Malwihu Kufuma Kudi Antañi

Yumanyi yinateli kuleñela muntu kupapatishewa kamuchiyedi?

Nsañu jikwawu, jinateli kuleñela muntu wapapatishewa kutoñojoka hakulema kwachipapatishu chindi nawa nateli kufuukulahu kupapatishewa kamuchiyedi. Chakutalilahu, hampinji yachipapatishu, hadaha muntu wadiña nakukoña yuma yadi kumuleñela kumuhaña muchipompelu neyi chakwila wadiñi wapapatishewa dehi. Komana muntu wamuchidiwu nateli kudihana kudi Nzambi? Muntu yeniwu wadi kudihana hohu kudi Yehova neyi chakwila walekeli yililu yabula kwitejawu munsona. Dichi, muntu wapapatisheweli henohu nakukoña yiluwa yeniyi, nateli kufuukulahu neyi chakwila watela kupapatishewa kamuchiyedi.

Indi kutalisha hadi muntu wabulileña kwila nshidi sampu nihachipapatishu ilaña wavulumwini hanyima yakumupapatisha chakwila anateli nikumukasila komiti yawunsompeshi? Indi neyi yahosha nindi helukili chuma chadiña nakwilayi hampinji yamupapatishileñawu nawa yela nindi halemesheli chipapatishuku? Neyi aeluda hiyakusompesha muntu wunavulumuni, hiyatela kutoñojoka nawu chipapatishu chindi hichadiña chamukunkulwayuku, nawa hiyatela kumwihula neyi chakwila nakutoñojoka nindi kudihana kwindi nichipapatishu kwadiña kwalema. Muloña watiyilili kumpanji yashindameneni haBayibolu kutalisha hakulema kwachipapatishu. Waakwili malwihu kutalisha hakudihana nichipapatishu. Kuhiñahu wahimpili yakuvwala yindi nawa amujimikili mumenji. Chakadi nikujina, welukili chikupu kulema kwachuma chelileñayi. Dichi neyi aeluda anakusompesha muntu wamuchidiwu, atela kwanuka nawu himuntu wapapatishewa.

Neyi muntu yeniwu yahosha hansañu yakulema kwachipapatishu, aeluda atela kumuleja nsañu yekala muKaposhi Kakutalila kaWundeli kaMarch 1, 1960, mafu 159 ni 160, nikaFebruary 15, 1964, mafu 123 nakushika hefu 126, halumbululawu chikupu nsañu yakupapatishewa kamuchiyedi. Nkumininaku, kupapatishewa kamuchiyedi hamuloña wansañu jikwawu (chidi neyi kubula kwiluka nsañu yamuBayibolu hampinji yamupapatishileñawu) hinsañu yatela kudifuukwilahu yomweni.

Yumanyi yatela kutoñojokahu akwaKristu neyi ashakamaña mwitala dimu nawantu acheñi?

Muntu wejima wakeñaña itala mwakushakama. Hela chochu, makonu antu amavulu hiyakweti matala ahalwawuku. Hamuloña wakubula mali, yikatu hela yuma yikwawu yinateli kuleñela kushakama nawantaña amavulu. Mumaluña amakwawu amukaayi, antaña anateli kushakamaña mukapeka kamu mwakwila hiyanateli kujinda yumaku.

Kuloñesha kwaYehova hikwekala namudimu wakusoneka nshimbi jajivulu kutalisha hatupeka twatuwahi mwatela kushakamawu akwaKristu muyipompelu yejima mukaayuku. AkwaKristu anayikoleshi kutoñojokaña hanshimbi jamuBayibolu kulonda eluki neyi nshakaminu yawu yayiwahi kumesu aNzambi hela nehi. Nshimbinyi jeniji?

Chuma chatachi chitwatela kutoñojokahu chikupu hiyuma yinateli kufumamu kutalisha hawuspiritu wetu niyuma yinateli kutumwekena  hamuloña wakushakama nawantu acheñi. Hiyantu amuchidinyi? Komana hiyakwakudifukula aYehova? Komana alondelaña nshimbi jamuBayibolu? Kapostolu Pawulu wasonekeli nindi: “Bayi ayidimbaku, kudikunda nawantu atama kwatamishaña maana amawahi.”—1 Kor. 15:33.

Nsona jahoshaña nawu Yehova wahela kubajama niwuvumbi. (Heb. 13:4) Dichi, neyi iyala namumbanda akamaña hamu ilaña hiyadisumbulaku, chaluwa kumesu aNzambi. MukwaKristu hanateli kushakama mwiluña mwetejawu yililu yatamaku.

Kubombelahu, Bayibolu yakonkomwenaña antu ejima akeña wuselewa waNzambi ‘kutemuka wuvumbi.’ (1 Kor. 6:18) Dichi, chikuwaha kudi akwaKristu kutondolwela nshakaminu yinateli kuyileñela kwila yuma yatama. Chakutalilahu, toñojokenu hadi akwaKristu amavulu ashakamaña mwitala dodimu. Komana kushakama muniyi njila kunateli kuyileñela kuvulumuna hamuloña wayuma yinateli kuyimwekena? Indi neyi antu ayedi abula kudisumbula awana kwila nawu anashili hakankawawu hamuloña wakwila antu amakwawu anafumuhu hakampinji kantesha? Chochimu, chikwikala hiwubanji kudi iyala namumbanda abula kudisumbula anadikomoki kushakamaña mwitala dodimu. Twatela kutondolwela nshakaminu yamuchidiwu.

Cheñi, chikwikala chaluwa kudi antu adiseña kutwalekahu kushakama mwitala dodimu. Hamuloña wakwila adinjilila chikupu, chinateli kuyileñela kwila yuma yatama.—Yish. 22:3.

Chuma chikwawu chalema chitwatela kutoñojokahu, chinatalishi hadi antu amuchituñilu chiyatoñojokaña hayuma yitwafuukulañahu. Neyi mukwaKristu yamona nshakaminu yindi nindi yayiwahi ilaña yinateli kuleñela antu amuchituñilu kuhosha yuma yatama, watela kutoñojokahu chiwahi. Dichi, hitunakukeña kuleta kasawuntu hejina daYehovaku. Pawulu wasonekeli nindi: “Bayi mwila chuma chakudimbwisha hela aYudeya, hela aHeleni, hela chipompelu chaNzambuku. Chochinatiyishaña antu ejima kuwaha muyuma yejima, hinakeña kwami kudikwasha ami awenuku; chiña yowu kukwasha antu amavulu, kulonda ahandi.”—1 Kor. 10:32, 33.

Antu afwilaña kuhemba nshimbi jaYehova jaloña chayikalilaña kuwana itala dadiwahi mwakushakama. Hela chochu, akwaKristu atela kutwalekahu ‘kushinshika yuma yamutiyishaña Mwanta kuwaha.’ Atela kwiluka chikupu nawu kwosi yuma yatama yinakumwekana mwitala dawuku. (Efwes. 5:5, 9) Chumichi chakeñekaña akwaKristu kulomba wunlomboli waNzambi nikuzata hakumina ñovu jawu kulonda kudikiña wumu namukwawu kumujimba, kwikala nayililu yayiwahi nikwikala nejina dadiwahi naYehova.