Malwihu Kufuma Kudi Antañi

Komana mazu ekala haEzekeli 18:20, akwila nawu, “Mwana hakakoola kuluwa kwatata yinduku,” aditadikishaña namazu ekala haKwidika 20:5, ahosha nawu Yehova ‘washikijaña kuluwa kwawatata jawantu hadi anyanawu’?

Awa mazu hiyaditadikishañaku. Mukuku wamazu wumu washimunaña chikupu nawu muntu nimuntu wamba kalumbulula, nawa wukwawu wamwekeshaña nawu yuma yatama yafumaña muchiluwa chamuntu yinateli kusambukila nianyanindi.

Mazu ekala haEzekeli kapetulu 18 akonkomwenaña nawu muntu yomweni wamba kalumbulula. Vasi 4 yahosha nawu, “Yowu muntu wukuvulumuna diyi wakafwa.” Indi muntu “waloña wukwila yaya muwuñaji nakuloña”? “Yena wakahanda.” (Ezek. 18:5, 9) Dichi, neyi muntu nashiki dehi hachipimu chatela kufuukulahu yomweni, muntu nimuntu amusompeshaña “iwu mwelañayi iwu mwelañayi.”—Ezek. 18:30.

Chuma chazatikili kudi kaLevi wejina daKora chamwekeshaña chachiwahi mwatalisha ilu lushimbi. Hampinji yadiñawu aIsarela halwendu lwamwisaña, Kora watachikili kudiwula mudimu windi walema wamwinkeluwu kudi Yehova. Hamuloña wakukeña kujikilila mudimu windi wawupristu, Kora niantu amakwawu adikañili nawañimenu jaYehova, aMosi naAroni. Hamuloña  wakulotokela hamudimu wabulili kuyinkawu, Yehova wamujilumwini Kora niantu jindi ejima adikañili. (Kuch. 16:8-11, 31-33) Hela chochu, anyana kaKora hiyadikañiluku. Nzambi hayisompesheli hamuloña wanshidi yatata yawuku. Kashinshi kawu kudi Yehova kayileñeleli kupuluka.—Kuch. 26:10, 11.

Indi kusoñamisha kwekala haKwidika 20:5, lushimbi lwekala hakachi Kanshimbi Ikumi? Chochimu shinshikenu hamazu ekalahu. Yehova watachikili chitiyañenu chamuNshimbi namuza wawaIsarela. Chatiyiluwu mwatalishili chitiyañenu, aIsarela abidikili hatooka nawu: “Mwejima mwanahoshiyi Yehova tukwilamu.” (Kwid. 19:5-8) Dichi muza wonsu wekalili nawubwambu wawuwahi naYehova. Komana mazu ekala haKwidika 20:5 ayitalishili chikupu kumuza wejima.

Hampinji yatwalekeluhu aIsarela kwikala ashinshika kudi Yehova, muza wahetelelumu nawa awukiswilili nankashi. (Lev. 26:3-8) Dichamwekeneni muza waIsarela hampinji yamukaaninuwu Yehova nakutachika kudifukula kudi anzambi akutwamba, walekeli kuyikiswila nikuyikiña; nawa muza wamweni kalula. (Ansomp. 2:11-18) Ilaña, kwadiña amakwawu ahembeli kashinshi kawu nikuhemba nshimbi jaNzambi hela chakwila nyuza yakoñeleña yuma yomisha mbaña. (1 Anya. 19:14, 18) Antu ashinshika amweni kukala muloña wanshidi yakoñeleña nyuza, ilaña Yehova wayitiyilili luwi.

Chelili aIsarela asweji kufumpa nshimbi jaYehova nawu kulonda ijina dindi adisawuli kudi nyuza, Yehova wababesheli antu jindi kuhitila mukuyitwala muwunkoli muBabiloni. Hela chochu, Yehova wayibabesheli hamuntu hamuntu, nawa niantu jindi neyi izanvu. (Yere. 52:3-11, 27) Eñañi, Bayibolu yamwekeshaña nawu yiluwa yakoñeli muza waIsarela yaswejeli nankashi chakwila yasambukilili makiñu alondeleluhu asatu, hela awana hela tuhu kubadikahu, ejima wawu asambwili kuluwa kwawankakulula jawu neyi chochahosha Kwidika 20:5.

Mwizu daNzambi mwekala nsañu yahoshaña hayisaka yasambukilili yiluwa yawanvwali jawu. Kapristu Muneni wejina daEli wamuvulumwini Yehova kuhitila mukwiteja ‘anyanindi amukunkulwayi,’ adiña nayililu yatama kutwalekahu kwikala atupristu. (1 Sam. 2:12-16, 22-25) Hamuloña wakwila Eli walemesheli anyanindi awamayala kubadika Yehova, Nzambi wahosheli nindi chisaka chaEli himwamba kafuma cheñi kapristuku, chumichi chamwekeni kutachikila hadi mwizukulwindi Abiyatari. (1 Sam. 2:29-36; 1 Anya. 2:27) Nawa lushimbi lwekala haKwidika 20:5 alumwekesha kuhitila muchakutalilahu chaGehazi. Hamuloña wakukeña kuheta yuma yakumujimba, wazatishili chatama chifulu chindi chawukalama kaElisha hanyima yakuuka Mukulumpi wamashidika wakuSiriya wejina daNayamani. Kuhitila mudi Elisha Yehova washimwini wunsompeshi windi nindi: “Mbumba yaNayamani yikulamati eyi nianyaneyi haya nyaka.” (2 Anya. 5:20-27) Dichi anyana kaGehazi amweni kalula hamuloña wayiluwa yakoñeliyi.

Yehova, hakwikala Nleñi nawa Wahanaña Wumi, wukweti wuswa wakubabesha muntu munjila yatelela. Yakutalilahu yidi hewulu yinamwekeshi nawu anyana anateli kumona ihuñu hamuloña wanshidi yakoñeli nkakulula yawu. Hela chochu, Yehova ‘watiyaña kudila kwadilañawu anakabishuwu,’ nawa antu amulombaña namuchima wumu nateli kuyitiyila luwi nikuyikundeja.—Yoba 34:28.

[Mwevulu wudi hefu 29]

Kora niakwawu akwakudikaña ayibabesheli hamuloña wayililu yawu yatama