Kwashenu Anyanenu Kulonda Kushinda Kukala Kwamonañawu

ANYANETU awatwansi anakumona kukala kweneni chikupu. Anakushakama mukaayi katama mwekala yililu yatama yaSatana, nawa atela kulwisha ‘nakufwila kwatama kwawukwenzi.’ (2 Tim. 2:22; 1 Yow. 5:19) Hela chochu, hamuloña wakwila afwilaña ‘kwanuka Nleñi yawu,’ atela kushinda yuma yidi neyi kasekesha nimakabi afumaña kudi antu adimbululaña yuma yakuhwelelawu. (Mukwa. 12:1) Hakwanuka mafuku akuwansi windi, mana kwetu wejina daVincent wahosheli nindi: “Muntu wumu wammwesheleña ihuñu, kunyandisha, hela kunzuñesha hamuloña wakwila nadiñi Chinsahu. Mpinji jikwawu ankabishileña chikupu chakwila hinakeñeleña nikuya kushikolaku.” *

Kubombela hakukala kwamonañawu mukaayi, anyanetu awamayala hela awambanda atela cheñi kushinda yitoñojoka yakufwila kwikala neyi akwawu. Muheletu Cathleen wudi muyaaka yindi yakukumishaku yawukankaña wahosheli  nindi: “Hichekala chaswayi kwikala wambukaku nawantu amakwawu.” Mana kwetu wakansi wejina daAlan wetejeli nindi, “Kakavulu nayileña nawakwetu akashikola mumafuku akunsa yamulungu kulonda kuya nakuhema, nawa natiyileña kuwaha kuya nawu.” Cheñi, kufwila kwawatwansi kwakuhema yisela hashikola, kunateli kuleñela kudiñija mukudikunda kwatama, kunateli kuswejelaku. Muheletu wakansi wejina daTanya wahosheli nindi “Nakeña nankashi yisela. Akulumpi jayisela ahashikola mpinji yejima akeñeleña nawu nihemeña yisela yahashikola. Chadiñi chakala kukaana.”

Munateli kukwasha ñahi anyanenu kulonda kushinda kukala kwamonañawu? Yehova waleja anvwali kufumbaña anyanawu. (Yish. 22:6; Efwes. 6:4) Chikonkwanyi chawanvwali amutiyaña Nzambi woma chekala chakuleñela anyanawu kumwovwahilaña Yehova. (Yish. 6:20-23) Kwila mwenimu, chikuleñelaña anyana kukaana ikakeja damukaayi hela chakwila hiyadi nawanvwali jawuku.

Chayikalilaña anvwali kwikala nachihandilu chachiwahi, kuhemba chisaka chawu nikwakamena nyidimu yamuchipompelu, hampinji yoyimu. Antu amakwawu elaña mwenimu hiyanvwali ajiki hela ayikabishaña kudi mwini kwawu wabula kwitiya. Hela chochu, Yehova nakukeña anvwali kwikalañaku nampinji yakudizishaña nikukwasha anyanawu. Dichi, chumanyi chimwatela kwila hakukwasha anyanenu kudikiña kwikañesha dawakwawu, kukweseka, nikukala kwamonañawu mpinji yejima?

Kukwata Wubwambu naYehova

Chatachi, anyanetu awatwansi atela kumwiluka Yehova nawu hiMuntu walala. Atela kuyikwasha kulonda ‘amwiluki Wakamonewaña.’ (Heb. 11:27) Vincent atenawu hakusambila, wanukaña anvwali jindi chamukwashiluwu kwikala ibwambu daYehova. Wahosheli nindi: “Andizishili chalemena kulomba. Inakwanuka kufuma kuwansi wami nalombeleña kudi Yehova mpinji yejima henohu kanda niyi nakunata mafwaha hakadidi. Naswinini chikupu kwakwihi naYehova.” Komana mwalombaña nawanyanenu? Komana kwila mutiyilila kuyuma yatenañawu mukulomba kwawu kudi Yehova nehi? Komana afuntulukaña hohu mumazu wowamu? Tahindi amwekeshaña chatiyañawu hadi Yehova neyi anakulomba? Neyi mutiyililaña chiyalombañawu, munateli kwiluka neyi chakwila anakuswila kwakwihi naYehova chikupu hela nehi.

 Cheñi, kutaña Izu daNzambi mafuku ejima dichuma chikwawu chalema chaleñelaña atwansi kuswila kwakwihi naYehova. Cathleen, atenawu hakusambila, wahosheli nindi: “Kutaña Bayibolu kufuma kuwansi wami kwankwashili. Kwila mwenimu kwankolesheli chikupu muloña nelukili nami hela chakwila antu anheleli, Yehova wankwashileña.” Komana anyanenu atañaña Bayibolu mafuku ejima?—Mas. 1:1-3; 77:12.

Mwamweni, anyana ashiyashana munjila yatambwilañamu kufumba kwayifumbañawu anvwali. Cheñi, hakwila nawu ayiluku hambidi kuspiritu chashindamenaña hayaaka yakusemuka yikwetuwu. Dichi, chakubula kuyifumba, chinateli kuyikalila atwansi kwiluka nawu Yehova hiMuntu walala chikupu. Anvwali atela kuyileja anyanawu mazu aNzambi kulonda anyana atwesheña kwiluka chatiyañayi Yehova hayuma yinakukeñawu kwila, kudi kwejima kwaduwu. (Kuhit. 6:6-9) Atwansi atela kwiluka nawu Yehova wayakamenaña chikupu.

Chakuhanjeka Chiwahi

Kuhanjeka hinjila yikwawu yalema yakukwashilamu anyanenu. Hela chochu, kuhanjeka chiwahi mwabombela yuma yayivulu kubadika hohu hakuhanjeka nawanyanenu. Kwabombelamu kwihula malwihu nikutiyilila nakanañachima chinakwakulawu, hela chakwila anakuli mwaluwa. Anne, mama yawantu wukweti nyana yawamayala yiyedi, wahosheli nindi, “Nayihulaña malwihu sampu neluki yuma yinakutoñojokawu niyuma yinakwilawu muchihandilu chawu.” Komana anyanenu ayiluka nawu mwayitiyililaña neyi anakuhosha? Tanya, atenawu hakusambila, wahosheli nindi: “Anvwali jami adiñi nakuntiyilila chikupu nawa anukileña yuma yitwahanjekeleña. Elukili majina awakwetu inatañaña nawu mushikola. Adiña nakuñihula hadi wena niyuma yikwawu yitwahanjekeleñanawu kumafuku akunyima.” Kutiyilila nikwanuka, hiyuma yakeñekaña hakuhanjeka chiwahi.

Yisaka yayivulu yeluka nawu mpinji yakudya, diyi mpinji yayiwahi yakuhanjeka. Vincent wahosheli  nindi: “Kudyila hamu chadiña chalema muchisaka chetu. Neyi chinatwesheki, twadiñi nakudyila hamu kumesa chisaka chejima. Hiyetejeleña kutalaña hachisanji chanyivwimbimbi, kutiyilila kuchisanji, hela kutaña hampinji yakudyaku. Chineli mpinji yejima hitwahanjekeleña chikupuku, kuhanjeka kwanleñeleleña kubula kwakama mafuku ejima nawa kwankwashileña kushinda kukala niikañesha dinamweneña kushikola.” Wabombeleluhu nindi: “Kwinjilila kuhanjekaña nawanvwali jami hampinji yakudya, cheñi kwankwashili kwikala wakasunuka kuhanjekanawu neyi inakukeña wukwashu hayuma yimu yalema.”

Dihulenu nenu, ‘Kapampa kañahi kitwadyilaña hamu nachisaka mulungu nimulungu?’ Komana neyi muhimpa muyuma yeniyi chikuyileñela kuhanjekaña chikupu nawanyanenu?

Chichawahila Kuhituluka Muyuma Yimunadizi

Kudifukula kwaChisaka kwamelela nikwena kwaleñela ejima muchisaka kwikala akasunuka hakuhanjeka nawa kwakwashaña atwansi kushinda kukala kwamonañawu. Alan, atenawu hakusambila wahosheli nindi: “Avwali jami azatishileña mpinji yakudiza kwachisaka kulonda kutwileñela kwikala akasunuka hakuhosha. Azatishileña nsañu yesekeneña nayuma yitwamweneña. Mama yaAlan wahosheli nindi: “Twazatishileña mpinji yakudiza kulonda kuhituluka muyuma yitunadizi. Kwila mwenimu kwakwashileña anyanetu kwiluka chakuhakwilaku chikuhwelelu chawu nikumwekesha nawu yuma yakuhwelelawu yalala chikupu. Chumichi chayileñeleleña kuumika kukala kwamweneñawu.”

Mwalala, neyi atwansi anakumona ikakeja, kakavulu akeñekaña kwila yuma yayivulu chatela kukaana hohu nakudiyila. Atela kwakula malwihu adi neyi muloñadi nawa wunakaaninidi? Cheñi atela kukuhwelela yuma yatela kwilawu neyi anakuyisekesha hamuloña wachikuhwelelu chawu. Neyi hiyanateli kuhakwilaku yuma yakuhwelelawuku, chikuyikalilaña kuhakwilaku kudifukula kwalala. Kuhituluka muyuma yinadizuwu kunateli kukolesha chikuhwelelu.

 Chikasha chidi hefu 18 chinashimuni yuma yikwawu yimwatela kuzatishaña hampinji yaKudifukula kwaChisaka kwamelela. Hampinji yimunakuhituluka muyuma yeniyi ilishenu kudiza kweniku kwikala kwalala kuhitila mukuyihula anyanenu malwihu hañakwilu yikuhanawu. Hampinji yimunakuhituluka muyuma yimunadizi, hanjekenu hayuma yayiwahi yimunateli kudizila kuyakutalilahu yamuBayibolu. Chakadi nikujina, kudizisha anyanenu munjila yeniyi hetala, kunateli kukwasha anyanenu kushinda kukala kushikola nikudi kwejima kwaduwu.

Komana Itala Denu Dekala hiChiswamu?

Komana anyanenu akeñaña kufunta kwitala hanyima yakufuma kushikola hefuku didi dejima dayañawu kushikola? Neyi itala denu dekala hichiswamu, chikukwasha anyanenu kushinda kukala kwamonañawu mafuku ejima. Muheletu wasumbuka wekala haBeteli wahosheli nindi: “Chinakulileña, chuma chaswejeli kulema kudami chadiñi chakwila nawu itala detu dadiñi hichiswamu. Hela chakwila yuma hashikola yikukala ñahi, nelukileña nami neyi nifunta kwitala, yuma yejima yikwikala chiwahi.” Yililu yamuchidinyi yekala hetala denu? Komana ayiluka nawu mwekala ‘akamadombu, mwakokwelaña kwenu, nikudambola,’ tahindi ayiluka nawu mwamwekeshaña ‘kukeña, muzañalu, [ni]kuwunda’? (Ŋal. 5:19-23) Neyi hetala hihekala kuwundaku, komana mwazataña nañovu kulonda kwiluka yuma yimwatela kuhimpa hakwila nawu itala denu dikali hichiswamu chawanyanenu?

Njila yikwawu yakukwashilamu anyanenu kushinda kukala hikuhitila mukutachikilahu kuhanjeka nawu chiwahi. Chakutalilahu, komana kwila mutambikaku amana kwetu niahela apama kuspiritu amuchipompelu kulonda kwikala hamu nachisaka chenu hampinji imunakunooka nehi? Hela, kwila muloñesha yakudya kulonda kudyila hamu nawankoñi endaña hela amana kwetu amakwawu ekala mumudimu wampinji yejima nehi? Komana mwelukahu amishonali adi ejima hela amana kwetu niahela atela kudikwata wubwambu nawanyanenu, hela kuhitila mukudisonekelaña nyikanda hohu, kuditemeshelaña nyikanda haIntaneti hela kuditemeshelaña nshiña? Wubwambu wamuchidiwu wunateli kukwasha anyanenu kutonda njila yayiwahi nikwimika yikonkwanyi yakuspiritu. Toñojokenu hachakutalilahu chachiwahi chamwekesheliyi kapostolu Pawulu kudi Timotewu hadiñayi kansi. (2 Tim. 1:13; 3:10) Kudikunda chikupu naPawulu kwamukwashili Timotewu kusha maana hayikonkwanyi yakuspiritu.—1 Kor. 4:17.

Yihamekenuña Anyanenu

Yehova watiyaña kuwaha hakumona atwansi chiyanakuumika hamuloña wakufwila chalala, hichikweti muloña nekakeja damukaayi kaSatanaku. (Mas. 147:11; Yish. 27:11) Chakadi nikujina, anenu mwatiyaña kuwaha hakumona atwansi anakutonda njila yayiwahi. (Yish. 10:1) Anyanenu atela kwiluka chimwatoñojokaña hadi wena, nawa yihamekenuña chikupu. Yehova wayimikila anvwali chakutalilahu chachiwahi. Hampinji yamupapatishileñawu Yesu, Yehova wahosheli nindi: “Yeyi Mwanami nakeña, natiyaña kuwaha nankashi mudeyi.” (Maku 1:11) Awa mazu aTata yindi amukolesheli Yesu kuumika kukala kwadiña kukamwihi nakumonayi. Ninenu mwatela kuleja anyanenu nenu mwayikeña, nikuyihameka hayuma yinakukoñawu.

Ilukenu nenu, himunateli kukiña chikupu anyanenu kwikakeja, kukuyikabisha nikukasekeshaku. Hela chochu, munateli kwila yuma yayivulu kulonda kuyikwasha. Munjilanyi? Yikwashenu kulonda akwati wubwambu naYehova. Ikalenu nayililu yinateli kuleñela kuhanjekaña hayuma yinateli kuyikolesha. Kudifukula kwaChisaka kwamelela kwatela kwikala kwakuwahi, nawa itala denu datela kwikala hichiswamu. Chakadi nikujina, kwila mwenimu chikukwashaña anyanenu kushinda kukala kwamonañawu.

[Tumazu twaheshina]

[Chikasha/Mwevulu wudi hefu 18]

KUHITULUKA MUYUMA YIMUNADIZI KUNATELI KUYIKWASHA

Yakutalilahu yikwawu yakukala kwamonaña atwansi anayisoneki heshina. Komana kwila muhitulukaña muyuma yeniyi hampinji yaKudifukula kwaChisaka kwamelela nehi?

▸ Mukulumpi wayisela namuleji mwanenu nindi yahemeña yisela hashikola.

▸ Hakufuma kushikola, mwanenu anamwinki makanya.

▸ Atwansi awamayala anakumuchinisha mwanenu nawu akamweta neyi amumona cheñi nakushimwina nsañu yayiwahi.

▸ Hampinji yinakukalakalayi mwanenu wamumbanda mumudimu wakushimwina kwitala nikwitala, nadibulakani namukwawu mukashikola.

▸ Mwanenu wamumbanda anamuleji kuya nakwimana kumesu awakwawu kulonda yashimuni chabulilañayi kudifukwila kumpandela.

▸ Kansi weyala hakumusekesha mwanenu weyala hakwikala Chinsahu.

[Mwevulu wudi hefu 17]

Komana anyanenu atañaña Bayibolu mafuku ejima?

[Mwevulu wudi hefu 19]

Komana mwatambikañaku amana kwetu niahela apama kuspiritu kulonda kwikala hamu nachisaka chenu hampinji imunakunooka?