“Mwana Wukweti Wuswa Wakuyilaku Hambidi kuSpiritu”

HADECEMBER 9, 2008, Mutayi wakuSweden watalaña haWuswa waMwana apompeli hamu kulonda kuhanjeka hamutu wahosheleña nawu “Mwana Wukweti Wuswa Wakuyilaku Hambidi kuSpiritu.” Anhoshi amavulu emeneneñaku Chaachi yaSweden, nsakililu jikwawu jamuKristendomu, akaIslamu niantu abula kukuhwelela munsakililu ashimwini yuma yashiyashana yatoñojokeleñawu.

Hakachi kawanhoshi wenawa hadiña mukulumpi wachaachi wahosheli nindi: “Muntu nateli kulumbulula chikupu kulema kwansañu yamuBayibolu yahosha hawuspiritu wawanyana.” Indi nsañu yamuNsona yakwashaña ñahi anyana akankila kuspiritu?

Mukulumpi wachaachi wahosheli nindi: “Nsañu yeniyi yaleñelaña anyana kutoñojokahu halwawu.” Wateneni hansañu jidi neyi “nsañu hadi Adama naEvu, hadi Kena naAbeli, hadi Davidi naGoliyati, nsañu kutalisha hakuvwalika kwaYesu, hadi Zakewu nsonkeshi, hachishimu chamwana wajimbeli, nawa hadi kaSamaliya wamuwahi.” Yuma yeniyi wayiteneni neyi “hinsañu yikwawu yinateli kumukwasha [mwana] kutoñojoka chiwahi kutalisha hayuma yalema muchihandilu, yidi neyi makasu, kudanakena, kubuta nshidi, kudihela, yuma yansonyi, wumanakwetu nikukeñañana.” Wabombeleluhu nindi: “Iji nsañu jahanaña yakutalilahu yatela kuhimpa chihandilu chamuntu, kuleñela muntu kukoñahu chuma chimu, nikwilukisha yuma.”

Mwamweni, hichuma chachiwahi kukolesha anyana kutañaña Bayibolu. Hela chochu, komana anyana anateli “kutoñojokahu halwawu” hayuma yatañañawu munsona nikufuukulahu chiwahi?

Akulumpi niwena akeñekaña kuyilumbulwila nsañu yamuNsona. Chakutalilahu, Bayibolu yatulejaña hadi muntu weyala wakañenyi kuwana wuspiritu walala kuhitila ‘mukutoñojoka kwahalwindi.’ Iyala yeniwu wadiña kalama wakuEtiyopiya. Wadiña nakutaña wuprofwetu waIsaya ilaña helukili muwatalishiluku. Chineli wakeñeleña kwiluka mwatalishili wuprofwetu weniwu, wetejeli kumulumbulwila kudi kambanji Fwilipu. (Yil. 8:26-40) Iwu kaEtiyopiya hidiyi hohu kankawindi wakeñeleña kwiluka Nsonaku. Wejima wetu, sweje-e anyana twakeñaña kutulumbulwila Nsona.

Bayibolu yatusoñamishaña nawu: “Wusupi awukasila mumuchima wakansi.” (Yish. 22:15) Anyana akeñekaña kuyilombola, nawa anvwali jawu akweti mudimu wakuyidizisha yililu yayiwahi nikuyidizisha shikola yakuspiritu yashindamena haBayibolu niyuma yatañishañawu muchipompelu chawakwaKristu. Anyana akweti wuswa wakudiza yuma yeniyi. Anyana akeñekaña kuyikwasha kufuma kuwansi wawu hakwila aali chikuku chashindamena haBayibolu kulonda atweshi kwikali ‘antu apama . . . afumba dehi yitoñojoka yawu, enjilila dehi kwambula yayiwahi nayatama.’—Heb. 5:14.