Zatishenuña Chiwahi “Mpoku yaSpiritu Yakabali”

‘Tambulenu . . . mpoku yaspiritu yakabali, wowu mazu aNzambi.’—EFWES. 6:17.

1, 2. Chumanyi chitwatela kwila chineli akwakushimwina aWanta amavulu anakukeñeka?

 YESU chamweniyi izaza dinakankili kuspiritu, walejeli atumbanji twindi nindi: “Mbutu jajivulu jinahi dehi, ilaña akwakukalakala anakehi. Dichi lombenu kudi Mwanta wakumuna atemeshi akwakukalakala kukumuna kwindi.” Yesu wakoñeli yuma yayivulu kubadika hakuhosha hohu mwenimu. Chelili nahoshi dehi mazu wenawa, ‘watambikili atumbanji twindi ikumi nayedi’ nakuyitemesha kuya mumudimu wakushimwina, hela “wakumuna.” (Mat. 9:35-38; 10:1, 5) Nkumininaku, Yesu ‘watondeli amakwawu makumi atanu nayedi, hakuyitemeshañahu dehi kumbidi, ayedi ayedi,’ kulonda kukalakala mudimu wowumu.—Luka 10:1, 2.

² Nimakonu, akwakushimwina aWanta amavulu anakukeñeka chikupu. Kuvula kwawantu apompeli kuChanukishu mukaayi kejima muchaaka chamudimu cha 2009 adiña 18,168,323. Kuvula kweniku kwahambakeni kuvula kwawaYinsahu jaYehova kubadika hayihita 10. Mwamweni, maha anashikili dehi hakumuna. (Yow. 4:34, 35) Dichi, twatela kulomba akwakukalakala amavulu. Hanu dinu, tunateli kukalakala ñahi kwesekeja nakulomba kweniku? Tunateli kwila mwenimu kuhitila mukwikala akwakushimwina asoñaña nyikabu hampinji yitunakukalakala chikupu mumudimu wakushimwina Wanta nikwilisha atumbanji.—Mat. 28:19, 20; Maku 13:10.

3. Indi spiritu yaNzambi yatukwashaña ñahi kwikala akwakushimwina akuluka yitembi?

³ Chibaaba chinafumuhu chahosheli hakulombolewa naspiritu yaNzambi chikwalemena ‘hakuhosha izu daNzambi chakadi woma.’ (Yil. 4:31) Spiritu yeniyi yinateli kutukwasha ninetu kwikala akwakushimwina akuluka yitembi. Njila yimu yakuyilaku hambidi mumudimu wetu wakushimwina hikuzatisha chiwahi chitwa chetu chachiwahi chatwinkayi Yehova Nzambi, Izu dindi dasonekewa, Bayibolu. Ayisonekeli hamuloña waspiritu yajila. (2 Tim. 3:16) Nsañu yekalamu ayonena kudi Nzambi. Dichi, neyi tuzatishaña Bayibolu chiwahi nawa ntañishilu yetu yishindamenaña haBayibolu, dikwila nawu anakutulombola kudi spiritu yajila. Henohu kanda twiluki chitwatela kwila mwenimu, tusambilenu kushinshika Hezu denidi chidasweja ñovu.

‘Izu daNzambi, Dikweti Ñovu’

4. Indi Bayibolu yinateli kuhimpa ñahi muntu?

⁴ Izu daNzambi hela nsañu yikweti ñovu nankashi. (Heb. 4:12) Muchifwikija, nsañu yekala muBayibolu yatwa kubadika mpoku yakabali yachilawu kudi muntu, muloña yapwikaña nakwambula mafwaha namanji. Chalala chamuBayibolu chashikaña hamuntu wamukachi nikuhanuka muyitoñojoka yindi, nikumwekesha chekalayi muntu mukachi. Chalala chamuBayibolu chikweti ñovu jakuhimpa muntu. (Tañenu Akolosi 3:10.) Mwamweni, Izu daNzambi dinateli kuhimpa antu.

5. Indi Bayibolu yatulombolaña munjilanyi, nawa yumanyi yafumañamu?

⁵ Kubombelahu, maana ekala muBayibolu abadika maana ejima. Mwekala nsañu yayiwahi yinateli kukwasha antu chakushakama mudinu ituña datama. Izu daNzambi hidatoñekaña hohu kunyendu yetuku, ilaña nimunjila mutwendaña. (Mas. 119:105) Datukwashaña hama neyi tudi nakukala hela tunakufuukulahu kutalisha hakutonda amabwambu, yisela, nyidimu, nvwalilu niyuma yikwawu. (Mas. 37:25; Yish. 13:20; Yow. 15:14; 1 Tim. 2:9) Kuzatisha nshimbi jekala Mwizu daNzambi kwatukwashaña kushakama chachiwahi nawakwetu. (Mat. 7:12; Fwi. 2:3, 4) Neyi twiteja izu daNzambi kutoñekaña munjila mutwendaña, tunateli kwiluka yuma yitwafuukulañahu chiyikatukwasha  kumbidi. (1 Tim. 6:9) Cheñi, Nsona jashimunaña yuma yakakoñayi Nzambi kumpinji yakumbidi, nawa jatukwashaña kwikala nachihandilu chinesekani nayuma yeniyi. (Mat. 6:33; 1 Yow. 2:17, 18) Neyi muntu yeteja nshimbi jaNzambi kumulombolaña, nateli kudiluñisha nankashi.

6. Indi chitwa chetu Bayibolu chasweja ñahi ñovu kutalisha hanjita yetu yakuspiritu?

⁶ Toñojokenu cheñi hachitwa chasweja ñovu Bayibolu, kutalisha hanjita yetu yakuspiritu. Pawulu wateneni izu daNzambi nindi ‘mpoku yaspiritu yakabali.’ (Tañenu Aefwesesa 6:12, 17.) Neyi muyizatisha chiwahi, nsañu yamuBayibolu yinateli kuleñela antu kukaana kuyiyuula kudi Satana. Himpoku yakabali yinakupulwisha mawumi awantu chatela kuyijilumuna. Komana kwila tuzatishaña izu daNzambi chiwahi nehi?

Zatishenuña Izu daNzambi Chachiwahi

7. Muloñadi chichalemena kwiluka chakuzatisha chiwahi ‘mpoku yaspiritu yakabali’?

⁷ Ishidika nateli kuzatisha chiwahi yitwa yindi munjita neyi yayizatishaña mafuku ejima nikudiza chakuyizatisha chiwahi. Hohamu nakuzatisha ‘mpoku yaspiritu yakabali’ munjita yetu yakuspiritu. Pawulu wasonekeli nindi: “Kabilaku kudimwekesha kumesu aNzambi, wumuntu anesekuwu dehi, mukwakukalakala wakadi hakutiyila nsonyi, nakulumbulula mazu ansañu yalala mwayawu mwayawu.”—2 Tim. 2:15.

8, 9. Chumanyi chinateli kutukwasha kwiluka chahosha Bayibolu? Shimunenu chakutalilahu.

⁸ Chumanyi chinateli kutukwasha ‘kulumbulula mazu ansañu yalala mwayawu mwayawu’ mumudimu wetu wakushimwina? Henohu kanda tulumbulwili antu chahosha Bayibolu, twatela kusambila kwiluka nsañu yeniyi. Chumichi, chakeñekaña kusha kashinshi kunsañu yidi muvasi hela muchibaaba.

⁹ Kwiluka chiwahi nsañu yidi muchibaaba chansona chakeñekaña kutaña mavasi anadikumashani nanoyu vasi. Mazu aPawulu ekala hamukanda wa Aŋalija 5:13 ahana chakutalilahu. Wasonekeli nindi: “Muloña enu ana kwetu, ayitambikilili kwenu waana. Ichi chimunabuli wuduñu, bayi muchibalumuna chiikali chakukwasha nachu chisemwa chahesekuku; ikalenu kwenu akwakudikalakela wumu namukwawu mukukeña.” Indi Pawulu wateneneña waana hela kusubuka kwamuchidinyi haniyi vasi? Komana wateneneña waana wakufuma kunshidi nikukufwa, kuwuduñu wakwitiya kwakutwamba tahindi yuma yacheñi? Nsañu yidi muvasi yinakumwekesha nawu Pawulu wateneneña hawaana hela kusubuka kwenzaña hamuloña ‘wakutukuula kukushiña kwanshimbi kwatushiñiluwu.’ (Ŋal. 3:13, 19-24; 4:1-5) Wateneneña hawaana hela kusubuka kwakuha, kwawakwaKristu, kwadiñawunaku hamuloña wakulondela Kristu. Antu ahamekeli iwu waana hela kusubuka adiña nakudikwasha wumu namukwawu hamuloña wakwila adikeñeli. Ilaña antu abulili kudikeña, adituñwileña nikuditadikisha.—Ŋal. 5:15.

10. Hakwila nawu twiluki chiwahi chalumbuluka Nsona, nsañu yamuchidinyi yitwatela kushinshikahu, nawa tunateli kuyiluka ñahi?

¹⁰ Nhoshelu yakwila nawa “nsañu yidi muvasi  hela muchibaaba” yikweti mazu amakwawu. Mazu adifwanaku diwenawa “chitachi, chihandilu.” Hakwila nawu twiluki chiwahi chalumbuluka nsona, twatela kwiluka nsañu yejima, yidi neyi muntu wasonekeli mukanda wamuBayibolu weniwu nimpinji niyuma yaletesheli awusoneki. Cheñi, chakwashanaña kwiluka muloña waletesheli asoneki mukanda weniwu, nawa neyi chinatwesheki, kwiluka yisemwa yawantu, yililu yawu niyuma yalemesheluwu, ninsakililu yadifukwileñaku mumafuku awu. *

11. Yumanyi yitwatela kutondolwela neyi tunakulumbulula nsona?

¹¹ ‘Kulumbulula mazu ansañu yalala mwayawu mwayawu’ kwabombelamu yuma yayivulu kubadika hakulumbulula chiwahi chalala chamuNsona. Twatela kubabala hakuzatisha Bayibolu kulonda kubula kutiyisha nachu antu woma. Hela chakwila twazatishaña Nsona kulonda kuhakwilaku chalala neyi cheliliyi Yesu hamwesekeluwu kudi Diyabolu, Bayibolu hiyekala chitwa chakutiyisha nachu antu womaku. (Kuhit. 6:16; 8:3; 10:20; Mat. 4:4, 7, 10) Twatela kutiyilila kusoñamisha kwakapostolu Petulu kwakwila nawu: “Chiña mujiliki Kristu munyichima yenu nenu diyi Mwanta, mutweshi kwakula mafuku ejima antu ejima akuyihula nsañu yakuchiñeja kumwachiñejaña; nakudizoza nawoma.”—1 Pet. 3:15.

12, 13. Indi Izu daNzambi dinateli kusanda ‘mpwembwinyi jakola’? Shimunenu chakutalilahu.

¹² Yumanyi yafumañamu neyi tulumbulula chiwahi chalala Chezu daNzambi? (Tañenu 2 Akorinda 10:4, 5.) Chalala chamuNsona chinateli kusanda “mpwembu jakola,” dikwila nawu, kusolola hatooka ntañishilu yakutwamba, yililu yatama niyitoñojoka yamwekeshaña maana awuntu. Tunateli kuzatisha Bayibolu kulonda kumanisha yitoñojoka ‘yadimika kwiwulu hela yetejañawu yaleñelaña kubula kumwiluka Nzambi.’ Tunateli kuzatisha ntañishilu yamuBayibolu kulonda kukwasha antu amakwawu kuhimpa yitoñojoka yawu kwesekeja nachahosha chalala.

¹³ Chakutalilahu, shinshikenu hansañu yamumbanda wukweti yaaka yakusemuka 93 washakamaña mwituña daIndia. Kufuma kuwansi windi amutañishili nawu neyi yofwa wakasañukila muchuma chacheñi. Chatachikiliyi kudiza Bayibolu kuhitila mukudisonekela nyikanda namwanindi weyala washakamaña kwituña dacheñi, wetejeli yuma yadizileñayi hadi Yehova niyikaninu yindi. Hela chochu, wakuhweleleli chikupu ntañishilu yakwila nawu neyi muntu nafwi wasañukilaña muchuma chacheñi chakwila mwanindi weyala chamusonekeleliyi kutalisha hachekalawu afu, wakaanini chikupu. Wahosheli nindi: “Nakañanyi kwiluka chalumbuluka Nsona jiwansonekelaña. Nsakililu jejima jatañishaña nawu mumujimba wetu mwekala chuma chabulaña kufwa. Nakuhwelela nami mujimba wafwaña nawa nami chuma chabulaña kumwekana chekala mumujimba wetu chasañukilaña muchuma chacheñi mapampa akushika ku 8,400,000. Ntañishilu yeniyi yinateli kwikala ñahi yakutwamba?  Dikwila nawu nsakililu jajivulu jatañishaña mwakutwamba?” Komana “mpoku yaspiritu yakabali” yinateli kusanda mpwembu jakola hela kumanisha yuma yakuhwelelawu antu? Hanyima yakwila anahanjeki haniyi nsañu kuhitila mukuzatisha Nsona, chimwahitili nyilungu wamusonekeleli mwanindi nindi: “Ichi natachiki kwiluka chalala hansañu yakufwa. Nazañalalaña hama hakwiluka nami mpinji yakusañuka neyi yinashiki dehi, twakadimona nawantu itwakeña afwa dehi. Inakulomba nami Wanta waNzambi winzi katataka.

Zatishenuña Izu daNzambi naKushinjila

14. Indi kushinjila antu itunakuhoshanawu kwalumbulukadi?

¹⁴ Kuzatisha chiwahi Bayibolu mumudimu wakushimwina hikwalumbuluka kutaña hohu nsonaku. Pawulu wahosheleña “nakushinjila” ninetu nawa twatela kwila momumu. (Tañenu Yililu 19:8, 9; 28:23.) “Kushinjila” kwalumbuluka “kuleñela muntu kwiteja yuma yimunakuhosha.” Muntu anashinjiluwu “wetejaña chikupu nakukuhwelela yuma yinamulejuwu.” Neyi tushinjila muntu kwiteja ntañishilu yamuBayibolu, dikwila nawu tunakumuleñela kukuhwelela ntañishilu yeniyi. Hakwila nawu twili mwenimu, twatela kushinjila muntu wunakutiyilila kuchalala chitunakuhosha. Tunateli kwila mwenimu kuhitila munjila jinalondeluhu.

15. Munateli kusha ñahi kashinshi kunsañu yamuBayibolu munjila yikuleñela antu kulemesha Bayibolu?

¹⁵ Shenu kashinshi Hezu daNzambi kuhitila mukumwekesha kalemesha. Neyi mutena nsona, shenu kashinshi hakulema kwakwiluka Nzambi chatoñojokañayi hansañu yimunakuhanjekahu. Neyi mwihula lwihu nawa mwiniitala yaakuli, munateli kuhosha yuma yidi neyi iyi, ‘Tutalenu Nzambi chatoñojokañayi haniyi nsañu.’ Hela munateli kwihula nenu, ‘Indi Nzambi wamonaña ñahi iyi yuma?’ Kulumbulula nsona muniyi njila kwamwekeshaña chikupu nawu Bayibolu yafuma kudi Nzambi nawa kwakwashaña ntiyilili kulemesha Bayibolu. Kwila mwenimu kwakwashaña sweje-e neyi tunakushimwina kudi muntu wakuhwelela mudi Nzambi ilaña helukisha ntañishilu yamuBayiboluku.—Mas. 19:7-10.

16. Yumanyi yatela kuyikwasha kulumbulula nsona chiwahi?

¹⁶ Mwatela kutaña nsona nikuyilumbulula. Pawulu wadiñi nachaaku ‘chakulumbulula nakukolesha chikupu’ yuma yadizishileñayi. (Yil. 17:3) Kakavulu, Nsona yimunakuhanjekahu mwekalaña yikuma yayivulu, nawa munateli kukonkomwena mazu hanashindameni yikuma yinakundami kunsañu yimunakuhanjekahu. Munateli kwila mwenimu kuhitila mukuhosha nakufuntilahu hela kulumbulula mazu hanashindameni chikuma hela kuhitila mukwihula malwihu akumukwasha mwiniitala kwiluka mazu imunakuhoshahu. Kuhiñahu, mwatela kulumbulula mwaya mazu wenawa amunsona. Hanyima yakwila mwenimu, mukwashenu muntu imunakuhoshanindi kulonda yamoni nsona yenoyu chiyinamukundami halwindi.

17. Munateli kudihujola ñahi kuhitila muNsona munjila yakushinjila?

¹⁷ Dihujolenuña mwomwaya nyikanda yajila munjila yakushinjila. Kuhitila mukwihula chachiwahi nawa munjila yakubabala, kwaleñeleli Pawulu ‘kudihujola nawantu mwomwaya nyikanda yajila.’ (Yil. 17:2, 4) Kufwana Pawulu, fwilenu kushika hamuchima wamuntu imunakuhanjekanindi. ‘Ilukenu’ yuma yidi mumuchima wamuntu kuhitila mukuzatisha malwihu amawahi akumuleñela kwikala nampwila yakutiyilila. (Yish. 20:5) Tondolwelenu kuhosha yuma yinateli kuneñesha muntu. Mwatela kuhosha munjila yatiyakana nawa yayiwahi. Yuma  yimunakuhosha yatela kushindamena hayuma yalala. Nsañu yimunakuhosha yatela kushindamena chikupu Hezu daNzambi. Chachiwahi kutaña nsona yimu nikuyilumbulula chiwahi kubadika kutaña nsona jiyedi hela jisatu mukulondashana. Kwila mwenimu, kunateli kuyileñela ‘kubombelaku yuma yimwadiza kunyivumbu yenu.’ (Yish. 16:23) Mpinji jikwawu, chikuwaha kusandujola kulonda kukeñelahu nsañu jikwawu. Mumbanda wayaaka yakuvwalika 93 atenawu hakusambila wakeñeleña kwiluka ntañishilu yakwila nawu wumi hiwafwañaku (hela spiritu) chiyatandila mukaayi. Kwiluka kwafumini ntañishilu yeniyi nawa nichiyatachikili munsakililu jajivulu jamukaayi chadiñi chalema kudi yena hakumushinjila kulonda yeteji chatañishaña Bayibolu hansañu yeniyi. *

Twalekenuhu Kuzatisha Chiwahi Izu daNzambi

18, 19. Muloñadi wutwatela kutwalekelahu kuzatisha chiwahi “mpoku yaspiritu yakabali”?

¹⁸ Bayibolu yahoshaña nawu: “Yuma yampata yinu chiyidichi, yahitaña.” Antu anakutaminaku. (1 Kor. 7:31; 2 Tim. 3:13) Dichi, chalema kutwalekahu kusanda “mpwembu jakola” kuhitila mukuzatisha “mpoku yaspiritu yakabali, wowu mazu aNzambi.”

¹⁹ Twekala amuzañalu hakwikala Nezu daNzambi, Bayibolu nawa nikuzatisha nsañu yayiwahi yekalamu kulonda kulekesha ntañishilu yakutwamba nakudizisha antu akweti nyichima yayiwahi. Kwosi chuma chidi chejima chikweti ñovu kubadika nsañu yeniyuku. Dichi, tuzateña nañovu kulonda kuzatisha chiwahi “mpoku yaspiritu yakabali” mumudimu watwinkayi Nzambi wakushimwina Wanta.

[Tumazu twaheshina]

Yumanyi Yimunadizi?

• Indi Izu daNzambi dasweja ñahi ñovu?

• Tunateli ‘kulumbulula’ ñahi ‘mazu ansañu yalala mwayawu mwayawu’?

• Indi nsañu yamuBayibolu yinateli kwiladi kutalisha ‘hampwembu jakola’?

• Munateli kushinjila ñahi chiwahi antu mumudimu wakushimwina?

[Malwihu aKuzatisha haKudiza]

[Chikasha/Mwevulu wudi hefu 12]

Chakuzatisha Izu daNzambi naKushinjila

▪ Mwatela kulemesha Bayibolu

▪ Lumbululenu Nsona

▪ Dihujolenuña nakushinjila kulonda kushika antu hamuchima

[Mwevulu wudi hefu 11]

Mwatela kuzatishaña chiwahi “mpoku yaspiritu yakabali”