Komana Mwahakwilañaku Wanta waYehova?
Komana Mwahakwilañaku Wanta waYehova?
‘Hoshenu munyuza nenu, Yehova nashakami muwanta.’—MASAMU 96:10.
1, 2. (a) Chumanyi chalema chamwekeni kwakwihi naOctober 29 C.E.? (b) Indi achina chuma chamulumbulukililidi Yesu?
CHUMA chalema chikupu, chakadi kumonañahu dehi hamaseki chamwekeni kwakwihi naOctober 29 C.E. Matewu nsoneki waNsañu Yayiwahi washimwini nindi: ‘Yesu chanamupapatishuwu, hohenohu azambuka nimumeji. Kutala mawulu hiyakumwenzulukila, [Yowanu mpapatishu] hakumona spiritu yaNzambi yidi nakusuluka neyi katela, hakuwila hadi Yesu. Kutiya mumawulu himukufuma izu nindi, Diyi Mwanami nakeña, natiyaña kuwaha nankashi mudi yena.’ Iyi hinsañu yantesha hakachi kansañu yasonekeluwu kudi ansoneki ejima awana aNsañu Yayiwahi.—Matewu 3:16, 17; Maku 1:9-11; Luka 3:21, 22; Yowanu 1:32-34.
2 Spiritu yajila yamwichikilili Yesu hatooka yamwekesheli nawu diyi Wawayishewa, idi izu daya mukwila nawu Mesiya hela Kristu. (Yowanu 1:33) Nkumininaku ‘mbutu’ yakaniniwu wamwekeni! Kwakwihi naYowanu Mpapatishu kwemeni muntu yakachikawu kukatutu kudi Satana nawa iwu muntu wakamuchika chilumbu muneni waYehova niwawanta Windi. (Kutachika 3:15) Kufuma hayina mpinji, Yesu welukili nindi watela kufwila kushikija nkeñelu yaYehova kutalisha hawunyuli nihaWanta Windi.
3. Indi Yesu wadiloñesheli ñahi kutalisha kumudimu wadiñayi kwakwihi nakutachika kuzata kulonda kuhakwilaku wanta waYehova?
3 Hakwila yadiloñeshi kuzata mudimu windi wawuha, ‘Yesu wafumini kuYodana kwayiliyi, wenzala spiritu yajila, hiyakumutwala kudi spiritu mwisaña.’ (Luka 4:1; Maku 1:12) Dichi, hamafuku 40 watoñojokeleña chikupu hakujinooka kwaleteliyi Satana kutalisha hawuswa waYehova wakuyula nihamudimu wadiñayi kwakwihi nakutachika kuzata kulonda kuhakwilaku wuswa waYehova wakuyula. Nsañu yeniyi yabombelamu yileñaleña yejima yikweti maana yekala mwiwulu nihamaseki. Dichi twatela kushinshika hachihandilu chaYesu chakashinshi nikwiluka chitwatela kwila kulonda ninetu tuhakwiluku wanta waYehova.—Yoba 1:6-12; 2:2-6.
Satana Wajinookaña Hatooka Wuswa waYehova waKuyula
4. Chumanyi cheliliyi Satana chasolweli nsañu yawanta?
4 Yuma yejimiyi yinatenuwu Satana wayilukili. Chakadi kumba mpinji, walukukili ‘mbutu’ ‘yamumbanda’ waNzambi yabadika kulema. (Kutachika 3:15) Satana wamwesekeli Yesu kapampa kasatu, nakumwila nindi yakoñi yuma yamuwahilili chatela yakalakali nkeñelu yaTata yindi. Kweseka kwamuchisatu kwasolweli nsañu yawanta. Satana chamulejeliyi Yesu “mawanta ampata yamunu mwishina ejima, nikulema kwawu,” wamulejeli Yesu chakadi nsonyi nindi: “Neyi wukudinata heseki nakudifukula kudami, nukukwinka yuma yejimiyi.” Yesu chelukiliyi chikupu nindi Diyabolu wadiña nañovu yakuyula “mawanta ampata yamunu mwishina ejima,” wamwekesheli nindi wahakwilañaku wanta kuhitila mukwakula nindi: “Fumaku eyi Satana, muloña anasoneki nawu, Kadifukulaña kudi Yehova Nzambi yeyi, wakakalakelaña yena hohu kanka windi.”—Matewu 4:8-10.
5. Mudimwinyi wakala washikijiliyi Yesu?
5 Chihandilu chaYesu chamwekesheli nawu kuhakwilaku wanta waYehova dichadiña chuma chalema. Yesu welukili chikupu nindi wateleli kwikala washinshika kushika tuhu nikukufwa kwindi muñovu jaSatana muloña wuprofwetu washimwineñahu dehi nawu ‘mbutu’ yamumbanda akamuchika kukatutu kulonda kumwekesha nawu Nzambi diyi nyuli watelela. (Matewu 16:21; 17:12) Cheñi washimwini wunsahu wakwila nawu Wanta waNzambi dichitwa chazatishañayi Yehova hakumushinda Satana mukwakudikaña kulonda kuleta kuwunda kuyileñaleña yejima. (Matewu 6:9, 10) Chumanyi cheliliyi Yesu hakushikija iwu mudimu wakala?
“Wanta waNzambi Wudi Kwakwihi”
6. Indi Yesu washimwini ñahi nindi Wanta dichitwa chakazatishayi Nzambi ‘hakukisañana nyidimu yaDiyabolu’?
6 Chatachi, “Yesu hakuya muÑaliliya nakushimuna nsañu yaNzambi yayiwahi, nindi, Mwaka wunashiki dehi, wanta waNzambi wudi kwakwihi.” (Maku 1:14, 15) Kafwampi wahosheli nindi: “Chiña nishimwina nsañu yawanta waNzambi yayiwahi . . . muloña dichi chantemesheleluwu.” (Luka 4:18-21, 43) Yesu wayili nakuhitahita kumaluña ejima, ‘nakushimwina nikuyileja nsañu yawanta waNzambi yayiwahi.’ (Luka 8:1) Cheñi Yesu wakoñeli nyidimu yañovu yayivulu yakudyisha mazaza awantu, kumwenesha mpepela yeneni, kuuka akata nikusañula afu. Kuhitila muniyi yihayamisha, Yesu wamwekesheli nindi Nzambi nateli kufumishahu kutama kwejima nikukabakana kwatachikili nakudikaña kwamuEdeni kulonda ‘akisañani nyidimu yaDiyabolu.’—1 Yowanu 3:8.
7. Indi Yesu wayilejeli atumbanji twindi kwiladi, nawa chumanyi chafuminumu?
7 Hakwila nawu nsañu yayiwahi yaWanta ayishimwini chikupu, Yesu wapompesheli izanvu dawatumbanji ashinshika nakuyidizisha iwu mudimu. Chatachi, Yesu wayinkeli atumbanji twindi 12 mudimu nawa “hakuyitemesha nakushimuna wanta waNzambi.” (Luka 9:1, 2) Kuhiñahu, watemesheli atumbanji amakwawu 70 kulonda kushimwina nsañu nawu: “Wanta waNzambi wunenzi dehi kwakwihi nanenu.” (Luka 10:1, 8, 9) Awa atumbanji chiyafuntiluwu nakumuleja Yesu chazatiluwu chiwahi mudimu wakushimwina Wanta, Yesu wahosheli nindi: ‘Namweni Satana hakuholoka kwiwulu neyi chikwanzaji.’—Luka 10:17, 18.
8. Indi chihandilu chaYesu chamwekesheli chumanyi?
8 Yesu wazatili nañovu chikupu nawa wazatishili kukooleka kwejima kulonda kushimwina nsañu yaWanta. Watwalekeluhu kuzata mwaana niwufuku, nawa hashili maana kuyuma yayiwahi yamuchihandiluku. Yesu wahosheli nindi: “Anyumbu akweti menawu, niatujila ahaluzwizu akweti yisakala yawu; hakwila Mwana kamuntu hakweti hakusachila mutu winduku.” (Luka 9:58; Maku 6:31; Yowanu 4:31-34) Henohu kanda yofwi, Yesu wamulejeli Pontusi Pilatu chakadi woma nindi: “Dichi chinavwalikilili, dichi chinenjilili mumpata yamunu mwishina, kulonda nakeli chinsahu chansañu yalala.” (Yowanu 18:37) Chihandilu chaYesu chamwekesheli nawu, Yesu henjili hohu hamaseki nakwikala ntañishi muneni hela mukwakukoña yihayamisha nikudihana neyi Chamwinuku, ilaña wenjili nakuhakwilaku wanta waYehova nikushimwina wunsahu kutalisha hañovu yaNzambi yakushikija nkeñelu yindi kuhitila muWanta.—Yowanu 14:6.
‘Chinashikijewi Dehi’
9. Indi Satana watwesheli ñahi kuchika ‘mbutu’ yamumbanda waNzambi kukatutu?
9 Yuma yejima yakoñeli Yesu kutalisha kuWanta hiyamuzañalesheli Satana Diyabolu Mukwankunyuku. Kuhitila ‘mumbutu’ yindi yaheseki—nsañu jamatuña nachiyulu ninsakililu, kakavulu Satana wakeñeleña kujilumuna ‘mbutu’ yamumbanda waNzambi. Kufuma tuhu hakusemuka kwindi kushika nikukufwa kwaYesu hanu hamaseki, Yesu afwilileña kumujaha kudi Satana nialunda nindi. Nkumininaku, munoña ya 33 C.E., mpinji yaMwana kamuntu yashikili yakumuhana kumakasa aChilumbu kulonda kumuchika kukatutu kudi Satana. (Matewu 20:18, 19; Luka 18:31-33) Nsañu Yayiwahi yamwekesha hatooka ochu antu kufumisha tuhu kudi Yudasi Isakaroti nakushika kudi akulumpi jawatupristu, asoneki, Afwarisi niaRoma chayizatishiluwu kudi Satana kulonda kumufwisha Yesu namuloña nakumujaha kufwa kwakata hamutondu wakuyandishilahu.—Yililu 2:22, 23.
10. Chumanyi chasweja kulema chashikijiliyi Yesu kuhitila mukufwa kwindi hamutondu wakuyandishilahu?
10 Chumanyi chimwanukaña neyi mutoñojoka Yesu wudi hamutondu wakuyandishilahu nakukabakana chovu-chovu kufwa kwakata? Hadaha mwanukaña ifutu danyiloña dahaniniyi Yesu namuchima wejima kudi antu akwanshidi. (Matewu 20:28; Yowanu 15:13) Munatweshi kuhayama hakukeña kweneni kwamwekesheliyi Yehova hakuloñesha iwu mulambu. (Yowanu 3:16) Hamwaha munatweshi kutiya neyi chatiyili mukulumpi wawamashidika awaRoma wahosheli nindi: “Chalala iwu wadiñi Mwana kaNzambi!” (Matewu 27:54) Awa mazu amawahi. Cheñi nawa, mwatela kwanuka mazu aYesu akukumishaku hamutondu wakuyandishilahu akwila nawu: ‘Chinashikijewi dehi.’ (Yowanu 19:30) Chumanyi chashikijeweli? Hela chakwila Yesu washikijili yuma yayivulu hadiñayi wamumi nihakufwa kwindi, komana chuma chalema chenjililiyi Yesu hamaseki hichadiñi chakumanisha nsañu yawanta waYehovaku? Cheñi nawa ashimwineñahu dehi nawu ‘mbutu’ wakakabakana chikupu kweseka kwaSatana kulonda kufumisha kasawuntu kejima hejina daYehova. (Isaya 53:3-7) Iyi yadiñi nyidimu yeneni, ilaña Yesu wayikalakeli chikupu. Eña, washikijili nyidimu yejima.
11. Chumanyi chakakoñayi Yesu hakushikija chikupu Wuprofwetu waprofweteluwu muEdeni?
11 Hamuloña wachikuhwelelu chindi nikashinshi, Yesu amusañwili, bayi mumujimba wawuntuku, ilaña hamu neyi ‘spiritu yahandishaña.’ (1 Akorinda 15:45; 1 Petulu 3:18) Yehova wamukanini Mwanindi walemesheliyi nindi: “Shakamaku kuchikasa chami chachidiilu, nichinamba kayila ayilumbu jeyi hiyadi itanda dakunyendu yeyi.” (Masamu 110:1) “Ayilumbu” anabombelimu, mukwakuvulumuna muneni, Satana, ‘nimbutu’ yindi yejima. Hamu neyi Mwanta waWanta waYehova wawuMesiya, Yesu Kristu wakalombola hakujilumuna akwakudikaña ejima mwiwulu niheseki. (Chimwekeshu 12:7-9; 19:11-16; 20:1-3, 10) Kufumahu, dihu hakashikijewa chikupu wuprofwetu wahaKutachika 3:15 nikulomba kwadizishiliyi Yesu atumbanji twindi nindi: “Wanta weyi winzi. Muchima weyi awili hamaseki neyi chawilañawu mwiwulu.”—Matewu 6:10; Afwilipi 2:8-11.
Yesu Watushilili Chakutalilahu chaKwimbujola
12, 13. (a) Yumanyi yinakufuma mumudimu wakushimwina nsañu yayiwahi yaWanta makonu? (b) Malwihwinyi yitwatela kudihula neyi tunakukeña kulondela mumahanji aKristu?
12 Makonu nsañu yayiwahi yaWanta anakuyishimwañena mumatuña amavulu, neyi chaprofweteliyi Yesu. (Matewu 24:14) Chinakufumamu, yihita yawantu anakudihana kudi Nzambi. Anakutalila nkisu yikaleta Wanta. Anakuchiñeja kushakama haya nyaka mukuwunda muparadisa hamaseki, nawa atiyaña kuwaha kulejaku amakwawu hakuchiñeja kwawu. (Masamu 37:11; 2 Petulu 3:13) Komana wudi hakachi kawakwakushimwina aWanta? Tunakuyihameka neyi mudi akwakushimwina. Hela chochu, kudi chuma chimu chitwatela kutoñojokahu chikupu wejima wetu.
13 Kapostolu Petulu wasonekeli nindi: “Kristu niyena wayimweneni yihuñu, wayishiyilili chuma chakutalilahu, kulonda mwendi mumahaji indi.” (1 Petulu 2:21) Ilukenu nenu haniyi mpinji, Petulu hahosheli hamuzañalu wakushimwina hela hakwilukisha kutañisha kwaYesuku, ilaña wahosheli hayihuñu yindi. Hamu neyi chinsahu wamweni namesu, Petulu welukili chikupu nindi Yesu wakeñeli kukabakana kulonda kwovwahila wanta waYehova nakumumwekesha Satana nawu hintwambi. Munjilanyi mutwatela kulondela mumahaji aYesu? Twatela kudihula netu: ‘Komana nidi wadihana kukabakana chikupu kulonda kuhakwilaku nikulemesha wanta waYehova? Komana yililu yami nikuzata nañovu mumudimu wakushimwina yamwekeshaña nawu kuhakwilaku wanta waYehova dichuma chinalemesha nankashi?’—Akolose 3:17.
14, 15. (a) Indi Yesu welili ñahi kuyitoñojoka yaluwa niyuma yamwinkeluwu, nawa muloñadi? (b) Nsañwinyi yitwatela kutoñojokañahu mpinji yejima? (Bombelenuhu nimazu adi hachikasha chinakwila nawu, “Hakwilenuku Wanta waYehova.”)
14 Mafuku ejima twatalañanaña nakweseka nikufukula hayuma yamaneni niyanyanya. Tunateli kwiluka ñahi mwakwilila? Chakutalilahu, chumanyi chitunateli kwila, neyi chakwila twikala mukweseka kunateli kukisañana ñimenu yetu yawiniKristu? Petulu chamulejeliyi Yesu nindi, bayi wakamenaku, Yesu welilidi? Yesu wahosheli nindi, “Eyi Satana hitaku kunyima yami, . . . hiwunati muchima kuyuma yaNzambuku, wunati muchima kuyuma yawantu.” (Matewu 16:21-23) Komana twakulaña neyi chakwiliyi Yesu, neyi atwinka mudimu wamali hela kudiza mudimu wahewulu watela kuluwañesha nyidimu yetu yawiniKristu niwubwambu wetu naNzambi? Yesu chelukiliyi nindi antu amweni yihayamisha yakoñeliyi “hiyakukeña kwinza nakumukwata nañovu amudiishi wanta,” wayiwombolokeli chakubula kumba mpinji.—Yowanu 6:15.
15 Muloñadi Yesu chakaniniyi chikupu haniyi mpinji nihampinji yikwawu? Muloña welukili nindi kwadiña chuma chalema chabadika kudikiña yomweni hela chuma chamweniyi nindi chamuwahilili. Wakeñeleña kwila nkeñelu yaTata yindi nikulemesha wanta waYehova hichidi namuloña nakukala kwadi kufumamuku. (Matewu 26:50-54) Dichi, mpinji yejima neyi tukubulaña kutoñojoka hansañu yawanta waYehova, neyi chatoñojokeleñayi Yesu, kakavulu tukukañanyaña kwila chuma chachiwahi. Muloñadi? Muloña chikwikala chaswayi kufwa mutukosi twaSatana, mwanta welishaña yuma yatama yimwekaneña neyi yayiwahi, neyi chelili hakumweseka Evu.—2 Akorinda 11:14; 1 Timotewu 2:14.
16. Chumanyi chatela kwikala chikonkwanyi chetu chacheni hakukwasha amakwawu?
16 Mumudimu wetu wakushimwina, twafwilaña kuhosha nawantu hayuma yakamenañawu nikuyileja ñakwilu yamuBayibolu. Iyi hinjila yayiwahi yakusañumuna mpwila yawu yakukeña kudiza Bayibolu. Hela chochu, chikonkwanyi chetu chacheni hichidi chakukwasha antu kwiluka chahoshaña Bayibolu hohu hela nkisu yikaleta Wanta waNzambuku. Twatela kuyikwasha kulonda eluki nsañu yawuswa waYehova wakuyula. Komana anakukeña kwikala eniKristu alala nikusenda ‘mutondu wawu wakuyandishilahu’ nikukaba kukoola Wanta? (Maku 8:34) Komana anakukeña kudibomba nawantu ahakwilañaku wanta waYehova nikumwekesha nawu Satana hisakutwamba? (Yishimu 27:11) Tukweti kukooleka kwakudikwasha etwaweni niamakwawu kulonda kuhakwilaku wanta waYehova.—1 Timotewu 4:16.
Hampinji yakekalayi Nzambi ‘Diyi Hohu Muyuma Yejima niMudi Ejima’
17, 18. Mpinjinyi yayiwahi chikupu yitwatela kutalila neyi twamwekeshaña netu twahakwilañaku wanta waYehova?
17 Chitunakuzata nañovu makonu kulonda kumwekesha muyililu yetu nimumudimu wetu wakushimwina netu twahakwilañaku wanta waYehova, tunateli kutalila mpinji ‘yakahanayi Yesu Kristu wanta kudi Nzambi, yowu Tata yindi.’ Wakalubula wanta mpinjinyi? Kapostolu Pawulu walumbulwili nindi: “Hamba kela nanoñeshi dehi kuyula kwejima, niwanta wejima, niñovu yejima. Chiña akayula yule-e, nichamba kadatayi [Nzambi] ayilumbu jindi ejima. . . . Henohu niyomweni Mwana nawa wakamwovwahila Mukwakwovwahisha yuma yejima; kulonda Nzambi akekali diyi hohu kanka windi chikupu, mwejima.”—1 Akorinda 15:24, 25, 28.
18 Hampinji yakekalayi Nzambi ‘diyi hohu muyuma yejima nimudi ejima,’ yikekala mpinji yayiwahi chikupu. Wanta wakashikija nkeñelu yawu. Akwakudimbulula wanta waYehova ejima akayijilumuna. Kuwunda kukekala mukuleña kwejima. Ñimbi yamasamu wahosheli nindi, yileñaleña yejima yikemba nawu: “Mwinkenu Yehova kulema kwejina dindi; . . . Hoshenu munyuza nenu, Yehova nashakami muwanta.”—Masamu 96:8, 10.
Mukwakula Nenudi?
• Indi Yesu walemesheli ñahi nsañu yawuswa wakuyula kwaNzambi?
• Chumanyi chasweja kulema chashikijiliyi Yesu kuhitila mumudimu windi nikufwa kwindi?
• Munjilanyi mutwatela kwimbujolila chakutalilahu chaYesu hakumwekesha netu twahakwilañaku wanta waYehova?
[Malwihu aKuzatisha haKudiza]
[Chikasha/Nyevulu yidi hefu 11]
HAKWILENUKU WANTA WAYEHOVA
Kwesekeja nachelukawu amana kwetu amavulu muKorea nikumaluña amakwawu, eniKristu neyi ekala mukweseka kweneni, chachiwahi kwiluka muloña waweni wuyamwenañawu kukala kwamuchidiwu.
Chinsahu chaYehova wuyakasili muchiyulu chachikulu chaSoviet, wahosheli nindi, “Chuma chatwikwashili kuumika chadiña chakwiluka chachiwahi nsañu yamwekeni mwitempa daEdeni, nsañu yawuswa waNzambi wakuyula. . . . Twelukili netu twadiña nakukooleka kwakuhakwilaku wanta waYehova. . . . Ichi chatwikolesheli nawa chatwikwashili kwikala ashinshika.”
Chinsahu mukwawu washimwini chamukwashili nichakwashili akwawu aYinsahu muchilombu mwakanjikijañawu kuzata nyidimu yakola. Wahosheli nindi, “Hela chakwila twadiña mukukala, twadiña asoñama lwakuspiritu muloña Yehova watukwashileña. Mpinji yejima twadiña nakudikolesha wumu namukwawu kuhitila mukudanukisha netu tunakuhakwilaku wanta waYehova kushindamena hansañu yawanta wakuleña kwejima.”
[Mwevulu wudi hefu 8]
Indi Yesu wahakwililuku ñahi wanta waYehova hampinji yamwesekeluwu kudi Satana?
[Mwevulu wudi hefu 10]
Indi kufwa kwaYesu kwashikijili chumanyi?