Kusandujola ‘Muyuma Yanzambi Yakunama’

‘Muloña Spiritu yashinshikaña yuma yonsu, chalala yuma yaNzambi yayeni yakunama.’—1 AKORINDA 2:10.

1. Walalanyi wamuBayibolu waleñelaña atudizi aBayibolu amaha kuzañalala?

 ETU AMAVULU muchipompelu chaweniKristu tunatweshi kwanuka muzañalu wutwatiyili hampinji yitwadizili chalala. Twadizili hanochu ijina daYehova chidekalila dalema, muloña wetejelayi makabi, nimuloña wayilañawu antu amakwawu mwiwulu niyuma yahembelawu muchidi wamuntu wejima washinshika kumbidi. Henohu kanda tudizi yuma yejimiyi twatela twashinshikili muBayibolu, ilaña yuma yeniyi ayijindili kudi etu, neyi chayijindawu kudi antu amavulu. Twadiña neyi muntu wunakushinshika ilola dakorali mumenji. Chakadi kuzatisha chitwa chidi chejima namoni hohu chanti lubanji lwayuma yidi kwishina damenji. Ilaña hamuloña wakuzatisha malolu akujimina nachu hamenji, hela mbopolu yikweti ikalashi heshina, natiyi muzañalu hakumona wulombu wakorali, inshi, anyama amukaluñalwiji niyileñaleña yikwawu yakuhayamisha. Chochimu, hampinji yatachikiluwu kutukwashaku kutiyishisha jiNsona, twamweni katachi ‘yuma yaNzambi yakunama.’—1 Akorinda 2:8-10.

2. Muloñadi muzañalu wakudiza Izu daNzambi chiwambulilaña kukuma?

² Komana tunateli kuzañalala hohu nakwiluka kwalala kwamuBayibolu kwabula kukunama? Nhoshelu yakwila nawu ‘yuma yaNzambi yakunama’ yabombelamu kutiyishisha maana aNzambi yasololawu kudi eniKristu kuhitila mudi spiritu yajila, ilaña ayijinda kudi antu amakwawu. (1 Akorinda 2:7) Maana aNzambi hiyakumañaku nawa tunateli kutiya muzañalu chikupu kuhitila mukukeñakeña  njila jindi! Hitunatweshi kwiluka yuma yejima kutalisha hajinjila jamaana aNzambuku. Muzañalu wutwatiyili hampinji yitwatachikili kudiza chalala chamuBayibolu, wunateli kutwalekahu neyi chakwila tutwalekahu kusandujola ‘muyuma yaNzambi yakunama.’

3. Muloñadi wutwakeñelaña kwilukisha muloña wutwakuhwelela yuma yeniyi?

³ Muloñadi wutwatelela kutiyishishila ‘yuma yakunama’? Bayi neyi kwilukisha hohu yuma yitwakuhwelelaku, ilaña nikwiluka chikupu muloña wutwayikuhwelela, neyi twilaña mwenimu chikuku chetu chachikuhwelelu chikwikala chakola. Nsona jatwikoleshaña kuzatisha ‘wuswa wetu wakutoñojoka’ kulonda ‘kushinshika mwayamuchima waNzambi, diwu wawuwahi, watiyishaña kuwaha, walala chikupu.’ (Aroma 12:1, 2) Kutiyishisha muloña watwilejelañayi Yehova kwenda munjila yayiwahi kwatukoleshaña kufuukulahu kumwovwahila. Hela chochu, kwiluka ‘yuma yakunama’ kunateli kutwinka ñovu yakushinda kweseka kwakudiñija muyuma yatama nikutwileñela kukalakala ‘nyidimu yayiwahi namuzañalu.’—Titusa 2:14.

4. Yumanyi yabombelamu mukudiza kwaBayibolu?

⁴ Hakwila nawu tutiyishishi yuma yakunama chakeñekaña kudiza. Hela chochu, kudiza hikunesekani nakutaña nsañu yabula kulemaku. Kwabombelamu kushinshika hansañu chiwahi kulonda kumona neyi yinesekani nayuma yitweluka dehi. (2 Timotewu 1:13) Chakeñekaña kutiyishisha muloña wuyanahosheluwu yuma yeniyi. Kudiza kwaBayibolu kwatela kubombelamu kutoñojoka chikupu hachitwatela kuzatisha yuma yitunakudiza hampinji yitunakufuukulahu chiwahi nihampinji yitunakukwasha amakwawu. Nawa, chineli ‘Nyikanda yajila yejima ayonena dehi kudi Nzambi; yayiwahi,’ kudiza kwetu kwatela kubombelamu “mazu ejima akufuma mukanwa kaNzambi.” (2 Timotewu 3:16, 17; Matewu 4:4) Kudiza kwaBayibolu kwakeñekaña kuzata nañovu! Ilaña kunateli kuleta muzañalu, nawa kutiyishisha ‘yuma yaNzambi yakunama’ hikwakala nankashuku.

Yehova Wakwashaña Adizoza Kutiyishisha Yuma

5. Anyi anatweshi kutiyishisha ‘yuma yaNzambi yakunama’?

⁵ Hela chakwila himwadizili shikolaku nawa himwelukisha chakudizaku, bayi mutoñojoka nenu munatweshi kukañanya kutiyishisha ‘yuma yaNzambi yakunamaku.’ Hampinji yadiñayi Yesu namudimu wakushimwina hamaseki, Yehova wasolweli kutiyishisha hankeñelu Yindi, bayi neyi kudi akwamaana nikudi antu ashinshikaku, ilaña kudi abula kutaña nawa abula kulema, adiña adizoza kulonda kuyidizisha kudi kambuña aNzambi. Amwekeni neyi hiyanyikeki neyi kuyesekeja nawantu adizili mumashikola. (Matewu 11:25; Yililu 4:13) Kapostolu Pawulu wasonekeleli akwawu akwakwitiya nindi: ‘Nzambi waloñeshela dehi antu amukeña yuma; Ilaña Nzambi natumwekesheli naspiritu yindi. Muloña spiritu yashinshikaña yuma yonsu, chalala yuma yaNzambi yakunama.’—1 Akorinda 2:9, 10.

6. Indi 1 Akorinda 2:10 yinatalishi mudihi?

⁶ Munjilanyi spiritu yaNzambi muyashinshikilaña ‘yuma yonsu, chalala yuma yaNzambi yakunama’? Chatela kwinka mwiniKristu wudi wejima chimwenu chachalala, Yehova wazatishaña spiritu yindi hakulombola kuloñesha kwindi, kwaleñelaña antu jaNzambi anuñañana kutiyishisha Bayibolu. (Yililu 20:28; Aefwesesa 4:3-6) Kunyeñumuka kaayi kejima, yipompelu yejima yadiluñishaña progiramu yoyimu yakudiza kwaBayibolu. Hayaaka yayivulu yinahituhu yipompelu yinadizi yuma yamboka-mboka  kutalisha hayuma yatañishaña Bayibolu. Spiritu yajila yakalakalaña muchipompelu kulonda kukwasha antu kwikala nayililu yakeñekaña hakutiyishisha ‘yuma yaNzambi yakunama.’—Yililu 5:32.

Yuma Yabombela ‘muYuma yaNzambi yaKunama’

7. Muloñadi antu amavulu chiyabulilañawu kutiyishisha ‘yuma yaNzambi yakunama’?

⁷ Hitwatela kutoñojoka netu ‘yuma yakunama’ yakala kutiyishishaku. Kwiluka ‘yuma yaNzambi yakunama’ kwakala kutiyishisha kudi antu amavulu, bayi neyi hamuloña wakwila maana aNzambi akala kuyilukaku, ilaña hamuloña wakwila Satana wadimbaña antu kulonda kukaana wukwashu waloñeshañayi Yehova kuhitila mukuloñesha Kwindi.—2 Akorinda 4:3, 4.

8. Yumanyi yakunama yateneniyi Pawulu mukapetulu kamuchisatu kamukanda windi wasonekeleliyi aEfwesesa?

⁸ Mukanda waPawulu wamuchisatu wasonekeleliyi aEfwesesa wamwekesheli nawu ‘yuma yaNzambi yakunama’ yabombelamu yuma yayivulu yalala yatiyishishañawu ambuña aYehova chiwahi, chidi neyi chinjikijilu chaLubutu lwakaninuwu, kusakula kwawantu kufuma munyichidi yawantu kulonda kwikala nakuchiñeja kwakushakama mwiwulu nihaWanta wawuMesiya. Pawulu wasonekeli nindi: “Yabulili kutiyakeshawu kudi antu ahanyaka yacheñi, neyi chanayimwekeshuwu makonu kudi apostolu jindi ajila niatuprofwetu twindi mudi spiritu. Chakwila nawu aJentili anekali dehi akwakuswanina hamu nawu, anekali dehi nawa yidi yamujimbowu, akwakutambwila hamu chikaninu chamudi Kristu Yesu.” Pawulu wahosheli nindi, anamutemeshi kulonda “akamwekeshi kudi antu ejima mwekalila nsañu yakujinda yajindiluwu nyaka yejima mudi Nzambi.”—Aefwesesa 3:5-9.

9. Muloñadi kutiyishisha ‘yuma yaNzambi yakunama’ chikwekalila hikukooleka?

⁹ Pawulu watwalekeluhu cheñi kulumbulula hankeñelu yaNzambi nindi, ‘mumawulu, maana aNzambi eñi naeñi, akayilukisha katataka muchipompelu.’ (Aefwesesa 3:10) Añelu ahetelaña kuhitila mukushinshika nikutiyishisha maana aYehova chazatañayi nachipompelu chawiniKristu. Tukweti kukooleka kwakutiyishisha yuma yatiyañawu kuwaha añelu! (1 Petulu 1:10-12) Kuhiñahu, Pawulu wahosheli nindi twatela kuzata nañovu kulonda ‘tukwati ñovu yakushinshika mwaya kutoha, nikuleha, nikuleha kwiwulu, nikukunama’ kwachikuhwelelu chawiniKristu. (Aefwesesa 3:11, 18) Ichi twayenu tushinshiki hayakutalilahu yayuma yakunama yitwabulili kwiluka hakusambila.

Yakutalilahu yaYuma yaKunama

10, 11. Kwesekeja naNsona, mpinjinyi yekalili Yesu mbadi yalema ‘yalubutu’ lwamwiwulu ‘lwamumbanda’ waNzambi?

¹⁰ Tweluka netu Yesu himbadi ‘yalubutu’ lwalema ‘lwamumbanda’ wamwiwulu waNzambi yatenawu haKutachika 3:15. Hakwila nawu tutiyishishi chikupu twatela kudihula netu: ‘Mpinjinyi yekaliliyi Yesu Lubutu lwakaninuwu? Komana yadiña henohu kanda yenzi hamaseki, indi hakusemuka kwindi hamu neyi muntu, hela hachipapatishu chindi, tahindi hampinji yamusañwiluwu?’

¹¹ Nzambi wakanini nindi mbadi yamwiwulu yakuloñesha kwindi, yatenawu muwuprofwetu hamu neyi “mumbanda” wakavwala lubutu lwakamuchika kapela kumutu. Ilaña yaaka yayivulu yahitiluhu, nawa mumbanda waNzambi havwalili lubutu lwatwesheli kumujilumuna Satana ninyidimu yinduku. Dichi, kaprofwetu Isaya wamuteneni nindi “nshinta” nawa ‘watiyili chikela mumuchima.’ (Isaya 54:1, 5, 6) Nkumininaku, Yesu wavwalikilili muBetelemi. Hanyima yakwila Yesu anamuwayishi dehi naspiritu yajila nakwikala mwana wukweti wubwambu walema naNzambi, Yehova wabidikili nindi: “Diyi Mwanami.” (Matewu 3:17; Yowanu 3:3) Nkumininaku, mbadi ‘yalubutu’ lwalema lwamumbanda lwadimwekesheli. Kufumahu, atumbanji twaYesu niwena ayiwayishili nikuvwalika naspiritu yajila. ‘Mumbanda’ waYehova watiyili hayaaka yayivulu neyi “nshinta wabulilaña kuvwala anyana” nkumininaku ‘wembili tumina.’—Isaya 54:1; Aŋalija 3:29.

12, 13. Nsonanyi yamwekeshaña nawu eniKristu ejima awayishewa heseki atuña ‘nduñu wamaana nikashinshi’?

 ¹² Chakutalilahu chamuchiyedi chayuma yakunama yatwimwekeshelawu, yatalisha hankeñelu yaNzambi yakusakula a 144,000 hakachi kamuchidi wamuntu. (Chimwekeshu 14:1, 4) Tweluka nikukuhwelela chikupu netu, awayishewa ejima adi hamaseki hampinji yidi yejima atuñewa hamu neyi ‘nduñu wamaana nikashinshi’ yahosheliyi Yesu nindi wakaloñeshelaña “yakudya” amwitala dindi. (Matewu 24:45) Nsonanyi yamuBayibolu yinakumwekesha nawu iku kutiyishisha kwalala? Komana Yesu wadiña nakutena mwiniKristu wudi wejima wukumukolesha mana kwindi nayakudya yakuspiritu?

¹³ Nzambi walejeli muza waIsarela nindi: “Yenu ayinsahu jami, nikambuñami inatondi.” (Isaya 43:10) Hanisani 11 muchaaka cha 33 C.E., Yesu walejeli anlomboli awaIsarela nindi Nzambi wakaanini muza wawu kubula kwikala ambuñindi. Wahosheli nindi: ‘Wanta waNzambi akayamukawu, akawinka muza wakasoñaña nyikabu yawu.’ Yesu walejeli izaza nindi: “Talenu itala denu anayishiyilidu dehi.” (Matewu 21:43; 23:38) Hamu neyi añamba jaYehova, itala daIsarela hidadiña dashinshika hela damaanaku. (Isaya 29:13, 14) Nkumininaku, dodina ifuku Yesu wehwili nindi: ‘Nduñu wamaana nikashinshi hinyi’? Dichi wadiñi nakwihula nindi, ‘Muzanyi wamaana wakahiña Isarela kwikala nduñu waNzambi wakashinshi?’ Kapostolu Petulu wakwili hampinji yalejeliyi chipompelu chaweniKristu awayishewa nindi: ‘Hakwila enu mumuza wajila, antu ambala.’ (1 Petulu 1:4; 2:9) Muza wakuspiritu, “aIsarela ambala a Nzambi” ekalili anduñu aYehova amaha. (Aŋalija 6:16) Neyi chochekalili Isarela wakushankulu ‘kambuña’ kamu, dichi nieniKristu ejima awayishewa hamaseki hampinji yimu ekalili ‘nduñu wamaana nikashinshi’ wumu. Hikukooleka kweneni hama hakutambula “yakudya” kuhitila mudi nduñu yaNzambi!

Tunateli Kudiluñisha Kudiza Kwahalwetu

14. Muloñadi kudiza kwaBayibolu chikwaletelaña muzañalu kubadika kuyitaña hohu?

¹⁴ Neyi atwileja kutiyishisha kwakuha kwamuNsona twekalaña amuzañalu hamuloña wakwila chikuhwelelu chetu chakoleshewaña. Dimuloña wutwadiluñishilaña kudiza kwaBayibolu, kubadika kutaña hohu. Dichi neyi tunakutaña nyikanda yawiniKristu twatela kudihula netu: ‘Indi iku kulumbulula kunesekani ñahi nakunadizili kunyima kutalisha haniyi nsañu? Mazwinyi amakwawu amuNsona hela malwihu yinateli kutoñojokahu anateli kukwasha chikupu iku kukunkulula kudi munichi chibaba?’ Neyi munakukeña kusandujola hayuma yikwawu, sonekenu lwihu lumunakukeña lwakulewi, nikuyilisha kwikala chikonkwanyi chakudizahu hampinji yakumbidi.

15. Yikonkwanyinyi yakudiza yinateli kuyiletela muzañalu nawa munjilanyi muyinateleli kuyihetesha chikupu?

¹⁵ Chikonkwanyinyi chakudiza chinateli kuyiletela muzañalu wakutiyishisha yuma yayiha? Tunateli kuyilaku hambidi mukutiyishisha, chakutalilahu kuhitila mukudiza chikupu yikaninu yamboka-mboka yazatishayi Nzambi kulonda muchidi wamuntu wuhetelumu. Chikuhwelelu chetu chinateli kukolelaku neyi tudizaña wuprofwetu watalisha hadi Yesu Kristu hela kutañaña vasi nivasi hawuprofwetu wamunyikanda yamuBayibolu. Chikuhwelelu chetu chinateli kukolelaku cheñi neyi tutañaña munsañu yamakonu yawaYinsahu jaYehova, kuzatisha mukanda waJehovah’s Witnesses—Proclaimers of God’s Kingdom, neyi tukweti mukanda weniwu mwidimi detu. * Cheñi kuhituluka  muyuma yitwadizili kunyima yidi neyi “Malwihu Kufuma Kudi Antañi” yasonekañawu muKaposhi Kakutalila anateli kutuleñela kutiyishisha nsañu jikwawu. Sonekenu yikuma yalema yayitoñojoka yinazatishewi muNsona kulonda kwiluka ñakwilu. Chumichi chikuyikwasha kufumba ‘yitoñojoka yenu’ nikwikala nakashinshi. (Aheberu 5:14) Hampinji yimunakudiza, mwatela kusoneka yikuma muBayibolu yenu hela hachipapilu kulonda kuhetela chikupu mukudiza kwenu hamu nanowu yimunakukwasha.

Kwashenu Atwansi Kudiluñisha Kudiza Bayibolu

16. Munjilanyi mumunateleli kukwashila atwansi kudiluñisha kudiza kwaBayibolu?

¹⁶ Anvwali atela kukwasha anyanawu kwikala nampwila yakwikala amabwambu jaNzambi. Bayi mutoñojoka nenu yuma yakunama yakala chikupu kutiyishisha kudi atwansuku. Neyi chakwila muyinka atwansi mudimu wakusandujola hayuma yimu kulonda kuloñesha kudiza kwaBayibolu kwachisaka, mwatela kuyihula hayuma yinadiziwu. Kudiza kwachisaka kwatela kubombelamu cheñi yibalu yakudiza chakukwasha atwansi chakuhakwila chikuhwelelu chawu nikwiluka nawu yuma yayidizishawu yalala. Kubombelahu mwatela kuzatisha broshuwa ‘yaSee the Good Land’ * kulonda kudizisha matuña niyuma yikwawu yamuBayibolu nikulumbulula yuma yimwadizaña mukutaña kwaBayibolu kwamulungu nimulungu.

17. Muloñadi chitwakeñekelaña kwesekeja yikonkwanyi yetu yakudiza kwaBayibolu kwahalwetu?

¹⁷ Yikonkwanyi yakudiza kwaBayibolu kwahalwenu yayiwahi nawa yazañaleshaña nikukolesha, ilaña mwatela kubabala muloña yinateli kuyimanishila mpinji yakuloñesha kupompa kwahachipompelu. Kupompa hinjila yimu yatwidizishilañamu Yehova kuhitila mudi ‘nduñu wamaana nikashinshi.’ Hela chochu, kusandujola kunateli kuyikwashaku kwakula yikuma yayiwahi hakupompa—chakutalilahu, haKudiza kwaMukanda haChipompelu hela hampinji yakuhosha yikuma yamaneni yakutaña kwaBayibolu kwamulungu nimulungu hakupompa kwaShikola yaMudimu waTeokalatiki.

18. Muloñadi ñovu yakeñekaña hakudiza ‘yuma yaNzambi yakunama’ chiyalemena?

¹⁸ Kudiza Kwezu daNzambi kwahalwenu kwakunama kunateli kuyikwasha kuswila kwakwihi naYehova. Hakumwekesha kulema kwakudiza kweniku, Bayibolu yahosha nawu: “Maana hichuma chakudihemba nachu, neyi chaneluwu mali hichuma chakudihemba nachu; ilaña kwiluka yuma chasweja kuwaha muloña maana ahembaña wumi wamuntu wayiheta.” (Mukwakutaŋisha 7:12) Hela chochu, ñovu yakeñekaña hakutiyishisha chalala chaNzambi yekala yalema chikupu. Bayibolu yashiika owu asandujolaña nawu: ‘Mwakawana kwiluka kutalisha hadi Nzambi.’—Yishimu 2:4, 5.

[Tumazu twaheshina]

Munateli Kulumbulula?

• Indi ‘yuma yaNzambi yakunama’ hiyumanyi?

• Muloñadi kudiza kwayuma yakunama chikwabulilaña kukuma?

• Muloñadi eniKristu ejima chiyekalila namuzañalu wakutiyishisha ‘yuma yaNzambi yakunama’?

• Munatweshi kuhetela ñahi chikupu ‘muyuma Nzambi yakunama’?

[Malwihu aKuzatisha haKudiza]

[Mwevulu wudi hefu 28]

Mpinjinyi yekalili Yesu Lubutu lwachikaninu?

[Mwevulu wudi hefu 31]

Anvwali atela kuleja anyanawu kusandujola hayuma yakudizawu kulonda kuloñesha kudiza kwachisaka