Fwilenu Kwila Nkeñelu yaNzambi Makonu

‘Kristu wafwilili ejima kulonda antu akuhanda abuli kudihandila cheñi awenawu.’—2 AKORINDA 5:15.

1. Shimunenu chakuhumañana chakamishonali wumu mumudimu windi.

 MISHONALI wejina daAaron wahosheli nindi, “Motoka yetu diyi yadiñi yatachi hakachi kanyotoka yabulili kwikala yawamashidika kwiñila mumukala wadiñi mukachi kesaña damuAfrica hanyima yakumana kwanjita. * Hitwatwesheleña kutiyañana nachipompelu chanyanya chamuwuna mukalaku, nawa twateleleli kwakamena kukankila kwawamana kwetu. Kubombela hayakudya, yakuvwala, ninyikanda yashindamena haBayibolu, twasendeli kopi yavidiyo yaJehovah’s Witnesses—The Organization Behind the Name. * Dichi antu amavulu adiñi nampwila yakudiza apompeli hamukala kulonda atalili mumunkanda weneni watuñiluwu kulonda kutalishilamu vidiyo nawa twayitalishili mapampa kayedi. Antu amavulu akeñeli kutachika kudiza Bayibolu hanyima yakutala vidiyo mapampa kejima kayedi. Chakubula nikujinooka, ñovu jetu jejima hijayili mumenjuku.”

2. (a) Muloñadi eniKristu chiyafuukwilañahu kuzatisha wumi wawu mumudimu waNzambi? (b) Malwihwinyi yitukushinshikahu?

² Muloñadi Aaron nialundanindi chatondeleluwu mudimu wakala ñana? Muloña ahamekaña ifutu danyiloña damulambu waYesu Kristu, nawa adihana kudi Nzambi nawa anakukeña kuzata kwesekeja nankeñelu yaNzambi. Kufwana wena, eniKristu ejima adihana afuukulahu ‘kubula kudihandila cheñi awenawu’ ilaña elaña yuma yejima yinateli kwilawu, muloña ‘wansañu yayiwahi.’ (2 Akorinda 5:15; 1 Akorinda 9:23) Eluka nawu neyi kanu kaayi kanakumi dehi, mali ejima nimpuhu yamukanu kaayi hiyakekala yalemaku. Dichi hakutwalekahu kuhanda, akeñaña kuzatisha wumi wawu kwesekeja nankeñelu yaNzambi. (Mukwakutaŋisha 12:1) Tunateli kwila ñahi mwenimu? Kudihi kutunateli kuwana wulobu niñovu hakwila nawu twili mwenimu? Nawa kukoolekanyi kwamudimu kutukweti?

Kuzatisha Njila Jajiwahi Jakuyilaku Hambidi

3. Njilanyi jalema jabombelamu hakwila nkeñelu yaNzambi?

³ Kudi eniKristu alala, kuzata nkeñelu yaNzambi himudimu wamuchihandilu chawu chejima. Kakavulu watachikaña najinjila janyanya jidi neyi kusonekesha muShikola yaMudimu waTeokalatiki, kutaña Bayibolu mafuku ejima, kushimwina nsañu yayiwahi nikuya hambidi nakushika kukupapatishewa. Neyi tunayiluku hambidi twanukaña mazu akapostolu Pawulu akwila nawu: “Dikwatishi muyumiyi [nakutoñojokamu], wudinkumu chikupu, kulonda chiwukuyaña kumbidi chimwekanaña kudi antu ejima.” (1 Timotewu 4:15) Wuya hambidi wamuchidiwu bayi neyi hikudilemeshaku, ilaña wamwekeshaña kufuukula kwetu kwakwila nkeñelu yaNzambi chikupu. Kukalakala munjila yamuchidiwu chamwekeshaña nawu tuneteji Nzambi kulombola njila yetu muyuma yejima yamuchihandilu, nawa Nzambi wakoñaña mwenimu chiwahi kubadika chitunateli kwila.—Masamu 32:8.

4. Tunateli kudiwula ñahi kwakamena kwakadi kutelela?

⁴ Kujinooka hakufuukula hela kudakamena nankashi kunateli kukañesha wuya hambidi wetu mumudimu waNzambi. (Mukwakutaŋisha 11:4) Dichi henohu kanda tuwani muzañalu walala hakumukalakela Nzambi niantu amakwawu, twatela kusambila kushinda kwakamena kwetu. Chakutalilahu, Erik wakeñeleña kuya nakuzatila kuchipompelu chazatishaña idimi dacheñi.  Ilaña wakameneni nindi: ‘Komana akantambwila? Komana nikayikeña amana kwetu? Niwena akankeña?’ Washimwini nindi: “Nkumininaku nelukili nami natela kwakamena chikupu amana kwami kubadika amaweni. Nafuukwiluhu kuleka kwakamena iyi yuma nakushindamena hohu hayuma yinatela kwilila antu amakwawu. Nalombeli wukwashu nawa natwalekeluhu nayitoñojoka yami. Chayinu mpinji, nadiluñishaña chikupu mudimu wami kuniidi iluña.” (Aroma 4:20) Chalala, neyi tumukalakela Nzambi niantu amakwawu namuchima wumu, tukuwana muzañalu.

5. Muloñanyi chichakeñekelaña kufuukulahu chiwahi hakwila nkeñelu yaNzambi? Hanenu chakutalilahu.

⁵ Hakwila nawu tukalakali nkeñelu yaNzambi chiwahi, chakeñekaña kufuukulahu nyidimu yetu nakanañachima. Tunateli kutondolwela nyikudi yinateli kutuleñela kwikala anduñu akanu kaayi nikukehesha kusubuka kwetu hakukalakala mudimu waNzambi muloña tukusha maana hakufweta nyikudi. Bayibolu yatwanukishaña nawu: “Mukwakusondama hinduñu yamukwakusondamisha.” (Yishimu 22:7) Kukuhwelela mudi Yehova nikutwamijaku yuma yakuspiritu chatukwashaña kusha maana hayuma yakuspiritu. Chakutalilahu, Guoming niahela jindi ayedi ashakamaña namama yawu mwiluña mwafwetelañawu matala wuseya wahewulu nawa mwakala kuwana mudimu wawuwahi. Kuhitila mukuzatisha mali chiwahi nikubombela mali hamu, ahandaña chiwahi hela chakwila wejima wawu hiyazatañaku. Guoming wahosheli nindi: “Mpinji jikwawu, wejima wetu hitwatambwilaña wufwetuku. Hela chochu, twatwalekañahu namudimu wawupayiniya nikumwakamena mama yetu chiwahi. Tudi namuzañalu wakwila nawu Mama hakeñaña nindi tuleki mudimu wawupayiniya ninyidimu yikwawu yamuchipompelu kulonda tutweshi kumwinkaña yuma yasweja kuwahaku.”—2 Akorinda 12:14; Aheberu 13:5.

6. Chakutalilahwinyi chinakumwekesha chitwatela kwesekeja chihandilu chetu nankeñelu yaNzambi?

⁶ Neyi musweja kufwila yuma yakumujimba chili kukeña mali chili yuma yikwawu, hakwila nawu mutwamijaku nkeñelu yaNzambi chikukeñeka kuhimpa yuma yayivulu. Hichekala chaswayi kuhimpa yuma mukapinji kantuku, nawa hichaya mukwila nawu munakañanyi neyi chakwila muluwañesha hakusambilaku. Shinshikenu Koichi wadiñi nakukala kwakunata mpinji yeneni hakukeña kuhema. Koichi wadizili Bayibolu hampinji yadiñayi kampululu, ilaña waswejeli kuhema yisela yahavidiyo hadi yaaka yayivulu muwumi windi. Ifuku dimu Koichi wadihwili nindi: ‘Wunakwiladi? Wudi dehi nayaaka yakusemuka kubadika ha 30, ilaña hiwunakwila chuma chidi chejima chachiwahi muwumi weyuku!’ Koichi watachikili cheñi kudiza Bayibolu nawa wetejeli wukwashu kufuma kuchipompelu. Hela chakwila wahimpileña chovu-chovu, halekeli kudizaku. Muloña wakusweja kulomba nikukoleshewa kudi amakwawu, nkumininaku Koichi washindili chaaku chindi. (Luka 11:9) Chayinu mpinji Koichi nakukalakala namuzañalu hamu neyi nkoñi wakuzatila.

Dizenu Chakwesekeja Yuma

7. Muloñadi chichakeñekelaña kwesekeja hakukalakala mudimu waNzambi?

⁷ Kufwila kwila nkeñelu yaNzambi chakeñekaña kuzata namuchima wetu wejima. Bayi tujinooka hela kwikala azeya hakukalakala nkeñelu yaNzambuku. (Aheberu 6:11, 12) Hela chochu, Yehova hakeñaña nindi tuzeyi chikupu lwakumujimba, nimuyitoñojokaku. Neyi tudikehesha nakwiteja netu hitunatweshi kuzata mudimu waNzambi nañovu jetuku, chamwekeshaña nawu twamulemeshaña Nzambi nawa twesekejaña yuma. (1 Petulu 4:11) Yehova watwikana kutwinka ñovu yatelela hakwila nkeñelu yindi, ilaña hitwatela kuzata kubadika hakumina ñovu jetu niyitoñojoka yetu nakweseka kwila yuma yabula kukuhwelelayi etu kwilaku. (2 Akorinda 4:7) Hakwila nawu tutwalekuhu kumukalakela Nzambi chakubula kuzeya, twatela kuzatisha chiwahi ñovu jetu.

8. Chumanyi chamwekeni hampinji yesekeleñayi mumbanda wawiniKristu kudihana kudi Yehova nikumudimu windi, nawa wahimpili yumanyi?

⁸ Chakutalilahu, Ji Hye washakamaña kuEast Asia wazatileña hamudimu wakeñekaña mpinji yeneni nankashi hadi yaaka yiyedi hampinji yoyimu wazatileña wupayiniya. Mumbanda yeniwu wahosheli nindi, “Nafwilileña kumuzatila Yehova chikupu nikuzata mudimu wami chikupu, ilaña  nakamineña hohu maora atanu. Nkumininaku hinadiña nañovu yakwila yuma yakuspirituku, nawa hinadiña namuzañalu wakukalakala mudimu waYehovaku.” Hakwila nawu yamukalakeli Yehova ‘namuchima windi wejima, nawumi windi wejima namaana indi ejima, nañovu jindi jejima,’ Ji Hye wakeñeli mudimu wakeñekaña kuzata kapinji kantesha. (Maku 12:30) Wahosheli nindi, “Hela chakwila nadiña nekakeja dakufuma kudi antaña nawu nikaleña namali amavulu, nafuukwiluhu kutwamijaku nkeñelu yaNzambi. Nichidi kukwata mali ashikila akulandamu yuma yakeñekaña chidi neyi yakuvwala yayiwahi. Nawa nakutiya kuwaha kukaama mpinji yeneni! Nidi namuzañalu wakuzata mumudimu wakushimwina nawa chayinu mpinji wulunda wami naYehova wunakoli. Chinekali ñana muloña hinikweti mpinji yeneni yakukomoka nikuluwañeshewa nayuma yamukaayuku.”—Mukwakutaŋisha 4:6; Matewu 6:24, 28-30.

9. Indi ñovu jetu jinateli kukuma ñahi antu mumudimu wakushimwina?

⁹ Bayi neyi wudi wejima watela kumuzatila Nzambi hamu neyi payiniya wampinji yejimaku. Neyi mwalwishaña nawushinakaji, yikatu, hela kukala kukwawu, anukenu nenu Yehova wahamekaña kashinshi kenu nimudimu wejima wumwazataña namuchima wumu. (Luka 21:2, 3) Hela chochu, kwosi niwumu hakachi ketu wunateli kudiwula yuma yafumaña muñovu jetu jakumuzatila Nzambi, hela chakwila jantesha chijinateli kukukwasha amakwawuku. Chakutalilahu, twili netu twaya nakushimwina hamatala antesha nawa hitunawani muntu wukweti mpwila munsañu yetuku. Hanyima yakufumaku, eni matala anateli kushala nakuhosha hadetu hampinji yayilehi hela chakwila kwosi watwenzunwina chenzeluku! Hitwatela kukuhwelela netu ejima akutiya nsañu yayiwahi atela kwiteja chiwahuku, ilaña amakwawu akwiteja. (Matewu 13:19-23) Amakwawu anateli kwiteja mukuhita kwampinji neyi yuma yamukaayi hela yamuchihandilu chawu yinahimpiki. Munjila yidi yejima, kuhitila mukwila chuma chidi chejima mumudimu wakushimwina hatooka, tunakuzata mudimu waNzambi. Twekala ‘akwakukalakala hamu naNzambi.’—1 Akorinda 3:9.

10. Kukoolekanyi kwekala nawantu ejima muchipompelu?

¹⁰ Kubombelahu, wejima wetu twatela kukwasha antu amuchisaka chetu niana kwetu niahela amuchipompelu. (Aŋalija 6:10) Chakutalilahu chetu chachiwahi kudi antu amakwawu chinateli kuyitiyisha kuwaha chikupu nawa chasendaña mpinji yayilehi. (Mukwakutaŋisha 11:1, 6) Neyi chakwila aeluda niankoñi akuzatila akalakalaña chiwahi nyidimu yawu, akwashaña antu  amuchipompelu kwikala nawulunda wawuwahi nawa wakola naYehova, nawa nyidimu yawiniKristu yayaña hambidi. Atwishiika chikupu nawu neyi ‘tusweja kukalakala mudimu waMwanta’ nyidimu yetu hiyekala ‘yamukunkulwayuku.’—1 Akorinda 15:58.

Fwilenu Kwila Nkeñelu yaNzambi muChihandilu Chenu Chejima

11. Kubombela hakuzata nachipompelu chenu, kukoolekanyi kukwawu kunateli kwikalaku?

¹¹ Hamu neyi eniKristu, twakeña wumi nawa twafwilaña kumulemesha Nzambi muyuma yejima yitwelaña. (1 Akorinda 10:31) Neyi tushimwina nsañu yayiwahi yaWanta nakashinshi nikutañisha antu amakwawu kuhemba yuma yejima yatulejeliyi Yesu, tukawana njila jajivulu jakumukalakela Nzambi nakutwiletela muzañalu. (Matewu 24:14; 28:19, 20) Kubombela hakukalakala nachipompelu chamwiluña denu, kudi kukooleka kwakuzatila kumaluña amakwawu kudi kukankila kweneni, chili mwiluña dacheñi, mwiluña dazatishañawu idimi dacheñi chili mwituña dacheñi. Aeluda niankoñi akuzatila ashikahu achidi ajiki anateli kuyitambika kulonda kuwanika kuShikola yaKudiza Mudimu wawuNkoñi, kufumahu ayaña nakuzatila kuyipompelu kunakukeñeka wukwashu waweniKristu apama, chili mwituña dawu chili mwituña dacheñi. Adisumbula nawa apayiniya ampinji yejima atela kushikahu kuyitambika kuya nakuwanika kushikola yawumishonali yaGileyadi nakukalakela kumatuña acheñi. Nawa kudi kukankila kwawakwakudihana kulonda kuzata nyidimu yashiyashana haBeteli nikutuña nikuloñesha maluña akupompela nitusanji twanyitayi.

12, 13. (a) Wunateli kufuukulahu ñahi nyichidi yanyidimu yiwunateli kukalakala? (b) Lumbululenu chuma chimunateli kwiluka kumudimu wumu chichinateli kuzatika kumudimu wacheñi.

¹² Nyidimu yamuchidinyi yiwunateli kukalakala? Hamu neyi kambuña Yehova, watela kutala kudi yena mpinji yejima nikuloñesha kwindi kulonda wuwani wunlomboli. ‘Spiritu yindi yayiwahi’ yikukukwasha kufuukulahu chiwahi. (Nehemiya 9:20) Kakavulu neyi tudiza mudimu wumu tunateli kuzata mudimu wukwawu, nawa kwiluka mudimu wumu wunateli kutuleñela kuzata mudimu wukwawu hampinji yacheñi.

¹³ Chakutalilahu, Dennis niñodindi Jenny, mpinji yejima adiña nakukwasha kumudimu wakutuña Matala aWanta. Hanyima yakwila wubanji wampepela yasweja kutoha yatenañawu nawu Hurricane Katrina yimwekani kukabeta kambwela kaUnited States, adihanini kukwasha ana adiña nakukeña wukwashu. Dennis wahosheli nindi: “Kuzatisha yuma yitwadizili hakutuña Matala aWanta kulonda kukwasha amana kwetu, chatuletela muzañalu weneni. Kuhameka kwamwekesheluwu ana yitwakwashili chalala kwakuzañalesha. Mazanvu amavulu adiña nakukwasha adiña kanda  amanishi kutuña. Ilaña aYinsahu jaYehova adiña amanisha dehi kutuñulula kubadika hamatala 5,300 niMatala aWanta amavulu. Antu amweni chumichi, chayinu mpinji adi nampwila yeneni yansañu yaWanta.”

14. Chumanyi chimwatela kwila neyi mudi nampwila yakukalakala mudimu wawupayiniya wampinji yejima?

¹⁴ Komana munateli kwila nkeñelu yaNzambi kuhitila mukutonda mudimu wawupayiniya wampinji yejima muwumi wenu wejima? Neyi dimu, mwatela kukuhwelela kutambwila nkisu yayivulu. Neyi chakwila chinayikalili chayinu mpinji, hekwawu munakukeñeka kuhimpahu yuma yimu. Lombenu neyi cheliliyi Nehemiya hampinji yafwilileñayi kuzata mudimu walema nindi: ‘Eyi Yehova, Nakulembeli, . . . ankwashi mwani, ami kambuñeyi.’ (Nehemiya 1:11) Kufumahu, mwatela kumukuhwelela ‘Mukwakutiyilila mwalombañawu antu,’ nakuzata kwesekeja nakulomba kwenu. (Masamu 65:2) Hakwila nawu Yehova yakiswili ñovu jenu hakumukalakela chikupu, mwatela kusambila kuzata nañovu. Chimwafuukulahu kutachika kukalakala mudimu wawupayiniya wampinji yejima, kakelenu kukufuukula kwenu. Mukuhita kwampinji, mukusweja kwiluka yuma nawa muzañalu wenu wukuswejelaku.

Chihandilu Chachiwahi Chikupu

15. (a) Twahetelañamu ñahi kuhitila mukuhosha nikutaña hadi antu anashimbuli muchalala? (b) Shimunenu nsañu yachihandilu chamuntu chayikolesheli chikupu.

¹⁵ Yakufumamwinyi yimwatela kukuhwelela hakwila nkeñelu yaNzambi? Hanjekenu nawambuña aNzambi anashimbuli muchalala, sweje-e ana akalakeli yaaka yayivulu mumudimu wampinji yejima. Ahanda wumi wawuwahi nawa wakuzañalesha. (Yishimu 10:22) Akuyileja nawu Yehova kanda yokañanyeñahu dehi kuyikwasha hela munshakaminu yakala kuwana yuma yakeñeleñawu chikupu niyuma yikwawu. (Afwilipi 4:11-13) Kutachika mu 1955 nakushika mu 1961, The Watchtower yadiña nakusoneka mpanji jadilondashana jadiña nakuhosha hadi antu ashinshika amuchidiwu hamutu wansañu wakwila nawu, “Pursuing My Purpose in Life.” (Kukalakala Nkeñelu Yami muWumi) Kufuma tuhu hayina mpinji, mpanji jayihandilu yawantu yayivulu ayisoneka. Nsañu yejima yamwekeshaña mpwila nimuzañalu yatwanukishaña nsañu yekala mumukanda wamuBayibolu waYililu. Kutaña nsañu yayiwahi yamuchidiwu yikutuleñela kuhosha netu, ‘Ichi dichihandilu chinakeñaña kuhanda!’

16. Chumanyi chaleteshaña nshakaminu yawiniKristu kwikala yayiwahi nawa yamuzañalu?

¹⁶ Aaron yatenawu hakusambila, wanukaña nindi: “Kakavulu nadiña nakuwana anyikwenzi amavulu muAfrica adiña nakutambatamba mwituña dejima nakukeña nkeñelu muwumi. Amavulu hiyayiwanineñaku. Ilaña etu twadiña nakukalakala nkeñelu yaNzambi kuhitila mukutwala hambidi nsañu yayiwahi yaWanta, nawa twadiluñishili nshakaminu yayiwahi niyakala. Twamweni chikupu netu kuhana kwaletaña muzañalu kutambwila kwakuminamu.”—Yililu 20:35.

17. Muloñanyi wutwatelela kukeña kwila nkeñelu yaNzambi makonu?

¹⁷ Ndochu enu? Nkeñelwinyi yimunakukeña? Neyi chakwila himukweti yikonkwanyi yakuspiritu yakuyikwasha kukalakala nkeñelu yaNzambuku, yuma yikwawu yinateli kujikilila mpinji yenu niñovu jenu. Mukukisiladi wumi wenu walema kuyuma yatwalaña hambidi kaayi kaSatana? “Yihuñu oyu yeneni” keña yishiki, maheta akumujimba nimpuhu yamukaayi yikekala yamukunkulwayi. Chuma chikekala chalema hiwulunda wetu naYehova. Owu muzañalu wutukatiya hakwila nawu tunamukalakeli Nzambi niamakwawu nawa tuneli nkeñelu yaNzambi muwumi wetu!—Matewu 24:21; Chimwekeshu 7:14, 15.

[Tumazu twaheshina]

Munateli Kulumbulula?

• Indi Yehova watiyaña ñahi hamudimu wutwamukalakelaña?

• Indi kutoñojoka chikupu nikwesekeja yuma kunateli kutwikwasha ñahi kumukalakela Nzambi niamakwawu?

• Kukoolekanyi kwekalaku kutwatela kukalakala?

• Munjilanyi mutunateli kushakama chihandilu chankeñelu yayiwahi makonu?

[Malwihu aKuzatisha haKudiza]

[Nyevulu yidi hefu 25]

Kwesekeja yuma kwakeñekaña hakwila nawu tutwalekuhu kumukalakela Yehova namuchima wejima

[Nyevulu yidi hefu 26]

Kwekala njila jajivulu jakumuzatila Nzambi