Kutwalekahu Kwikala Muluwi lwaNzambi Neyi Chihandilu Chihimpika

KOMANA chihandilu chenu chinakuhimpika? Komana chinakuyikalila kushakama kwesekeja nachihandilu chinahimpiki? Etu amavulu twamonaña hela twakamona kukala kwamuchidiwu. Yakutalilahu yachihandilu chawantu akunyima yinateli kutukwasha kwiluka yililu yitwatela kwikala nayu.

Chakutalilahu, toñojokenu hadi Davidi nichomikiliyi nayuma yahimpikili muchihandilu chindi. Hampinji Samweli yamuwayishiliyi Davidi kulonda yakekali mwanta mafuku akumbidi, wachidiña mukwenzi nawa wadiña kabiña. Hadiñayi kansi, wadihanini kulwa nachilobu chawaFwilistinu Goliyati. (1 Sam. 17:26-32, 42) Mukwenzi Davidi amutambikili kushakama muchipañu chajila chaMwanta Sawulu nawa amutondeli kwikala mukulumpi wawamashidika. Davidi hatoñojokeli nindi chihandilu chindi chakahimpikaku; hela kukuhwelela nindi kudi chuma chakamumwekenaku.

Wubwambu waDavidi naSawulu watamini chikupu. (1 Sam. 18:8, 9; 19:9, 10) Hakwila nawu yapulwishi wumi windi, Davidi wadiña nakushakama chihandilu chakulumbwañila hohu hadi yaaka yayivulu. Hela tuhu hampinji yayulileñayi neyi mwanta muIsarela, chihandilu chindi chahimpikili neyi mukulabula kwadisu, sweje-e hampinji yeliliyi wuvumbi nikukeña kubuta hanshidi jindi kuhitila mukujahana. Dichi waleteli kukala muchisaka chindi hamuloña wanshidi yakoñeliyi. Chakutalilahu, Davidi wamweni ikezeñi hamuloña wamwanindi Abisalomi wadikañili. (2 Sam. 12:10-12; 15:1-14) Hela chochu, chelili Davidi yabalumuki mumuchima hanshidi yakoñeliyi yawuvumbi niyakujahana, Yehova wamwanakeneni nawa Davidi wekalili cheñi nawubwambu wawuwahi naNzambi.

Anenu nawa chihandilu chenu chinateli kuhimpika. Kankati, kukala kwamali, hela kubula kutiyañana muchisaka hela tuhu munzatilu yetu, yumiyi yahimpaña chihandilu chetu. Yililwinyi yitwatela kwikala nayu yikutukwasha kuumika kukala kwamuchidiwu?

 Kudizoza Kwatukwashaña

Kudizoza kwabombelamu kwikala ovwahila. Kudizoza kukutuleñela kudimona neyi chochitwekala nikumona akwetu neyi chochiyekalawu. Kuhitila mukulemesha yililu yawantu amakwawu niyuma yakoñañawu, chikutuleñela kuyilemesha nikulemesha yuma yazatañawu. Chochimu, kudizoza kunateli kutukwasha kulonda kwiluka muloña wunaleñeli yuma yitumwekeni nichitwatela kwila.

Jonatani mwana kaSawulu wemikili chakutalilahu chachiwahi. Chihandilu chindi chahimpikili kuhitila muyuma yamumwekeneni yabadikili hañovu jindi. Hampinji yamulejiluwu Sawulu kudi Samweli nindi Yehova nakutambuli wanta, hahosheli nindi Jonatani diyi wakekala mwantaku. (1 Sam. 15:28; 16:1, 12, 13) Nzambi chatondeliyi Davidi kwikala mwanta wawaIsarela habombelelumu Jonataniku. Munjila yikwawu, kudikaña kwaSawulu kwamuleteleli Jonatani kukala. Hela chakwila Jonatani hakwatiluhu chikasa hayuma yakoñeliyi Sawuluku, hamuswanini tata yinduku. (1 Sam. 20:30, 31) Indi Jonatani welili ñahi naniku kukala? Komana wahilili hamuloña wakunatila mumenji iku kukooleka, nikumutiyila Davidi ichima? Nehi. Hela chakwila wadiña mukulumpi nawa welukili yuma yayivulu, Jonatani wamukwashili Davidi nankashi. (1 Sam. 23:16-18) Kudizoza kwamuleñeleli kwiluka muntu wakiswililuwu kudi Nzambi, nawa ‘haditoñojokeli kulema kwakubadika mwatelela kutoñojokaku.’ (Rom. 12:3) Jonatani welukili yuma yakeñeliyi Yehova nindi yakoñi nawa wetejeli kufuukula Kwindi haniyi nsañu.

Hela chochu, kuhimpika kwakuvulu kwaletaña kukala kwamboka-mboka. Hampinji yimu Jonatani wadikundili nawamayala ayedi adiña hamu nayena. Wumu wadiña Davidi, ibwambu dindi, mwanta wawaIsarela wakumbidi, atondeluwu kudi Yehova. Mukwawu wadiña Sawulu, tata yindi, akaaninuwu kudi Yehova hela chakwila wachidiña mwanta. Iku kukala kwatela kwamuleñeleli Jonatani kwakamena nankashi hela chakwila wakeñeleña kwikala mukukeña kwaYehova. Kuhimpika kukwawu kunateli kutuleñela kwakamena chikupu. Ilaña neyi twiluka yuma yakeñañayi Yehova, tukutwalekahu kumukalakela nakashinshi hela chakwila kudi yuma yikuhimpika.

Chichalemena Kwiluka Mwakukumina

Muntu wadizoza hohu hanateli kwiluka mwakukuminaku.

Davidi wadiña wadizoza. Hela chakwila Yehova wamutondeli kwikala mwanta, hadi yaaka yayivulu Davidi hatwesheli kutambula itanda dawantaku. Bayibolu hiyashimuna nawu Davidi amulejeli kudi Yehova chuma chaleñeleli yabuli kuswana wanta swayiku. Hela chakwila kwamwekeni yuma yamuchidiwu yamuhilishili, hiyamuluwañesheluku. Welukili mwatela kukuminayi, nawa welukili nindi Yehova waleñeleli yuma yejimiyi kumwekana, diyi wadiña nakulombola yuma yejima. Hakwila nawu yapulwishi wumi windi, Davidi hamujahili Sawuluku, nawa wamulekesheli ibwambu dindi Abishayi kumujaha.—1 Sam. 26:6-9.

Mpinji yikwawu, kudi yuma yinateli kumwekana muchipompelu chamwiluña detu yitunateli kubula kutiyisha hela yitunateli kumona  netu atela kuyikoña munjila yayiwahi. Komana mukudizoza tukwiluka netu Yesu diyi Mutu wachipompelu nawa watulombolaña kuhitila mudi aeluda atondawu? Komana tukumwekesha kudizoza, hakwiluka netu hakwila nawu twikali mukukeña kwaYehova, twatela kumuchiñeja kulonda yalomboli kuhitila mudi Yesu Kristu? Komana mukudizoza tukumuchiñejaña hela chakwila hichaswayuku?—Yish. 11:2.

Kwovwaha Kwatukwashaña Kuumika

Kwovwaha hikubula kwikala nandulu. Kwatuleñelaña kuumika kukala munjila yakuwunda, chakubula kuhilashana, ndulu, nikubula kuhemba nkunyi. Kwikala ovwaha chakala chikupu. Hela chochu, twatela kuzata nañovu kulonda kwikala nanichi chililu. Chamuzañalu, Bayibolu yahosha nawu “Ovwaha anakooleki, muloña akaswana mpata.” (Mat. 5:5) Kwovwaha chochimu nakudizoza, nawa kwabombelamu yililu yikwawu, yidi neyi kuwaha nikuwunda. Muntu wovwaha wetejaña kumudizisha nikumufumba nawa wakulilañaku kuspiritu.

Indi kwovwaha kwatukwashaña ñahi kuumika neyi chihandilu chetu chihimpika? Chakadi nikujina muneluki nenu antu amavulu amonaña kuhimpika kwachihandilu neyi hiyuma yatama. Ilaña kunateli kutwinka kukooleka kwakutudizisha kudi Yehova. Chihandilu chaMosi chamwekeshaña chumichi.

Hampinji yadiñayi nayaaka 40, Mosi wadiña dehi nayililu yayiwahi. Washili maana kuyuma yakankililuwu antu jaNzambi nawa wamwekesheli spiritu yakudihana. (Heb. 11:24-26) Ilaña, henohu kanda amwinki mudimu kudi Yehova wakulombola aIsarela kufuma kuEjipitu, chihandilu chaMosi chahimpikili nawa chamuleñeleli kwikala wamwovu. Watemukili muEjipitu nawa wayili nakushakama mwituña daMidiyani hadi yaaka 40, nakutachika chihandilu chawukabiña. Chumanyi chafuminumu? Iku kuhimpika kwamuleñeleli kwikala muntu wamuwahi. (Kuch. 12:3) Wadizili kutwamijaku yuma yakuspiritu muchihandilu chindi.

Hakumwekesha chakutalilahu chakwovwaha kwaMosi, tushinshikenu chuma chamwekeni hampinji yahosheliyi Yehova nindi wakeñeleña kukaana muza wadikañili nikwila anyana kaMosi ekali muza wañovu. (Kuch. 14:11-20) Mosi walembeleleluku muza. Mazu ahosheliyi amwekeshaña nawu wadiña nakwakamena ijina daNzambi nichihandilu chawana kwindi, bayi neyi yuma yakeñeleñayi yomwenuku. Iwu mudimu wakwikala nlomboli yamuza nawa ihaku wakeñekeleña muntu wamwovu wudi neyi Mosi. Miriyami naAroni amutobeleli Mosi, ilaña Bayibolu yahoshaña nawu Mosi ‘wadiñi wamwovu nankashi kubadika amayala ejima.’ (Kuch. 12:1-3, 9-15) Chidi neyi hamuloña wakwovwaha Mosi wayanakeneni. Chumanyi chadi kumwekana neyi Mosi hadiña wamwovuku?

Mpinji yimu, spiritu yaYehova yashikeneni hadi amayala amu, nawa yayileñeleli atachiki kuprofweta. Yoshuwa, kalama kaMosi, watoñojokeli nindi aIsarela adiña nakuluwañesha. Ilaña Mosi, mukwovwaha wamweni nindi Yehova diyi  wayileñeleli atachiki kuprofweta nawa haneñeli hakumutambula wunlomboli winduku. (Kuch. 11:26-29) Neyi Mosi hadiña wamwovuku, komana wadi kwiteja iku kuhimpika kwaloñesheliyi Yehova?

Kwovwaha kwamukwashili Mosi kuzatisha chiwahi wunlomboli windi wabadika nimudimu wamwinkeluwu kudi Nzambi. Yehova wamulejeli nindi yayi kuMpidi yaHorebi nakwimana kumesu awantu. Nzambi wahosheli naMosi kuhitila mudi kañelu nawa wamutondeli kwikala ihaku wachitiyañenu. Kwovwaha kwamukwashili Mosi kwiteja iku kuhimpika kweneni kwawunlomboli nawa hampinji yoyimu hakoñeli chuma chidi chejima chadi kumuleñela kujimbesha wuselewa waNzambuku.

Chumanyi chitwatela kwila? Kwovwaha kwalema hakwila nawu muntu nimuntu yayiluku hambidi. Antu ejima enkawu nyidimu niwunlomboli wakutala antu jaNzambi atela kwikala amwovu. Kwovwaha kwatuleñelaña kudikehesha neyi chihandilu chetu chihimpika nawa kwatukwashaña kumanisha kukala munjila yayiwahi. Njila mutwamwenaña yuma yekala yalema. Komana tukwiteja neyi kuhimpika kumwekana? Tukumona kuhimpika neyi hinjila yakuyilaku hambidi? Hadaha kuhimpika kweniku kukwikala diyi njila yayiwahi yakwikalilamu nachililu chakwovwaha.

Kakavulu tukumonaña netu chihandilu chetu chinakuhimpika. Mpinji yikwawu chakalaña kwiluka chinakuhimpikila yuma. Kuzeya kwakumujimba nikwakama kunateli kutukañesha kumona yuma neyi chayimonañayi Yehova. Hela chochu, yililu yidi neyi kudizoza, nikwovwaha yikutukwasha kwiteja kuhimpika kwachihandilu nikutwalekahu kushakama muluwi lwaNzambi.

[Mazu ekoku adi hefu 4]

Kudizoza chikupu kwatukwashaña kwiluka chitwekala

[Mazu ekoku adi hefu 5]

Kwovwaha kwalema hakwila nawu tuyiluku hambidi

[Mwevulu wudi hefu 5]

Mosi wamweni kukala kwamuleñeleli kwikala wamwovu