Maku—‘Wakalakeli Chikupu Mudimu’

CHIPOMPELU chakuAntiyoki chadiña nakukala, ilaña ntadi yavulumukili hakachi kakapostolu Pawulu naBaranaba yakundamini kunsañu yacheñi. Amayala wenawa atoñojokeleña kukasa lwendu lwawumishonali; ilaña hampinji yatondeleñawu muntu wateleleli kuyanawu, kwavulumukili ‘ntadi yayeni’ hakachi kawu. (Yil. 15:39) Amayala wenawa ambokelelumu, iwu nakuya njila yindi, iwu nakuya njila yindi. Ntadi yawu yafumini hadi kamishonali wamuchisatu—Maku.

Indi Maku wadiñanyi? Chumanyi chaletesheli apostolu ayedi kuditadikisha hadi yena? Muloñadi chaditadikishilileñawu? Komana ntadi yeniyi yamanini? Nawa chumanyi chimunateli kudizila kunsañu yaMaku?

Hetala Dawu muYerusalema

Maku, hadaha wafumini kuchisaka chaheta chawaYudeya, wakulilili muYerusalema. Nsañu yatachi yitwadizaña hadi Maku, yahosha hansañu yachipompelu chawakwaKristu akusambila. Kukamwihi  nachaaka cha 44 C.E., helili kañelu kaYehova muchihayamisha kamufumishi kapostolu Petulu mukaleya kaHerodi Agiripa I, Petulu wayili ‘kwitala daMariya, mama yaYowanu atumbiluwu ijina dikwawu daMaku, mwapompeleluwu antu amavulu nakulomba.’—Yil. 12:1-12. *

Chumichi chinakumwekesha nawu chipompelu chamuYerusalema chadiña nakupompela mwitala damama yaMaku. Mazu akwila nawu “antu amavulu” anakumwekesha nawu itala dawu dadiña deneni. Mariya wadiña nañamba yindi wamumbanda wejina daRoda, wayili nakumwenzulwilaku Petulu hadondomweneniyi “kuchenzelu chakuchipañu.” Nsañu yeniyi yinakumwekesha nawu Mariya wadiña samaheta. Nawa itala denidi aditeneni nawu itala dindi bayi nawu danfumwinduku, chumichi chinakumwekesha nawu watela wadiña ntuluwa nawa Maku wachidiña kansi.—Yil. 12:13.

Maku watela wadiña hakachi kawantu apompeli nakulomba. Watela wayilukili chikupu atumbanji twaYesu niantu amakwawu amweni yuma yamwekeni mumudimu waYesu namesu kapu. Kafwampi, Maku watela diyi wadiñi mukwenzi wadikumbakesheli ihina wesekeli kumulondela Yesu hamukwatiluwu katachi ilaña watemukili hampinji yeliluwu nawu amukwati.—Maku 14:51, 52.

Nyidimu Yakalakeleñayi muChipompelu

Chakadi nikujina, kudikunda nawakwaKristu apama kwamukwashili chikupu Maku. Wapamini kuspiritu chakwila amana kwetu alombweleña chipompelu amukomokeli. Kukamwihi nachaaka cha 46 C.E. hampinji Pawulu naBaranaba yahenuwu ‘wukwashu’ kufuma kuAntiyoki kushika nikuYerusalema kulonda kumanisha kukala kwenjili hamuloña wanzala, amukeñeli Maku. Hampinji Pawulu naBaranaba yafuntileñawu kuAntiyoki, amusendeli Maku.—Yil. 11:27-30; 12:25.

Muntu wunakutaña nsañu yeniyi chakubula kushaku kashinshi nateli kutoñojoka nindi hakachi kanawa antu asatu hihadiña wuntañaku, hela chakwila adiña amana kwamuntu akuspiritu, nawa wukumona nindi Pawulu naBaranaba azatileña hamu naMaku hamuloña wayililu yindi yayiwahi. Ilaña hakachi kanyikanda yasonekeliyi Pawulu, mukanda wumu wamwekeshaña nawu Maku wadiña musonya aBaranaba. (Kol. 4:10) Chumichi chinateli kutukwasha kulumbulula yuma yamumwekeneni Maku kumbidi.

Chimwahitili chaaka chimu hela kubadikahu, Pawulu naBaranaba ayilombweli kudi spiritu yajila kuya halwendu lwawumishonali. Afumini kuAntiyoki nakuya kuKipirosi. Yowanu Maku wayilinawu kulonda “ekali kansi kawu hela nkwashi yawu.” (Yil. 13:2-5) Hekwawu Maku wadiña nakuyikwashaku nyidimu halwendu kulonda apostolu ashi maana kunyidimu yakuspiritu.

Pawulu, Baranaba niMaku ayili kuKipirosi nakushimwina, kufumahu ayili kuAsia Minor. Kwituña denidi, Yowanu Maku wafuukwiluhu chuma chamuneñesheli Pawulu. Nsañu yeniyi yashimuna nawu izanvu dawantu chidashikili kuPerega, “Yowanu hakuyishiya, hakufunta  kuYerusalema.” (Yil. 13:13) Chuma chaleñeleli yayishiyi hiyachishimunaku.

Chimwahitili yaaka, Pawulu, Baranaba niMaku afuntili cheñi kuAntiyoki. Apostolu ahanjekeleña wena ayedi halwendu lwawu lwamuchiyedi lwawumishonali kulonda kuya nakuwahisha yuma yakalakeluwu halwendu lwatachi. Baranaba wakeñeleña nindi ayi hamu namusonyindi, ilaña Pawulu hakeñeleñaku, muloña Maku wayishili halwendu lwatachi. Dichuma chavulumwini kukala kwatenawu hakusambila. Baranaba wamusendeli Maku nakuya kwituña dawu kuKipirosi, hakwila Pawulu wayili kuSiriya. (Yil. 15:36-41) Mwamweni, Pawulu naBaranaba amweni chuma chafuukwiliyi Maku hakusambila munjila jashiyashana.

Kudanakena

Chakadi nikujina, Maku waneñeli hama hachuma chamwekeni. Hela chochu, watwalekeluhu kwikala mukwakukalakala washinshika. Chimwahitili yaaka hakachi ka 11 na 12 kufuma hambukiliyi naPawulu, Maku atachikili cheñi kumutena munsañu yanyaka yawakwaKristu akusambila. Kudihi? Hadaha kwiluña kudi kwejima kwadiñayi Pawulu.

Muchaaka cha 60-61 C.E., hadiñayi Pawulu mukaleya muRoma, watemesheli nyikanda yayivulu yekala hakachi kaNyikanda Yajila. Mumukanda wasonekeleliyi Akolose, wasonekeli nindi: ‘Arisitaka twekala nindi mukaleya, nayimushi; niMaku musonya aBaranaba; anayileji chimwakamwila, neyi wakashika kudenu mwakamutambuli . . . Diwu akalakalaña hamu nanami mudimu wawanta waNzambi wowenawa hohu, diwu amayala ankundejaña.’—Kol. 4:10, 11.

Maku wahimpili chikupu. Hela chakwila Maku wamuhilishili Pawulu, wekalili mukwakukalakalanindi wamuwahi. Dichi Pawulu walejeli Akolose nindi Maku wakayendela. Neyi chakwila wayendeleli, wadikwikala ñimenu yaPawulu.

Komana Pawulu wadiñi wakalisha chikupu naMaku kuyaaka yakunyima? Komana Maku wahetelelumu mukufumba kwamufumbiluwu? Tahindi hahetelelumuku? Chili dimu chili nehi, kudanakena kwawu kwamwekeshaña nawu Pawulu naMaku adiñi apama. Hiyanukili yuma yahita dehuku, nawa kwila mwenimu kwayikwashili kuzatila hamu cheñi. Ichi hichakutalilahu chachiwahi kudi muntu wudi wejima wabulaña kutiyañana namukwawu mukwaKristu.

Maku Mukwakwenda

Neyi mutaña nsañu yalwendu lwendeliyi Maku, mukwiluka nenu wendeli chikupu. Wafumini kuYerusalema, nakuya kuAntiyoki, nawa chafuminuku wayili kuKipirosi nikuPerega. Kufumahu wayili kuRoma. Hampinji yadiñayi muRoma, Pawulu wakeñeleña kumutemesha Maku kuKolose. Kudi maluña amakwawu kwayiliyi.

Kapostolu Petulu wasonekeli mukanda windi watachi kukamwihi nachaaka cha 62 nakushika mu 64 C.E. Wasonekeli nindi: ‘Iwu . . . wekala muBabiloni, nayimushi; nimwanami Maku nawa.’ (1 Pet. 5:13) Dichi, Maku wayili kuBabiloni kulonda kukalakala hamu nakapostolu wayileña kukupompa kwawakwaKristu kwapompeleleñawu mwitala damama yaMaku kuyaaka yakunyima.

Hampinji yamukasiluwu Pawulu mukaleya kamuchiyedi muRoma kukamwihi nachaaka cha 65 C.E., hasonekeliyi mukanda kulonda kumutambika Timotewu kufuma kuEfwesesa, wabombeleluhu nindi: “Inzaku naMaku.” (2 Tim.  4:11) Dikwila nawu hampinji yeniyi Maku wadiña muEfwesesa. Chakadi nikujina, Maku wetejeli kufunta kuRoma hamu naTimotewu, kwesekeja nachasonekeliyi Pawulu. Hayina mpinji, ñendelu yadiña yakala, ilaña Maku watwesheli kwenda.

Mudimu Wukwawu Wabadika Kulema

Mudimu wukwawu wabadika kulema wadiluñishiliyi Maku, wadiña wakumonena kudi Yehova kulonda kusoneka mukanda wumu waNsañu Yayiwahi. Hela chakwila Nsañu Yayiwahi yamuchiyedi hiyashimuna muntu wayisonekeluku, kwesekeja nachisemwa, iyi nsañu wayitiyilili kudi Petulu. Kafwampi, Petulu wadimweneni namesu kapu yuma yejima yasonekeliyi Maku.

Akwakusandujola haNsañu Yayiwahi yaMaku eluka nawu nsañu yeniyi wasonekeleli antañi akaMatuña; nawa walumbulwili jiika yililu yawaYudeya. (Maku 7:3; 14:12; 15:42) Maku wabalumwini mazu achiAramaic adiña akala kutiya kudi antu abulili kwikala aYudeya. (Maku 3:17; 5:41; 7:11, 34; 15:22, 34) Wazatishili mazu amavulu achiLatin nikulumbulula mazu achiGriki azatishileñawu antu nakuyibalumuna muchiLatin. Yuma yejimiyi yaditeja nachisemwa chakushankulu nawu Maku wasonekeleli Nsañu yindi Yayiwahi muRoma.

“Wankwashaña kuMudimu”

Maku hasonekeli hohu Nsañu Yayiwahi muRomaku, kudi yuma yikwawu yeliliyi. Anukenu mazu amulejeluwu Timotewu kudi Pawulu akwila nawu: “Inzaku naMaku.” Muloñadi Pawulu chatoñojokeleliyi mwenimu? “Muloña wankwashaña kumudimu.”—2 Tim. 4:11.

Iyi nsañu yahosha hadi Maku, kwesekeja nandonda diyi nsañu yayiha yalumbulula nankashi hadi yena. Mumudimu wakalakeleñayi muchipompelu, Maku hiyamutenahu nawu wadiñi kapostolu, nlomboli hela kaprofwetuku. Wadiña mukwakukalakala, dikwila nawu, wadiñi nakuhembelela nikukalakela antu. Haniyi mpinji, henohu Pawulu kanda yafwi, chakadi nikujina kapostolu waheteleli muwukwashu waMaku.

Neyi tushinshika hansañu yitunadizi hadi Maku, yinakumwekesha nawu wadiñi neyena dakutiyakesha nsañu yayiwahi mumatuña ashiyashana amukaayi, iyala wakeñeleña chikupu kukalakela antu. Chakadi nikujina, Maku wadiluñishili namudimu weniwu muloña watwalekeluhu kukalakala.

Kufwana Maku, hakwikala ambuña aNzambi, anetu nawa twafwilaña kushimwina nsañu yayiwahi yaWanta. Neyi cheliliyi Maku, etu amakwawu twayaña kumaluña acheñi hela kumatuña acheñi kulonda kutiyakesha nsañu yayiwahi. Etu amavulu hichinateli kwikala chapela kubuukila kwiluña dacheñuku, ilaña tunateli kumwimbujola Maku munjila yikwawu yalema. Neyi chakalakeliyi chikupu kulonda kukalakela amana kwindi akwaKristu, ninetu twafwilaña kukalakala nankashi kulonda kukwasha akwetu akakwitiya munjila jashiyashana kulonda kumukalakela Nzambi yawu. Hampinji yitunakukalakala mwenimu, twatela kwiluka chikupu netu twakatwalekahu kutambwila nkisu jaYehova.—Yish. 3:27; 10:22; Ŋal. 6:2.

[Tumazu twaheshina]

[Mapu/Mwevulu wudi hefu 8, 9]

(Neyi munakukeña kumona ntanjikilu yejima talenu mumukanda)

Iyi Diyi Nyisumba Yimu Yendeleliyi Maku

Roma

Efwesesa

Kolose

Perega

Antiyoki (wamuSiriya)

Kipirosi

KALUÑALWIJI KAMEDITERRANEAN

Yerusalema

Babiloni