Komana Mwazatishaña Kukooleka Kudi Kwejima Kulonda Kuhosha haYuma Yimwakuhwelela?

“KOMANA chalala chacheni chekala kwoku?” Iwu diwu wadiña mutu wansañu wachibaba chasonekeluwu hakudibecha kwadiña mwituña daPoland. Nshimbi yamwakusonekela chibaba yadiña nakuhosha nawu: “Hitunakukeña chalala chachenuku. Kwosi muntu wunakuchikeña. Hikwekala chalala chachenuku.” Agata wudi nayaaka 15 watañilaña hashikola yasekondari nawa hiChinsahu chaYehova, wafukwiluhu kuzatisha iku kukooleka kulonda kuhanjeka nawamakwawu yuma yakuhwelelayi munsakililu yawu.

Agata wasambilili kulomba wukwashu waYehova henohu kanda yaloñeshi chibaba chindi, kufumahu watachikili kusandujola nyikanda yahosha hansañu yeniyi. Waweni nsañu yadifwanaku muWatchtower yaJuly 1, 1995. Wasonekeli lwihu lwamwihwiluwu Yesu kudi Pontusi Pilatu nindi: ‘Walala hichumanyi?’ (Yowanu 18:38) Lwihu lwasonekeliyi lwamwekesheli yililu yakujinooka neyi kwiji nakuhosha nawu: ‘Chalala? Hichumanyi? Hikwekala chalalaku!’ Agata wasonekeli nindi, “lwihu lwaPilatu lwamwanukishili nshimbi yachibaba.”

Kuhiñahu, wahosheli hayitoñojoka yinavuliluku yakwila nawu, chuma chikutoñojokayi muntu wumu nindi chalala mukwawu hakuchimona nindi chalalaku nawa wejima wawu anateli kuhosha “mwalala.” Wehwili malwihu adi neyi, “Hinyi hakachi ketu wukwiteja kukandama mundeki neyi hitwatoñojokaña netu nshimbi yahosha hakwenda kwayuma muluzwizu hijalala chikupuku?” Kufuma Agata wahosheli kutalisha haBayibolu nindi: “Kukuhwelela Izu daNzambi kwashindamena hayuma yalala chikupu.” Wahosheli hakuchiñeja kwindi kwakwila nawu, antu afwilaña kuwana chalala chacheni akawana kuwunda kwakuwahi chikupu.

Agata amwinkeli dipuloma yayiwahi nawa wadiña nakukooleka kwakuhosha kumesu awakwawu akashikola. Akwawu akashikola amavulu etejeli kudiza Bayibolu nayena. Agata wukweti muzañalu hakuzatisha iku kukooleka hakulejaku antu amakwawu yuma yakuhwelelayi. Neyi tuzatisha mpinji yidi yejima hakuhosha yuma yitwakuhwelela, kunateli kusoña nyikabu. Kukoolekanyi kumukweti kwakuhosha hayuma yimwakuhwelela?