Kaanenu Nsañu jaKutwamba jaSatana

‘BAYI ayidimbaku. Nzambi yenu hakuyikwashaku. Tutiyañani hela mumoni ihuñu!’ Awa diwu mazu ahosheli Rabishake ntemesha yaMwanta wakuAshuri Senakeribi, alejeliyi antu amuYerusalema. Mashidika amwanta alukukili ituña daYuda. Mazu antemesha yeniwu adiñi akutamisha yililu yayiwahi yawantu akuYerusalema nikuyitiyisha woma kulonda azeyeli.—2 Anya. 18:28-35.

Antu amuAshuri ayilukili nawu adiña awukatu. Atiyishileña woma ayilumbu jawu kuhitila mukuyileja chiyadiña nakuyandisha antu akwatileñawu muwuduñu. Kwesekeja nachahosheli Philip Taylor weluka nsañu jakunyaka, antu wenawa adiñi nachaaku chakutiyisha antu woma nikuwanisha nsañu jakutwamba nikutiyisha woma antu atela kwikala ayilumbu jawu kuhitila mukuyileja nyevulu yamwekesheleña chiyadiña nawukatu kudantu nawa chaluwañesheleñawu yitoñojoka yawu. Nsañu jakutwamba jekala hichitwa chañovu hama. Taylor wahosheli nindi nsañu jeniji “jaluwañeshaña yitoñojoka yawantu.”

AkwaKristu alala ‘hiyalwishaña nawantu akweti nyijimba namashuku, alwishaña . . .nawaspiritu atama,’ dikwila nawu, nayileñaleña yakuspiritu yadikañili naNzambi. (Efwes. 6:12) Satana Diyabolu diyi chilumbu chetu muneni. Niyena watiyishaña antu woma kuhitila munsañu jakutwamba.

Satana wahoshaña nindi nateli kufumpa kashinshi ketu. Mumafuku ankakulula Yoba, Satana wamulejeli Yehova Nzambi nindi: “Muntu wukuhana yuma yakwetiyi yejima nawumi windi.” Munjila yikwawu, neyi ikakeja disweja, muntu nateli kufumpa kashinshi kindi kudi Nzambi. (Yoba 2:4) Komana Satana wahosheleña mwalala? Komana wejima wetu tukweti mwakukumina kutalisha hayuma yitunateli kuumika kulonda kuhemba kashinshi ketu? Satana wakeñaña nindi tukuhweleli mwenimu. Dichi, wazatishaña nsañu jatama kulonda kutuleñela kutoñojokaña mwenimu. Tushinshiki hanjila jindi mwelilañayi mwenimu nikwiluka mutwatela kumukaanina.

“Afuma Mulunkuñu”

Satana wazatishili Elifwazi, wahakachi kawalunda jaYoba asatu amwendeleleli, kulonda kutadika nindi antu hiyanateli kutwalekahu kwikala ashinshika kudi Nzambuku. Hakutena antu nindi “ashakama mumatala amaseki,” wamulejeli Yoba nindi: “Afuma mulunkuñu, achikekaña neyi kabubu? Elaña budidi adi kwoku, namelela anachikeki dehi puchi-puchi, ajilumukaña chakadi niniwu wukutalaku.”—Yoba 4:19, 20.

Nsona jikwawu jatufwanisha ‘kunsaba jamawumba,’ nuñu jamawumba. (2 Kor. 4:7) Twekala azeya muloña twaswana nshidi nikubula kuwanina. (Rom. 5:12) Neyi tudimena, chaswayi kutwilukuka kudi Satana. Ilaña hakwikala akwaKristu, Yehova watukwashaña. Hela chakwila twazeya, twekala alema kumesu aNzambi. (Isa. 43:4) Kubombelahu, Yehova wayinkaña spiritu yajila antu amulombaña. (Luka 11:13) Spiritu yindi yinateli kutwinka “ñovu jabadika nankashi,” kulonda kutukwasha kuumika makabi atuletelañayi Satana. (2 Kor. 4:7; Fwi. 4:13) Neyi tudikaña naDiyabolu, ‘nakukola muchikuhwelelu,’ Nzambi wakatukolesha. (1 Pet. 5:8-10) Dichi, hitwatela kutiya Satana Diyabolu womaku.

 Muntu “Wanwaña Kuheña”

Elifwazi wehwili nindi: “Ochu muntu wudi ñahi mwaka ekali wakadi majilu? Wavwalika kudi mumbanda wudi ñahi mwaka ekali waloña?” Kuhiñahu watwalekeluhu kwakula nindi: “Chikaña indi ajila Nzambi hayikuhwelelañaku; hela tuhu mawulu hiyabulaña majilu kumesu induku; winzi wumoni muntu washimanaña watoka dehi, wanwaña kuheña neyi meji!” (Yoba 15:14-16) Elifwazi walejeleña Yoba nindi kwosi muntu waloña kumesu aYehovaku. Cheñi Satana wazatishaña yitoñojoka yatama. Watuleñelaña kwakamena hayiluwa yitwakoñeli kunyima, nikudifwisha nanyiloña nikutuleñela kutoñojoka netu hiyanateli kutwanakenaku. Cheñi wakeñaña tutoñojokeña netu Yehova watukuhwelelaña nindi tumukoñeleña yuma yayivulu, nawa nindi luwi lwindi, kwanakena niwukwashu windi hijinateli kubuta yiluwa yetuku.

Kafwampi, wejima wetu ‘tunavulumuni, nikukañanyi kushika mwashikila kulema kwaNzambi.’ Kwosi muntu wabula kuwanina wunateli kushika hayipimu yaloña yaYehovaku. (Rom. 3:23; 7:21-23) Hela chochu, hichaya mukwila nawu twekala amukunkulwayi kudi yenaku. Yehova weluka nindi “kapela mukulu atenañawu nawu Diyabolu, diyi Satana,” watukoolekelaña hamuloña wakubula kuwanina. (Chim. 12:9, 10) Nzambi weluka nindi ‘tudi lunkuñu hohu,’ nawa ‘hakeñaña chiluwa’ mudetuku.—Mas. 103:8, 9, 14.

Neyi tuleka kwila yuma yatama, nikulomba kudi Yehova mukudikehesha nakumwekesha netu tunabalumuki chikupu mumuchima, ‘yena wakatwanakena nankashi.’ (Isa. 55:7; Mas. 51:17) Bayibolu yahosha nawu, hela chakwila nshidi jetu “jichinana, jakatooka to-o neyi mpeza.” (Isa. 1:18) Dichi, tufwilenu kutwalekahu kwila yuma yakeñañayi Nzambi.

Hamuloña wanshidi jetu, hitunateli kwikala aloña kumesu aNzambuku. Adama niEvu hiyatwalekeluhu kwikala aloñaku, nawa ajimbesheli wumi wahaya nyaka bayi neyi wena hohuku, ilaña wejima wetu. (Rom. 6:23) Hela chochu, hamuloña wakusweja kukeña antu, Yehova waloñesheli njila yazatishañayi kulonda kutwanakena nshidi jetu neyi tukuhwelela mumulambu wefutu danyiloña daMwanindi, Yesu Kristu. (Mat. 20:28; Yow. 3:16) Iyi hinjila yayiwahi yamwekeshelamu Nzambi “luwi.” (Tit. 2:11) Nzambi wanakenaña nshidi jetu. Dichi, hitwatela kumwiteja Satana kutuleñela kutoñojoka netu Nzambi hanateli kwanakena nshidi jetuku.

‘Kwataku haMujimba Windi’

Satana wahosheli nindi Yoba wukuleka kumukuhwelela Nzambi neyi yokata nankashi. Hakumuzuñesha Yehova, Diyabolu wahosheli nindi: ‘Kwataku hamujimba windi, wutali neyi wukubula kukuhosha chatama kumesu eyi.’ (Yoba 2:5) Chilumbu chaNzambi watiyaña kuwaha neyi yatuleñela kutoñojoka netu tudi amukunkulwayi hamuloña wakukata.

 Hela chochu, Yehova hatwikaanaña neyi tunakukañanya kukalakala yuma yejima neyi chitwakalakeleña kunyima mumudimu winduku. Indi neyi chakwila ibwambu detu amulukuka nakumukatisha? Komana tunateli kumudiwula hamuloña wakwila naleki kutwikoñela yuma yayivulu neyi chelileñayi kunyima? Inehi! Tukutwalekahu kumukeña nikumwakamena, sweje-e neyi amukatishili hamuloña wakufwila kutwilila chuma. Yehova hanateli kukoña yuma yanteshaku. Bayibolu yahosha nawu: “Nzambi waloña hakavulamena mudimu wenu hela kukeña kumwakeñeli ijina dinduku.”—Heb. 6:10.

Nsona jahosha hadi “mumbanda wanfwila kazweñi wumu” wadiñi nakutwala hambidi kudifukula kwaNzambi hadi yaaka yayivulu. Yesu chamumweniyi nakuumbila “tumali twanyanya tuyedi” muchikasha chakuswekela mali chatembeli, komana Yesu wamudiwili mumbanda yeniwu nitumali twaheniyi? Kwambukaku, Yesu wamuhamekeli hama hakukalakala nañovu kulonda kutwala hambidi kudifukula kwalala.—Luka 21:1-4.

Neyi tutwalekahu kwikala ashinshika, wubwambu wetu naYehova wakakola, hichikweti muloña namakabi yitwamonaña hamuloña wawushinakaji hela kukata kwenzaña hamuloña wakubula kuwaninaku. Nzambi hamba kashiya antu jindi ashinshika hamuloña wamakabi anakuyikañesha kumukalakelaku.—Mas. 71:9, 17, 18.

Tambulenu “Itepa daChikuñu daWamwinu”

Tunateli kudikiña ñahi kunsañu jakutwamba jaSatana? Kapostolu Pawulu wasonekeli nindi: “Ikalenu akwañovu mudi Mwanta, nimuñovu jindi jasweja nankashi. Manyekenu yitwa yaNzambi yejima, kulonda mutweshaña kudikaña namaana adiyabolu akudimbana.” Chitwa chimu chaniyi yitwa yakuspiritu chekala ‘hiitepa dachikuñu dawamwinu.’ (Efwes. 6:10, 11, 17) Hamuloña wansañu yakutwamba yaSatana, twatela kutambula itepa denidi nikudivwala. Itepa damushidika dakiñaña mutu windi. ‘Kuchiñeja kwetu kwawamwinu,’ kukuhwelela muyikaninu yaNzambi kutalisha hetuña dadiwahi dadiha, kwatukiñaña kukubula kutiyilila kunsañu jakutwamba jaSatana. (1 Tesa. 5:8) Twatela kutoñojokaña chikupu hakuchiñeja kweniku kuhitila mukudizaña Nsona.

Yoba womikili makabi asweja kufuma kudi Satana. Yoba wakuhweleleli chikupu mukusañuka chakwila nsañu yakufwa hiyamuneñesheluku. Ilaña, wamulejeli Yehova nindi: “Wadi kutambika, ami nadi kwitiya; wunafwili mudimu wakumakaseyi.” (Yoba 14:15) Hela chakwila Yoba wadi kufwa hamuloña wakuhemba kashinshi kindi, wakuhweleleli nindi hamuloña wakwila Nzambi wakeña Ambuñindi ashinshika, chadi Kumuleñela kuyisañula.

Anetu nawa tumukuhweleleña Nzambi walala. Yehova nateli kukañesha kukala kudi kwejima kunateli kuletayi Satana niantu jindi hadetu. Anukenu cheñi nenu, Pawulu watukolesha nindi: “Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela.”—1 Kor. 10:13.

[Mwevulu wudi hefu 20]

Yehova walemeshaña mudimu wenu wumwamukalakelaña nakashinshi

[Mwevulu wudi hefu 21]

Tambulenu itepa dachikuñu dawamwinu, nikudivwala