‘Spiritu niNsumbuki Elaña Nawu, Inzaña’
‘Spiritu niNsumbuki Elaña Nawu, Inzaña’
‘Spiritu ninsumbuki elaña nawu, Inzaña. . . . Muntu wudi nampwila enzi, yowu wukukeña kutambula, atambuli menji awumi chakadi kulanda.’—CHIM. 22:17.
1, 2. Komana twatela kusambila kukeña Wanta waNzambi muchihandilu chetu, nawa muloñadi?
KOMANA twatela kusambila kukeña Wanta waNzambi muchihandilu chetu? Yesu wakonkomweneni atumbanji twindi ‘kusambila kukeña wanta,’ nakuyikolesha nindi neyi chakwila elili mwenimu, Nzambi wadi kuyinka yuma yakeñeleñawu. (Mat. 6:25-33) Wesekejeli Wanta waNzambi namperola yasweja kulema wuseya chakwila chayiweniyi mukwakulandisha, ‘walandishili yuma yadiñiyi nayu yejima, hakuyilanda.’ (Mat. 13:45, 46) Mudimu wakushimwina Wanta nikwilisha atumbanji watela kwikala walema nankashi kudetu.
2 Neyi chitwadizili muyibaaba yiyedi yinafumuhu, neyi tuhoshaña chakadi woma nikuzatisha chiwahi Izu daNzambi mumudimu wakushimwina twamwekeshaña nawu tunakulombolewa naspiritu yaNzambi. Spiritu yeniyi, cheñi yazataña mudimu walema hampinji yitwakalakalaña mumudimu wetu wakushimwina Wanta. Tushinshikenu mudimu walema wazataña spiritu.
Mutambi waWantu Ejima!
3. Indi antu ejima ayitambika ‘kwinza’ nakunwa menji amuchidinyi?
3 Antu ejima anayitambiki kuhitila mudi spiritu yajila. (Tañenu Chimwekeshu 22:17.) Mutambi weniwu ‘wakwinza’ kulonda kumanisha mpwila namenji ambukaku chikupu. Menji wenawa hiyekala menji itwanwañaku. Hela chakwila menji ekala alema muchihandilu hanu hamaseki, Yesu wahosheleña hamenji ambukaku hahosheleñayi namumbanda kaSamaliya heshima nindi: “Muntu wukunwa meji nukumwinkami, hakatiya cheñi mpwilaku, ilaña meji nukumwinkami akwikala mudi yena kaseloki kameji kakusefukila kuwumi wahaya nyaka.” (Yow. 4:14) Menji wenawa iyanatambikiluwu antu kwinza nakunwa aleñelaña kwikala nawumi wahaya nyaka.
4. Muloñadi menji awumi chiyakeñekeleleña, nawa menji wenawa emenañaku chumanyi?
4 Menji wenawa awumi akeñekeleña hampinji yelili muntu watachi Adama yadibombi nañodindi Evu kulonda kudikaña nanleñi yawu, Yehova Nzambi. (Kutach. 2:16, 17; 3:1-6) Eyala namumbanda wenawa ayihañili mwitempa, mumukala wawu ‘kulonda Adama yabuli kolola chikasa chindi, yatambuli mutondu wawumi, adyi, ahandi haya nyaka.’ (Kutach. 3:22) Hakwikala nkakulula yawantu, nkumininaku Adama waleteli kufwa hadi antu ejima. (Rom. 5:12) Menji awumi anakwimenaku yuma yejima yaloñeshayi Nzambi kulonda kufumisha muchidi wamuntu muwuduñu wanshidi nikufwa nikuyinka wumi wakabulaña kufwa muParadisa hanu hamaseki. Yuma yeniyi yaloñeshayi Nzambi yikekalaku hamuloña wamulambu wefutu danyiloña daYesu Kristu.—Mat. 20:28; Yow. 3:16; 1 Yow. 4:9, 10.
5. Hinyi watachikili mutambi wakwinza ‘nakunwa menji awumi chakadi kulanda’? Lumbululenu.
5 Hinyi watachikili mutambi wakwinza ‘nakutambula menji awumi chakadi kulanda’? Neyi yuma yejima yakaleta wumi yaloñeshawu kuhitila mudi Yesu yinashikijewi dehi muKuyuula kwaKristu kwayaaka Ikombakaji, yakemenaku ‘kaloña kamenji awumi, kakekema neyi ilola dakejima.’ Kaloña kenaka akimonaña ‘kanakuhita kufuma mwitanda daNzambi dawanta, dodaMwana kaMukoku.’ (Chim. 22:1) Dichi, Yehova Mukwakuhana Wumi, diyi Nsulu yamenji awumi. (Mas. 36:9) Diyi Wahanaña menji wenawa kuhitila mudi ‘Mwana kaMukoku,’ Yesu Kristu. (Yow. 1:29) Aka kaloña kachifwikija hinjila mwakamanishilayi Yehova kukala kwejima kwaleteliyi Adama hadi muchidi wamuntu. Mwamweni, Yehova Nzambi diyi watachikili mutambi wakwila nawu “inzaña.”
6. Indi ‘kaloña kamenji awumi’ katachikili kuhita mpinjinyi?
6 Hela chakwila ‘kaloña kamenji awumi’ kakashikijewa chacheni muKuyuula kwaKristu kwaYaaka Ikombakaji, katachikili kuhita ‘mwiifuku daMwanta,’ datachikili hampinji yamuswanyikiluwu ‘Mwana kaMukoku’ mwiwulu mu 1914. (Chim. 1:10) Dichi, yuma yikwawu yawumi ayiloñesheli hanyima yachumichi. Yuma yeniyi yabombelamu Izu daNzambi, Bayibolu, muloña nsañu yekalamu ayifwanisha ‘namenji.’ (Efwes. 5:26) Antu ejima ayitambika kwinza nakutambula menji kuhitila mukutiyilila kunsañu yayiwahi yaWanta. Hanu dinu, hinyi wunakutambika antu mwiifuku daMwanta?
‘Nsumbuki’ Welaña Nindi “Inzaña”
7. Anyi atachikili kutiyakesha mutambi ‘wakwinza’ ‘mwiifuku daMwanta,’ nawa atambikaña anyi?
7 Antu amwizaza dansumbuki, akwaKristu awayishewa, diwu atachikili kutambika antu ‘kwinza.’ Anyi iyatambikaña? Nsumbuki hanakuditambika yomweni nindi ‘inzañaku.’ Ilaña, nakutambika antu achiñejaña wumi wahaya nyaka hanu hamaseki hanyima yakwila ‘njita yefuku odu deneni daNzambi Watwesha yejima’ yinamani dehi.—Tañenu Chimwekeshu 16:14, 16.
8. Yumanyi yamwekeshaña nawu akwaKristu awayishewa atwalekahu kutiyakesha mutambi waYehova kufuma tuhu mu 1918?
8 Atumbanji twaKristu awayishewa atachikili kutambika antu kutachika muchaaka cha 1918. Muchaaka chenichi, mpanji yawantu amavulu yadiña namutu wakwila nawu “Millions Now Living May Never Die” yakolesheli nawu antu amavulu akatambwila wumi wahaya nyaka muparadisa hanu hamaseki hanyima yanjita yaAmagedoni. Mpanji yahosheluwu hakupompa kweneni kwawaTudizi aBayibolu kuCedar Point, Ohio, U.S.A., mu 1922 yakolesheli antiyilili ‘kutiyakesha hadi Mwanta niwanta windi.’ Mazu wenawa akwashili awayishewa amwizaza dansumbuki kutambika antu amavulu. Mu 1929, Kaposhi Kakutalila kaWundeli kaMarch 15 mwadiña chibaaba chahosheleña nawu “Gracious Invitation,” chashindameneni hamukanda waChimwekeshu 22:17. Chibaaba chenichi chahosheli nawu: “Izanvu dawashalahu ashinshika adibombaña [naMukwakubadika Mwiwulu] mumutambi wawuwahi nakuhosha nawu ‘Inzaña.’ Nsañu yeniyi atela kuyishimwina kudi antu akeña kuloña nichalala. Atela kuyishimwina yoyinu mpinji.” Izaza dansumbuki datwalekahu kutambika antu kushika nikulelu.
“Muntu Wukutiya Niyena Eli Nindi, Inzaña”
9, 10. Indi antu anakutiya mutambi wakwila nawu, “Inzaña” atela kwila ñahi niwena?
9 Chumanyi chatela kwilawu antu atiyaña mutambi wakwila nawu “inzaña”? Ayitambika kulonda kuhosha nawu, “Inzaña.” Chakutalilahu, Kaposhi Kakutalila kaWundeli kaAugust 1932 hefu 232 kahosheli nawu: “Awayishewa akoleshi antu ejima anakukeña kulonda kushimwina nsañu yayiwahi yawanta. Bayi neyi atela kwikala awayishewa aMwanta hakwila nawu ashimwini nsañu yaMwantaku. Chamuzañalu hama kudi aYinsahu jaYehova kwiluka nawu ayiteja kusenda menji awumi kwiizaza dawantu akapuluka haAmagedoni nakuyinka wumi wahaya nyaka hanu hamaseki.
10 Hakukonkomwena hamudimu wawantu atiyaña mutambi wakwila nawu, “Inzaña,” Kaposhi Kakutalila kaWundeli kaAugust 15, 1934, ifu 249, kahosheli nawu: “Antu ezaza daYonadabi atela kuya hamu nawantu anakwimenaku izaza daYehu, dikwila nawu awayishewa, kulonda kushimwina nsañu yawanta, hela chakwila hiyekala ayinsahu awayishewa aYehovaku.” Mu 1935, “izaza deneni” datenawu haChimwekeshu 7:9-17 adilukili chikupu. Chumichi chaleñeleli mudimu wakutiyakesha mutambi waNzambi kuyilaku hambidi. Kufuma tuhu muchaaka chenichi, antu ezaza deneni dawakwakudifukula alala anakuvulilaku, anabadiki dehi hayihita yitanu nayiyedi, aneteji iwu mutambi. Hanyima yakutiya nsañu yeniyi, anadihani kudi Nzambi, anapapatishewi mumenji, nawa anadibombi nezaza dansumbuki kuhitila mukutambika antu amakwawu ‘kwinza nakunwa menji awumi chakadi kulanda.’
‘Spiritu’ Yelaña Nawu, “Inzaña”
11. Indi spiritu yajila yazatili ñahi mudimu weneni kutalisha hamudimu wakushimwina muyaaka nkulakaji yakusambila C.E.?
11 Yesu chashimwinineñayi mushikola muNazareta, wabakwili mukanda wakaprofwetu Isaya nakutaña nindi: “Spiritu yaYehova yidi hadami, muloña wanwayisha dehi manji nishimwini atuzweñi nsañu yayiwahi; nantemeshi kulonda nibidiki ankoli nsañu yakuyisubula, niamputamesu atoni; kulonda kuyumbaku antu anachikuwu, nishimuni mwaka waYehova wunawahi dehi.” Kufumahu Yesu watalishili awa mazu kudi yomweni, nakuhosha nindi: “Nsañu iyi yasonekeluwu yinalumbuluki kumatu enu lelu.” (Luka 4:17-21) Henohu Yesu kanda yayi mwiwulu, walejeli atumbanji twindi nindi: “Mwakatambula ñovu, mwake[ka]la ayinsahu jami . . . nikwakumina maseki.” (Yil. 1:8) Muyaaka nkulakaji yakusambila, spiritu yajila yazatili mudimu weneni nankashi kutalisha hamudimu wakushimwina.
12. Indi spiritu yaNzambi yazatikaña ñahi mumudimu wakutambika antu makonu?
12 Indi spiritu yajila yaNzambi yazataña ñahi hakutwalekahu kutambika antu makonu? Yehova diyi wahanaña spiritu yajila. Wazatishaña spiritu kulonda kwenzununa yitoñojoka yezaza dansumbuki kulonda eluki Izu dindi, Bayibolu. Spiritu yayileñelaña kutwalekahu kutiyakesha mutambi nikulumbulula chalala chamuNsona kudi antu achiñejaña kushakama haya nyaka muParadisa hanu hamaseki. Komana spiritu yazatikaña nikudi antu atambwilaña mutambi, nakwikala atumbanji aYesu Kristu, nikutwalekahu kutambika antu amakwawu? Spiritu yayikwashaña niwena. Chela apapatishewa ‘mwijina daspiritu yajila,’ alondelaña mwayilombolañawu kudi spiritu yajila nikushindamena hawukwashu wayu. (Mat. 28:19) Cheñi, toñojokenu hansañu yashimwinaña awayishewa niezaza deneni dinakutohelaku. Nsañu yeniyi yashimwinañawu yekala muBayibolu, mukanda wasonekeluwu kuhitila mukuzatisha spiritu yaNzambi. Dichi, antu ayitambikaña kuhitila mudi spiritu yajila. Kafwampi, twalombolewaña naspiritu. Chumichi chinateli kutwileñela kuzata nakushika hadihi mumudimu wakutambika antu?
‘Elaña Nawu, Inzaña’
13. Indi nhoshelu yakwila nawu ‘spiritu ninsumbuki elaña nawu, inzaña’ yalumbulukadi?
13 ‘Spiritu ninsumbuki’ hiyahoshaña hohu nawu ‘Inzañaku.’ Izu dachiGriki dazatishawu hanu dalumbuluka kutwalekahu kwila chuma. Kutoñojoka hansañu yeniyi, Bayibolu yaNew World Translation yahosha nawu: ‘Spiritu ninsumbuki elaña nawu, Inzaña.’ Chumichi chinakumwekesha kutwalekahu kutambika antu kumutambi waNzambi. Chumanyi chelañawu antu atiyaña nikwiteja mutambi weniwu? Niwena ahoshaña nawu, “Inzaña.” Izaza deneni dawakwakudifukula alala aditena nawu ‘akalakalaña mwaana niwufuku mutembeli yaYehova.’ (Chim. 7:9, 15) Munjilanyi ‘mwakalakelañawu mwaana niwufuku’? (Tañenu Luka 2:36, 37; Yililu 20:31; 2 Atesalonika 3:8.) Chakutalilahu chakaprofwetu wamumbanda Ana nikapostolu Pawulu chamwekeshaña nawu ‘kukalakala mwaana niwufuku’ chayamukwila nawu kutwalekahu nikukalakala nañovu mumudimu wakushimwina.
14, 15. Indi Danyeli wamwekesheli ñahi nindi chalema kudifukulaña mpinji yejima?
14 Kaprofwetu Danyeli niyena wamwekesheli nindi kudifukula mpinji yejima kwalema. (Tañenu Danyeli 6:4-10, 16.) Hahimpili chaaku chindi chakulombaña kudi Nzambi “ifuku dimu mapampa kasatu[ku], . . . neyi chelilañayi hakusambila,” hadi kakweji kamu, hela chakwila kwila mwenimu chadi kuleñela kumuumbila muwina wawanyitupa. Yililu yindi yamwekesheli hatooka to-o kudi antu amumweneña nawu kudifukulaña kudi Yehova mpinji yejima dichuma chalema nankashi.—Mat. 5:16.
15 Hanyima yakwila Danyeli nakami muwina wawanyitupa wufuku wejima, mwanta wayili kwenakuna nakubilela nezu neyi dakudila hohu nindi: “Eyi Danyeli, eyi kambuñaNzambi wamumi, Nzambi yeyi wakalakelaña mafuku ejima, natweshi kukuhandisha kudi anyitupa?” Hohenohu Danyeli wamwakwili nindi: “Eyi mwanta, kalombu. Nzambi yami natemeshi kañelu kindi, najiki mutunwa twawanyitupa, hiyanankatishuku; muloña hinadiñi namuloña kumesu induku, hela kumesu eyeyi mwanta hineli chuma chatamaku.” Yehova wamukiswilili Danyeli hakukalakala “mafuku ejima.”—Dan. 6:19-22.
16. Indi chakutalilahu chaDanyeli chakudifukulaña mpinji yejima chinateli kutuleñela kwihula malwihwinyi kutalisha hakukalakala mumudimu wakushimwina?
16 Danyeli wafuukwiluhu kufwa kubadika kuleka kudifukula kudi Yehova mpinji yejima. Indetu, chumanyi chitwatela kwila? Yumanyi yitunakukalakala hela yitunakukeña kukalakala kulonda kutwalekahu kushimwina nsañu yayiwahi yaWanta waNzambi? Dichi, hitwatela kumanisha kakweji kamu chakadi kuyishimwina antu hadi Yehovaku. Neyi chinatwesheki, komana kwila tuyaña mumudimu wamwiha mulungu nimulungu nehi? Hela chakwila tunakuyekela nayikatu chakwila tunateli kushimwina hohu hadi jiminiti 15 mukakweji kamu, twatela kwila lipoti jiminiti jeniji. Muloñadi? Muloña spiritu ninsumbuki hamu ninetu twafwilaña kutwalekahu kwila netu, “Inzaña.” Eña, twatela kuzata hakumina ñovu jetu jejima kulonda kutwalekahu kwikala akwakushimwina aWanta.
17. Kukoolekanyi kwakutiyakesha mutambi waYehova kutwatela kukalakalaña?
17 Twatela kutwalekahu kutiyakesha mutambi waYehova hampinji yidi yejima, bayi neyi mpinji yitwatanjika hohu yakukalakala mumudimu wakushimwinaku. Tukweti kukooleka kwakutambika antu adi nampwila kulonda ‘atambuli menji awumi chakadi kulanda’ hampinji jikwawu, chidi neyi hakulanda yuma, halwendu, hakunooka, neyi tunakuzata hela hampinji yakuya kushikola. Hela chakwila anlomboli alekesha mudimu wakushimwina, twatwalekañahu kushimwina munjila yakubabala, hadaha kuhitila mukushimwina hamatala antesha hohu nkumininaku tuya nakushimwina kwiluña dacheñi hela kushimwinaña nankashi kuhitila mukuhanjeka.
Ilenuña Nenu, “Inzaña”
18, 19. Mwamwekeshaña ñahi nenu mwalemesha kukooleka kwakwikala akwakukalakala ambala aNzambi?
18 Spiritu ninsumbuki elaña nawu, “Inzaña” kudantu adi nampwila yamenji awumi, hadi yaaka kubadika hamakumi atanu nawana yinahituhu. Komana mutambi wawu wawuwahi mwawutiya dehi? Neyi mwawutiya dehi, anayikoleshi kutambikaku antu amakwawu.
19 Hitweluka mpinji yakamana iwu mutambi waYehova wawuwahuku. Hela chochu, kwiteja mutambi weniwu kuhitila mukuhosha netu, “Inzaña,” kwatuleñelaña kwikala akwakukalakala ambala aNzambi. (1 Kor. 3:6, 9) Tukweti kukooleka hama! Dichi, tumwekesheña netu twalemesha iku kukooleka nawa “tumulambulenu Nzambi mulambu wakumuhameka mafuku ejima” kuhitila mukushimwinaña mafuku ejima. (Heb. 13:15) Ejima wetu twachiñejaña kushakama hanu hamaseki hamu nezaza dansumbuki, tutwalekuhu kwila netu, “Inzaña.” Dichi antu amavulu atambuli “menji awumi chakadi kulanda.”
Yumanyi Yimunadizi?
• Anyi anakutambikawu ‘kwinza’?
• Muloñadi wutwatela kuhoshela netu Yehova diyi watachikili mutambi ‘wakwinza’?
• Indi spiritu yajila yazataña mudimwinyi kutalisha hakutiyakesha mutambi ‘wakwinza’?
• Muloñadi wutwatela kufwila kuyaña mumudimu wakushimwina mafuku ejima?
[Malwihu aKuzatisha haKudiza]
[Chati/Nyevulu yidi hefu 16]
(Neyi munakukeña kumona ntanjikilu yejima talenu mumukanda)
Ilenuña Nenu, “Inzaña”
1914
Akwakushimwina adiña 5,100
1918
Antu amavulu akatambwila wumi muParadisa hanu hamaseki
1922
“Tiyakeshenu, tiyakeshenu, tiyakeshenu, Mwanta niwanta windi”
1929
Ashalahu ashinshika elileña nawu, “Inzaña”
1932
Kubadika hadi awayishewa, antu amakwawu ayitambikili kumutambi wakwila nawu “Inzaña”
1934
Izaza daYonadabi aditambikili kulonda kushimwina nsañu yayiwahi
1935
“Izaza deneni” adilukili
2009
7,313,173 akwakushimwina