Nyuli Samaheta Wafuukwili Mwabula Kutelela

NYULI wachikwenzi nawa samaheta, wadiña nakashinshi, wovwahilileña nshimbi nawa walemesheli nsakililu. Wenjili kudi Yesu hakumufukamina nakumwihula nindi: ‘Nkuluñaña muwahi, chumanyi chinatela kwila kulonda nakaswani wumi wahaya nyaka?’

Hakwakula, Yesu wahosheli nindi hakuheta wumi, iyala yeniwu wakeñekeleña kuhemba nshimbi jaNzambi. Chamwihwiliyi Yesu kulonda yalumbululi chikupu, Yesu wahosheli nindi: “Kujaha muntu chinjila; kwila wuvumbi chinjila; kwiya chinjila; kushimuna wunsahu wakutwamba chinjila. Lemeshaku tata yeyi nimama yeyi; niniyi yakwila nawu, Keñaku mukwenu neyi chiwadikeña eyi aweni.” Iji jadiña nshimbi jasweja kulema jadiñi hakachi kaNshimbi jamwinkeluwu Mosi. Mukwenzi weyala hakumwila nindi: “Yuma yejimiyi nayihembi dehi, kunashalidi?”—Matewu 19:16-20.

Yesu “hakumukeña” nawa hakumwila nindi: “Kunashali chuma chimu hohu; yaña wakalandishi yuma yeyi yejima winki atuzweñi, eyi wakaheta maheta amwiwulu; winzi wunlondaña.”—Maku 10:17-21.

Hohenohu nyuli wachikwenzi watalañeni nachuma chakala kufuukulahu. Chumanyi chateleleli kwilayi? Komana wateleli kuhana maheta mukudikeñela kulonda kwikala kambanji kaYesu, tahindi kutwalekahu namahetindi? Komana wateleleli kukeña maheta aheseki tahindi maheta amwiwulu? Chumichi chatela chamukalilili kufuukulahu. Wadiña nampwila yayuma yakuspiritu chikupu muloña wahembeli Nshimbi nawa wakeñeli kwila chuma chachiwahi kulonda kwikala nawuselewa waNzambi. Chumanyi chafuukwiluhu? “Hakudiyila kwindi nakuneña; muloña wadiñi muntu waheta maheta amavulu nankashi.”—Maku 10:22.

Nyuli wachikwenzi wafuukwili mwabula kutelela. Neyi chakwila wekalili kambanji washinshika waYesu, chiña watambwilili chuma chakeñeleñayi—wumi wahaya nyaka.  Hitweluka chuma chazatikili kudi ona mukwenzi weyalaku. Hela chochu, tweluka hohu netu chimwahitili yaaka kwakwihi namakumi awana, mashidika aweniRoma ajilumwini Yerusalema niluña deneni daYudeya. A Yudeya amavulu ajimbesheli wumi wawu nimaheta awu.

Kwambukaku nanyuli wachikwenzi, kapostolu Petulu niatumbanji amakwawu afuukwiluhu chachiwahi. ‘Ashiyili yuma yejima’ nakumulondela Yesu. Kufuukulahu kwawu kwayihetesheli chikupu. Yesu wayilejeli nindi akatambwila yuma yayivulu chikupu kubadika yuma yashiluwu kunyima. Kubombelahu, akaswana wumi wahaya nyaka. Afuukwiluhu chuma chiyabuliluwu kutoña chimwahitili mpinji.—Matewu 19:27-29.