Chitwa Chejima Chikayichililawu Hichikatweshaku
Chitwa Chejima Chikayichililawu Hichikatweshaku
‘Chitwa chejima chikayichililawu hichikatweshaku.’—ISAYA 54:17.
1, 2. Indi yakutalilahu yawaYinsahu jaYehova mwituña daAlbania yamwekeshaña ñahi walala waIsaya 54:17?
YAAKA yinahituhu, kwadiñi izanvu dimu daweniKristu abula woma mwituña danyanya damapidi kukabadi kamusela waEurope. Nfulumendi yawaKomyunisiti yabula kukuhwelela mudi Nzambi yazatili nañovu kulonda ayijilumuni. Hela chakwila ayiyandishileña, kuyisha muyilombu yakuyandishilamu, nikuyitwambila hayikuzulemba, chumichi hichayikañesheluku. Hiyanyi wenawa dinu? Adiña aYinsahu jaYehova mwituña daAlbania. Hela chakwila chayikalilileña nankashi kuwanika kukupompa hamu nikushimwina, atwalekeluhu hadi yaaka yayivulu nawa chinaleteshi wuKristu kutiyakana nikulemeshewa niijina daYehova anakudihameka. Chaaka chinamani, hakuhana kasanji kawu kamutayi kakaha, Chinsahu wumu wunakalakali hadi yaaka yayivulu nakashinshi wahosheli nindi: “Hela chakwila Satana wukwasa njita yamuchidinyi, hatweshaña kushindaku, ilaña Yehova wukatwalekañahu nakushinda!”
2 Yuma yejimiyi yinakumwekesha kushikijewa kwawalala wachikaninu chaNzambi kudi antu jindi chasonekawu ha Isaya 54:17 nawu: “Hikwakekala chitwa, chakachilawu nawu akukatishi nachu, chakakolaku. Madimi ejima akakunyamukila nawu akusompeshi, wakayitanyisha.” Nsañu yanyaka yinakumwekesha nawu kwosi chikwila ituña daSatana chikatwesha kukañesha antu jindi adihana kudifukula kudi Yehova Nzambuku.
Satana Watuñaña Yitwa, Ilaña Hatweshañaku
3, 4. (a) Yumanyi yinadibombeli muyitwa yaSatana? (b) Munjilanyi munakañenyi yitwa yaDiyabolu?
3 Yitwa yazatishañawu hakukabisha akwakudifukula alala yinabombelumu kulekesha mudimu wakushimwina, kuyandishewa, kuyikasa, ‘niyuma yatama yelaña nshimbi.’ (Masamu 94:20) Chayinu mpinji, mumatuña amakwawu aYinsahu jaYehova anakudiza achinu chibaba, awa eniKristu alala ‘anakuyeseka’ hamuloña wakwikala ashinshika kudi Nzambi.—Chimwekeshu 2:10.
4 Chakutalilahu, kasanji kamu kamutayi kawaYinsahu jaYehova kashimwini nawu muchaaka chimu hohu, kwadiñi nsañu 32 jakuhumpula ambuña aNzambi hampinji yadiñuwu mumudimu wakushimwina. Kubombelahu, kwadiñi nyiloña 59 yawakapokola akasili aYinsahu dikwila nawu, atwansi niakulumpi, amayala niambanda, adiñi nakushimwina hatooka. Amakwawu ayifwachikishili, nikuyikwata nyevulu, nikuyisha mukaleya nawu hiyambanji. Amakwawu niwena ayitiyishaña woma nakuyiyandisha lwakumujimba. Mwituña dikwawu, mudi nyiloña yasonekawu yakubadika ha 1,100 yawaYinsahu jaYehova anakukasawu, afweteshañawu, hela ahumpulañawu. Nawa nyiloña yakubadika ha 200 yamwekeni hefuku dapompeluwu nakwanakana kufwa kwaYesu! Ilaña, spiritu yaYehova yinayikwashi antu jindi kupuluka hela chakwila anakumona makabi asweja, mumatuña wenawa nimumatuña acheñi. (Zekariya 4:6) Hela chakwila ayilumbu akusweja ndulu, hiyakutwesha kumwenesha ana anakumushimeka Yehovaku. Eñañi, tunakuhweleli netu kwosi chitwa chikutwesha kufwomona nkeñelu yaNzambi.
Madimi Akutwamba Anayitanyishi
5. Madiminyi akutwamba anyamukilili antu jaYehova munkulakaji yamwaka watachi?
5 Isaya waprofweteli nindi antu jaNzambi akatanyisha madimi ejima akayinyamukila. Munkulakaji yamwaka watachi, eniKristu ayitwambilileña chikupu, nakuyitena nawu akwakuluwalala. Nsañu yidi haYililu 16:20, 21 yinakulumbulula chayitwikileñawu nyiloña nawu: “[Awa amayala] hiyatuvuba adi nakukabisha nankashi ñanda yetu. Hiyakutuleja yaaku, kuyitambula hela kuyovwahila kudetu aRoma chinjila.” Mpinji yikwawu, akwankunyi ansakililu esekeli kusañumuna anyuli amusumba kulonda afwomoni atumbanji twaKristu, nakuhosha chakola nawu: “Wenawa hiyatuvuba anavunduli mpata yamunu mwishina yejima, anenzi nikunu nawa, . . . Wejima wawu hiyovwahilaña nshimbi jaKesaruku.” (Yililu 17:6, 7) Kapostolu Pawulu amuteneneña nawu “hikavuba” nawa mukulumpi wawakwachaaku chakusañumuna majita “mwahita kaayi kejima.”—Yililu 24:2-5.
6, 7. Njilanyi yimu mwatanyishilañawu eniKristu alala mahosha ayihosholañawu?
6 Dichi, hichatuhayamishañaku neyi tumona eniKristu alala makonu anakuyitwambila nikuyituñila mazanvu akutamisha ijina daweniKristu alala kuhitila mukushimuna nsañu jakutwamba. Hanu dinu munjilanyi mutwatanyishilaña mahosha amuchidiwu?—Isaya 54:17.
7 Yililu yayiwahi yawaYinsahu jaYehova yamwekeshaña hatooka nawu nyiloña ninsañu yamuchidiwu yakutwamba chikupu. (1 Petulu 2:12) Neyi eniKristu adimwekesha nawu hiyantu ovwahila nshimbi nawa nawu hiyantu akweti yililu yayiwahi akamenaña mawumi awakwawu antu, nyiloña yayitwikañawu yamwekanaña nawu yakutwamba chikupu. Yililu yetu yayiwahi yamwekesha nawu tudi antu amawahi. Akwakutala chamonawu chitunakutwalekahu kwila nyidimu yayiwahi, ahizumukaña nakutachika kumulemesha Tata yetu wamwiwulu nikwiluka chihandilu chachiwahi chawañamba jindi.—Isaya 60:14; Matewu 5:14-16.
8. (a) Chumanyi chitwatela kwila mpinji jikwawu hakwila nawu tuhakwiluku ñimenu yetu yashindamena haBayibolu? (b) Kufwana Kristu, twatanyishaña ñahi madimi akañeshaña?
8 Kubombelahu hayililu yetu yawiniKristu, mpinji yikwawu chakeñekaña kuhakwilaku ñimenu yetu yashindamena haBayibolu chakadi woma. Njila yimu yidi yakuholokela kunyendu yafulumendi niyota yanyiloña kulonda atukwashuku. (Esita 8:3; Yililu 22:25-29; 25:10-12) Henohu Yesu wuchidi hamaseki, mpinji jikwawu, wayilejeleña antu amutadikishileña hatooka, nikuyileja nawu mwahosheleñawu mwakutwamba. (Matewu 12:34-37; 15:1-11) Kufwana Yesu, twekalaña nampinji yakulumbulwila antu kulonda eluki yuma yitwakuhwelelamu chikupu. (1 Petulu 3:15) Dichi hela anakutusekesha hashikola, hamudimu, hela antaña jetu abula kwitiya, bayi tuleka kutiyakesha chalala Chezu daNzambuku.—2 Petulu 3:3, 4.
Yerusalema—“Ilola Dalema”
9. Yerusalema wumu yodihi wunafwanishuwu ‘nelola dalema’ dinatenuwu haZekariya 12:3, nawa anyi anakudimenaku hamaseki?
9 Wuprofwetu waZekariya washimuna chuma chaleteshaña nyuza kukaana eniKristu alala. Talenu chahosha Zekariya 12:3: “Hefuku odu nakabalumuna Yerusalema kwikala ilola dalema kudi antu akunyuza yejima.” Indi iwu wuprofwetu wunakutena Yerusalema wumu yodihi? Wuprofwetu waZekariya wahosha hadi Yerusalema watalisha kudi “Yerusalema yamwiwulu,” Wanta wamwiwulu kwayitambikilawu eniKristu awayishewa. (Aheberu 12:22) Ashalahu antesha hohu ahezanvu dawanswana aWanta wawuMesiya achidi hamaseki. Ashalahu nawalundanawu “anyikoku acheñi,” alejaña antu kulonda ekali ayilolu akayulewaña naWanta waNzambi henohu kuchidi mpinji. (Yowanu 10:16; Chimwekeshu 11:15) Indi nyuza yinakoñuhu chumanyi kutalisha kuniwu mutambi? Wukwashu wamuchidinyi wayinkayi Yehova akwakudifukula indi alala makonu? Tusambilenu kushinshika mwalumbulukila Zekariya kapetulu 12 kulonda twiluki. Kwiluka mwatalisha awa mazu kukutukwashaku kukuhwelela chikupu netu ‘kwosi chitwa chikatwesha’ kukañesha awayishewa aNzambi nialundanawu adihana.
10. (a) Muloñadi antu jaNzambi chayikabishilañawu? (b) Chumanyi chinakuyimwekena antu anakweseka kufumisha “ilola dalema” munjila?
10 HaZekariya 12:3 hahoshaña nawu nyuza yakaditwikadu ‘yakadikatisha nankashi.’ Indi nyuza yadikatishaña munjilanyi? Yehova nahani lushimbi lwakwila nindi nsañu yayiwahi yaWanta atela kuyishimwina. A Yinsahu jaYehova alemesha iwu mudimu wakushimwina. Ilaña, nyuza yinakumona mudimu wakushimwina Wanta wukamanisha kukala kunakumonawu antu neyi ‘ilola dalema.’ Esekaña kuwifumishahu kuhitila mukuluwañesha akwakushimwina aWanta. Hakwila mwenimu, nyuza yinakukañesha mudimu wakushimwina ‘yinakudikatisha nankashi kwilola dalema,’ yinakuditapola chikupu. Nijina dawu dinakwipuka ivumba datama muloña wakukañanya. Hiyakutwesha kukañesha akwakudifukula alala, alemesha mudimu wakushimwina “nsañu yayiwahi yahaya nyaka” yaWanta waNzambi wawuMesiya henohu kukuma kwakanu kaayi kanda kwinzuku. (Chimwekeshu 14:6) Mukwakuhemba atuyilu wumu wamwituña dimu muAfrica chamweniyi antu jaYehova anakuyibabesha wahosheli nindi: ‘Enu akwankunyi munakudikabishahu tuhu nakuyandisha awa antu. Hiyakalekaku. Avulilañaku hohu mpinji yejima.’
11. Indi Nzambi nahembi ñahi chikaninu chindi chasonekawu haZekariya 12:4?
11 Tañenu Zekariya 12:4. Yehova nasanyiki nindi wukaputisha mesu awantu akazuñesha atuñanda twindi aWanta adikita ‘nikuyifwisha mutentu’ wachifwikija. Yehova washikijaña mwahoshañayi. Chakutalilahu, mwituña dimu mwalekesheluwu kudifukula kwalala, akwakukañesha akañenyi kulekesha antu jaNzambi kutambula yakudya yakuspiritu. Chipapilu chansañu chimu chashimwini nawu aYinsahu jaYehova azatishileña mabaloon hakwiñinja nyikanda mwituña! Chikaninu chaNzambi chakaniniyi antu jindi chashikijeweli chakwila nindi: ‘Nakatona mesu ami, nakaputisha mesu atuwalu twejima twanyuza yawantu.’ Ayilumbu jaWanta anakañanyi kwiluka njila yatela kuyawu muloña anaputi nakuzuwa. Eña, tunakuhweleli chikupu netu Yehova wukapulwisha antu jindi neyi izaza nikuyakamena.—2 Anyanta 6:15-19.
12. (a) Munjilanyi mwatachikililiyi Yesu kesi hampinji yadiñayi hamaseki? (b) Indi ashalahu awayishewa anabutuli ñahi kesi lwakuspiritu, nawa yumanyi yinafumumu?
12 Tañenu Zekariya 12:5, 6. “Ayilolu amuYuda” anashimunuwu anakwimenaku antu adiña nakutala akwawu hakachi kawantu jaNzambi. Yehova wayinkaña awa ankoñi awayishewa muzañalu wudi neyi kesi hamuloña wayuma yidi heseki yaWanta windi. Mpinji yimu, Yesu walejeli atumbanji twindi nindi: “Ami nenzi nakunatila kesi hanu hamaseki.” (Luka 12:49) Mwamweni, Yesu wabutwili kesi kachifwikija. Nsañu yaWanta waNzambi yadiña hinsañu yalema nankashi yashimwinineñayi Yesu namukoyi. Chumichi dichaleteli ntadi mwituña dawaYudeya dejima. (Matewu 4:17, 25; 10:5-7, 17-20) Munjila yoyimu, ‘neyi inuñu yinabutuki kesi mukachi kanyitondu nawa neyi chimunyi chakesi chidi mukachi kayita,’ atumbanji anakulondela mumahaji aKristu makonu, anakubutula kesi kakuspiritu. Mukanda wamu 1917 waThe Finished Mystery * wasolweli hatooka to-o wunfwikiji wekala muKristendomu. Chumichi chaletesheli akulumpi jansakililu kulendumuka nakuzuwa. Muyaaka yakatataka, Nsañu yaWanta Na. 37, yikweti mutu wakwila nawu “Kukuma kwaNsakililu yaKutwamba Kudi Mukamwihi!” yinaleteshi antu kwikala kukabadi kaWanta waNzambi hela nehi.
“Matenti awaYuda” Anayamwini
13. Indi “matenti awaYuda” anakwimenaku chumanyi, nawa muloñadi Yehova chamwinañayi antu anakukabishawu?
13 Tañenu Zekariya 12:7, 8. “MuIsarela wakushankulu, matenti adiñi ashiyashana mwituña, mpinji jikwawu ayizatishileña kudi atubiña niandimi. Antu amuchidiwu diwu asambilileña kumona kalula nawa diwu akeñekeleña kuyikiña neyi muza wawayilumbu wulukuka musumba waYerusalema. Nhoshelu yakutena nawu “matenti awaYuda” yinakumwekesha nawu ashalahu awayishewa mumafuku etu anakushimwina hatooka dikwila nawu hiyadi munyisumba yakolaku. Adi hanzi nakuhemba yuma yaWanta wawuMesiya chakadi kutiya woma. Yehova wamazaza ‘wukusambila kwamwina matenti awaYuda’ muloña diwu anakukeñayi Satana kulukuka.
14. Indi Yehova wajikililaña ñahi ana adi ‘mumatenti awaYuda’ nikuyinka ñovu?
14 Mwamweni, nsañu yanyaka yamwekeshaña nawu Yehova nakujikilila awa atuñanda awayishewa aWanta ‘mumatenti’ mwisaña. * Wayinkaña “ñovu” muloña wayikoleshaña nikwikala ahamuka neyi Davidi, mwanta mukwanjita.
15. Muloñadi Yehova ‘chinakukeñelayi kujilumuna nyuza yejima,’ nawa mpinjinyi yakelayi mwenimu?
15 Tañenu Zekariya 12:9. Muloñadi Yehova ‘chinakukeñelayi kujilumuna nyuza yejima’? Muloña anakutwalekahu kukañesha Wanta wawuMesiya. Hamuloña wakusweja kulukuka nikuyandisha antu jaNzambi, dichi atela kuyibabesha. Katataka antu jaSatana ahamaseki keña alukukuki akwakudifukula alala aNzambi kakukumishaku, kukaletesha kaayi kejima kukisika neyi chatenawu muBayibolu nawu Amagedoni. (Chimwekeshu 16:13-16) Chikela ayilumbu analukuki dehi, Nsompeshi Muneni wakajikilila antu jindi nawa wakajilika ijina dindi mukachi kanyuza.—Ezekeli 38:14-18, 22, 23.
16, 17. (a) Indi “wuswana wawambuña aYehova” hichumanyi? (b) Neyi tumika kulukuka kwaSatana tukumwekeshadi?
16 Satana hakweti chitwa chatela kuzeyesha chikuhwelelu hela kujima mpwila yawantu jaNzambi adi mukaayi kejimaku. Kuwunda kutukweti hamuloña wakwiluka netu Yehova watukwashaña nañovu jindi, ‘hiwuswana wawambuña aYehova.’ (Isaya 54:17) Kwosi niwumu wunateli kututambula kuwunda kutukweti niheta dakuspirituku. (Masamu 118:6) Satana wukutwalekaña hohu nakuleta ikañesha nikuswejesha makabisha. Dichi neyi tukumika nakashinshi hela chakwila anakutusawula, tukumwekesha nawu tudi naspiritu yaNzambi. (1 Petulu 4:14) Nsañu yayiwahi yaWanta waYehova wunemikuwu anakuyishimwañena mukaayi kejima. Kufwana yozelu yazatishañawu neyi yitwa yakutiyisha nachu woma, antu jaNzambi anakumona lukadi ludi neyi ‘malola achifwikija akwasa nanyonji.’ Ilaña, nañovu jaYehova antu jindi ashindaña awa malola. (Zekariya 9:15) Ashalahu awayishewa nialundanawu ashinshika hiyakatwesha kuyilekeshaku!
17 Dichi tunakutalila mpinji yikatupulwishawu kunjita yaDiyabolu. Wenowu muzañalu wutukweti hakutukana nawu ‘kwosi chitwa chakutuchililawu chakutukatisha nachu, chikakolaku. Madimi ejima akatunyamukila nakutusompesha akatanya.’!
[Tumazu twaheshina]
^ Wasonekawu kudi aYinsahu jaYehova ilañichi hiyanakuwupulintaku.
^ Neyi munakukeña nsañu jikwawu, talenu mukanda waJehovah’s Witnesses—Proclaimers of God’s Kingdom, mafu 675-6, wasonekawu kudi aYinsahu jaYehova.
Mukwakula Nenudi?
• Chumanyi chinakumwekesha nawu yitwa yaSatana yinakañanyi?
• Indi Yerusalema yakwiwulu yekalili ñahi “ilola dalema”?
• Indi Yehova naamwini ñahi “matenti awaYuda”?
• Chineli tunakuswila kwakwihi naAmagedoni, chumanyi chimunakuhweleli?
[Malwihu aKuzatisha haKudiza]
[Nyevulu yidi hefu 23]
Antu jaYehova muAlbania atwalekeluhu nakashinshi, hela chakwila ayilukukili kudi Satana
[Mwevulu wudi hefu 25]
Yesu wahosheli nindi mwahosheleñawu mwakutwamba
[Nyevulu yidi hefu 26]
Hikwakekala chitwa chikafwomona antu anakushimwina nsañu yayiwahuku