Chiyuulu chaSatana Keña Chikañanyi Kuyuula

‘Mukwakwila yatama hakamona kuwahaku.’—MUKWA. 8:13.

1. Muloñadi nsañu yakusompesha antu atama chiyinekalili yakukundeja?

 ANTU atama keña ayisompeshi. Akalumbulula hayuma yinakukoñawu. (Yish. 5:22; Mukwa. 8:12, 13) Iyi nsañu yakukundeja hama, sweje-e kudi antu akeña kuloña niantu akabishañawu kudi antu atama. Satana Diyabolu, tata yakutama, diyi akasambilawu kusompesha hakachi kawantu atama.—Yow. 8:44.

2. Muloñadi mpinji chiyakeñekeleleña kulonda kumanisha nsañu yatachikiluwu muEdeni?

² Satana wakojejeli antu kukaana chiyuulu chaYehova muEdeni, hamuloña wakukeña kudinyamuna. Chafuminumu, anvwali jetu akusambila adibombeli hamu naSatana kulonda kuzuñesha chiyuulu chaYehova nawa ekalili akwanshidi kumesu Indi. (Rom. 5:12-14) Kafwampi, Yehova welukili yuma yikafuma mukudikaña kwawu nikubula kalemesha. Hela chochu, yuma yafuminumu ayimwekesheli hatooka kudi yileñaleña yejima yikweti maana. Dichi, mpinji yakeñekeleña hakwila nawu nsañu yeniyi yimani nikumwekesha chikupu nawu akwakudikaña wenawa aluwili chikupu.

3. Indi ñimenu yetu kutalisha hanfulumendi jawantu yekala ñahi?

³ Chineli antu akaanini chiyuulu chaYehova, ateleleli kwimika nfulumendi jawu. Kapostolu Pawulu hakusonekela akwawu akakwitiya muRoma, wahosheli hanfulumendi jawantu jeniji nindi “anyanta.” Mumpinji yaPawulu, anyanta wenawa adiña hinfulumendi yaRoma yayuulileñayi Mwanta Nero, kufuma mu 54-68 C.E. Pawulu wahosheli nindi anyanta wenawa “ekalamu anayishumu kudi Nzambi.” (Tañenu Aroma 13:1, 2.) Komana chumichi chinayi mukwila nawu Pawulu wahakwilileñaku chiyuulu chawantu nawu chabadika chiyuulu chaNzambi? Hidimuku. Watalishili mukwila nindi hamuloña wakwila Yehova weteja chiyuulu chawantu kwikalahu, akwaKristu atela kulemesha ‘nshimbi yaNzambi’ nikwiteja anyuuli wenawa.

Njila Yalombolaña Kukujilumuka

4. Lumbululenu muloña wukaleñela chiyuulu chawantu kukañanya.

⁴ Hela chochu, chiyuulu chawantu chayuulewaña naSatana chinakañanyi kuyuula. Muloñadi? Muloña wumu wudi wakwila nawu, chiyuulu chenichi hichashindamena hamaana aNzambuku. Yehova diyi hohu wukweti maana aloña. Diyi hohu wayuulaña chiwahi. (Yere. 8:9; Rom. 16:27) Kwambukaku nawantu adizilaña yuma kuhitila mukweseka, mpinji yejima Yehova weluka njila yayiwahi yakuyuulilamu. Chiyuulu chejima chabulaña kulondela nshimbi jindi chikakañanya. Hamuloña weniwu, chakadi kutena yitoñojoka yatama yabombelamu, kufuma tuhu kukutachika, njila yikwawu yayuulilañamu Satana kuhitila muchiyuulu chawantu yamwekeni hatooka nawu yikakañanya.

5, 6. Yumanyi yamuleñeleli Satana kudikaña naYehova?

⁵ Kakavulu, muntu wamaana watondolwelaña chuma chinamoniyi nindi hichikazatikaku. Neyi yotwalekahu kwila chuma chakabula kuzatika, welukaña chiluwa chindi. Nsañu yanyaka yamwekeshaña chumichi mapampa kakavulu nawu chatama kudikaña naNleñi yetu wabadika. (Tañenu Yishimu 21:30.) Hela chochu,  hamuloña wakwila Satana wakeñeleña kudilemesha nikudinka wanta, wamufutaleleli Yehova. Dichi, mumushikila Diyabolu watondeli njila yaleteli kukala.

⁶ Yililu yaSatana yakuditiya ayimwekesheli kudi nyuuli wamuBabiloni asonekawu nawu waditiyileña nindi: “Ami nukukanduka mwiwulu. Neyi, Itanda dami dawanta nukudimotwesha tutumbwa twaNzambi. Neyi, Nukushakama hampidi yapompelañawu, kwakweni kunsa kumutamba wakukabeta kakuchimunswa. Nukukanduka haheni hewulu damavu. Nukwikala neyi Mukwakubadika.” (Isa. 14:13-15) Iku kukana kwakubula maana kwanyuuli yeniwu kwakañenyi kushikijewa, nawa anyuuli ejima amuBabiloni ahiñilumu akuminini dakutiya nsonyi. Chochimu, Satana nikaayi kindi keña ayishindi.

Muloñadi Nzambi Chetejelayi Antu Kudiyuula?

7, 8. Nkiswinyi jinafumimu chineli Yehova wetejeli kutama kutwalekahu hampinji yantesha?

⁷ Antu amakwawu anateli kudihula nawu, muloñadi Yehova chabulililiyi kukiña antu kulonda kubula kudikunda naSatana nikulondela chiyuulu chakakañanya? Hakwikala Nzambi Chinaweji, wadi kwila mwenimu. (Kwid. 6:3) Ilaña, hakoñeli mwokuku. Yehova wafuukwiluhu nindi neyi yabula kudiñija mukudikaña kwawantu hakapinji kantesha, mukafuma yuma yayiwahi. Nkumininaku, Yehova akamuyiiñisha nawu hiNyuuli waloña nawa wukweti kukeña, nawa antu ashinshika akahetelamu muyuma yafuukwiliyi Nzambi.

⁸ Neyi antu etejeli kuyuulewa nachiyuulu chaNzambi nikudikaña nayitoñojoka yaSatana, hiyadi kumonaña makabuku. Hela chochu, kufuukula kwaYehova kwakwiteja antu kudiyuulaña awenawu hadi mpinji yantesha kunaheteshi antu. Kufuukula kwaNzambi kunaleñeli antu akweti nyichima yayiwahi kwiluka chikupu chichawahila kumutiyilila Nzambi nikumukuhwelela. Yaaka yayivulu yinahituhu, antu anayuulewi nanfulumendi jajivulu jashiyashana, ilaña kwosi nfulumendi niyimu yaloña. Chumichi chinakoleshi akwakudifukula aNzambi kwiteja chikupu nawu chiyuulu chaYehova dichalala chikupu. Mwamweni, Yehova chetejeliyi chiyuulu chatama chaSatana, chinaleñeli antu kukabakana, kubombelahu niantu ashinshika adifukulaña kudi Nzambi. Hela chochu, kwiteja kutama hakapinji kantesha cheñi kunaleñeli akwakudifukula ashinshika kuhetelamu.

 Kudikaña Kunaleñeli Kumulemesha Yehova

9, 10. Lumbululenu ochu chiyuulu chaSatana chichaleñelaña antu kumulemesha Yehova.

⁹ Kwiteja antu kulonda kuyiluwañesha kudi Satana nikudiyuula awenawu hikunasawuli chiyuulu chaYehova hela hantuku. Kwambukaku, nsañu yakunyaka yamwekeshaña nawu mazu aYeremiya ahosheliyi hampinji yamonenenuwu kutalisha hadi antu nawu hiyanatweshi kudiyuulaku, alala chikupu. (Tañenu Yeremiya 10:23.) Kubombelahu, kudikaña kwaSatana kunamuleñeli Yehova kumwekesha yililu Yindi yayiwahi munjila yayiwahi. Munjilanyi?

¹⁰ Chineli tunakumona yuma yatama yinakumwekana hamuloña wachiyuulu chaSatana, dichi yililu yayiwahi yaYehova niyena yinakumwekana chikupu. Chumichi chinakuleñela kumuhameka Yehova kudi antu amukeña. Hela chakwila hadi chaambu, njila yinakuyuulilamu Satana yinakuleñela antu kumulemesha Nzambi chikupu. Chiyuulu chaSatana chinamwekeshi njila yayiwahi yakoñelañamu Yehova kukala kweniku kutalisha hachiyuulu chindi. Hakwila twiluki walala weniwu, mukwihihisha tushinshikenu hayililu yikwawu yaYehova nikwiluka njila yatama yayuulilañamu Satana chiyinamuleñeli Yehova kumwekesha yililu yeniyi munjila jashiyashana.

11. Indi Yehova wamwekesha ñahi kukeña kwindi?

¹¹ Kukeña. Nsona jatulejaña nawu “Nzambi diyi kukeña.” (1 Yow. 4:8) Tachi, Nzambi wamwekesheli kukeña kuhitila mukuleña antu. Kubombelahu, njila yatutuñilamu yakala nawa yakuhayamisha yamwekeshaña nawu Nzambi watukeña. Cheñi Yehova wayinkeli antu mukala wawuwahi mwadiñi yuma yejima yakuyitiyisha kuwaha. (Kutach. 1:29-31; 2:8, 9; Mas. 139:14-16) Dichi, chisaka chawantu chichavulumwini, Yehova wamwekesheli kukeña munjila jajiha. Munjilanyi? Kapostolu Yowanu wamusombolweli Yesu nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yow. 3:16.) Komana Nzambi wadi kumwekesha kukeña kudi muchidi wamuntu munjila yabadika hakutemesha Mwanindi wumu hohu hamaseki kulonda kukuula akwanshidi? (Yow. 15:13) Cheñi iyi njila yabadika yakumwekeshelamu kukeña yahanaña chakutalilahu kudi antu, nakuyinka mpinji yakutoñojoka hakukeña kwaNzambi muchihandilu chawu, neyi cheliliyi Yesu.—Yow. 17:25, 26.

12. Munjilanyi mwamwekeshelañayi Yehova ñovu jindi?

¹² Ñovu. ‘Nzambi, Watwesha yejima,’ diyi hohu wukweti ñovu yakuleña wumi. (Chim. 11:17; Mas. 36:9) Neyi chochekala chipapilu hakadi kusoneka, nichihandilu chamuntu chatachikaña hakuvwalika kwindi. Neyi yofwa, hachipapilu chenichi wasonekañahu yuma yidi neyi yuma yafuukwileñayi, yuma yakoñeleñayi niyuma yamweneñayi yahimpili chihandilu chindi. Iyi nsañu anateli kuyihemba  kudi Yehova. Kumpinji yakumbidi, Yehova nateli kumufuntishila muntu yeniwu wumi, neyi chochadiñayi. (Yow. 5:28, 29) Hela chakwila hiyadiñi nkeñelu yaNzambi kudantuku, kufwa kwaleñela Yehova kumwekesha nawu wukweti ñovu yakusañula afu. Mwalala, Yehova, diyi ‘Nzambi Watwesha yejima.’

13. Indi mulambu waYesu wamwekeshaña ñahi nawu Yehova diyi wahakulaña mwaloña chikupu?

¹³ Wuñanji. Yehova hatwambañaku; nawa hahakulaña mwaheñaku. (Kuhit. 32:4; Tit. 1:2) Mpinji yejima wahakulaña mwalala nawa mwawuñanji, hela chakwila kwila mwenimu chamwekanaña neyi chamukalilaña. (Rom. 8:32) Yehova watiyili kutama chikupu hakumona Mwanindi wasweja kukeñayi nakufwa hamutondu wakuyandishila wukwila neyi Yesu wadiñi mukwakusawula Nzambi wabula kushinshika. Ilaña, hamuloña wakukeña antu abula kuwanina, Yehova wetejeli ichi chuma chakuneñesha kumwekana kulonda kuhakwilaku wuñanji windi waloña chikupu. (Tañenu Aroma 5:18-20.) Kanu kaayi mwenzala wuñanji waheña kamuleñeleli Yehova kumwekesha nawu diyi wahakulaña mwaloña chikupu.

14, 15. Njilanyi jikwawu mwamwekeshelañayi Yehova maanindi abadika nikubula kuzuwa swayi?

¹⁴ Maana. Chelili Adama naEvu anavulumuni dehi, Yehova wasolweli njila yamwekesheli nawu wakafumishahu yuma yatama yejima yenjiluku hamuloña wakudikaña kwawu. (Kutach. 3:15) Hakunyakala kwila mwenimu, nikutwalekahu kusolola nsañu kutalisha haniyi yuma yakeñeleñayi kwila kudi ambuñindi yamwekesheli maana aYehova. (Rom. 11:33) Kwosi chuma nichimu chinateli kumukañesha Nzambi kukoña yuma munjila yayiwahuku. Mukanu kaayi munenzali yuma yatama, njita, kubula kwovwaha, kubula kwovwahila, kubula luwi, chaambu, niwunfwikiji, Yehova wayinka antu jindi mpinji yeneni kulonda eluki chekala maana alala. Kambanji Yakoba wahosheli nindi: “Maana afumaña mwiwulu, kusambila amawahi, nkumininaku awunda, ovwaha, anyakala kutiya, enzala luwi nanyikabu yayiwahi, hiyaheta ntadi hela wufwikijuku.”—Yak. 3:17.

¹⁵ Kubula Kuzuwa Swayi niKukaba Kabe-e. Yililu yaYehova yakubula kuzuwa swayi nikukaba kabe-e kachi hitwadi kuyilukaku, neyi Yehova habulili kukalakala namuchidi wamuntu wabula kuwanina, mukwanshidi nawa mukwakuvulumunaku. Hakwila mwenimu hayaaka yayivulu yinahituhu chamwekeshaña nawu wukweti yililu yeniyi yayiwahi, nawa hamuloña wachuma chenichi twatela kumusakilila chikupu. Kapostolu Petulu wahosheli hatooka nindi: “Chakubulayi Mwanta kuzuwa swayi hiwamwinu.”—2 Pet. 3:9, 15.

16. Chineli Yehova wafwilaña kutwanakena, muloñadi chitwatela kuzañalela?

¹⁶ Kwanakena. Wejima wetu tudi  akwanshidi, nawa twavulumunaña kakavulu. (Yak. 3:2; 1 Yow. 1:8, 9) Twatela kuhameka chikupu muloña Yehova watwanakenaña “nankashi.” (Isa. 55:7) Shinshikenu cheñi haniwu walala: Hakwikala akwanshidi, twazañalalaña chikupu neyi Nzambi yatwanakena yiluwa yetu. (Mas. 51:5, 9, 17) Yehova chatwanakenañayi hamuntu hamuntu chatuleñelaña kumukeña chikupu nikulondela chakutalilahu chindi neyi tunakukalakala nawakwetu antu.—Tañenu Akolosi 3:13.

Kaayi Chikanatamini

17, 18. Munjilanyi chiyuulu chaSatana muchinakañenyi kuyuula?

¹⁷ Kaayi kejima kaSatana, yuma yafumaña muchiyuulu chindi—kanakañanyi kutwalekahu kuyuula hadi yaaka yayivulu. Hamuloña wakuyiluwañesha kudi Satana, anvwali jetu akusambila atondeluhu kuyuulewa nawantu bayi naYehovaku. Dichi, akeñeli chiyuulu chakañenyi kuyiyuula. Kukala nimakabi amonañawu antu mukaayi kejima hiyinjikijilu yinakumwekesha nawu chiyuulu chawantu chatama nankashi.

¹⁸ Chiyuulu chaSatana chaleñelaña kwikala nalwisu. Hela chochu, lwisu hilunateli kushinda kukeñaku, hashindamena chiyuulu chaYehova. Chiyuulu chaSatana chinakañanyi kuleta muzañalu wahaya nyaka hela kuwunda. Chiyuulu Yehova anakuchihakwilaku. Komana makonu tukweti wunsahu wunakumwekesha chumichi? Eña, neyi chitukudiza muchibaba chinahiñuhu.

Yumanyi Yitunadizi haNsañu yaChiyuulu Kuhitila Mukutaña . . .

• Aroma 13:1, 2?

• Yishimu 21:30?

• Yeremiya 10:23?

• Akolosi 3:13?

[Malwihu aKuzatisha haKudiza]

[Nyevulu yidi hefu 25]

Chiyuulu chaSatana chinakañanyi kuzañalesha muchidi wamuntu

[Mazu aKusakilila]

U.S. Army photo

WHO photo by P. Almasy

[Mwevulu wudi hefu 26]

Yehova wukweti ñovu yakusañula afu

[Mwevulu wudi hefu 27]

Yehova wamwekesheli kukeña niwuñanji kuhitila mukulambula Mwanindi