Komana Yehova Mwamumonaña Neyi hiTata Yenu?

‘MWANTA, tuleji chakulomba.’ Kambanji wumu chamulejeliyi Yesu mazu wenawa, Yesu wamwakwili nindi: “Chimukulomba ilenuña nenu, Tata yetu wekala mwiwulu, ijina deyi dijili.” (Luka 11:1, 2) Yesu wadi kumutena Yehova kuhitila mukuzatisha nkumbu jajiwahi jidi neyi “Chinaweji,” ‘Nleji Muneni,’ “Nleñi,” “Wakunyaka nanyaka,” nawa ‘Mwanta wahaya nyaka.’ (Kutach. 49:25; Isa. 30:20; 40:28; Dan. 7:9; 1 Tim. 1:17) Ilaña, Yesu wazatishili nkumbu yakwila nawu “Tata.” Muloñadi? Hadaha wakeñaña nindi tumusolomokeña Muntu wabadika kulema mwituña dejima, neyi mwana chamusolomokañayi tata yindi wukweti kukeña.

Hela chochu, antu amakwawu chayikalilaña kutoñojoka nawu Nzambi hiTata yawu. MukwaKristu wejina da Atsuko * wetejeli nindi: “Chankalilili kuswila kwakwihi naYehova nikulomba kudi yena hadi yaaka yayivulu kufuma hinapapatisheweli hamu neyi Tata.” Hakushimuna muloña wamuleñeleli, wahosheli nindi, “Atata yami anvwala, kanda ammwakesheleñahu dehi kukeña.”

Munanu mafuku akukumininaku akala, ‘kukeña’ kwakuhwelelañayi mwana kufuma kudi tata yindi kunakukeha chikupu. (2 Tim. 3:1, 3) Antu amavulu atoñojokaña neyi chatoñojokeleñayi Atsuko. Hela chochu, twakoleshewaña hakwiluka netu kudi yuma yayivulu yatuleñelaña kumumona Yehova neyi hiTata yetu wukweti kukeña.

Yehova hiMukwakuhana Wukweti Kukeña

Neyi tunakukeña Yehova kwikala Tata yetu, twatela kumwiluka chikupu. Yesu wahosheli nindi: “Kwosi muntu wamwiluka Mwanaku, chiña yowu Tata; kwosi nawa wamwiluka Tataku chiña yowu Mwana, nianakeñiyi Mwana kuyimwekeshela.” (Mat. 11:27) Njila yayiwahi yakwilukilamu chekalayi Yehova hamu neyi Tata, hikutoñojoka hayuma yamwekesheliyi Yesu hadi Nzambi walala. Hanu dinu, yumanyi yamwekesheliyi Yesu hadi Tata yindi?

Hakwiluka nindi Yehova diyi Nsulu yawumi, Yesu wahosheli nindi: ‘Nahandaña muloña waTata.’ (Yow. 6:57) Anetu nawa twekalaku hamuloña waTata. (Mas. 36:9; Yil. 17:28) Chumanyi chamuletesheli Yehova kuyinka antu wumi? Komana hikukeña kwamuletesheli kuyinka antu wumuku? Hamuloña wachawaana chenichi, anetu nawa twatela kumukeña Tata yetu wamwiwulu.

Kukeña kwabadika kwamwekesheliyi Nzambi kudi antu kwadiña kwakuhana Yesu kwikala mulambu wakukuula nachu antu. Mulambu weniwu waleñela antu akwanshidi kudikunda chikupu naYehova kuhitila mudi Mwanindi wakeñayi. (Rom. 5:12; 1 Yow. 4:9, 10) Chineli Tata yetu wamwiwulu Washikijaña yikaninu yindi, tunateli kukuhwelela netu ejima amukeña nawa amwovwahilaña akadiluñisha ‘waana wawanyana kaNzambi wowu waana walema.’—Rom. 8:21.

Tata yetu wamwiwulu ‘watuntwishaña itañwa dindi hadi’ etu mafuku ejima. (Mat. 5:45) Hichakeñekaña kulomba kudi Nzambi kulonda yatuntwisheña itañwaku. Hela chochu, twakeñaña iyena nikudiluñisha chikupu. Kubombelahu, Tata yetu hiMukwakuhana wabadika, weluka yuma yitwakeñaña henohu kanda tumulombi. Dichi, komana kwila twikalaku nampinji yakushinshikaña nikutoñojokaña hadi Tata yetu wamwiwulu chakamenañayi yileñaleña yindi nehi?—Mat. 6:8, 26.

Tata Yetu, ‘Watukiñaña Chikupu’

Wuprofwetu waIsaya wakolesheli antu jaNzambi akushankulu nawu: “Mpidi jamaneni  jakafuma, nimpidi janyanya jakatuntuka, kwinza luwi lwami hilwakafuma kudeyuku, nichitiyañenu chami chakuwunda hichakatuntukaku. Dimu mwanahoshiyi Yehova wakutiyilaña wushona [wakukiñaña chikupu].” (Isa. 54:10) Hakukonkomwena hachikuma chenichi, kulomba kwaYesu kwalombeliyi hawufuku wakukumishaku hanu hamaseki kwamwekeshaña nawu Yehova ‘watutiyilaña wushona hela watukiñaña chikupu.’ Kutalisha hadi atumbanji twindi, Yesu walombeli nindi: “Awa adi mumpata yamunu mwishina; ami hinukwinza kudeyi. Eyi Tata Wajila, yihembi mwijina deyi.” (Yow. 17:11, 14) Yehova wayihembaña nikuyikiña atumbanji twaYesu.

Njila yimu mwatukiñilañayi Nzambi kutufuta twaSatana makonu, yekala yakutwinka yakudya yakuspiritu hampinji yatelela kuhitila mudi ‘nduñu wamaana nikashinshi.’ (Mat. 24:45) Neyi tunakukeña ‘kumanyeka yitwa yaNzambi yejima,’ chalema nankashi kudyaña yakudya yeniyi yatukoleshaña. Chakutalilahu, shinshikenu ‘hankebu yabadika yachikuhwelelu,’ yatukwashaña “kujima nachu nyivu yakesi yamukwakutama yejima.” (Efwes. 6:11, 16) Chikuhwelelu chetu chatukiñaña kuwubanji wakuspiritu nawa chamwekeshaña nawu tweteja ñovu yaTata yetu yatukiñaña.

Tunateli kudiza yuma yayivulu hakukeña kwaTata yetu wamwiwulu kuhitila mukushinshika ochu Mwana kaNzambi chadihembeliyi hampinji yadiñayi hanu hamaseki. Talenu nsañu yasonekawu haMaku 10:13-16. Mumavasi wenawa, Yesu amusombolola nakuhosha kudi atumbanji twindi nindi: “Itejenu anyana anyanya kwinza kudami.” Anyana wenawa chayiluwu kudi yena, wayakatili nikuyikiswila. Azañaleli chikupu. Chineli Yesu wahosheli nindi: “Muntu nanmonami namoni Tata,” tweluka netu Nzambi walala wakeñaña nindi twinzi kudi yena.—Yow. 14:9.

Yehova Nzambi diyi Nsulu yakukeña kwabulaña kumana. Diyi Mukwakuhana nawa Mukwakukiña wabadika, wakeñaña nindi tuswili kwakwihi nayena. (Yak. 4:8) Chakadi nikujina, Yehova diyi Tata yetu wabadika.

Chitwahetelañamu Chikupu

Twahetelañamu chikupu kuhitila mukumukuhwelela Yehova netu diyi Tata yetu wamwiwulu wukweti kukeña nawa wakamenaña. (Yish. 3:5, 6) Yesu wahetelelumu chikupu kuhitila mukukuhwelela Tata yindi. Kristu walejeli atumbanji twindi nindi: “Hinekala kanka wamuku, nindi naTata wantemesheli.” (Yow. 8:16) Yesu washindameneneña hawukwashu waYehova mpinji yejima. Chakutalilahu, hachipapatishu chindi, amukolesheli kudi Tata yindi hampinji yahosheliyi nindi: “Diyi Mwanami nakeña, natiyaña kuwaha nankashi mudi yena.” (Mat. 3:15-17) Henohu kunashali kwanti nakufwa, Yesu wabidikili nindi: “Tata, nashi spiritu yami mumakaseyi.” (Luka 23:46) Yesu wakuhweleleli chikupu mudi Tata yindi.

Anetu nawa twatela kwikala nachikuhwelelu chamuchidiwu. Chineli Yehova wekala nanetu, chumanyi chitwatela kutiya woma? (Mas. 118:6) Atsuko atenawu hakusambila, wadiña nachaaku chakushindamena hañovu jindi hohu neyi namoni kukala. Ilaña, wadizili hachihandilu chaYesu nimudimu windi, sweje-e hawubwambu waYesu naTata yindi wamwiwulu. Chumanyi chafuminumu? Atsuko wahosheli nindi “Nelukili chichawahila kwikala naTata nikushindamena hadi yena.” Wabombeleluhu nindi “Nekalili namuzañalu chikupu nikushakama chawunda. Mwamweni, kwosi chuma chatela kutuleñela kwakama.”

Njilanyi yikwawu mutwahetelaña hakumumona Yehova neyi hiTata yetu? Anyana akeña anvwali jawu chikupu nawa akeñaña kuyitiyisha kuwaha. Hamuloña wakukeña, Mwana kaNzambi ‘welileña yuma yamutiyishileña Tata yindi kuwaha mafuku ejima.’ (Yow. 8:29) Chochimu, neyi tumukeña Tata yetu wamwiwulu chikutwileñela kukoña yuma yamaana ‘nikumusakilila.’—Mat. 11:25; Yow. 5:19.

Tata Yetu ‘Watukwataña kuChikasa Chetu Chachidiilu’

Tata yetu wamwiwulu watwinka cheñi ‘nkwashi,’ spiritu yindi yajila. Yesu wahosheli nindi, spiritu yeniyi ‘yakayileja mwahita nsañu yalala yejima.’ (Yow. 14:15-17; 16:12, 13) Spiritu yaNzambi  yajila yinateli kutuleñela kumwiluka chikupu Tata yetu. Yinateli kutukwasha ‘kusanda mpwembu jakola,’ dikwila nawu, nsañu yakufwikija, yitoñojoka yaluwa hela nsañu jakutwamba, kulonda “kutwala yitoñojoka yejima muwuduñu wakwovwahila Kristu.” (2 Kor. 10:4, 5) Dichi, tulombeña kudi Yehova kulonda yatwinki ‘nkwashi’ wakaniniyi, nakukuhwelela netu ‘Tata yetu wamwiwulu wukubadika kuyinka awa akumulomba spiritu yajila.’ (Luka 11:13) Cheñi, chalema kulomba netu spiritu yajila yikutukwasha kulonda kuswila kwakwihi naYehova chikupu.

Mwana wanyanya neyi nakwenda natata yindi, wekalaña wakiñewa nawa hatiyaña womaku. Neyi Yehova mumumonaña nenu hiTata yenu, munateli kukuhwelela mumazu akukundeja akwila nawu: “Ami Yehova Nzambi yeyi nakakukwataña kuchikasa cheyi chachidiilu, nakakwilaña nami, Bayi wutiya womaku, nukukukwashañaku.” (Isa. 41:13) Munateli kwikala nakukooleka kwakuwahi ‘kwakwenda’ naNzambi haya nyaka. (Mika 6:8) Twalekenuhu kwila yuma yakeñañayi Nzambi, mwakekala akeñewa, amuzañalu nawa mwakakiñewa hamuloña wakumumona Yehova neyi hiTata yenu.

[Tumazu twaheshina]