Chitwa Chatela Kukwasha Atwansi Kwanuka Nleñi Yawu
Chitwa Chatela Kukwasha Atwansi Kwanuka Nleñi Yawu
YAAKA 3,000 yinahituhu, Solomoni, iyala mukwamaana wasonekeli nindi: “Anukaña nawa Nleñi yeyi mumafuku awukwenzi weyi.” (Mukwa. 12:1) Ichi atwansi akwaKristu akweti chitwa chikwawu chikuyikwashañaku kwanuka Nleñi yawu. Mukanda wunakuhosha nawu Ifipusho Abacaice Bepusha—Nefyasuko Ifingabafwa, Ibuuku 2, awidishili haKupompa kwaNkambi kwawaYinsahu jaYehova kwahosheleña nawu “Twalombolewaña naSpiritu yaNzambi” kwadiñaku mukaayi kejima kutachika muMay 2008 nakushika muJanuary 2009.
Kumatachikilu aniwu mukanda mudi mukanda wunasonekeluwu atwansi kufuma Kwizaza Dalombolaña. Hakachi kansañu yidimu, mudi nsañu yinakuhosha nawu: “Tunakulomba chikupu netu nsañu yidi mumukanda weniwu yikuyikwasha kwimika mushindu hamuloña wekakeja nikweseka kunakumonawu atwansi makonu nawa yikuyikwasha kufuukula kwesekeja nachakeñañayi Nzambi.”
Anvwali akeñaña kulela anyanawu “nakuyibabesha nikuyikonkomwena mudi Mwanta [Yehova].” (Efwes. 6:4) Neyi anashiki dehi hawukwenzi hela hawunkaña, atwansi amavulu hiyadikuhwelelaña awenuku nawa afwilaña kuyikwasha. Neyi mudi anvwali akweti mwana washika dehi hawukwenzi hela hawunkaña, munateli kukwasha ñahi mwanenu kuhetelamu mumukanda weniwu? Talenu njila jinashimunuwu heshina.
▪ Tambulenu kopi yamukanda weniwu nawa ilukenu chikupu nsañu jidumu. Chumichi chakeñekaña yuma yayivulu kubadika hakuwutaña hohu. Mwatela cheñi kwiluka nhoshelu yinasonekuwu muniwu mukanda. Chatela kuyileja hohu atwansi yuma yayiwahi niyatama, mukanda weniwu wunakuhosha chikupu hakufumba “yitoñojoka” yawu. (Heb. 5:14) Wunakuyileja cheñi njila jatela kuyikwasha chakukakela kuyuma yaloña. Chakutalilahu, Kapetulu 15 kanakuhosha nawu (“Kuti Nacita Shani pa Kuti Nshilekonkelela Abanandi?”) kanakuyileja atwansi kuhosha yuma yayivulu kubadika hakuhosha hohu nawu inehi. Kapetulu kenaka kalumbulula njila jamuBayibolu nihañakwilu yayiwahi yikuyikwasha kwiluka “mwakwakwila antu ejima.”—Kol. 4:6.
▪ Zatishenuña nsañu yinakuhosha hakuhanjeka. Hela chakwila iyi nsañu analoñesheli atwansi, komana ninenu kwila musoneka mumukanda wenu hanakukeñeka kusoneka nehi? * Neyi himukuhanjeka hefu 16 hadi malwihu ayedi imukuhanjekahu anakuhosha hansañu yakudiluka neyala hela namumbanda, esekenu kwanuka chimwatiyileña hampinji yimwadiñi muyaaka yawukwenzi hela yawunkaña neyi yamwanenu. Hadaha mukukeña kusoneka ñakwilu hamapwata analoñeshuwu kwesekeja nachimwadi kwakula awa malwihu hampinji yimwadiñi muyaaka yeniyi. Kufumahu, dihulenu nenu: ‘Indi yitoñojoka yami kutalisha haniyi nsañu yinahimpiki ñahi hayaaka yinahituhu? Yumanyi yinnadizi kufuma kuwansi wami, nawa nateli kumuleja ñahi chiwahi mwanami yuma yinnadizi?’
▪ Lemeshenu Yuma Yajindañayi Mwanenu. Yibalu yakuhanjekahu yidi muniwu mukanda anayiloñeshi kulonda kukwasha mwanenu kwiluka yuma yinakutoñojokayi nikuyisoneka mumukanda windi hela kutoñojokañahu. Chikonkwanyi chenu chakufwila kwiluka jidi mumuchima windi, bayi nsañu jidi mumukanda winduku. Hefu 2 dachibalu chinakuhosha nawu “Mwe Bafyashi,” iwu mukanda wahoshaña nawu: “Hakwila mukwashuku anyanenu atwansi kusoneka nsañu chakadi kusweka, himwatela kutalaña hansañu yasonekañawu mumukanda wawuku. Mukuhita kwampinji akakasunuka nakuyileja yuma yinasonekuwu.”
Chitwa Chatela Kuyikwasha haKudiza Bayibolu kwaChisaka
Mukanda wa Ifipusho Abacaice Bepusha, Ibuuku 2, hichitwa chachiwahi nankashi chakuzatishaña haKudifukula kwaChisaka. Chineli mumukanda weniwu himwekala malwihu akuhanjekahu parakalafu niparakalafuku, munateli kuwuzatisha ñahi? Komana kwila muhimpa njila yakudizilamu kuhitila mukuzatisha njila yatela kukwasha anyanenu chiwahi nehi?
Chakutalilahu, yisaka yikwawu yinateli kuhitulukaña muyibalu neyi hiyakuhanjeka hachibalu chinakuhosha nawu “Ifyo Nkacita Abanandi Nga Balefwaya Mbakonkelele” chidi hamafu 132 ni 133. Lwihu lwatachi lunateli kukwasha mwanenu weyala hela wamumbanda kwiluka yuma yamukalilaña nankashi. Lwihu lwamuchiyedi lunateni chuma chinateli kuleta kukala. Hanyima yakuhosha hayuma yafumaña mukudiñija hela kudikaña nekakeja dawamabwambu, mwanenu anamwihuli kutoñojokela chadimu kwiteja ikakeja, kukaana, hela kufuntisha katama nakatama. Mukwashenu mwanenu kwikala wababala nawa nikwiluka mwakwakwila malwihu akutweshayi kwakula nachikuhwelelu.—Mas. 119:46.
Chitwa Chakutiyañenamu
Mukanda waIfipusho Abacaice Bepusha, Ibuuku 2, wakoleshaña atwansi kuhanjeka nawanvwali jawu. Chakutalilahu, yikasha yinakuhosha nawu “Kuti Nacita Shani pa Kuti Ndande Nabafyashi Bandi pa Lyashi Lya Baume Nangu Ilya Banakashi?” (hamafu 63-64) nichikasha chinakwila nawu “Landa Nabafyashi Bobe” (hefu 189) yashimuna njila jajiwahi hachakutachika mpanji kutalisha hansañu yatiyishaña nsonyi hakuyihosha. Kankaña wumu wayaaka 13 wasonekeli nindi: “Iwu mukanda wankwashili kwikala nawulobu wakuhosha nawanvwali jami hayuma yinatoñojokeleña—nihayuma yinakoñeli.”
Mukanda weniwu wahoshaña cheñi hansañu yakuhanjeka munjila jikwawu. Kunsa yakapetulu kadi kejima kwekala chikasha chahoshaña nawu “Uletipo Shani?” Chikuyikwasha kuhitulukamu cheñi nawa chikwikala neyi yikuma yakuhanjekahu chisaka. Kwakwihi nakukumisha kwakapetulu hikapetulu kudi cheñi chikasha chinakuhosha nawu “Ifyo Ndefwaya Ukucita!” Chikasha chenichi chakwashaña atwansi kusoneka njila jikwawu jinateli kuzatishawu jadiziluwu mukapetulu kenaka. Mbadi yakukumishaku yanichi chikasha chinakwila nawu “Ifyo Ndefwaya Ukucita!” yahoshaña nawu: “Ifyo ningatemwa ukwipusha abafyashi bandi pali ili ilyashi ni fi . . . ” Kwila mwenimu chikuyikwasha anyana kwihula anvwali jawu kulonda ayileji maana amawahi.
Yishikenu haMuchima
Hakwikala anvwali, chikonkwanyi chenu chakushika mwanenu hamuchima. Mukanda wa Ifipusho Abacaice Bepusha, Ibuuku 2, wunateli kuyikwasha kwila mwenimu. Talenu chelañayi tata yawantu wumu hakuzatisha iwu mukanda kulonda yasañumuni mpwila yakuhanjeka chiwahi namwanindi wamumbanda.
“Ami niRebekah twekala namaluña amawahi kutwayaña nakwolola nyendu, nikuchovwa jinkinga, hela kwendesha motoka. Kwila mwenimu kwamuleñelaña mwanami kwikala wakasunuka hakuhosha.
“Chibalu chatachi chawunu mukanda chitwahanjekahu, himukanda kufuma Kwizaza Dalombolaña nichibalu chakwila nawu ‘Mwe Bafyashi.’ Nakeñeleña mwanami wamumbanda kwiluka nindi watela kwikala wakasunuka kusoneka mumukanda windi yuma yejima chakadi kusweka neyi chinashimunuwu hefu 2. Hinatañaña nsañu jinasonekiyuku.
“Namwitejeli Rebekah kutonda tupetulu twakeñeleñayi nindi tuhanjekeñahu mukusinsashana. Kapetulu katachi katondeliyi kahosheleña nawu ‘Bushe Mfwile Ukwangala Ifyangalo Fya paKompyuta?’ Hinabokeleña hohu nami wukutonda aka kapetuluku. Ilaña, kudi chuma chamuletesheli kutonda kapetulu kenaka. Amabwambu jindi amavulu adiñi nakuhema chisela chamadombu. Hinelukili nami muchisela chenichi mwadiñi madombu ninhoshelu yatamaku. Nelukili yuma yejimiyi hampinji yitwahanjekeleña hachikasha chahoshaña nawu “Ifyo Ndefwaya Ukucita!” hefu 251. Chikasha chenichi chamukwashili cheñi Rebekah kwiluka chakwakula neyi muntu wudi wejima yamukakeja kutala chisela chamuchidiwu.
“Chayinu mpinji, Rebekah hanjindaña yuma yasonekañayi mumukanda winduku. Hitwajiñaña kudizaku. Twelaña iwu yatañaku, iwu yatañaku, nawa wakeñaña kuhosha hansañu yejima, kushilahu nyevulu niyikasha. Chumichi chankwashañaku kuhosha yuma yadiñi nakummwekena hampinji yinadiñi neyi yena, kuhiñahu niyena wukunlumbulwila yuma yinakumwekana makonu. Wakeñaña kunleja yuma yejima!”
Neyi mudi anvwali, tunakuhweleli netu mwatiyili kuwaha chedikili iwu mukanda. Ichi mukweti kukooleka kwakuwuzatisha chiwahi. Izaza Dalombolaña dinakuhweleli nawu mukanda wa Ifipusho Abacaice Bepusha—Nefyasuko Ifingabafwa, Ibuuku 2, wukukwasha chikupu chisaka chenu. Tunakulomba netu iwu mukanda wukwashi antu ejima, sweje-e anyanetu kulonda ‘endeña chakuyendesha kudi spiritu yajila.’—Ŋal. 5:16.
[Tumazu twaheshina]
^ Hamaluña amakwawu hakusonekela nsañu atela kusonekahu kudi akulumpi niatwansi. Chakutalilahu, chikasha chinakuhosha nawu “Uleilama” (hefu 221) chinateli kuyikwasha neyi chichinateli kukwasha mwanenu weyala hela wamumbanda. Dichatela kuzata nichibalu chinakwila nawu “Ifyo Nkacita Abanandi Nga Balefwaya Mbakonkelele” (hamafu 132-133), “Ifyo Nakulabomfya Indalama Cila Mwenshi” (ifu 163), “Ifyo Mfwaya Ukucita” (ifu 314).
[Chikasha chidi hefu 30]
Yuma Yinakuhoshawu Atwansi Amakwawu
“Iwu himukanda wakeñekaña kushakama hamaseki nansonekeshu nakuwutaña nikutoñojokahu chikupu. Chineli awusoneka neyi mukanda wakusonekamu nsañu jenu, waleñelaña muntu kutoñojokahu kwakankawindi nakufwila kwikala nachihandilu chachiwahi.” —Nicola.
“Namonaña ikakeja dakukeña kudiluka nawamayala kufuma tuhu nikudi antu alemeshawu. Chibalu chatachi chawunu mukanda chankwashili chikupu nawu hela chakwila antu akuhosha chamuchidinyi, nichidi kanda nifuukuluhu kudiluka nawamayala.”—Katrina.
“Chikasha chahoshaña nawu ‘Are You Thinking of Getting Baptized?’ chinankwashi kulemesha chipapatishu chami nankashi. Chanleñeleli kubalumuna njila yakudizilamu nikulomba.”—Ashley.
“Hela chakwila anvwali jami akwaKristu anandizishi chalala kufuma kuwansi, iwu mukanda wunankwashi kuditoñojokela amaweni yuma yinatela kwila muchihandilu. Wunankwashi cheñi kwikala wakasunuka chikupu nawanvwali jami.”—Zamira.
[Mwevulu wudi hefu 31]
Anvwali, mwatela kwiluka nsañu yidi mumukanda wunu
[Mwevulu wudi hefu 32]
Imikenu chikonkwanyi chakushika mwanenu hamuchima