Chekala Chakala Kudizoza

ANTU amavulu, anateli kutoñojoka nawu kudizoza hichuma chamukunkulwayi mukaayi kamakonu. Antu alombolaña akwawu chiwahi diwu afwilaña chikupu kubadika akwawu, adinkaña wanta, nawa diwu afwilaña kwikala nayuma yakeñañawu. Antu amavulu akomokaña mpuhu ninshakaminu yamaheta, hiyakomokaña akwakudizozaku. Antu ayilañaku hambidi muchihandilu kakavulu aditiyaña nawu atweshaña kwila mwenimu hamuloña wakuzata nañovu. Chatela kudizoza, adilemeshaña hamuloña wayuma yatweshañawu kwila.

Mukwakusandujola wakuCanada wahosheli ‘hayililu yalwisu nikudisamba yinakuyilaku hambidi’ mwituña dawu. Amakwawu atoñojokaña nawu ashakamaña mwituña mwalemeshawu kudiluñisha chikupu kubadika kulemesha yuma yalema yamuchihandilu nawa amonaña nawu makonu antu adakamenaña aweni hohu. Dichi mukaayi kamuchidiwu kudizoza kunateli kumwekana neyi hichililu chamukunkulwayi.

Ilaña, antu antesha hohu diwu anateli kukaana nawu kudizoza hichililu chachiwahi chineli antu adizoza ekala aswayi kutiyañana nawu. Hela chochu, mukaayi mwekala yililu yakudibecha, amakwawu achinaña nawu neyi ekala adizoza, akuyimona nawu azeya.

Izu daNzambi Bayibolu, yashimwineñahu dehi nawu mumafuku etu antu akekala “akwakudisamba, akwakudinka wanta.” (2 Timotewu 3:1, 2) Komana himunateli kwiteja nenu iwu wuprofwetu wunakushikijewaku? Komana munakutoñojoka nenu chekala chachiwahi kwikala adizoza? Hela munateli kutoñojoka nenu muntu wadikehesha anateli kumumona neyi wazeya, nawa waswayi kumudila hamutu?

Chalala chidi chakwila nawu, Bayibolu yahosha hayuma yayiwahi yitwatela kulemeshela nikwikala adizoza. Bayibolu yahosha hachitwatela kwikala nammwenu yakudizoza nikukolesha antu kwikala adizoza, nawa yamwekesha nawu kudizoza kwalala hichinjikijilu chakwikala akola bayi azeyaku.

[Mwevulu wudi hefu 3]

Twatela kutiya ñahi hayuma yitwatweshaña kukoña?