Endenuña chaKuyendesha Kudi Spiritu Nawa Hembenu Kudihana Kwenu

‘Endenuña chakuyendesha kudi spiritu, kulonda mubuli kwila yafwilaña chisemwa chaheseki.’—ŊAL. 5:16.

1. Chipapatishu chamuchidinyi chamwekeni hefuku daPentekosta?

 ATUMBANJI twaYesu ahosheleli mumadimi hefuku daPentakosta 33 C.E., hanyima yakuyipapatisha naspiritu yajila. Amwekesheli chamukunkulu chaspiritu muchihayamisha. (1 Kor. 12:4-10) Chumanyi chafumini munichi chamukunkulu nimumpanji yahosheliyi kapostolu Petulu? Antu amavulu ‘alemeni munyichima yawu.’ Petulu chayikonkomweneniyi, abalumukili munyichima nawa ayipapatishili. Nsañu yakunyaka yahosha nawu: “Dichi wena atambwili mazu indi hiyakuyipapatisha; ifuku denodu hiyakubombelaku antu kafwampi neyi makombakaji asatu.” (Yil. 2:22, 36-41) Kwesekeja nachashimwiniyi Yesu, atela ayipapatishili mumenji mwijina daTata, nidaMwana, nidaspiritu yajila.—Mat. 28:19.

2, 3. (a) Lumbululenu chaambu chidi hakupapatishewa naspiritu yajila nikupapatishewa mwijina daspiritu yajila. (b) Muloñadi akwaKristu ejima makonu chatela kuyipapatishawu mumenji?

 ² Hela chochu, komana hadi chaambu hakachi kakupapatishewa naspiritu yajila nikupapatishewa mwijina daspiritu yajila? Eña. Antu apapatishañawu naspiritu yajila avwalikaña cheñi chachiha hamu neyi anyana kaNzambi atondewa naspiritu. (Yow. 3:3) Ayiwayishaña kulonda akekali anyanta nawa atupristu anyanya amuWanta waNzambi wamwiwulu, nawa ekala mujimba wumu wakuspiritu naKristu. (1 Kor. 12:13; Ŋal. 3:27; Chim. 20:6) Dichi ichi chipapatishu, dikwila nawu kupapatishewa naspiritu yajila, dichipapatishu chelili Yehova, hefuku daPentekosta nikuhiñahu, chatondeliyi antu ekalili answana chimu naKristu. (Rom. 8:15-17) Indi chipapatishu chamumenji mwijina daspiritu yajila, chuma chamwekanaña mpinji yejima hakupompa kweneni nihakupompa kwankambi kwawantu jaYehova makonu?

³ AkwaKristu alala ayipapatishaña mumenji chinjikijilu chakudihana kudi Yehova Nzambi namuchima wumu. Chochimu niantu atambwilaña mutambi wakuya mwiwulu. Ilaña chipapatishu chamumenji hinjila yalema yalondelaña yihita yawantu amayala nawambanda makonu akweti kuchiñeja kwakushakama hamaseki haya nyaka. Hichidi namuloña nakuchiñeja kwamuntuku, kupapatishewa mumenji mwijina daTata, nidaMwana, nidaspiritu yajila hinjila yalema yatela kulondelayi muntu kulonda kwikala nawubwambu wawuwahi naNzambi. AkwaKristu ejima apapatishewa atela ‘kwendaña chakuyendesha kudi spiritu.’ (Tañenu Aŋalija 5:16.) Komana munakwenda chakuyendesha kudi spiritu nikuhemba kudihana kwenu?

Chichalumbuluka ‘Kutwendesha Kudi Spiritu’

4. Indi ‘kwenda chakutwendesha kudi spiritu’ kwabalumunañadi?

⁴ ‘Kwendaña chakuyendesha kudi spiritu’ chabombelamu kweteja ñovu yaspiritu yajila, nikwiteja spiritu yajila yiyilomboleña. Munjila yikwawu, chatalisha mukulombolewaña naspiritu yajila munyidimu yetu yejima ifuku nifuku. Aŋalija kapetulu 5 kamwekeshaña chaambu chekala hakulombolewa naspiritu yajila nakwila mwaya chisemwa chaheseki.—Tañenu Aŋalija 5:17, 18.

5. Indi kulombolewa naspiritu yajila kwabombelamu kutondolwela nyidimu yamuchidinyi?

⁵ Neyi chakwila anakuyilombola kudi spiritu yajila, dikwila nawu munakukeña kutondolwela kufwila nyidimu yachisemwa chaheseki. Nyidimu yeniyi yabombela yuma yidi neyi “wuvumbi, wuzondu wamumuchima, kufwila yatama, kupesha, kupanda, kuhelañana, kuzuña, ichima, madombu, kukokwela kwenu, kudambola, kwitiya nsañu yaheña, lwisu, kusheta, yisela.” (Ŋal. 5:19-21) Dikwila nawu, ‘kufwisha nyidimu yachisemwa chaheseki naspiritu.’ (Rom. 8:5, 13) Yikuyikwasha kusha maana kuyuma yakuspiritu nikulondela muyikuyilombolaña, chatela nyidimu yachisemwa chaheseki yiyilomboleña.

6. Lumbululenu chuma chakeñekaña hakwila nawu tumwekeshi mukabu waspiritu.

⁶ Spiritu yajila chiyikuyilombolaña, mukumwekeshaña yililu yaNzambi, ‘mukabu waspiritu.’ (Ŋal. 5:22, 23) Dichi mukwiluka nenu, kwila mwenimu kwakeñekaña kuzata nañovu. Chakutalilahu: Neyi ndimi yadima iha, mwaana nimenji akeñekaña; chakadi yumiyi hanateli kwañulahu mbutuku. Chochimu spiritu yajila yidi neyi mwaana. Spiritu yajila yakeñekaña hakwila nawu tumwekeshi mukabu waspiritu. Ilaña,  yumanyi yatela kwañulayi ndimi neyi kuzata nañovu nehi? (Yish. 10:4) Eñañi, neyi mwikala namuchima wawuwahi mukuswejaña kusoña mukabu wawuwahi waspiritu yajila. Dichi dihulenu nenu, ‘Komana netejaña spiritu yajila yisoñeña mukabu kuhitila mukwiteja yinlomboleña?’

7. Muloñadi kudiza nikutoñojokahu nankashi chikwalemena neyi munakukeña kwikala namukabu waspiritu yajila?

⁷ Andimi akeñekaña kwichililaña mbutu yawu hakwila nawu akañuli chikupu. Hakwila nawu twikali namukabu waspiritu, twatela kunwaña menji achalala chamuBayibolu chahanañawu kuhitila muchipompelu chawakwaKristu makonu. (Isa. 55:1) Chakadi nikujina mwalejaña antu amavulu nenu Nyikanda Yajila ayonena naspiritu yajila. (2 Tim. 3:16) Cheñi nawa, izanvu danduñu wamaana nikashinshi daloñeshaña yuma yakeñekaña chikupu yatukwashaña kwiluka menji alala achalala chamuBayibolu. (Mat. 24:45-47) Mwatalisha awa mazu mwatiyakana chikupu. Hakwila nawu atulomboleña kudi spiritu yajila, twatela kutañaña nikutoñojokaña nankashi Hezu daNzambi. Neyi munakwila mwenimu, munakwimbujola chakutalilahu chachiwahi chawatuprofwetu “ehujolelumu nakukabila” nsañu yayiloñesheleluwu. Chalema kwiluka netu niañelu akeñesha nankashi chalala chakuspiritu kutalisha haLubutu lwakaninuwu nihachipompelu chawakwaKristu awayishewa.—Tañenu 1 Petulu 1:10-12.

Indi Spiritu Yatulombolaña Ñahi?

8. Muloñadi chichalemena kulomba spiritu yaYehova?

⁸ Himwatela kudizaña hohu Bayibolu nikutoñojokahuku. Mwatela kulombaña wukwashu niwunlomboli waYehova. Yena natweshi “kwila chakubadika nankashi mutukulomba hela mutukutoñojoka mwejima.” (Efwes. 3:20; Luka 11:13) Munateli kwakula nenudi, neyi muntu yehula nindi, “Muloñadi chinatela kulombaña kudi Nzambi henohu welukilañahu dehi ‘yuma yinabuli hinichidi kanda niyilombi’?” (Mat. 6:8) Kuhitila mukulomba spiritu yajila, mwamwekeshaña nenu mwashindamena hadi Yehova. Chakutalilahu, neyi muntu yenza nindi mumukwashi, mukuzata hakumina ñovu yenu kulonda mumukwashi, muloña walomba nindi mumukwashi, nawa wamwekesha nindi wayikuhwelela. (Esekejenu Yishimu 3:27.) Chochimu, Yehova watiyaña kuwaha neyi mumulomba spiritu yindi, nawa nateli kuyinka.—Yish. 15:8.

9. Indi kuyaña kukupompa kwawakwaKristu kunateli kuyikwasha ñahi kulombolewaña naspiritu yaNzambi?

⁹ Munateli kuhameka hakwiluka nenu njila yikwawu mwatulombwelaña spiritu yaNzambi yekala kuhitila mukupompa kwetu, kwamaneni, nikwankambi. Kuzata nañovu kulonda kuya nakupompa nikutiyilila chikupu kuprogiramu kwalema nankashi. Kwila mwenimu kwayikwashaña kwiluka “yuma yaNzambi yayeni yakunama.” (1 Kor. 2:10) Cheñi nawa kwakulañahu mpinji yejima kwalema. Toñojokenu hakupompa kumwapompeli hadi nyilungu yiwana yinahituhu. Mapampa kañahi kumolweli chikasa, nakukeña kwakulahu, kulonda kumwekesha chikuhwelelu chenu? Komana munamoni nenu mwatela kuyilaku hambidi? Neyi munamoni nenu mwatela kuyilaku hambidi, fuukulenuhu chuma chimwatela kwila munyilungu yidi hambidi. Yehova wukumona nindi munakukeña kwakulahu nawa wukuyinka spiritu yindi yajila, yikuyikwasha kuhetelamu chikupu mukupompa kumwawanewañaku.

10. Kwenda chakutwendesha kudi spiritu kwabombelamu kuleja antu mutambi wamuchidinyi?

 ¹⁰ Kwendaña chakutwendesha kudi spiritu kwabombelamu kwiteja kumutambi wutwatañaña haChimwekeshu 22:17 nawu: “Nispiritu ninsumbuki hiyakwila nawu, Inzaña. Muntu wukutiya niyena eli nindi, Inzaña. Muntu wudi nampwila enzi, yowu wukukeña kutambula, atambuli meji awumi chakadi kulanda.” Spiritu yalombolaña izanvu dasumbuki dawawayishewa, anakuhana iwu mutambi kutalisha kumenji awumi. Neyi muneteji iwu mutambi wakwila nawu “inzaña” komana ninenu munafuukuluhu kuhosha nenu, “Inzaña”? O kukoleka kutukweti kwakukalakala iwu mudimu wakupulwisha mawumi awantu!

11, 12. Indi spiritu yajila yakwashanaña ñahi mumudimu wakushimwina?

¹¹ Spiritu yajila diyi yinakulombola iwu mudimu walema wunakuzatawu makonu. Twatañaña nsañu yashimunaña spiritu yajila chiyakwashili antu amuyaaka nkulakaji yakusambila kuwana maluña amaha akushimwinamu amishonali. Kapostolu Pawulu niamabwambu jindi ‘ayilekesheli kudi spiritu yajila kushimuna mazu muAsiya’; nawa hiyayitejeli kuya kuBitiniyaku. Hitweluka jiika spiritu chiyayikañesheli hakwila nawu abuli kuya kunawa maluñaku, ilaña tweluka chikupu netu spiritu yamulombweli Pawulu kuya kwiluña deneni dakuEurope. Muchimwenu wamweni iyala wakuMasidoniya wadiña nakumulembelela nindi yamukwashi.—Yil. 16:6-10.

¹² Makonu, spiritu yaYehova yinakulombola mudimu wakushimwina mukaayi kejima. Kwosi yimwenu yachihayamisha yinakulombola iwu mudimu, ilaña, Yehova nakulombola awayishewa kuhitila mudi spiritu yajila. Nawa spiritu yasañumunaña amana kwetu niahela kudikita nankashi mumudimu wakushimwina nikutañisha. Chakadi nikujina, anenu nawa mwazataña muniwu mudimu walema. Komana kwila muyilaku hambidi muniwu mudimu wawuwahi nehi?

13. Munateli kwovwahila ñahi wunlomboli waspiritu yajila? Lumbululenu.

¹³ Munateli kwovwahila wulomboli waspiritu yajila kuhitila mukuzatisha nsañu yaloñeshelañawu antu jaNzambi. Shinshikenu hadi muhela wakansi wejina daMihoko wakwituña daJapan. Hakwikala payiniya wamuha, wadimweneña nindi hanashikilumu kufuntila kudi antuku nawa watoñojokeli nindi heluka kuhosha nawantu amwekesheleña mpwilaku. Hayina mpinji, njila jajiwahi jakuhoshelamu mukwihihisha hakufuntila kudi muntu, ayilumbulwili muMudimu Wetu waWanta. Kwedikili cheñi buloshuwa yahoshaña nawu A Satisfying Life—How to Attain It. Iyi buloshuwa yazatikileña nankashi mwiluña dakuJapan. Mihoko wazatishili njila jashimunawu hakuzatisha iyi buloshuwa, sweje hakuhosha mukwihihisha hakufuntilaku kudi antu. Neyi mukulabula kwadisu, Mihoko watachikili kudiza Bayibolu nawantu akaanineña kudiza hatachi. Wahosheli nindi: “Nekalili nawatudizi amavulu akushika ku 12 nawa mpinji yimu nalejeleña amakwawu nami anhembeli henohu kanda nitachiki kudiza nawu!” Eñañi, neyi mwenda chakuyendesha kudi spiritu, kuzatisha jinjila jalejañawu ambuña aYehova, munateli kwañwila heneni.

Shindamenenu haSpiritu yaNzambi

14, 15. (a) Komana antu abula kuwanina anatweshi kuhemba kudihana kwawu? (b) Munateli kukwata ñahi amabwambu amawahi?

¹⁴ Hakwikala mukwakukalakala watondewa, mukweti mudimu wumwatela kuzata.  (Rom. 10:14) Munateli kutoñojoka nenu himunashikilumu kuzata iwu mudimuku. Ilaña neyi chochatondañawu awayishewa, Nzambi diyi wayinkaña ñovu. (Tañenu 2 Akorinda 3:5.) Munateli kuhemba kudihana kwenu kuhitila mukudikita nankashi nikushindamena haspiritu yaNzambi.

¹⁵ Ilaña, hichekala chaswayi etu antu abula kuwanina kuhemba kudihana kwetu nikwikala ashinshika kudi Yehova Nzambi yetu wawaninaku. Chuma chimu chakala nankashi, antu amakwawu mwadikundili nawu anateli kuhayama hakumona munahimpi chihandilu chenu nawa anateli ‘kuyitena chatama.’ (1 Pet. 4:4) Ilaña, bayi mudiwula chikuma chakwila nenu munakwati wubwambu wawuha, walema nankashi naYehova niYesu Kristuku. (Tañenu Yakoba 2:21-23.) Cheñi chalema kwiluka amana kwetu niahela amuchipompelu chenu, niwena ‘hiyana kwetu’ amukaayi kejima. (1 Pet. 2:17; Yish. 17:17) Kuhitila muspiritu yindi Yehova wukuyikwasha kukwata amabwambu akuyikwashaña kwenda munjila yayiwahi.

16. Kufwana Pawulu, munateli ‘kutiya ñahi kuwaha nakuzeyazeya kwenu’?

¹⁶ Hela chakwila mukweti amabwambu ayikwashaña muchipompelu, hohamu chinateli kuyikalila kushinda kukala kumwamonaña ifuku nifuku. Kukala kumukuumikaña mpinji yikwawu kukuyileñelaña kutiya kutama, nawa mukutiyaña neyi kwiji munasendi chitelu chalema hamutu. Iyi diyi mpinji yimwatela kumulomba Yehova, yayinki spiritu yindi yajila. Kapostolu Pawulu wasonekeli nindi, “Muloña hinukuzeya, dihu hinukutiya ñovu.” (Tañenu 2 Akorinda 4:7-10; 12:10.) Pawulu welukili nindi spiritu yaNzambi yinateli kukolesha antu mukuzeyazeya kwawu hichikweti muloña nachidiwuku. Dichi, ñovu yaNzambi yazatikaña yinateli kuyikolesha neyi munazeyi nawa munakukeña wukwashu. Pawulu wasonekeli nindi, “nukukumina dakutiya kuwaha nakuzeyazeya.” Hampinji yazeyeleñayi, spiritu yajila dihu hiyamukolesheleña. Ninenu nawa yinateli kuyikolesha!—Rom. 15:13.

17. Indi spiritu yajila yikuyikwasha ñahi kushika kwiluña kumunakuya?

¹⁷ Hakwila nawu tuhembi kudihana kwetu tunakukeña spiritu yaNzambi yitulomboleña. Desekejenu neyi mudi akwakuvuwa watu. Chikonkwanyi chenu chidi chakumukalakela Yehova haya nyaka. Spiritu yajila yidi neyi kwiluka kunakutalisha mpepela kulonda yiyikwashi kushika chiwahi kwiluña kumunakuya. Himunakukeña nenu ayihuñumuni kudi spiritu yamukaayi kaSatanaku. (1 Kor. 2:12) Mwatela kwiluka mpepela yayiwahi kulonda yiyikwashi. Mpepela yeniyi diyi spiritu yajila. Kuhitila Mwizu daNzambi nimukuloñesha kwindi kwalombolewaña naspiritu, spiritu yajila yikuyilombolaña munjila yaloña.

18. Chumanyi chimunafuukuluhu, nawa muloñadi?

¹⁸ Neyi mwadizaña nawaYinsahu jaYehova, nikudiluñisha kudikunda nawu muyuma yakuspiritu, ilaña nihanu kanda mutonduhu njila yalema yakudihana nikupapatishewa, dihulenu nenu, ‘Chumanyi chinakunkañesha?’ Neyi muneluki mudimu wunakuzata spiritu yajila hakukalakala mudimu waYehova makonu nawa munakuhameka chiyalombolaña, komana ilukenu nenu yuma yimunadizi yalala. Yehova wukuyikiswila nankashi. Wukuyinka chikupu spiritu yindi yajila. Neyi ayipapatishili dehi kuyaaka yakunyima, chakadi nikujina munamoni spiritu yajila chiyayilombolaña. Munamoni nikwiluka chatela kuyikoleshayi Nzambi naspiritu yindi. Eñañi, nateli kutwalekahu kuyikwasha haya nyaka. Dichi, fuukulenuhu kutwalekahu kwendaña chakuyendesha kudi spiritu yajila.

Munakwanuka?

• Indi ‘kwenda chakutwendesha kudi spiritu’ kwalumbulukadi?

• Chumanyi chatela kuyikwasha ‘kwendaña chakuyendesha kudi spiritu’?

• Munateli kuhemba ñahi kudihana kwenu?

[Malwihu aKuzatisha haKudiza]

[Mwevulu wudi hefu 15]

Chakeñekaña kuzata nañovu hakwila nawu muwahishi muchima wenu

[Nyevulu yidi hefu 16, 17]

Komana mwalombolewaña naspiritu yaNzambi?