Chikweti Luwi lwaYehova Hakwikala Antu Jindi

‘Tudi ambala aYehova.’—ROM. 14:8.

1, 2. (a) Kukoolekanyi kutukweti? (b) Malwihwinyi itukushinshikahu?

 MUNZA waIsarela awilemesheli kudi Yehova hampinji yayilejeliyi nindi: “Mukwikala chuma chalema, chamami aweni chakwambula munyuza yejima yawantu.” (Kwid. 19:5) Makonu, antu amuchipompelu chawakwaKristu niwena akweti kukooleka kwakwikala antu jaYehova. (1 Pet. 2:9; Chim. 7:9, 14, 15) Hikukooleka kunateli kutuhetesha haya nyaka.

² Hela chakwila kwikala antu jaYehova kwekala hikukooleka, cheñi kwekala himudimu. Antu amakwawu anateli kudihula nawu: ‘Komana nakatwesha kwila yuma yakeñañayi Yehova nindi nileña? Komana Yehova wakanshiya neyi nivulumuna? Komana kwikala muntu waYehova kunateli kunleñela kubula kudiluñisha?’ Chachiwahi kushinshika hamalwihu wenawa. Hela chochu, tusambilenu kushinshika chikupu hanilu lwihu lukwawu lunakwila nawu: Nkiswinyi jafumaña mukwikala antu jaYehova?

Kwikala Antu jaYehova Kwaleñelaña Kwikala Amuzañalu

3. Indi kufuukulahu kwaRahaba kwakumukalakela Yehova kwamukwashili ñahi?

³ Komana antu jaYehova ahetelañamu hakwikala antu jindi? Shinshikenu hachihandilu chaRahaba, chivumbi washakamineña muYeriku wakushankulu. Chakadi nikujina, wadifukwileña kudi anzambi akutwamba akuKenani. Chatiyiliyi yuma yakuhayamisha yakoñeleliyi Yehova aIsarela, welukili nindi Yehova diyi Nzambi  walala. Washili wumi windi hakatooña kulonda kukiña antu jaNzambi atondeliyi nakusha wumi windi wakumbidi mumakasawu. Bayibolu yahosha nawu: “Nichivumbi Rahaba nawa waloñeli nanyidimu, hatambwiliyi antemesha nakuyifuntisha njila yacheñi.” (Yak. 2:25) Dichi watambwilili nkisu yeneni hekaliliyi wakadi majilu neyi chadiña antu jaNzambi, antu adizishiluwu kuhitila muNshimbi jaNzambi munjila yakukeña nawa yawuñanji. Wazañaleli chikupu hamuloña wakwila walekeli yuma yatama yakoñeleñayi kunyima! Wasumbukili nakaIsarela nawa wamuvweleli mwana weyala wejina daBowazi, wekalili muntu waNzambi wambukaku nawakwawu antu.—Yosh. 6:25; Luti 2:4-12; Mat. 1:5, 6.

4. Indi Luti wadiluñishili ñahi chafuukwiluhu kumukalakela Yehova?

⁴ Luti washakamineña kwituña daMowabi niyena wafuukwiluhu kumukalakela Yehova. Hadiñayi kansi, wadiñi nakudifukula kudi nzambi ateneneñawu nawu Kemoshi nianzambi amakwawu awaMowabi, ilaña wamwilukili Nzambi walala, Yehova, wasumbukili nakaIsarela wenjili nakushakama mwituña dawu. (Tañenu Luti 1:1-6.) Chimwahitili mafuku, Luti niñoda ishaku dindi wejina daOripa ayili namukuwawu wamumbanda Nyawomi kuBetelemi, dichi Nyawomi wayilejeli awa atwansi awambanda kufunta kumukala wawu. Chadi kuyikalila kushakama muIsarela. Mwalala Oripa ‘wafuntili kumukala wawu nikudi akishi indi,’ hakwila Luti wakaanini kufuntamu. Wakoñeli kwesekeja nayuma yakuhweleleliyi nawa welukili Nzambi wakeñeleñayi kudifukulañaku. Wamulejeli Nyawomi nindi: “Bayi wunkakeja kukushiya, mwaka nifuntumu nibuli kuya naneyuku. Kwejima kuwukuyeyi kwoku nukuya ninami. Kwejima kuwukushakameyi, kwoku nikushakama ninami. Antu eyi akwila antu ami. Nzambi yeyi wukwila Nzambi yami.” (Luti 1:15, 16) Hamuloña wakukeña kumukalakela Yehova, Luti wadiluñishili nshimbi jaNzambi, jahosheleña hakutoñojokelaku amfwila, niatuzweñi niantu abulili mpata. Hamuloña wakumukiña kudi Yehova, wadiñi namuzañalu nawa wadiñi wakiñewa.

5. Yumanyi yimwamonaña kutalisha hadi antu amukalakelaña Yehova nakashinshi?

⁵ Hadaha mwelukahu antu amakwawu adihana kudi Yehova anamukalakeli hayaaka yayivulu nakashinshi. Yihulenu hankisu yinahetelumu hamuloña wakumukalakela Yehova. Hela chakwila antu ejima amonaña kukalaku, yuma yakuhayamisha yinafumimu yinakumwekesha walala wamazu ekala hamasamu akwila nawu: “Antu akweti Nzambi yawu Yehova anakooleki.”—Mas. 144:15.

Yehova Wakeñaña Nindi Twileña Yuma Yakeñañayi

6. Muloñadi wutwatela kubulila kutiya woma wakukañanya kwila yuma yakeñañayi Yehova nindi twileña?

⁶ Hadaha mwadihulahu dehi neyi chakwila munatweshi kwila yuma yakeñañayi Yehova. Chaswayi kutiya woma muloña mwekala kambuña Nzambi, mwahembaña nshimbi jindi nawa mwahoshaña hejina dindi. Chakutalilahu,  Mosi watiyili neyi hanatweshi kwila mwamulejeluwuku, hampinji yamutemesheluwu kulonda kuhosha nawaIsarela nikudi mwanta wawaEjipitu. Ilaña Nzambi wamukuhweleleli Mosi. Yehova ‘wamulejeli chakwila.’ (Tañenu Kwidika 3:11; 4:1, 10, 13-15.) Chineli Mosi wetejeli wukwashu, wazañaleli hakukalakala yuma yakeñeleñayi Nzambi. Munjila yoyimu, Yehova watukuhwelelaña. Weluka nindi hitwawaninaku, dichi, wakeñaña kutukwasha. (Mas. 103:14) Chatela kutiya woma, twazañalalaña hakumukalakela Nzambi hamu neyi kambanji kaYesu, muloña kwila mwenimu kwaheteshaña antu amakwawu nikumutiyisha Yehova kuwaha. Yesu wahosheli nindi: “Inzenu kudami, . . .ami nukuyinookesha. Ditwikenu mpanda yami, mudizili kudami muloña ami nawunda, nadizoza mumuchima.”—Mat. 11:28, 29.

7. Muloñadi chimwatela kukuhwelela nenu Yehova wukuyikwashaña kwila yuma yayikuhwelelañayi kwila?

⁷ Yehova wukutukwashaña mpinji yejima, neyi tushindamena hadi yena. Chakutalilahu, Yeremiya hadiña wahamuka hakuhoshaku. Dichi, Yehova chamulejeliyi kwikala kaprofwetu Kindi, Yeremiya wahosheli nindi: “Yowe! Mwanta Yehova! Ami hineluka kuhoshaku muloña nikansi.” Nkumininaku, wahosheli cheñi nindi: “Hinukuhosha cheñi mwijina dinduku.” (Yere. 1:6; 20:9) Ilaña, hamuloña wakumukolesha kudi Yehova, Yeremiya washimwinini hadi yaaka 40 nsañu yaheleluwu antu. Kakavulu, Yehova wamukolesheleña namazu akwila nawu: “Ami nidi neyi kulonda kukwamwinaña nakukupulwishaña.”—Yere. 1:8, 19; 15:20.

8. Twamwekeshaña ñahi netu twamukuhwelela Yehova?

⁸ Neyi chamukolesheluwu Mosi kudi Yehova, anetu nawa nateli kutukwasha kwila yuma yakeñañayi nindi akwaKristu eleña makonu. Chuma cheneni chiña kushindamena hadi Nzambi. Bayibolu yahosha nawu: ‘Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitejaña Yehova mwejima muwukwilaña, niyena wakakwolwelaña njila jeyi.’ (Yish. 3:5, 6) Twamwekeshaña netu twamukuhwelela Yehova neyi twiteja wukwashu watwinkañayi kuhitila Mwiizu dindi nichipompelu. Neyi tumwiteja Yehova kutulombolaña muchihandilu chetu, kwosi chuma chikatukañesha kubula kwikala ashinshika kudi yena.

Yehova Wakamenaña Antu Jindi haMuntu haMuntu

9, 10. Kukiña kwamuchidinyi kwakanawu haMasamu 91?

⁹ Hampinji yatoñojokeleñawu antu amakwawu neyi atela kudihana kudi Yehova, amakwawu atela adihwili nawu, indi neyi nivulumuna, nikala wabula kutelela nikunkaana kudi Yehova? Chamuzañalu, Yehova watwinkaña yuma yejima yitwakeñaña hakwila nawu tuhembi wubwambu wetu wawuwahi nayena. Tushinshikenu chiwahosha mukanda waMasamu 91 hachumichi.

¹⁰ Isamu denidi datachika nawu: “Wekala muchiswamu chaMukwakubadika Kwiwulu wakashakama muwulelu waChinaweji. Nukumutena Yehova nami, Diyi chiswamu chami, diyi mpwembu yami diyi Nzambi yami, inakuhwelela. Muloña yena diyi wakakupulwisha nimumwonji watayi chibinda.” (Mas. 91:1-3) Ilukenu nenu, Nzambi wakana kukiña antu amukeña nawa amukuhwelela. (Tañenu Masamu 91:9, 14.) Kukiña kwamuchidinyi kwateneneñayi? Yehova wakiñili ambuñindi amakwawu akushankulu kumujimba, wayikiñili kulonda munyachi wutwalekuhu nakushika nikudi Mesiya wakaninuwu. Hela chochu, Satana waleñeleli antu amavulu ashinshika kuyikasa mutuleya, kuyiyandisha nikuyijahola kulonda kuyileñela abuli kwikala ashinshika kudi Nzambi. (Heb. 11:34-39) Omikili muloña Yehova wayikiñili kulonda kubula kufumpa kashinshi kawu. Dichi, tunateli kuhosha netu Masamu 91 yahoshaña hakukana kwakukiñewa kuspiritu.

11. Indi “chiswamu chaMukwakubadika Kwiwulu” hichumanyi, nawa antu amuchidinyi akiñañayi Nzambi muchiswamu chenichi?

¹¹ Dichi, “Chiswamu chaMukwakubadika  Kwiwulu” chateneniyi ñimbi yamasamu chekala hiluña dachifwikija dakukiñewelamu kuspiritu. Antu ashakamaña naNzambi neyi enyi jindi akiñewaña kuyuma yejima nikudi antu ayichinishaña kulonda kuzeyesha chikuhwelelu chawu nikuleka kumukeña Nzambi. (Mas. 15:1, 2; 121:5) Chekala hichiswamu muloña antu abula kwitiya hiyanateli kuchilukaku. Muchiswamu chenichi, Yehova wakiñaña antu ahoshaña nawu: ‘Yeyi Nzambi yami, inakuhwelela.’ Neyi tutwalekahu kushakama muchiswamu chenichi, hitwakatiya woma wakujimbesha wuselewa waNzambi kuhitila mukufwa mumuhetu waSatana, “chibinda[ku].”

12. Yumanyi yashaña hakatooña wubwambu wetu naNzambi?

¹² Yumanyi yashaña hakatooña wubwambu wetu wawuwahi naNzambi? Ñimbi yamasamu wateneni yuma yayivulu, hayuma yeniyi hekala ‘chipupu chendaña namwidima, . . . nikujilumuka kwakisañanaña hakachi kamwaana.’ (Mas. 91:5, 6) “Chibinda” yeniwu nalawuli antu amavulu kulonda kufwila yuma yamukunkulwayi yakukeña kudimena. (2 Kor. 11:3) Walawulaña antu amakwawu kuhitila mukwiteja yililu yalwisu, kudinka wanta nimaheta akumujimba. Antu amakwawu wayidimbaña kuhitila mukwikala nachaambu, kukuhwelela nawu yuma yadinjilili yayeni nikwitiya kwakutwamba. (Kol. 2:8) Nawa, antu amavulu ayilawulaña mumuhetu wawuvumbi. Yililu yeniyi yidi neyi yipupu nawa yinakojeji antu amavulu kumuhela Nzambi.—Tañenu Masamu 91:7-10; Mat. 24:12.

Chakukiña Kukeña Kwenu Kumwamukeña Nzambi

13. Indi Yehova watukiñaña ñahi kuyuma yatama yaluwañeshaña wuspiritu wetu?

¹³ Indi Yehova wakiñaña ñahi antu jindi kuwubanji wakuspiritu? Ñimbi yamasamu wahosha nindi: “Wakayileja añelu jindi nindi akakuhembaña mwejima muwakayaña.” (Mas. 91:11) Añelu amwiwulu atulombolaña nikutukiña kulonda tutweshi kushimwina nsañu yayiwahi. (Chim. 14:6) Kubombelahu hadi añelu, aeluda akwaKristu atukiñaña kulonda tubuli kuluwañeshewa nayitoñojoka yatama kuhitila mukuzatisha Nsona neyi anakutañisha. Anateli kukwasha muntu wudi wejima wunakufwila kushinda yililu yamukaayi. (Tit. 1:9; 1 Pet. 5:2) Cheñi, ‘nduñu wamaana nikashinshi’ watwinkaña yakudya yakuspiritu kulonda kutukiña kuntañishilu yakwila nawu yuma yejima yadinjilili yayeni, kufwila yuma yatama, kufwila maheta nikuya mpuhu niyuma yikwawu yayivulu yakufwila kwila yuma yatama niyaluwañeshaña. (Mat. 24:45) Yumanyi yinayikwashi kutondolwela yuma yatama?

14. Tunateli kuzatisha ñahi chiwahi wukwashu watwinkañayi Yehova?

¹⁴ Chumanyi chitwatela kwila hakwila nawu tutwalekuhu kushakama “muchiswamu” chaNzambi? Neyi chochitwatela kutwalekahu kudikiña kuwubanji wakumujimba, wudi neyi maposu, ambanji hela yikatu, dichitwatela kutwalekahu kudikiña kuwubanji wakuspiritu. Dichi, mpinji yejima twatela kuzatishaña nshimbi jatwinkañayi Yehova kuhitila munyikanda,  kupompa kwachipompelu nikupompa kwefuku dadimena nikwañinza. Twatela kwiteja kufumba kwawaeluda. Nawa twahetelaña muyililu yashiyashana yamwekeshañawu amana kwetu niahela akwaKristu. Eña, kudikunda nachipompelu kwatuleñelaña kwikala namaana.—Yish. 13:20; tañenu 1 Petulu 4:10.

15. Muloñadi chimunateli kukuhwelela nenu Yehova nateli kuyikiña kuchuma chidi chejima chinateli kuyileñela kujimbesha wuselewa windi?

¹⁵ Kwosi chuma chinateli kutuleñela kujinoka netu Yehova hanateli kutukiña kuchuma chidi chejima chinateli kutuleñela kujimbesha wuselewa winduku. (Rom. 8:38, 39) Wakiñaña chipompelu kunsakililu jañovu nikudi akajipolitiki afwilaña kutwambula kudi Nzambi yetu wajila, bayi kutujahaku. Kukana kwaYehova kunashikijewi, kwahosha nawu: “Hikwakekala chitwa chakachilawu, nawu akukatishi nachu, chakakolaku.”—Isa. 54:17.

Hinyi Watulubulaña?

16. Muloñadi kaayi chikanateli kutuleñela kubula kudiluñisha?

¹⁶ Komana kwikala antu jaYehova kunateli kutuleñala kubula kudiluñisha? Kwambukaku, kwikala antu amukaayi kunateli kutuleñela kubula kudiluñisha. Kaayi kambukaku kudi Yehova nawa kayuulewaña nanzambi wawukatu wayandishaña antu. (Yow. 14:30) Chakutalilahu, kaayi kaSatana kazatishaña ikakeja dakufwila mali kulonda kuleñela antu abuleña kudiluñisha. (Esekejenu Chimwekeshu 13:16, 17.) Nshidi niyena yinakuyandisha antu chikupu. (Yow. 8:34; Heb. 3:13) Dichi, hela chakwila antu abula kwitiya akukana kudiluñisha neyi chakwila eteja yuma yambukaku nayuma yatañishañayi Yehova, antu ejima akulondela ntañishilu yeniyi, akunyakala kudiñija muwuduñu wanshidi nichihandilu chatama.—Rom. 1:24-32.

17. Indi Yehova watulubula kuyumanyi?

¹⁷ Munjila yikwawu, Yehova wakatulubula kuyuma yejima yinateli kutuluwañesha neyi tudihana kudi yena. Munjila yoyimu, twekala neyi muntu wunashindameni hadi mukwakuladika wakuluka yitembi wunateli kumupulwisha kuwubanji wakufwa. Ejima wetu twekala muwubanji wakufwa, nshidi yitwaswana. Hakwila nawu twakalubuki kunshidi nikushakama haya nyaka, twatela kudihana kudi Yehova, kuhitila mukushindamena hamulambu waKristu. (Yow. 3:36) Neyi chitwatela kumukuhwelela mukwakuladika kuhitila mukwiluka chekalayi, dichitwatela kumukuhwelela niYehova neyi tutwalekahu kudiza hadi yena. Dichi, tutwalekuhu kudiza Izu daNzambi nakanañachima muloña chikutukwasha kumukeña Nzambi chakwila tuleka nikutiya woma wakwikala antu jindi.—1 Yow. 4:18.

18. Chumanyi chakadiluñishawu antu jaYehova?

¹⁸ Yehova wayinkaña antu ejima wuswa wakudifuukwila. Izu Dindi dahosha nawu: “Tondaku wumi kulonda wuhandi, nineyi nianyaneyi; wukeñi Yehova Nzambi yeyi.” (Kuhit. 30:19, 20) Wakeñaña nindi tumukeñi kuhitila mukutondahu kumukalakela. Chatela tubuleña kudiluñisha, kwikala antu jaNzambi itwakeña kukutwileñela kwikala amuzañalu chikupu.

19. Muloñadi chichekalila hiluwi lwaYehova hakwikala antu jindi?

¹⁹ Hakwikala akwanshidi, hitwatelela kwikala antu jaNzambi wawaninaku. Chikweti luwi lwaNzambi hakwikala antu jindi. (2 Tim. 1:9) Dichi, Pawulu wasonekeli nindi: “Hela tukuhanda, tukumuhandila Mwanta [Yehova]; hela tukufwa, tukumufwila Mwanta [Yehova]. Dichi hela tukuhanda hela tukufwa, tudi ambala aMwanta [Yehova].” (Rom. 14:8) Chalala, hitwamba katoña hakwikala antu jaYehovaku.

Mukwakula Nenudi?

• Nkiswinyi jafumaña mukwikala antu jaYehova?

• Muloñadi chitunateli kukoñela yuma yakeñañayi Nzambi nindi twileña?

• Indi Yehova wakiñaña ñahi ambuñindi?

[Malwihu aKuzatisha haKudiza]

[Nyevulu yidi hefu 8]

Ihulenu antu amakwawu chiyanahetelumu hakwikala antu jaYehova

[Mwevulu wudi hefu 10]

Njilanyi jikwawu mwatukiñilañayi Yehova?