakawaha ituña dadiha mwakekala kuloña. Himwakekala kutamaku; ilaña mafuku ejima mwakekalaña yuma yayiwahi. Mwalala, Yehova wakafumishamu yuma yejima yaheña, wakela mwenimu  munjila yakubula etu kwiluka. Dimuloña waweni Yehova Nzambi wamoneneniyi kapostolu Petulu kusoneka nindi: “Hakwila etu twatalilaña mawulu amaha niiseki dadiha, mwakekala kuloña neyi chakaniniyi.”—2 Petulu 3:13.

16. Munjilanyi munemikiluwu “mawulu amaha,” nawa “iseki dadiha” anakudiloñesha ñahi makonu?

¹⁶ Eña “mawulu amaha,” nfulumendi yaNzambi yamwiwulu yinakuyulewa naKristu, ayimika dehi. Izanvu dawantu akekala “Iseki dadiha,” muza wawuha waheseki wawantu ovwahila chachiwahi, anakuyipompesha munanu mafuku akukuminina. Adi dehi kwakwihi nakushika ku 7,000,000, mumatuña akushika ku 235 nawa adi muyipompelu yakushika ku 100,000. Iyi yihita yawantu anakudiza njila jaYehova jaloña nawa jajiwahi, chinafumimu, kaayi kejima anakudiluñisha kunuñañana kwashindamena hakukeña kwawiniKristu. Kunuñañana kwawu kwatiyakana chikupu nawa kunashimbuli nankashi muchihandilu chawantu mukaayi, kunuñañana kunabadiki yuma yejima yamonaña antu jaSatana. Kukeña nikunuñañana kwamuchidiwu kunakumwekesha mpinji yayiwahi yakumbidi mwituña daNzambi dadiha, diyakayulañawu mukuloña nimuwuñaji.—Isaya 2:2-4; Yowanu 13:34, 35; Akolose 3:14.

Kulukuka kwaSatana Kukakañanya

17. Muloñadi kulukuka kwaSatana kwakukumishaku kwakalukukayi antu jaYehova chikwakakañanya chikupu?

¹⁷ Katataka Satana niantu jindi alukuki akwakudifukula aYehova nakufwila kuyikisañana. (Ezekeli 38:14-23) Iku kulukuka kukekala mbadi ‘yalukadi lwasweja, lwakwila kufumisha kutachi yamatuña kushika nikulelu, kanda alumonañahu dehi, hela kumbidi hiyamba kalumona cheñuku’ lwateneniyi Yesu. (Matewu 24:21) Indi kulukuka kwaSatana kukashinda? Inehi. Izu daNzambi datukonkomwenaña nawu: “Yehova wakeña wuñaji, hashiyaña antu indi ajilaku, wayihembaña nyaka yejima, ilaña anyana kawantu atama akayifumishamu. Akwakuloña akaswana ituña, akashakamamu haya nyaka.”—Masamu 37:28, 29.

18. (a) Indi Nzambi wukeladi nakulukuka kwaSatana kwakalukukayi antu Jindi kumbidi? (b) Munahetelimu ñahi hakudiza nsañu yamuBayibolu yinakuhosha hawuñaji chiwukatanda mwituña dadiha?

¹⁸ Satana nimukanka windi chakalukukawu ambuña aYehova dikakekala kasawuntu kakukumishaku. Yehova washimwineñahu dehi kuhitila mudi Zekariya nindi: ‘Muloña muntu wukukunkeyi, nakunki hakantu kadisu dami.’ (Zekariya 2:8) Chidi neyi kwiji muntu nakuchonka munu hakantu kadisu daYehova. Wakanyakala kunyamuka nakujilumuna ambanji. Ambuña aYehova hiyantu akweti kukeña, anuñañana, awunda, alondelaña nshimbi chikupu hamaseki. Dichi iku kulukuka hikukayitelelaku, nawa kwaheña. Yehova wasweja ‘kukeña wuñaji’ hakachitejaku. Muloña wakujikilila antu jindi chikaletesha kujilumuna ayilumbu jawantu jindi haya nyaka, hakwila wuñaji wukatandi, nawa antu adifukulaña kudi Nzambi walala hohu akapuluki. Yuma yakuzañalesha yakuhayamisha chikupu yidi mukamwihi hambidi yetu.—Yishimu 2:21, 22.

Mukwakula Nenudi?

• Muloñadi kuheña chikunaswejeli?

• Indi Yehova wukamanisha ñahi kuheña hanu hamaseki?

• Chumanyi chinayitiyishi kuwaha muniku kudiza kutalisha hakushinda kwawuñaji?

[Malwihu aKuzatisha haKudiza]

[Mwevulu wudi hefu 15]

Kutama kwaswejeli henohu Dibaji kanda dinzi, nimunanu “mafuku akukuminina” chochimu

[Mwevulu wudi hefu 16, 17]

Mwituña daNzambi dadiha, wuñaji nikuloña wukahiña hakutama