Shikenu Mwani muNjila yaWumi Wawuwahi!

‘Hela tukuhanda hela tukufwa, tudi ambala aMwanta.’—Rom. 14:8.

1. Yumanyi yatañishiliyi Yesu kutalisha hanjila yawumi wawuwahi?

 YEHOVA wakeñaña nindi tulondeleña njila yawumi wawuwahi. Antu anateli kulondela njila jashiyashana, ilaña kwekala hohu njila yimu yalala. Njila yabadika kuwaha muchihandilu chetu, yekala yakulondela Izu daNzambi nikudizila kudi Mwanindi, Yesu Kristu. Yesu walejeli atumbanji twindi kudifukula kudi Nzambi muspiritu nimuchalala, nawa wayinkeli mudimu wakwilisha atumbanji. (Mat. 28:19, 20; Yow. 4:24) Neyi tulondelaña nshimbi jatwinkayi Yesu, tukumuzañaleshaña Yehova nikudiluñisha nkisu jindi.

2. Chumanyi cheliluwu antu amavulu muyaaka nkulakaji yakusambila kutalisha hansañu yaWanta, nawa kuwana ‘njila’ kwalumbulukilidi?

² Neyi antu adizoza etiya nawa apapatishewa, tunateli kuyishikija netu, “Shikenu mwani munjila yawumi wawuwahi!” (Yil. 13:48) Muyaaka nkulakaji yakusambila C.E., antu amavulu akunyunza yashiyashana etejeli chalala nakumwekesha hatooka kudihana kwawu kudi Nzambi kuhitila mukupapatishewa. (Yil. 2:41) Awa atumbanji akusambila awanini ‘Njila.’ (Yil. 9:2; 19:23) Awa mazu adiña alala muloña antu ekalili atumbanji twaKristu akakeleleli kuchihandilu chashindameneni hakumukuhwelela Yesu Kristu nikwimbujola chakutalilahu chindi.—1 Pet. 2:21.

3. Muloñadi antu jaYehova chapapatishewelañawu, nawa antu añahi anajimikuwu hayaaka 10 yinahituhu?

³ Mudimu wakwilisha atumbanji wunakuyilaku hambidi munanu mafuku akukuminina nawa anakuwukalakala mumatuña akubadika ha 230. Muyaaka 10 yinahituhu, antu akubadika ha 2,700,000 anafuukuluhu kumukalakela Yehova nawa anapapatishewi kulonda kumwekesha kudihana kwawu kudi yena. Dikwila nawu mulungu nimulungu antu ashikaña kuavareji yakubadika ha 5,000. Hakwila nawu muntu yafuukuluhu kupapatishewa, chashindamenaña hakumukeña Nzambi, kwiluka Nsona, nikukuhwelela yuma yatañishañawu. Kupapatishewa hichuma chalema chikupu muchihandilu chetu, muloña kwekala hintachikilu yawubwambu waweni naYehova. Cheñi kwamwekeshaña nawu twakuhwelela netu Yehova wakatukwasha kumukalakela nakashinshi, neyi chakwashiliyi ambuñindi akunyima kwenda munjila yindi.—Isa. 30:21.

 Muloñadi Kupapatishewa Chikwalemena?

4, 5. Shimunenu nkisu nikuwaha kwekala mukupapatishewa.

⁴ Hadaha munadizi hadi Nzambi, kudi yuma yimunahimpi muchihandilu chenu, nawa munekali mukwakushimwina wabula kupapatishewa. Tunayihameki hakuyilaku hambidi muniyi njila. Hanu dinu, munadihani kudi Nzambi kuhitila mukulomba nawa munakukeña kupapatishewa? Kuhitila mukudiza Bayibolu, muneluki chikupu nenu chihandilu chenu chatela kushindamena hakumuhameka Yehova, bayi kuditiyishaña kuwaha enu awenuku hela kufwila maheta akumujimbaku. (Tañenu Masamu 148:11-13; Luka 12:15) Nkiswinyi nikuwaha kwekala mukupapatishewa?

⁵ Hakwikala mukwaKristu wadihana, chihandilu chenu chakekala chachiwahi. Mukwikala amuzañalu muloña munakwila yuma yakeñañayi Nzambi. (Rom. 12:1, 2) Spiritu yajila yaYehova yikuyileñela kwikala nayililu yaNzambi yidi neyi kuwunda nichikuhwelelu. (Ŋal. 5:22, 23) Nzambi wakaakula kulomba kwenu nikuyikiswila kulonda kukalakala kwesekeja nachahosha Izu dindi. Mukudiluñishaña mudimu wenu wakushimwina, nawa kwikala nayililu yamuzañaleshaña Nzambi kukakolesha chikuhwelelu chenu chakwikala nawumi wahaya nyaka. Kubombelahu, neyi mudihana nawa mupapatishewa mukumwekesha nenu munakukeñesha kwikala Chinsahu chaYehova.—Isa. 43:10-12.

6. Indi chipapatishu chamwekeshañadi?

⁶ Twamwekeshaña hatooka netu tudi antu jaYehova neyi tudihana kudi Nzambi nikupapatishewa. Kapostolu Pawulu wasonekeli nindi, “Kwosi mwinetu wadihandilaña yomwenuku; kwosi wadifwilaña yomwenuku. Muloña hela tukuhanda, tukumuhandila Mwanta; hela tukufwa, tukumufwila Mwanta. Dichi hela tukuhanda hela tukufwa, tudi ambala aMwanta.” (Rom. 14:7, 8) Nzambi watulemesha kuhitila mukutwinka wuswa wakudifuukwila. Neyi tufuukulahu kulondela iyi njila yawumi hamuloña wakumukeña Nzambi, twatiyishaña muchima windi kuwaha. (Yish. 27:11) Chipapatishu chetu hichinjikijilu chamwekeshaña nawu tunadihani kudi Nzambi nawa chamwekeshaña hatooka nawu Yehova diyi Nyuuli yetu. Nawa chamwekeshaña nawu tunakumuhakwilaku kutalisha hansañu yakuleña kwejima. (Yil. 5:29, 32) Neyi twila mwenimu, Yehova niyena wukwikala nanetu. (Tañenu Masamu 118:6.) Kupapatishewa, cheñi kwaleñelaña kwikala nankisu jikwawu jakuspiritu hayinu mpinji nikumbidi.

Atumbanji Apapatishewa Akooleka Hakwikala Hakachi Kawumana Kwetu

7-9. (a) Chumanyi Yesu chakaniniyi antu ashili yuma yawu yejima nakumulondela? (b) Indi kukana kwaYesu kwasonekawu haMaku 10:29, 30 kunakushikijewa ñahi?

⁷ Kapostolu Petulu wamulejeli Yesu nindi: “Tala, etu tunashiyi yuma yejima, tunakulondeli; indi etu twakatambuladi?” (Mat. 19:27) Petulu wakeñeleña kwiluka yuma yakatambwilayi  kumbidi niatumbanji twaYesu amakwawu. Hakwila nawu akalakali nankashi mumudimu wakushimwina Wanta, adihanini chikupu. (Mat. 4:18-22) Chumanyi chayikaniniyi Yesu?

⁸ Kwesekeja nansañu yadifwanaku yaMaku, Yesu wamwekesheli nindi atumbanji twindi akekala hakachi kawumana kwetu wakuspiritu. Wahosheli nindi: “Hikudi muntu nashiyi hela itala, hela ana kwindi, hela ahelindi, hela mama yindi, hela tata yindi, hela anyana, hela maha, kukoola ami ninsañu yayiwahi, wukubula kutambwilamu nkulakaji katataka makonu, nimatala, niana kwindi, niahelindi, niamama, nianyana, nimaha, kubombelaku nikuyikabisha; hanyaka yakenzaku wumi wahaya nyaka.” (Maku 10:29, 30) AkwaKristu amuyaaka nkulakaji yakusambila, adi neyi Lidiya, Akwila, Pirisila niGayusi, adiña hakachi kawantu ahanineña ‘matala’ nawa ekalili ‘ana kwawu, ahela jawu, niamama’ jawakwawu akakwitiya, neyi chakaniniyi Yesu.—Yil. 16:14, 15; 18:2-4; 3 Yow. 1, 5-8.

⁹ Yuma yahosheliyi Yesu yinakushikijewa chikupu makonu. “Maha” ashiyañawu atumbanji twindi atalisha kunyidimu niyuma yashiyañawu antu amavulu, kubombelahu amishonali, amana kwetu niahela azatilaña haBeteli, amana kwetu niahela azatilaña kumatuña acheñi niantu amakwawu, kulonda kutwala Wanta hambidi mumatuña ashiyashana. Amana kwetu niahela amavulu ashiya matalawu kulonda kupelesha chihandilu chawu, chumichi chatuzañaleshaña hakutiya yakuhumañana yawu yamwekeshaña ochu Yehova chayakamenañayi nimuzañalu wekalañawunawu hamuloña wakumukalakela. (Yil. 20:35) Kubombelahu, ambuña aYehova ejima apapatishewa anateli kudiluñisha nkisu jafumaña ‘mukusambila kukeña wanta nikuloña [kwaNzambi]’ hakwikala hakachi kawumana kwetu wamukaayi kejima.—Mat. 6:33.

Kukiñewa ‘muChiswamu’

10, 11. Indi ‘chiswamu chaMukwakubadika Kwiwulu’ hichumanyi, nawa tunateli kushakamamu ñahi?

¹⁰ Kudihana nikupapatishewa kwaleñelaña kwikala nankisu jikwawu, kukooleka kwakwikala “muchiswamu chaMukwakubadika Kwiwulu.”  (Tañenu Masamu 91:1.) Idi hiluña dachifwikija dakukiñewelamu, njila yakukiñewelamu kuwubanji wakuspiritu. Chekala ‘hichiswamu’ muloña antu abula kutona kuspiritu nikumukuhwelela Nzambi, hiyachilukaku. Neyi tukalakalaña kwesekeja nakudihana kwetu nikumukuhwelela Yehova nankashi, dikwila nawu tunakuhosha netu: “Diyi chiswamu chami, diyi mpwembu yami, diyi Nzambi yami, inakuhwelela.” (Mas. 91:2) Yehova Nzambi wekala hichiswamu chetu mwakushakama. (Mas. 91:9) Hikwekala chiswamu chabadika Yehovaku.

¹¹ Kwikala ‘muchiswamu’ chaYehova cheñi kwalumbuluka nawu tukweti kukooleka hakwikala amabwambu jindi. Chumichi chatachikilaña hakudihana nikupapatishewa. Kuhiñahu, twakoleshaña wubwambu wetu naNzambi kuhitila mukuswila kwakwihi nayena, kudiza Bayibolu, kulomba kwakufuma hamuchima nikwovwahila chikupu. (Yak. 4:8) Kwosi muntu waswilahu dehi kwakwihi naYehova kubadika Yesuku, wakuhweleleli chikupu mudi Nleñi. (Yow. 8:29) Dichi, bayi tumujinoka Yehova hela kukeña kwindi niwuswa wakutukwasha kushikija chikaninu chakudihanaku. (Mukwa. 5:4) Yakudya yakuspiritu Nzambi yaloñeshelayi antu jindi hiwunsahu walala wamwekeshaña nawu watukeña chikupu nawa wakeñaña nindi tutwalekuhu kumukalakela.

Lemeshenuña Paradisa Yetu yakuSpiritu

12, 13. (a) Indi paradisa yakuspiritu hichumanyi? (b) Tunateli kukwasha ñahi antu amaha?

¹² Kudihana nichipapatishu cheñi kwatuleñelaña kushakama muparadisa yakuspiritu yakiswilawu. Hiparadisa yakuspiritu yambukaku chikupu yitwadiluñishaña nawakwetu akakwitiya, amwovwahilaña Yehova Nzambi nikushakama chachiwahi wumu namukwawu. (Mas. 29:11; Isa. 54:13) Kwosi chuma chamukaayi chinateli kwesekana naparadisa yetu yakuspirituku. Chumichi chamwekanaña sweje-e hakupompa kwamatuña amavulu, hekalaña amana kwetu niahela afumaña kunyunza yayivulu, akumadimi eñi naeñi, akuyisemwa yashiyashana kwinza hamu mukuwunda, kudinuña nimukukeñañana.

¹³ Paradisa yakuspiritu yitwadiluñishaña yambukaku nankashi nayililu yatama yamukaayi kamakonu. (Tañenu Isaya 65:13, 14.) Neyi tushimwinaña nsañu yaWanta, dikwila nawu tukweti kukooleka kwakutambika antu amakwawu kumutambi wakwiñila muparadisa yakuspiritu. Cheñi kwekala hikukooleka kwakukwasha antu amaha anakudikunda nachipompelu nawa akahetelamu kuhitila mukudiza chakushimwina. Neyi aeluda atuleja kwila mwenimu, tunateli kuhetelamu kuhitila mukukwasha amaha, neyi Akwila niPirisila ‘amulumbulwilileña [Apolosi] mwaya njila yaNzambi, chakashinshi hanashali hanashali.’—Yil. 18:24-26.

Twalekenuhu Kudizila Kudi Yesu

14, 15. Yumanyi yayiwahi yatuleñelaña kutwalekahu kudizila kudi Yesu?

¹⁴ Tukweti yuma yayiwahi yatuleñelaña kutwalekahu kudizila kudi Yesu. Henohu kanda yenzi hanu hamaseki mumujimba wawuntu, Yesu wazatili naTata yindi hadi yaaka yayivulu. (Yish. 8:22, 30) Welukili nindi njila yawumi wawuwahi yashindameneni hakumukalakela Nzambi nikushimwina chalala. (Yow. 18:37) Yesu welukili chikupu nindi njila yikwawu yawumi yadi kwikala yalwisu nawa yahakapinji kantesha. Welukili nindi akamweseka nikumujaha. (Mat. 20:18, 19; Heb. 4:15) Hakwikala chakutalilahu chetu, watulejeli chakwikala ashinshika.

¹⁵ Hanyima yakwila Yesu napapatishewi dehi, Satana wamwesekeli kulonda yaleki njila yawumi wawuwahi, ilaña wakañenyi. (Mat. 4:1-11) Chumichi chatudizishaña nawu tunateli kwikala ashinshika, hichikweti muloña nayuma yelañayi Satanaku. Washaña maana hadi antu anakukeña kupapatishewa hamu tuhu nianapapatishewi katataka. (1 Pet. 5:8) Antaña jetu anateli kutudimbulula hamuloña wakuyileja nsañu yakutwamba hadi aYinsahu jaYehova nawa atoñojokaña nawu kwila mwenimu anakutukiña. Hela chochu, kweseka kwamuchidiwu kwatuleñelaña kumwekesha yililu yayiwahi yawakwaKristu, yidi neyi kalemesha nikwiluka mwakuhoshela neyi tunakushimwina nikwakula malwihu. (1 Pet. 3:15) Iyi yakuhumañana  yinateli kukwasha nankashi antu atutiyililaña.—1 Tim. 4:16.

Kakelenu Kunjila Yawumi Wawuwahi

16, 17. (a) Yumanyi yisatu yakeñekaña hakwikala nawumi yekala haKuhituluka 30:19, 20? (b) Indi Yesu, Yowanu niPawulu etejeli ñahi yuma yasonekeliyi Mosi?

¹⁶ Yaaka 1,500 yahitiluhu henohu Yesu kanda yenzi hamaseki, Mosi wakolesheli aIsarela kutonda njila yawumi wawuwahi. Wahosheli nindi: “Natambiki niiwulu niiseki ekali ayinsahu jenu lelu, ami nakushili dehi kumesu eyi niwumi nikufwa, ninkisu niishiñu; dichi dinu tondaku wumi kulonda wuhandi, nineyi nianyaneyi; wukeñi Yehova Nzambi yeyi, wovwahili mwizu dindi, wumulamati, muloña yena diyi wumi weyi, diyi mafuku eyi amavulu; kulonda wakashakami mwituña dasanyikililiyi Yehova ankakulula jeyi aAbarahama, naIsaka, naYakoba kuyinka.” (Kuhit. 30:19, 20) A Isarela hiyatwalekeluhu kwikala ashinshika kudi Nzambuku. Hela chochu, yuma yisatu yateneniyi Mosi yakeñekeleña hakwikala nawumi, hiyahimpikaku. Yuma yeniyi ayiteneni cheñi kudi Yesu niantu amakwawu.

¹⁷ Chatachi, ‘twatela kukeña Yehova Nzambi yetu.’ Twamwekeshaña netu twamukeña Nzambi kuhitila mukwila yuma yakeñañayi. (Mat. 22:37) Chamuchiyedi, ‘twatela kwovwahila izu daYehova’ kuhitila mukudiza Izu daNzambi nikwovwahilaña nshimbi jindi. (1 Yow. 5:3) Chumichi chakeñekaña kuyaña mafuku ejima kukupompa kwawakwaKristu, kwadizañawu Bayibolu. (Heb. 10:23-25) Chamuchisatu, ‘twatela kulamata kudi Yehova.’ Hichikweti muloña nayuma yitwamwonañaku, mpinji yejima tumukuhwelelaña Nzambi nikumwimbujola Mwanindi.—2 Kor. 4:16-18.

18. (a) Indi Kaposhi Kakutalila kaWundeli kalumbulwili ñahi chalala mu 1914? (b) Twatiyaña ñahi kutalisha hachejeji chansañu yalala makonu?

¹⁸ Kulondela chalala chamuBayibolu hikukooleka kweneni. Mu 1914, awa mazu alema ayisonekeli muKaposhi Kakutalila: ‘Komana hitwekala antu akiswilewa nawa amuzañaluku? Komana Nzambi yetu hashinshikaku? Neyi kudi muntu weluka chuma chachiwahi, yachisendi. Hakachi kenu neyi hadi muntu wukuwana chuma chachiwahi, tunakuhweleli netu wukutuleja. Yuma yitwawana Mwizu daNzambi yabadika yuma yejima. . . . Hitukweti mazu akuhosha kutalisha hakuwunda, muzañalu ninkisu yitukweti hamuloña wakudiza chalala hadi Nzambi walalaku. Nsañu yahosha haMaana aNzambi, Wuñanji, Ñovu niKukeña, yatuleñelaña kuzañalala nankashi kutalisha hayuma yitwatoñojokañahu. Hitunakukeña yuma yikwawuku. Kwosi yuma yikwawu yitunakukeña, ilaña tunakufwila kwilukilahu yuma yikwawu hadi Nzambi.’ (Kaposhi Kakutalila, kaWundeli kaDecember 15, 1914, mafu 377-378) Twatwalekañahu kuhameka hachejeji chakuspiritu nihachalala. Chakadi nikujina, hamuloña ‘wakwenda muchejeji chaYehova,’ chatuleñelaña kuzañalala nankashi.—Isa. 2:5; Mas. 43:3; Yish. 4:18.

19. Muloñadi antu anashikuhu kupapatishewa chatela kupapatishewelawu chakadi kulaba?

¹⁹ Neyi munakukeña ‘kwenda muchejeji chaYehova,” ilaña kanda mwikali mukwaKristu wapapatishewa wadihana, bayi mulabaku. Zatenu nañovu jenu jejima kulonda mutweshi kuwanisha yuma yakeñekaña yamuBayibolu kutalisha hachipapatishu, njila yalema yakuhamekelamu yuma yatukoñelayi Nzambi niKristu. Mwinkenu Yehova iheta denu dabadika kulema, wumi wenu. Mwekeshenuña nenu munakufwila kwila yuma yakeñañayi Nzambi kuhitila mukwimbujola Mwanindi. (2 Kor. 5:14, 15) Chakadi nikujina, iyi diyi njila yawumi wawuwahi.

Munateli Kwakula Nenudi?

• Indi chipapatishu chetu chamwekeshañadi?

• Nkiswinyi jafumaña mukudihana kudi Nzambi nikupapatishewa?

• Muloñadi chichalemena kudizila kudi Yesu?

• Chumanyi chatela kutukwasha kukakela munjila yawumi wawuwahi?

[Malwihu aKuzatisha haKudiza]

[Mwevulu wudi hefu 25]

Chipapatishu chenu chamwekeshaña nawu munatonduhu njila yawumi wawuwahi

[Nyevulu yidi hefu 26]

Komana mwakiñewa ‘muchiswamu’?