Kupapatishewa Mwijina daTata nidaMwana nidaSpiritu Yajila

‘Dichi yenu mwakelishi atumbanji . . . , mwakayipapatishi mwijina daTata, nidaMwana, nidaspiritu yajila.’—MAT. 28:19.

1, 2. (a) Chumanyi chazatikili muYerusalema haPentekosta 33 C.E.? (b) Chumanyi chakojejeli antu amavulu mwizaza apapatishewi?

 MUYERUSALEMA mwenzeli antu amavulu afumini kumatuña amavulu. Hefuku daPentekosta 33 C.E., kwadiñi chawija chalema nawa kwahwilili enyi amavulu. Ilaña kwamwekeni chuma chakuhayamisha, hanyima yakwila kapostolu Petulu nahani mpanji yashikili antu hanyichima nawa mwafumini yuma yayiwahi. A Yudeya niantu abalumukili kwikala aYudeya akushika ku 3,000 ahizumukili namazu akapostolu Petulu chakwila abalumukili munyichima nakupapatishewa mumenji. Dichi, ayibombeleli kuchipompelu chachiha chawakwaKristu. (Yil. 2:41) Hamuloña wawantu amavulu apapatishileñawu mumajiya amuYerusalema, atela aleñeleli ipumba.

² Chumanyi chaleñeleli antu amavulu apapatishewi? Hefuku denidi ‘mwiwulu mwafumini lushindu ludi neyi lwampepela yinakukunka nañovu yasweja nankashi.’ Mwitala dahewulu, atumbanji twaYesu akushika ku 120 enzeli naspiritu yajila. Nkumininaku amayala niambanda akalemesha apompeli hamu nawa ahayamini hakutiya atumbanji wenawa ‘anakuhosha madimi acheñi.’ Chatiyiluwu yuma yahosheliyi Petulu nimazu alumbulwiliyi kutalisha hakufwa kwaYesu, antu amavulu “alemana nimunyichima yawu.” Chumanyi chadi kwilawu? Petulu waakwili nindi: ‘Balumukenu munyichima yenu, ayipapatishi wejima wenu mwijina daYesu Kristu . . . , mutambuli chamukunkulu chaspiritu yajila.’—Yil. 2:1-4, 36-38.

3. Hefuku daPentekosta, chumanyi chakeñekeleña kwilawu aYudeya abalumukili munyichima niantu abalumukili nakwikala aYudeya?

 ³ Toñojokenu chatiyiluwu aYudeya niantu abalumukili kwikala aYudeya kutalisha hansakililu chatiyiluwu mazu ahosheliyi Petulu. Adiña amwiteja dehi Yehova nawu hiNzambi yawu. Nawa kuhitila mukuzatisha Nyikanda yachiHeberu, elukili chekala spiritu yajila, ñovu yaNzambi yazatishiliyi hakuleña yuma nawa yazatishañayi hayinu mpinji. (Kutach. 1:2; Ansomp. 14:5, 6; 1 Sam. 10:6; Mas. 33:6) Akeñekeleña kwiluka yuma yikwawu. Chadiñi chalema kwiluka nikwiteja njila yakapulwishilamu Nzambi antu kuhitila mudi Yesu, Mesiya. Dichi Petulu wahosheli nindi akeñekeleña ‘kuyipapatisha. . . . mwijina daYesu Kristu.’ Henohu chipapatishu kanda, Yesu wasañukili walejeli Petulu niantu amakwawu kupapatisha antu ‘mwijina daTata, nidaMwana, nidaspiritu yajila.’ (Mat. 28:19, 20) Chumichi chadiñi chalema muyaaka nkulakaji yakusambila, nawa chichidi chalema nimakonu. Chumanyi chenichi?

Kupapatishewa Mwijina daTata

4. Chumanyi chahimpikili kutalisha hadi antu adikwatili wubwambu naYehova?

⁴ Neyi chitunadizi, antu atiyilili kumpanji yaheniyi Petulu adifukwileña kudi Yehova nawa kumafuku akunyima adiñi nawubwambu wawuwahi nayena. Afwilileña kulondela Nshimbi yaYehova, diyaletesheli antu akumatuña acheñi enzi kuYerusalema. (Yil. 2:5-11) Hela chochu, kudi chuma chalema chahimpiliyi Nzambi kutalisha hanzatilu yindi nawantu. Wayikaanini aYudeya hamu neyi muza wambukaku; nawa kuhemba Nshimbi hiyadiña njila yakutambwilamu wuselewa waNzambi cheñuku. (Mat. 21:43; Kol. 2:14) Dichi, ana antu adiña nakutiyilila, neyi akeñeleña kutwalekahu nawubwambu wawu naYehova, kudi chuma chacheñi chateleleli kwilawu.

5, 6. Chumanyi cheliluwu aYudeya amuyaaka nkulakaji yakusambila niantu abalumukili kwikala aYudeya hakwila nawu ekali amabwambu jaNzambi?

⁵ Chakadi nikujina, ateleli kufunta kudi Yehova Wayinkeli Wumi. (Yil. 4:24) Nawa antu etejeli yuma yalumbulwiliyi Petulu, hiyatwesheli kumwiluka chikupu Yehova neyi hiTata yawu wukweti luwuku. Watemesheli Mesiya kulonda kuyikuula nawa wafwilileña kwanakena antu ateneniyi Petulu nindi: ‘Enu akwamutaña waIsarela ejima, ilukenu kwenu chalala, iwu Yesu mwapopeleli hamutondu wakuyandishila, Nzambi namubalumuni dehi kwikala niMwanta diyi, niKristu diyi.’ Kafwampi, antu alondeleli mazu ahosheliyi Petulu chayileñeleli kuhameka nankashi yuma yayikoñeleli Tata yawu kudi antu ejima akeñeleña kwikala amabwambu jaNzambi.—Tañenu Yililu 2:30-36.

⁶ Chakadi nikujina, aYudeya wenawa niantu abalumukili kwikala aYudeya elukili nawu wubwambu wawu naYehova washindameneni hakumwiluka nawu diyi Mukwakwamwina kuhitila mudi Yesu. Ichi munateli kwiluka chuma chaleñeleli abalumuki munyichima nikuleka nshidi, kubombelahu ninshidi jakoñeluwu hakujaha Yesu chili elukili chili nehi. Nawa chelukewa chikupu nawu mumafuku alondeleluhu ‘akakeleli mbe mukuleja kwawapostolu.’ (Yil. 2:42) Atwesheli nawa akeñeleña ‘kukundama kwakwihi netanda daluwi chakadi woma.’—Heb. 4:16.

7. Indi antu amavulu makonu anahimpi ñahi yitoñojoka yawu kutalisha hadi Nzambi nikupapatishewa mwijina daTata?

⁷ Makonu, yihita yawantu afuma kuyisemwa yashiyashana anadizi chalala hadi Yehova kufuma muBayibolu. (Isa. 2:2, 3) Antu amakwawu hiyakuhweleleli mudi Nzambuku, nawa amakwawu akuhweleleli nawu Nzambi wekala kwoku ilaña atoñojokeleña nawu Nzambi hakamenaña yileñaleña yinduku, ilaña elukili chikupu nawu Nleñi wekala kwoku watela kudikwatanindi wubwambu. Antu amakwawu adiña nakudifukula kudi anzambi asatu hela ankishi ashiyashana. Adizili nawu Yehova kankawindi diyi Nzambi wañovu jejima, nawa amutenaña hejina dindi. Chumichi chinesekani nachahosheliyi Yesu nindi atumbanji twindi atela kupapatishewa mwijina daTata.

8. Indi antu abulili kwiluka nshidi yaAdama ateleleli kwiluka chumanyi hadi Tata?

⁸ Anadizi cheñi nawu aswana nshidi kufuma kudi Adama. (Rom. 5:12) Chalala chenichi chinadizuwu chachiha kudi wena. Antu amuchidiwu  anateli kuyifwanisha kudi iyala wakata wabulili kwiluka chikatu chakatileñayi. Hadaha watiyileña yinjikijilu yachikatu, chidi neyi kukatakata. Hela chochu, hakubula kwiluka chikatu chakatileñayi, watela watoñojokeleña nindi wadiña wakola. Ilaña, yuma yahimpikili. (Esekejenu 1 Akorinda 4:4.) Chumanyi chadi kwilayi neyi welukili chikatu chakatileñayi? Komana hadi kukeñakeña nikwiteja kumuuka nayitumbu yetejawuku? Chochimu, hanyima yakwiluka chalala kutalisha hanshidi yitwaswana, antu amavulu aneteji “kuyuuka” kuhitila mukuzatisha Bayibolu nawa aneteji chikupu nawu Nzambi “nakuuka” nyisoñu yanshidi yitwaswana. Mwalala, antu ejima abula kudikunda naTata atela kwinza kudi Yena watela “kuyuuka.”—Efwes. 4:17-19.

9. Chumanyi cheliliyi Yehova kulonda tutweshi kwikala nawubwambu wawuwahi nayena?

⁹ Neyi mwadihana dehi kudi Yehova Nzambi nawa munekali mukwaKristu wapapatishewa, muneluki chichawahila kukwata wubwambu naYehova Nzambi. Ichi muneluki chikupu nenu Yehova hiTata yenu wamuwahi. (Tañenu Aroma 5:8.) Hela chakwila Adama naEvu avulumwini, Nzambi waweni njila kulonda anyana kaAdama naEvu, kushilahu ninetu, tutweshi kwikala nawubwambu wawuwahi nayena. Hakwila mwenimu, Nzambi watiyili kukata hakumona Mwanindi wakeñayi nakukabakana kushika nikukufwa. Komana kwiluka chumichi hikwatukwashaña kwiteja wunlomboli waNzambi nikwovwahila nshimbi jindi chakufuma hamuchima nehi? Neyi kanda mwili mwenimu kudi yuma yatela kuyileñela mudihani kudi Nzambi nikupapatishewa.

Kupapatishewa Mwijina daMwana

10, 11. (a) Munjilanyi mumwamuhamekelaña Yesu? (b) Mwatiyaña ñahi hakufwa kwaYesu hamu neyi ifutu danyiloña?

¹⁰ Toñojokenu cheñi hamazu ahosheliyi Petulu kwizaza. Wakonkomweneni hakumwiteja Yesu, kwendelaña hamu nakupapatishewa ‘mwijina . . . daMwana.’ Muloñadi chumichi chichalemeneni kumafuku akunyima nimakonu? Dichi, kumwiteja Yesu nikupapatishewa mwijina dindi kwalumbuluka kwiluka mudimu wazatañayi kutalisha hawubwambu wetu naNleñi yetu. Yesu amukudikilili hamutondu wakuyandishila kulonda kufumishahu kushiña kwaNshimbi kudi aYudeya, hela chochu, kufwa kwindi kwaleteli kukooleka kweneni. (Ŋal. 3:13) Waheni mulambu wefutu danyiloña dakeñekeleña kudi muchidi wamuntu. (Efwes. 2:15, 16; Kol. 1:20; 1 Yow. 2:1, 2) Hakwila nawu yuma yeniyi yizatiki, Yesu womikili kutama, kasawuntu, kuyandishewa, nkumininaku wafwili. Komana mwahamekaña chikupu hamulambu windi? Difwikijenu neyi mudi kansi weyala wukweti yaaka yakusemuka 12 wudi halwendu mumbopolu yateneneñawu nawu Titanic, yadihumini mwilola damayimakanza nakujiya muchaaka cha 1912. Mweseka kukandama muwatu wakupulukilamu, ilaña munenzali antu. Dichi iyala wumu wudi muwatu weniwu yamufufwa iñodindi, yofuma nimuwatu nakufunta cheñi mumbopolu, nakuyinyamuna nakuyisha muwatu wakupulukilamu. Munateli kutiya ñahi? Chakadi nikujina mukumusakilila hama. Munateli kwiluka chatiyiliyi kansi weyala wumu wahitili muniku kukala. * Hela chochu, Yesu wayikoñeleli yuma yayivulu. Wafwili kulonda mwakaheti wumi wahaya nyaka.

¹¹ Mwatiyili ñahi chimwadizili hayuma yayikoñeleliyi Mwana kaNzambi? (Tañenu 2 Akorinda 5:14, 15.) Mwatela mwahamekeli hama. Chumichi chayileñeleli kudihana kudi Nzambi ‘nakubula kudihandila cheñi enu aweni, ilaña kumuhandila yena wayifwilili.’ Kupapatishewa mwijina daMwana kwalumbuluka kwiluka yuma yayikoñelayi Yesu nikwiteja kuyilombola hamu neyi “Mwiniwumi.” (Yil. 3:15; 5:31) Kumpinji yakunyima, hela chakwila mwadiñi nachikuhwelelu henohu kanda mudikwati wubwambu naNleñi, chikuhwelelu chenu hichadiñi chalalaku. Ilaña, kuhitila mukukuhwelela mumashi aYesu Kristu apwekeli nikupapatishewa, ichi munadikwati wubwambu naTata. (Efwes. 2:12, 13) Kapostolu Pawulu wasonekeli nindi: “Ninenu hamwaka mwadiñi aambuka naNzambi, mwadiñi ayilumbu munyichima yenu, munyidimu yenu yatama; ilaña katataka [Nzambi] nayikundamishi dehi mumujimba [waYesu] waheseki nakufwa kwindi, kulonda akayimiki kumesu indi nakujila, nakubula himwatamina.”—Kol. 1:21, 22.

12, 13. (a) Kupapatishewa mwijina daMwana kunateli kuyileñela kwiladi neyi chakwila anayivulumuni kudi muntu? (b) Hakwikala mukwaKristu wapapatishewa mwijina daYesu, mudimwinyi wumukweti?

 ¹² Hela chakwila mwapapatishili mwijina daMwana, mweluka chikupu yiluwa yenu. Neyi mwilukaña yiluwa yenu, chakwashanaña mafuku ejima. Chakutalilahu, neyi muntu nayivulumuni, komana mwanukaña nenu wejima wenu mwekala akwanshidi? Wejima wenu mwakeñaña kuyanakena, kudi Nzambi, nawa ninenu mwatela kwanakena akwenu. (Maku 11:25) Hakukonkomwena hanichi chuma Yesu waheni chakutalilahu: Nkaka yanduñu wamwanakeneni nduñu yindi mukudi wamakombakaji antalenta ikumi (mali akushika ku 60 miliyoni). Kuhiñahu, nduñu yeniwu hamwanakeneni mukwawu nduñu wadiñi namukudi windi wakushika kunkulakaji yamaluku. Yesu walumbulwili ichi chikuma nindi: Yehova hanakenaña muntu wabulaña kwanakena mana kwinduku. (Mat. 18:23-35) Mwamweni, kupapatishewa mwijina daMwana kwalumbuluka kwiteja kulombolewa naYesu nikufwila kwimbujola chakutalilahu chindi nintañishilu yindi, kubombelahu nichakutalilahu chindi chakukeña kwanakena antu.—1 Pet. 2:21; 1 Yow. 2:6.

¹³ Hakwikala antu abula kuwanina, himunateli kumwimbujola Yesu chikupuku. Hela chochu, hamuloña wakudihana kudi Nzambi namuchima wejima, mwafwilaña kumwimbujola Yesu hakumina ñovu jenu. Chumichi chabombelamu kutwalekahu kuzata nañovu kulonda kuvuula muntu wamukulu nakuvwala muntu wamuha. (Tañenu Aefwesesa 4:20-24.) Neyi ibwambu denu mwamulemesha, chakadi nikujina mwafwilaña kudizila kuchakutalilahu chindi niyililu yindi yayiwahi. Chochimu, mwakeñaña kudizila kudi Kristu nikumwimbujola.

14. Munateli kumwekesha ñahi nenu mweteja kulombolewa naYesu hamu neyi Mwanta wamwiwulu?

¹⁴ Kudi njila yikwawu mumunateli kumwekeshela chalumbuluka kupapatishewa mwijina daMwana. Nzambi “wamwovwahishila dehi [Yesu] yuma yejima nakuyisha kwishina danyendu yindi; wamukunjika dehi kwikala mutu wahewulu dayuma yejima kuchipompelu.” (Efwes. 1:22) Dichi, mwatela kulemesha njila yalombwelañamu Yesu antu adihana kudi Yehova. Kristu nakuzatisha antu abula kuwanina muyipompelu, akulumpi alombolewaña naspiritu, aeluda. Amayala wenawa ayitonda “kulonda kukolesha akwakujila, . . . atuñi chachiwahi mujimba waKristu.” (Efwes. 4:11, 12) Hela chakwila muntu wabula kuwanina yakoña chiluwa, Yesu wekala Mwanta waWanta wamwiwulu wakamanisha kukala munjila yayiwahi nawa hampinji yatelela. Komana mwakuhwelela mwenimu?

15. Neyi kanda ayipapatishi, nkiswinyi yimwatela kutalila hanyima yakupapatishewa?

¹⁵ Cheñi, antu amakwawu kanda adihani kudi Yehova nikupapatishewa. Neyi muchidi kanda mudihani, komana yuma yitunadizi, yinayileñeli kumona nenu kwiluka Mwana kaNzambi dichuma chalema nawa chimwatela kuhameka? Kupapatishewa mwijina daMwana kunateli kuyileñela mukatambwili nkisu jajivulu.—Tañenu Yowanu 10:9-11.

Kupapatishewa Mwijina daSpiritu Yajila

16, 17. Indi kupapatishewa mwijina daspiritu yajila kwalumbulukadi kudenu?

¹⁶ Indi kupapatishewa mwijina daspiritu yajila kwalumbulukadi? Neyi chitunadizi, antu atiyileña chahosheleñayi Petulu hefuku daPentekosta elukili kutalisha hadi spiritu yajila. Dichi, amweni wunsahu wamwekesheli nawu Nzambi watwalekeluhu kuzatisha spiritu yajila. Petulu wadiñi hakachi kawantu ‘enzeli naspiritu yajila,  nakutachika kuhosha madimi acheñi.’ (Yil. 2:4, 8) Nhoshelu yakwila nawu ‘mwijina da’ hiyatalisha kwijina damuntuku. Makonu, yuma yayivulu ayikoñaña kuhitila mukuzatisha “ijina danfulumendi,” nfulumendi yeniyi hiyekala muntuku. Ayikoñaña kuhitila mukuzatisha ñovu janfulumendi. Chochimu, muntu wunapapatishewi mwijina daspiritu yajila, welukaña nindi spiritu yajila hiyekala muntuku, ilaña hiñovu jaYehova jazatikaña. Nawa kupapatishewa muniyi njila kwalumbuluka nawu muntu wunapapatishewi neteji mudimu wazataña spiritu yajila muyuma yakeñañayi Nzambi.

¹⁷ Komana kudiza Bayibolu hikunayileñeli kwiluka chekala spiritu yajilaku? Chakutalilahu, muneluki nenu Bayibolu ayisonekeli kuhitila mukuzatisha spiritu yajila. (2 Tim. 3:16) Chimwayilileñaku hambidi kuspiritu, mwatela mwatachikili kwiluka walala wakwila nawu ‘Tata yetu wamwiwulu wayinkaña owu amulombaña spiritu yajila,’ kushilahu ninenu. (Luka 11:13) Hadaha, mwamonahu dehi spiritu yajila chiyayikwashaña muchihandilu chenu. Munjila yikwawu, neyi munakukeña kupapatishewa mwijina daspiritu yajila, kukana kwaYesu kwakwila nindi Tata wenkaña spiritu yajila, kwatalisha mukwila nawu mwakekala nankisu jajivulu neyi mutambwila spiritu yeniyi.

18. Nkiswinyi jadiluñishañawu antu apapatishewaña mwijina daspiritu yajila?

¹⁸ Nimakonu chamwekana hatooka nawu, Yehova walombolaña chipompelu chawakwaKristu kuhitila mudi spiritu yindi. Spiritu yeniyi yatukwashaña ninetu munyidimu yitwazataña mafuku ejima hamuntu hamuntu. Kupapatishewa mwijina daspiritu yajila kwalumbuluka kwiteja mudimu wazataña spiritu yajila muchihandilu chetu nikulondela muyinakutulombola. Hela chochu, antu amakwawu anateli kudihula chatela kukalakalawu kwesekeja nakudihana kwawu kudi Yehova nichinateli kuyikwashawu kudi spiritu yajila. Twakahanjeka hansañu yeniyi muchibaaba chinalondeluhu.

[Tumazu twaheshina]

Munakwanuka?

• Kupapatishewa mwijina daTata kwabombelamu yumanyi?

• Indi kupapatishewa mwijina daMwana kwalumbulukadi?

• Munateli kumwekesha ñahi nenu mwahamekaña kulema kwakupapatishewa mwijina daTata nidaMwana?

• Indi kupapatishewa mwijina daspiritu yajila kwalumbulukadi?

[Malwihu aKuzatisha haKudiza]

[Nyevulu yidi hefu 10]

Hanyima yaPentekosta 33 C.E., atumbanji amaha adikwatili wubwambu wamuchidinyi naTata?

[Mazu aKusakilila]

Yerusalema, kuhitila mukulomba lusesa lweTala diyahembelañamu yuma yakushankulu.