Dizishenu Mwanenu Kwikala Wawunda

Nicole wudi nayaaka yitanu nayisatu watiyili kuwaha hama chelili chisaka chawu chakeñeleña kutuntukila kwiluña dacheñi dadilehi nawa mpinji yejima wadiña nakumuleja ibwambu dindi wakeñeliyi chikupu Gabrielle hayuma yejima. Ifuku dimu, Gabrielle wamulejeli Nicole chakumukasumwisha nindi hadiñi hakameneni kutalisha hakutuntuluka kwinduku. Chumichi chamuhilishili Nicole chikupu, nawa wamulejelimu mama yindi nindi, “Hinakukeña kumumona Gabrielle cheñuku!”

KUKALA kwawatwansi kudi neyi kwaNicole naGabrielle kwakeñekaña kukwimanisha kudi anvwali—bayi neyi kuwundisha hohu kuzuwaku ilaña nikumwekesha chakumanisha kukala kweniku. Atwansi chiyekalawu amwekeshaña “[yaaku] yawansi,” nawa kakavulu hiyelukaña niwubanji wafumaña mumazu hela yuma yelañawuku. (1 Akorinda 13:11) Akeñaña wukwashu wunateli kuyileñela kwikala nayililu yinateli kuleta kuwunda nawantu amuchisaka niamakwawu.

Anvwali akwaKristu akeña kudizisha anyanawu chikupu ‘kukeñakeña kuwunda nikukuhaña chakuhaña.’ (1 Petulu 3:11) Muzañalu wafumaña mukwikala mukwakuleta kuwunda wabadika kulema kwikala nawuswa wakukeña kushinda yitoñojoka yakujinooka, kuhila nikudihela. Neyi wudi nvwali, wunateli kudizisha ñahi anyaneyi kwikala awunda?

Kwashenu aNyanenu Ekali naMpwila yaKumuzañalesha “Nzambi waKuwunda”

Yehova amutenaña nawu “Nzambi wakuwunda” nawa amwiluka hamu neyi Nzambi ‘wahanaña kuwunda.’ (Afwilipi 4:9; Aroma 15:33) Dichi anvwali akweti kashinshi azatishaña Izu daNzambi Bayibolu munjila yakubabala kulonda kuyilisha anyanawu kwikala nampwila yakumuzañalesha Nzambi nikwimbujola yililu yindi. Chakutalilahu, kwashenu anyanenu kuhitila mukufwikija hayuma yamweniyi kapostolu Yowanu muchimwenu—wamweni kansuluñunda kalubanji kelola daemeraladi damenji amatamba kanyeñumukili kwitanda daYehova. * (Chimwekeshu  4:2, 3) Lumbululenu nenu kansuluñunda kenaka kanakwimenaku kuwunda kukwetiyi Yehova nawa nenu nkisu yeniyi akayihana kudi ejima amwovwahilaña.

Yehova walombolaña cheñi kuhitila mudi Mwanindi, Yesu, yatenañawu nawu “Kalamba wakuwunda.” (Isaya 9:6, 7) Dichi, tañenu nikuhanjeka nawanyanenu hansañu yamuBayibolu yahosheliyi Yesu kutalisha hayuma yalema yakutondolwela kubobola nikutadika. (Matewu 26:51-56; Maku 9:33-35) Yilumbulwilenu chamuleñeleleli Pawulu kwikala “mukwawinyi,” chelili nahimpi yililu yindi wasonekeli nindi ‘nduñu yaMwanta, chinjila kufwila ntadi, chiña ekali wamwovu nawantu ejima, . . . ekali akwakudiyula kukutama.’ (1 Timotewu 1:13; 2 Timotewu 2:24) Mwanenu nateli kutiyilila chachiwahi kubadika chimwatoñojokaña nawu hanateliku.

Evan wanukili nindi ansupishili hampinji yadiñayi nayaaka yitanu nayiyedi kudi kansi weyala mubasi yashikola. Wahosheli nindi: “Nahilili chakwila nakeñeleña hohu kufuntisha katama nakatama. Kutwala muna, nanukili nsañu yitwadizili kwitala kutalisha kudi antu avulumunaña ndombu. Nelukili nami Yehova hakeñaña nindi nili ‘mwinami katama nakatama kanañiliyuku’ chiña ‘kushakama chachiwahi nawantu ejima.’” (Aroma 12:17, 18) Evani wakolesheweli nawa womikili nakumanisha kukala kweneni kuhitila mukwakula munjila yakuwunda. Wakeñeleña kumuzañalesha Nzambi wakuwunda.

Nvwali Watela Kwikala waWunda

Komana hetala denu hekala kuwunda? Neyi hekala kuwunda, anyanenu anateli kudiza yuma yayivulu kutalisha hakuwunda kuhitila mukushinshika yuma yimwelaña. Kudizisha anyanenu chikupu kwikala awunda, kwashindamena nankashi hachipimu chimwembujolaña yililu yakuwunda yaNzambi niKristu.—Aroma 2:21.

Russ niCindy azataña nañovu hakudizisha anyanawu ayedi awamayala, nikuyikolesha kulonda amwekesheña yililu yakukeña neyi chakwila akwawu anayivuloki. Cindy wahosheli nindi, “Yililu yamwekeshaña Russ ninami kudi anyanetu niantu amakwawu neyi kunamwekani kukala yazatikaña chikupu kutalisha munjila yamanishilañamu anyanetu kukala kwadifwanaku.”

Hela chakwila munaluwañeshi ilukenu nenu anvwali ejima aluwañeshaña—munateli kuzatisha kukooleka kweniku kulonda kudizisha anyanenu yuma yalema. Stephen wetejeli nindi: “Kwadiñi mpinji jikwawu jitwazuwileña chikupu nañodami Terry nakuyibabesha anyanetu henohu kanda twiluki walala wejima. Chumichi neyi chineliki, twadiña nakudanakena.” Terry wabombeleluhu nindi: “Twadiñi nakuyileja anyanetu kulonda eluki nawu ninetu hitwaloñaku, nawa twaluwañeshaña. Chumichi bayi neyi chaleta hohu kuwunda muchisaka chetuku ilaña chakwashili anyana kudiza chakwikala awunda.”

Komana anyanenu anakudiza chakwikala awunda kuhitila mukushinshika chimwayihembaña? Yesu wahosheli hatooka nindi: “Dichi yejima yimunakeñi antu kuyililenu, ninenu nawa yililenu mwomumu.” (Matewu 7:12) Hela chakwila mwaluwañeshaña, mwatela kwiluka nenu kukeña kumwamwekeshaña kudi anyanenu kwakasoña nyikabu yayiwahi. Anyanenu akatiyilila chikupu neyi chakwila muyilombola kuhitila munjila yakukeña.

 Labenu Kuzuwa

Yishimu 19:11 yahosha nawu: “Kutoñojoka kashinshi kwatoñojokañayi muntu kwamulabishaña kuzuwa.” Munatweshi kukwasha ñahi anyanenu kwikala naniyi yitoñojoka? David walumbulwili njila yayiwahi chikupu yawanawu kwikala yayiwahi kuzatisha nañodindi Mariann kudi mwanawu weyala niwamumbanda. David wahosheli nindi: “Neyi anayihilishi kudi muntu hela kuyikatisha kumuchima, twayikwashaña kulonda kwikala namuchima waluwi. Twayihulaña malwihu apela adi neyi: ‘Muntu yeniwu wazeya? Indi watiya ichima? Hamwaha amutiyisha kumuchima kutama?’” Mariann wabombeleluhu nindi, “Kwila mwenimu kwawundishaña nyichima yawanyana chatela atwalekuhu kuhila kutalisha hansañu yeniyi hela kuditadikisha nakukeña kwiluka waluwañesha nawabula kuluwañesha.”

Kudizisha kwamuchidiwu kweletaña yakufumamu yayiwahi hama. Toñojokenu munjila yamukwashililuwu Nicole yatenawu hakutachika kwanichi chibaba kudi mama yindi Michelle. Amukwashili kubadi hakufuntisha hohu wubwambu wawu naGabrielle. Michelle wahosheli nindi: “Twatañili hamu naNicole kapetulu 14 kamukanda waLearn From the Great Teacher.” * “Kufumahu nalumbulwili mwatalishiliyi Yesu hampinji yahosheli nindi twatela kwanakena muntu ‘mapampa makumi atanu nayedi.’ Hanyima yakutiyilila chinakulumbululayi Nicole, namukwashili kulonda kutiyishinsha muloña waneñeleliyi Gabrielle nikutiya chikela hakumona ibwambu dindi wakeñeshayi hakukukila kwiluña dadilehi.”—Matewu 18:21, 22.

Yitoñojoka yayiha yaNicole kutalisha hachuma chamuletesheli Gabrielle kuhila yamukwashili Nicole kwikala nayitoñojoka yakutoñojokelaku akwawu nawa yamuleñeleli kumutemeshela Gabrielle  nshiña kulonda kudanakena. Michelle wahosheli nindi, “Kufuma tuhu hayina mpinji, Nicole wekala wamuzañalu hakutoñojokelaku akwawu nikuyilila yuma yayiwahi kulonda kuyitiyisha kumuchima kuwaha.”—Afwilipi 2:3, 4.

Kwashenu anyanenu kubula kuhila swayi hamuloña wayiluwa nikubula kutiyishisha. Kwila mwenimu chikayileñela kwikala amuzañalu hakumona anyanenu anakumwekesha yililu yakukwasha amakwawu nikutiyila antu luwi.—Aroma 12:10; 1 Akorinda 12:25.

Koleshenu Kulema kwaKwanakena

Yishimu 19:11 yahosha nawu “Kulema . . . yowu kudiwula mwanavulumuni mukwenu.” Mpinji yakabakeniyi Yesu chikupu, wembujoleli Tata yindi nikumwekesha yililu yakwanakena. (Luka 23:34) Anyanenu anateli kudiza kulema kwakwanakena neyi chakwila eluka nawu ninenu mwayanakenaña.

Chakutalilahu, Willy wudi nayaaka yitanu wakeñeli kusoneka nyevulu nawulombu hamu nankaaka yindi wamumbanda. Hampinji yimu, Nkaaka yindi walekeli kusoneka nawulombu, nakumuzuwila Willy chikupu yodinyamukila nikudinyamukila. Willy waneñeli chikupu. Tata yindi Sam wahosheli nindi: “Nkaaka yaWilly wakata musoñu waAlzheimer. Dichi twamulumbulwilili Willy kuhitila mukuzatisha mazu apela kutiyishisha.” Hanyima yakumwanukisha Willy nawu amwanakena kapampa kakavulu nawa niyena watela kwila momumu, Sam wahayamini hayililu yamwekesheliyi Willy. Sam wahosheli nindi: “Toñojokenu chitwatiyili namwinikwami, iku tunakushinshika mwanetu wanyanya nakuya kudi nkaaka yindi wadiñi nayaaka 80, nakuhosha nindi munjila yakudanakena, nikumukwata kuchikasa kulonda kufunta hamesa.”

Hichuma chalema nankashi neyi anyana adiza ‘chakwovwahila’ kukala niyiluwa yawakwawu nawa nikuyanakena. (Akolose 3:13) Hela chakwila antu akuhila mumushikila, mwatela kuyileja anyanenu nenu kwakula munjila yakuwunda kwekala kwalema, muloña “neyi mwelañayi muntu mwamutiyishaña Yehova kuwaha hela tuhu ayilumbu jindi wayimweneshaña akabuli ndombu nayena.”—Yishimu 16:7.

Twalekenuhu kuKwasha Mwanenu Kwikala waWunda

Neyi anvwali azatisha Izu daNzambi hakufumba anyanawu, ‘mukuwunda’ nawa hamu neyi ‘akeñaña kuwunda’ dikwila nawu anakukwasha anyanawu chikupu. (Yakoba 3:18) Anvwali amuchidiwu adizishaña anyanawu yuma yakeñekaña hakwila nawu amanishi kukala nawa nikwikala awunda. Chumichi chayileñelaña kwikala amuzañalu chikupu munshakaminu yawu yejima.

Dan niKathy akweti nyana yisatu yakalakalaña chiwahi lwakuspiritu. Dan wahosheli nindi: “Hela chakwila chadiña chakala hakuyidizisha hampinji yadiñawu atwansi, tukweti muzañalu hakumona anyanetu anakuzata chiwahi mumudimu waYehova. Chayinu mpinji atiyashanaña chiwahi nawakwawu, nawa anakenaña akwawu neyi kunamwekani kukala.” Kathy wahosheli nindi, “Chumichi chatwikoleshaña chikupu, chineli kuwunda kwekala hakachi kanyikabu yaNzambi yakuspiritu.”—Aŋalija 5:22, 23.

Dichi hamuloña wayuma yalema, hamu neyi anvwali akwaKristu himwatela ‘kuleka’ hela “kuzeya” kudizisha anyanenu kulonda kwikala awundaku, hela chakwila hakutachika hiyanateli kudiza mukunyakashanaku. Hampinji yimunakukoña mwenimu mwatela kukuhwelela nenu “Nzambi wela nikukeña nikuwunda wukwikala nanenu.”—Aŋalija 6:9; 2 Akorinda 13:11.

[Tumazu twaheshina]

[Chikasha/Mwevulu wudi hefu 14]

KOMANA HICHAKUTALILAHU CHACHIWAHI?

Chibaba chasonekeluwu kudi akakwilukisha nsañu yahachikunzulemba hamutu wahosheleña nawu “Yisela yaNdombu haYikuzulemba” yahosheli nawu: “Yitoñojoka yakwila nawu ndombu diyi njila yakumanishilamu kukala, ayikonkomwenaña muyisela mwamwekeshañawu chiluwañimbi nimukwakushinda anakutwalekahu kuzuña.” Mapesenti kwakwihi na 10 hohu jifilimu nitumina twahavidiyo diwu amwekeshaña yuma yatama yafumaña mumadombu. Ilaña chibaba chahosheli nawu, “ndombu ayimwekesheli neyi yaloña, nawa yayiwahi, hiyatwesheli kuyitondolwelaku, diyi njila yakumanishilamu kukala chikupu.”

Komana munamoni muloña wumwatelela kukeheshaku kutala chisanji chanyivwimbimbi hetala denu? Bayi mwiteja yisela yahayikuzulemba kuzeyesha ñovu jenu jakudizisha anyanenu kulonda kwikala awundaku.

[Mwevulu wudi hefu 12]

Dizishenu anyanenu kwikala nampwila yakuzañalesha “Nzambi wakuwunda”

[Mwevulu wudi hefu 13]

Zatenu nañovu kulonda mwololi nhoshelu niyililu yakatishaña kumuchima

[Mwevulu wudi hefu 15]

Anyanenu atela kudiza kudanakena nikwanakena