Ikalenu Kambanji Walala waKristu

‘Mutondu wawuwahi wejima wasoñaña nyikabu yayiwahi, ilaña mutondu watama wasoñaña nyikabu yatama.’—MAT. 7:17.

1, 2. Indi atumbanji alala aKristu ambukaku ñahi kudi akwaKristu akutwamba, sweje-e munanu mafuku akukumininaku?

 YESU wahosheli nindi antu ahoshaña nawu amukalakelaña akekala ambukaku kudi atumbanji alala kuhitila kunyikabu yawu, ntañishilu yawu niyililu yawu. (Mat. 7:15-17, 20) Mwamweni, antu ayiluwañeshaña kuhitila muyuma yatoñojokañawu nawa yekala mumuchima. (Mat. 15:18, 19) Antu adizishañawu nsañu yakutwamba asoñaña “nyikabu yatama,” ilaña antu adizishañawu chalala chakuspiritu asoñaña “nyikabu yayiwahi.”

² Nyichidi yiyedi yanyikabu yinakumwekana hatooka munanu mafuku akukumininaku. (Tañenu Danyeli 12:3, 10.) AkwaKristu akutwamba hiyeluka walala hadi Nzambuku, nawa kakavulu adifwikijaña neyi amwakama Nzambi, ilaña antu atona kuspiritu adifukulaña kudi Nzambi ‘muwalala nimuspiritu.’ (Yow. 4:24; 2 Tim. 3:1-5) Afwilaña kumwekesha yililu yidi neyi yaKristu. Indi etu yililwinyi yitwatela kumwekesha hamuntu hamuntu? Hampinji yimukushinshikaña hanjila jitanu jakwilukilaku akwaKristu alala, dihulenu nenu: ‘Komana yililu nintañishilu yami yashindamenaña hachahosha Izu daNzambi? Komana yililu nintañishilu yami yakokolaña antu anakukeña chalala?’

Londelenuña Chahosha Izu daNzambi

3. Chumanyi chamuzañaleshaña Yehova, nawa yumanyi yabombelamu kudi akwaKristu alala?

³ Yesu wahosheli nindi “Antu ejima akuntenatena nawu, Mwanta, Mwanta; hiyakawanina kwiñila muwanta wamwiwuluku, chiña muntu welaña muchima waTata yami wudi mwiwulu.” (Mat. 7:21) Eña, bayi neyi kuditena hohu nawu nidi mukwaKristu dikwamutiyishaña Yehova kuwahaku, ilaña chiña kwila yuma yatela kwila mukwaKristu. Kudi akwaKristu alala, kwila mwenimu kwabombelamu chihandilu chawu chejima, yililu yawu kutalisha hamali, nyidimu yakumujimba, yisela, yaaku yamukaayi niyidika, maluwi niyuma yikwawu yelañawu nawakwawu antu. Hakwila akwaKristu akutwamba, ekalaña nayitoñojoka nikulondela njila jamukaayi, jinasweji kuvula jabulaña kumuzañalesha Nzambi munanu mafuku akukumininaku.—Mas. 92:7.

4, 5. Tunateli kuzatisha ñahi mazu aYehova ekala hamukanda waMalaki 3:18 muchihandilu chetu?

⁴ Kaprofwetu Malaki wasonekeli nindi: “Mwakafunta cheñi, mwakashinshika nakwambula niwaloña niwatama, niwamukalakelaña Nzambi, niwabulaña kumukalakela.” (Mal. 3:18) Chimukutoñojokaña hamazu wenawa, dihulenu nenu: ‘Komana nekala neyi antu akwituña tahindi nambukaku? Komana mpinji yejima nafwilaña kwesekana nawalundanami akwituña, chili kushikola, kumudimu, tahindi nahembaña chikupu nshimbi jamuBayibolu, nikujihakwilaku neyi chinatwesheki?’ (Tañenu 1 Petulu 3:16.) Kafwampi, hitwakeñaña kumwekana neyi twaloñaku, ilaña twatela kwikala ambukaku nawantu abulaña kumukalakela nikumukeña Yehova.

⁵ Neyi kudi yuma yimunakukeña kuhimpa, komana kwila mulombaña kudi Nzambi hayuma yenoyu nikukeña wukwashu kuhitila mukudizaña Bayibolu mafuku ejima, kulomba, nikuyaña kukupompa nehi? Neyi musweja kuzatisha Izu daNzambi, mukusweja kusoña “nyikabu yayiwahi,” kubombelahu ‘ninyikabu yakunyivumbu yakwiteja ijina daNzambi.’—Heb. 13:15.

Shimwinenuña haWanta waNzambi

6, 7. Kutalisha hansañu yaWanta, chaambwinyi chekala hakachi kawakwaKristu alala niakutwamba?

⁶ Yesu wahosheli nindi: “Chiña nishimwina  nsañu yawanta waNzambi yayiwahi nikunyikala yikwawu yinashali nawa, muloña dichi chantemesheleluwu.” (Luka 4:43) Muloñadi Yesu chazatishililiyi Wanta waNzambi kwikala mutu wansañu kutalisha hamudimu windi wakushimwina? Welukili nindi yena hakwikala Mwanta waWanta weniwu, hamu niamana kwindi akasañukila kuspiritu, akafumishahu nsulu yayihuñu, nshidi niDiyabolu. (Rom. 5:12; Chim. 20:10) Dichi, wayilejeli atumbanji twindi kushimwina haWanta weniwu sampu kukuma kwampata yamakonu. (Mat. 24:14) Antu aditwambilaña kwikala atumbanji twaKristu hiyakalakalaña iwu mudimuku, kafwampi hiyanateli kuwutweshaku. Muloñadi? Kudi yuma yisatu yayileñelaña kubula kutwesha: Chatachi, hiyanatweshi kushimwina yuma yabula kwilukawuku. Chamuchiyedi, antu amavulu hiyadizozaku, nawa hiyakweti wulobu wakushinda kasekesha nikudimbulula kwafumañamu hamuloña wakushimwina nsañu yaWanta kudi antuñinawu. (Mat. 24:9; 1 Pet. 2:23) Chamuchisatu, akwaKristu akutwamba hiyakweti spiritu yaNzambuku.—Yow. 14:16, 17.

⁷ Kwambukaku, atumbanji alala aKristu eluka chalumbuluka Wanta waNzambi niyuma yikakoña Wanta weniwu. Kubombelahu, atwamijañaku Wanta weniwu muchihandilu chawu, nakuwishimwina mukaayi kejima, hamuloña wakuyikwasha kudi spiritu yaYehova. (Zek. 4:6) Komana mwakalakalaña mafuku ejima mumudimu weniwu? Hakwikala mukwakushimwina waWanta, komana munakufwila kuyilaku hambidi, chidi neyi kushimwina maora amavulu mumudimu weniwu hela kudikitaña chikupu? Amakwawu aneseki kuyilaku hambidi mumudimu wawu wakushimwina kuhitila mukuzatisha chiwahi Bayibolu. Kapostolu Pawulu wadiña nachaaku chakuzatisha Nsona hakuhanjeka nawantu, wasonekeli nindi, ‘Izu daNzambi dadumi nawa dikweti ñovu.’—Heb. 4:12; Yil. 17:2, 3.

8, 9. (a) Yakuhumañananyi yinakumwekesha kulema kwakuzatisha Bayibolu mumudimu wetu wakushimwina? (b) Yumanyi yinateli kutukwasha kuzatisha chiwahi Izu daNzambi?

⁸ Hampinji yadiñayi mumudimu wakwitala nikwitala, mana kwetu wamutañilili iyala wamuchaachi yaKatolika mukanda waDanyeli 2:44 nawa walumbulwili Wanta waNzambi chiwakaleta kuwunda hanu hamaseki. Iyala yeniwu waakwili nindi: “Nakusakilili hama hakuzatisha Bayibolu nikunleja chahosha nsona kubadika kunleja hohu mukanwa.” Mana kwetu mukwawu chamutañililiyi mumbanda wamunsakililu yaGreek Orthodox, mumbanda yeniwu wamwihwili malwihu amavulu amwekesheli nawu wadiña nampwila yakudiza chalala. Cheñi, mana kwetu niñodindi, aakwili malwihu wenawa kuhitila mukuzatisha Bayibolu. Nkumininaku, mumbanda yeniwu wahosheli nindi: “Muneluki muloña wanleñela niiteji kuhanjeka nenu? Muloña mwazatisha Bayibolu, nawa mwataña kufuma muBayibolu.”

⁹ Hela chochu, nyikanda yetu yalema nawa twatela kuyihanaña mumudimu wakushimwina. Ilaña, Bayibolu dichitwa chitwazatishaña nankashi. Neyi himwavula kuzatisha Bayibolu mumudimu wenu wakushimwinaku, kwila mwimika chikonkwanyi chakuyizatishaña mumudimu wenu wakushimwina nehi? Hadaha munateli kutonda nsona jalumbulula hachekala Wanta waNzambi nawa nichiwakamanisha kukala kwamonañawu antu amuchituñilu chenu. Kuhiñahu, mwatela kutaña nsona jimunatondi neyi mudi mumudimu wakushimwina kwitala nikwitala.

 Ikalenu Amuzañalu haKushimwina Hejina daNzambi

10, 11. Kutalisha hakuzatisha ijina daNzambi, chaambwinyi chekala hakachi kaYesu niantu ahoshaña nawu amulondelaña?

¹⁰ “Yenu ayinsahu jami akunshimuna nenu, yami Nzambi.” (Isa. 43:12) Chinsahu chaYehova wabadika kulema, Yesu Kristu, welukili nindi hikukooleka kushimwina hejina daNzambi nikuditiyakesha. (Tañenu Kwidika 3:15; Yowanu 17:6; Aheberu 2:12.) Kafwampi, hamuloña wakwila Yesu washimwinini hejina daTata yindi, amuteneni nawu ‘Chinsahu Washinshika.’—Chim. 1:5; Mat. 6:9.

¹¹ Kwambukaku, antu amavulu aditenaña nawu amwimenañaku Nzambi niMwanindi anasawuli ijina daNzambi, nikudifumisha mumaBayibolu awu. Hakumwekesha yililu yoyimu, nshimbi yayinkeluwu akulumpi jawaKatolika katataka yahosheli nawu “ijina daNzambi dasonekawu mutetragrammaton YHWH hiyatela kudizatisha hela kuditena” hampinji yakudifukulaku. * Iyi yitoñojoka yatama chikupu!

12. Indi ambuña aYehova ayilukili ñahi chikupu nawu hiyambuña aYehova muchaaka cha 1931?

¹² Hakwimbujola Kristu ‘niizaza deneni dawayinsahu’ adiñaku henohu Kristu kanda yenzi hanu hamaseki, akwaKristu alala ekalaña amuzañalu hakuzatisha ijina daNzambi. (Heb. 12:1) Kafwampi, muchaaka cha 1931, ambuña aNzambi ayilukili chikupu nawu hiyambuña aYehova kuhitila mukwiteja ijina dakwila nawu aYinsahu jaYehova. (Tañenu Isaya 43:10-12.) Dichi, atumbanji alala aKristu ekalili ‘antu atumbawu ijina daNzambi’ munjila yambukaku.—Yil. 15:14, 17.

13. Tunateli kuzata ñahi kwesekeja nejina datwinkayi Nzambi?

¹³ Chumanyi chitwatela kwila, hakwikala antu atumbawu ijina daNzambi? Chuma chatachi, twatela kwikala ashinshika hakushimwina wunsahu hadi Nzambi. Pawulu wasonekeli nindi: “Muntu wukutambika ijina daYehova wukuhanda. Akumutambika ñahi chakadi kumwitiya? Akumwitiya ñahi chakadi kumutiya? Akutiya ñahi chakadi mukwakushimuna? Akushimuna ñahi chakadi kuyitemesha?” (Rom. 10:13-15) Cheñi, twatela kusolola hatooka nsañu yakutwamba yatañishaña nsakililu yasawulaña Nleñi yetu, chidi neyi ntañishilu yakesi kahelu, yililu yatama yazatishañayi Diyabolu bayi Nzambi wukweti kukeñaku.—Yere. 7:31; 1 Yow. 4:8; esekejenu Maku 9:17-27.

14. Chumanyi chelañawu antu amakwawu hakudiza hejina daNzambi?

¹⁴ Komana mwazañalalaña hakushimwina hejina daTata yenu wamwiwulu? Komana mwakwashañaku antu amakwawu kulonda kwiluka hanidi ijina dajila? Mumbanda wumu wakuParis, mwituña daFrance, watiyili nindi aYinsahu jaYehova eluka ijina daNzambi, dichi wehwili Chinsahu wamuchiyedi wahumañeniyi kulonda yamuleji ijina denidi kufuma muBayibolu. Chatañiliyi Masamu 83:18, mwafumini yuma yayiwahi chikupu. Mumbanda yeniwu watachikili kudiza Bayibolu nawa chayinu mpinji himuhela washinshika wunakuzatila kwituña dacheñi. Mumbanda wumu wamunsakililu yaKatolika wekala kuAustralia chamweniyi ijina daNzambi muBayibolu katachi, wadilili hamuloña wakutiya muzañalu. Nakalakali mudimu wawupayiniya wampinji yejima hadi yaaka yayivulu. Katataka, chelili aYinsahu amwituña daJamaica amuleji mumbanda wumu nsona hekala ijina daNzambi muBayibolu yindi, niyena wadilili hamuloña wakutiya muzañalu. Dichi, ikalenu amuzañalu hakushimwina hejina daNzambi, nawa mwimbujolenuña Yesu, hakutiyakesha ijina denidi kudi antu ejima.

‘Bayi Mukeña Mpata Yamunu Mwishinaku’

15, 16. Indi akwaKristu alala amonaña ñahi kaayi, nawa malwihwinyi itwatela kudihula?

¹⁵ “Bayi mukeña mpata yamunu mwishina, hela yuma yamunu mwishinaku. Neyi muntu wukukeña mpata yamunu mwishina, kukeña kwaTata hikwekala mudi yenaku.” (1 Yow. 2:15) Kanu kaayi kemena hakudimbulula Yehova nispiritu yindi yajila. Dichi, atumbanji alala aKristu hiyatondolwelaña hohu kubula kwikala antu amukaayuku. Ilaña, akaanaña kukeña kanu kaayi, muloña eluka mazu asonekeliyi kambanji Yakoba akwila nawa, ‘wubwambu wampata yamunu mwishina wukweti nkunyi naNzambi.’—Yak. 4:4.

 ¹⁶ Chinateli kwikala chakala kwovwahila mazu aYakoba mudinu ituña mwekala kweseka kwakuvulu. (2 Tim. 4:10) Dichi, Yesu walombeleluku atumbanji twindi nindi: ‘Hinalombi nami wuyifumishi mumpata yamunu mwishinaku, ilaña nami wuyihembi kudi watama. Wena hiyampata yamunu mwishinaku, neyi chineli ninami hinidi wampata yamunu mwishinaku.’ (Yow. 17:15, 16) Dihulenu nenu: ‘Komana, nafwilaña kwambukaku nampata yamunu mwishina? Komana antu añiluka nawu hinanakanaña yidika niyaaku yabula kwitejawu munsona hamu tuhu niyisela yabula kukundama kunsakililu yakutwamba, ilaña yamwekeshaña yililu yamukaayi?’—2 Kor. 6:17; 1 Pet. 4:3, 4.

17. Chumanyi chinateli kusañumuna antu amawahi nyichima kukeña kuswila kudi Yehova?

¹⁷ Mwamweni, yuma yitwakuhwelela kutalisha haBayibolu hiyikaleñela kutukeña kudi antu amwituñaku, ilaña yikaleñela antu akweti nyichima yayiwahi kukeña kwiluka yuma yitwakuhwelela. Eña, neyi antu wenawa eluka nawu twakuhwelela Bayibolu chikupu nawa twadihana nawumi wetu wejima, anateli kuhosha kuhitila mudi awayishewa nawu: “Tuyi nenu, muloña tunatiyi nawu Nzambi mwekala nindi.”—Zek. 8:23.

Mwekeshenuña Kukeña Kwamwekeshañawu akwaKristu Alala

18. Indi kumukeña Yehova niantuñinetu kwabombelamu yumanyi?

¹⁸ Yesu wahosheli nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima” nawa “keñaku mukwenu neyi chiwadikeña eyi aweni.” (Mat. 22:37, 39) Kukeña kweniku (kwatenañawu muchiGiriki nawu a·gaʹpe) hikukeña kwashindamena hayuma yayiwahi nawa kwaleñelaña muntu kukalakala nyidimu, kulondela nshimbi nikwikala nayililu yayiwahi. Hela chochu, kakavulu kwabombelamu kukeña. Kukeña kweniku kunateli kwikala kwabadika kuwaha. (1 Pet. 1:22) Kwekala kwambukaku nalwisu, muloña kwamwekenaña munhoshelu nimuyililu yabulaña kumwekesha lwisu.—Tañenu 1 Akorinda 13:4-7.

19, 20. Shimunenu yakuhumañana yinakumwekesha nawu kukeña kwamwekeshañawu akwaKristu kukweti ñovu.

¹⁹ Chineli kukeña himbadi yamukabu waspiritu yaNzambi yajila, kwaleñelaña akwaKristu alala kwila yuma yakañanyaña kwila antu amakwawu, yidi neyi chaambu, chisemwa, niikañesha  dafumaña kudi akajipolitiki. (Tañenu Yowanu 13:34, 35; Ŋal. 5:22) Antu afwana anyikoku neyi amona kukeña kwamuchidiwu ahayamaña chikupu. Chakutalilahu, kansi weyala kaYudeya wakwituña daIsarela chayiliyi katachi kukupompa kwawakwaKristu, wahayamini hakumona amana kwetu aYudeya niaAraba anakudifukula hamu. Chafuminumu, watachikili kuyaña kukupompa mafuku ejima nawa wetejeli kudiza Bayibolu. Komana mwamwekeshaña kukeña kwamuchidiwu kudi amana kwenu? Komana mwazataña nañovu kulonda kutambwila enyi enzaña Hetala denu daWanta, hichikweti muloña namuza kuyafumawu, ikowa hela chifulu chikwetuwuku?

²⁰ Hakwikala akwaKristu alala, twafwilaña kumwekesha kukeña kudi antu ejima. Mwituña daEl Salvador, mumbanda wetiya muKatolika wadiña nayaaka 87 wakakeleli kuchaachi yawu wadizileña Bayibolu namukwakushimwina wakansi. Ifuku dimu, mumbanda yeniwu wakatili nankashi nawa amutentekeli muchipatela. Mumbanda yeniwu chafuntiliyi kwitala, aYinsahu awambanda amuhempwili nikumwinka yakudya. Amukwashili kukamwihi nakakweji kamukuma. Kwosi muntu niwumu wamuchaachi yawu wamuhempwileña. Chumanyi chafuminumu? Wanatili nkishi jindi, walekeli kuyaña kuchaachi yawu nawa watachikili cheñi kudizaña Bayibolu. Mwamweni, kukeña kwamwekeshañawu akwaKristu kukweti ñovu chikupu! Kumwekesha kukeña kwamwekeshañawu akwaKristu kunateli kusañumuna antu kubadika kuyishimwina hohu.

21. Chumanyi chitunateli kwila hakwila nawu chihandilu chetu chakumbidi chikekali chachiwahi?

²¹ Yesu keña yaleji antu ejima ahoshaña nawu amukalakelaña nindi: “Hinayilukili hela ifuku nidimuku; fumenu kudami enu mwakoñaña yakuluwa.” (Mat. 7:23) Dichi, tusoñenu mukabu wamulemeshaña Tata niMwanindi. Yesu wahosheli nindi: “Antu ejima akutiya awa mazu amami hiyakuyila, akayifwikija neyi mukwamaana watuñilili itala dindi helola.” (Mat. 7:24) Eña, neyi twikala atumbanji alala aKristu, twakekala nawuselewa waNzambi, nawa chihandilu chetu chakumbidi chakekala chachiwahi neyi kwiji anachituñili helola.

[Tumazu twaheshina]

Komana Munakwanuka?

• Indi atumbanji alala aKristu ambukaku ñahi nawatumbanji akutwamba?

• Tenenu “nyikabu” yayilukilañaku akwaKristu alala.

• Yikonkwanyi yamuchidinyi yimwatela kwimika hakusoña mukabu wawakwaKristu?

[Malwihu aKuzatisha haKudiza]

[Mwevulu wudi hefu 13]

Komana mwekala nachaaku chakuzatisha Bayibolu mpinji yejima mumudimu wenu wakushimwina?

[Mwevulu wudi hefu 15]

Komana antu eluka nawu himwanakanaña yidika yabula kwitejawu munsona?