Mukanka Wumu niKabiña Wumu

‘Enu nawa munanlondami mwakashakama hamatanda awanta ikumi nayedi, nakusompesha nyuza yaIsarela ikumi nayiyedi.’—MAT. 19:28.

1. Yehova wadiña nawubwambu wamuchidinyi nawanyana kaAbarahama, nawa muloñadi chichinabulili kutalisha mukwila nawu waheleli chikupu antu amakwawu?

 YEHOVA wamukeñeli Abarahama, dichi Wamwekesheli kukeña kwalala kudi anyana kaAbarahama. Kubadika hayaaka nkulakaji 15, wamweni muza waIsarela, wafumini kuchikota chaAbarahama, neyi antu jindi atondewa, dikwila nawu “ambala ayena.” (Tañenu Kuhituluka 7:6.) Komana chamwekesheli nawu Yehova wadiwili chikupu antu akunyuza yacheñi? Inehi. Hayina mpinji, antu abulili kwikala aIsarela akeñeleña kudifukula kudi Yehova, ayitejeleña kudibombela kumuza windi watondewa. Awa antu abalumukili, ayimweneña nawu amuniwu muza. Ateleleli kuyimona neyi ana kwawu. (Lev. 19:33, 34) Nawa ateleleli kwovwahila nshimbi jaYehova jejima.—Lev. 24:22.

2. Mazwinyi akuhayamisha ahosheliyi Yesu, nawa lwihwinyi lutwatela kwihula?

² Hela chochu, Yesu wahosheli mazu akuhayamisha kudi aYudeya adiñaku munana mafuku nindi: “Wanta waNzambi akayamukawu, akawinka muza wakasoñaña nyikabu yawu.” (Mat. 21:43) Hiyanyi ekala muniwu muza wawuha, nawa iku kuhimpika kunatukumi ñahi makonu?

Muza Wawuha

3, 4. (a) Indi kapostolu Petulu wawilukili ñahi muza wawuha? (b) Anyi ekala muniwu muza wawuha?

³ Kapostolu Petulu welukili chikupu iwu muza wawuha. Wayisonekeleli akwawu akwaKristu awa mazu akwila nawu: “Hakwila enu mumuza watondewa, muwupristu wawanta, mumuchidi wajila, mumuza wambala waNzambi; kulonda mutiyakeshaña kashinshi kakeni kayena wayitambikili nindi mufumi mumwidima, mwiñili muchejeji chindi chakuhayama.” (1 Pet. 2:9) Neyi chiyashimwineñahu dehi, aYudeya akumujimba, amwitejeli Yesu nawu diyi Mesiya, diwu adiña antu atachi muniwu muza wawuha. (Dan. 9:27a; Mat. 10:6) Nkumininaku, antu amavulu abulili kwikala aIsarela ayibombeleli muniwu muza, muloña Petulu watwalekeluhu nindi: “Enu hamwaka himwadiñi muzaku, ilaña katataka mwela dehi muza wambala waNzambi.”—1 Pet. 2:10.

⁴ Indi Petulu wadiña nakutena anyi? Kumatachikilu amukanda windi, wahosheli nindi: “[Nzambi] watuvweli chachiha tukwati kukuchiñeja kwakuumi nakusañuka kwaYesu Kristu mudi afu, mwaya luwi lwindi lwasweja. Watuvweleli niwuswana wakatokaña, wakadi kujilola, wabulaña kujimuka, wanayiswekeluwu enu mwiwulu.” (1 Pet. 1:3, 4) Muniwu muza mwekala akwaKristu awayishewa, akweti kuchiñeja kwakuya mwiwulu. Diwu “aIsarela ambala aNzambi.” (Ŋal. 6:16) Muchimwenu, kapostolu Yowanu wamweni nindi “aIsarela ambala aNzambi” adiña 144,000. “Diwu akuuliluwu mukachi kawantu ekali nyikabu yaNzambi niyaKana kamukoku yatachi” kulonda kukalakala neyi ‘atupristu’ nawa “akayulila hamu [naYesu] ikombakaji danyaka.”—Chim. 5:10; 7:4; 14:1, 4; 20:6; Yak. 1:18.

Komana Muza waIsarela Wemenañaku Hohu Awayishewa?

5. (a) Indi nhoshelu yakwila nawu “aIsarela ambala aNzambi” yatalisha mudihi? (b) Muloñadi izu dakwila nawu “Isarela” chidikweti kulumbulula kwashiyashana?

⁵ Chakadi nikujina, mazu akwila nawu “aIsarela  ambala aNzambi” ekala haAŋalija 6:16 ahoshaña hadi akwaKristu awayishewa. Hela chochu, komana Yehova wazatisha muza waIsarela neyi chakutalilahu, chabombelamu akwaKristu bayi awayishewaku? Tunateli kuwana ñakwilu mumazu aYesu ahosheliyi kudi apostolu indi ashinshika nindi: “Ami nukuyikunjika wanta wenu, neyi chankunjikiluwu ami kudi Tata yami, kulonda mwakadyi nakunwa kumesa yami muwanta wami, mwakashakami hamatanda awanta nakusompesha nyuza yaIsarela ikumi nayiyedi.” (Luka 22:28-30) Chumichi chakazatika “hakuleña kwakwiha,” hampinji yakayulañayi Kristu hadi Ikombakaji daNyaka.—Tañenu Matewu 19:28.

6, 7. Indi nhoshelu yakwila nawu “nyuza yaIsarela ikumi nayiyedi,” yashimunawu haMatewu 19:28 niLuka 22:30 yatalisha mudihi?

⁶ Izaza dawa 144,000 akekala anyanta amwiwulu, atupristu, ansompeshi mukuyula Kwekombakaji daNyaka. (Chim. 20:4) Anyi akasompeshawu, nawa akayulañanyi? HaMatewu 19:28 niLuka 22:30, atuleja nawu akasompesha “nyuza yaIsarela ikumi nayiyedi.” Anyi anakwimenaku “nyuza yaIsarela ikumi nayiyedi” yinatenuwu? Emenañaku antu ejima akweti kuchiñeja kwakushakama hamaseki—antu akweti chikuhwelelu mwifutu danyiloña daYesu, ilaña abula kwikala hezanvu dawawayishewa. (Muza wawaLevi hiyawubombeleli kunyuza 12 yawaIsarela akumujimbaku.) Antu anakwimenaku nyuza yawaIsarela 12 diwu akahetelamu chikupu munyidimu yawupristu yakazatañawu a 144,000. Awa antu akahetelamu abula kwikala atupristu, niwena hiyantu jaNzambi nawa wayikeña nikuyilemesha. Dihafuma Nzambi kuyesekeja nawantu jindi akumpinji yakunyima.

⁷ Chelili kapostolu Yowanu namoni dehi aIsarela akuspiritu akushika ku 144,000 anayilamiki dehi chilamiki chahaya nyaka henohu lukadi lweneni kanda, wamweni cheñi “izaza deneni” dakadi kutwesha kuchinda “dawantu akunyuza yejima.” (Chim. 7:9) Antu wenawa akapuluka halukadi lwasweja nakwikala muChiyulu chaKristu Chayaaka Ikombakaji. Akadibomba hamu nayihita yawantu akasañuka. (Yow. 5:28, 29; Chim. 20:13) Awa Antu ejima anakwimenaku muchifwikija “nyuza yaIsarela ikumi nayiyedi,” akayisompesha kudi Yesu nikudi a 144,000 akayulañayi nawu.—Yil. 17:31; 24:15; Chim. 20:12.

8. Indi yuma yamwekeneña hachilaaka Chefuku daKubuta Nshidi, yashimwineñahu dehi ñahi wubwambu wekala hakachi kawa 144,000 niantu ejima?

⁸ Wubwambu wekala hakachi kawa 144,000 nawantu ejima awushimwineñahu dehi muyuma yamwekeneña hachilaaka Chefuku daKubuta Nshidi. (Lev. 16:6-10) Chatachi kapristu muneni wateleli kuhana ñombi wamulambu wahanshidi kulonda “akeli yakudibuta nachu yomweni niakwetala dindi.” Dichi, mulambu waYesu, chatachi wakundama kudi amwitala dindi, atupristu anyanya, antu akakalakala nindi mwiwulu. Cheñi, kushankulu, Hefuku daKubuta Nshidi, ahanineña ampembi ayedi kulonda kubuta hanshidi yawaIsarela amakwawu. Indi ampembi anakwimenaku chumanyi? Muchinu chibaaba, muza wawatupristu wunakwimenaku 144,000, nawa aIsarela ejima anakwimenaku antu ejima akweti kuchiñeja kwakushakama hamaseki. Iku kulumbulula kwamwekeshaña nawu mazu akwila nawu “nyuza yaIsarela ikumi nayiyedi,” ekala  haMatewu 19:28, hiyatalishaña kudi atupristu anyanya aYesu atondewa naspirituku, ilaña atalishaña kudi antu ejima akuhwelela mumulambu waYesu. *

9. Indi atupristu amuchimwenu chaEzekeli chahatembeli emenañaku anyi, nawa aIsarela abulili kwikala atupristu emenañaku anyi?

⁹ Talenu chakutalilahu chikwawu. Kaprofwetu Ezekeli wamweni chimwenu cheneni chatembeli yaYehova. (Ezek. tupe. 40-48) Muchina chimwenu, atupristu azatileña mutembeli, kuhana nshimbi nikutambwila kufumba nikuleja kwaYehova. (Ezek. 44:23-31) Muchimwenu chochimu, antu afumini kunyuza yamboka-mboka enjileña nakudifukula nikulambula nyilambu. (Ezek. 45:16, 17) Dichi munichi chimwenu, atupristu emenañaku awayishewa, nawa aIsarela abulili kwikala muza wawatupristu, emenañaku antu akweti kuchiñeja kwakushakama hamaseki. Ichi chimwenu chamwekeshaña nawu, awa mazanvu ayedi azatilaña hamu chachiwahi nawa izanvu dawatupristu diwu alombolaña mukudifukula kwalala.

10, 11. (a) Mazwinyi akukolesha chikuhwelelu chetu ahosheliyi Yesu itunakumona? (b) Lwihwinyi lutwatela kudihula kutalisha hadi nyikoku yikwawu?

¹⁰ Yesu wateneni “anyikoku acheñi,” abula kwikala ‘mwiyinda dimu’ ‘nakamukanka kawanyikoku kantesha,’ kawatumbanji twindi awayishewa. (Yow. 10:16; Luka 12:32) Wahosheli nindi: “Chiña nakayileta niwena; wena akatiya izu dami; akekali mukanka wumu nikabiña wumu.” Chikuhwelelu chetu chinakukolelaku nankashi hakumona kushikijewa kwanawa mazu. Mazanvu ayedi anayibombi hamu dikwila nawu izaza danyanya dawawayishewa nizaza deneni dawanyikoku amakwawu (Tañenu Zekariya 8:23.) Hela chakwila anyikoku amakwawu muchifwikija hiyazatilaña muchipañu chamukachi katembeli yakuspirituku, azatilaña muchipañu chatembeli yahanji.

¹¹ Neyi chakwila mpinji jikwawu Yehova wazatishaña aIsarela akushankulu abula kwikala atupristu kwimenaku anyikoku amakwawu, komana antu akweti kuchiñeja kwakushakama hamaseki niwena atela kudya kuyifwikija yahaChanukishu? Tukuhanjeka hañakwilu yanilu lwihu.

Chitiyañenu Chachiha

12. Chitiyañenwinyi chachiha chashimwineñayi dehi Yehova?

¹² Yehova washimwineñahu dehi chitiyañenu chachiha nawantu jindi hampinji yahosheliyi nindi: “Tiyenu chitiyañenu chinakatiyañana namutaña waIsarela hakamana mafuku owu; nakasha nshimbi jami muyitoñojoka yawu nakajisoneka munyichima yawu. Nakekala Nzambi yawu niwena akekala antu ami.” (Yere. 31:31-33) Kuhitila munichi chitiyañenu chachiha, chikaninu chaYehova kudi Abarahama chadiña chakumukolekesha nikumukiswila haya nyaka.—Tañenu Kutachika 22:18.

13, 14. (a) Anyi ekala munichi chitiyañenu chachiha? (b) Anyi ahetelañamu, nawa ‘akakelaña’ ñahi kunichi chitiyañenu chachiha?

 ¹³ Yesu wahosheli hanichi chitiyañenu chachiha hawufuku welili kanda yafwi, wahosheli nindi: “Lupasilu dichi chitiyañenu chachiha chamumashi ami, awa akuyipwekela.” (Luka 22:20; 1 Kor. 11:25) Komana akwaKristu ejima ekala munichi chitiyañenu chachiha? Inehi. Amakwawu adi neyi apostolu anwini mulupasa hawuna wufuku, ekala munichi chitiyañenu chachiha. * Yesu watuñili chikaninu chikwawu chakuyula hamu nawu muWanta windi. (Luka 22:28-30) Akakalakalaña hamu naYesu muWanta windi.—Luka 22:15, 16.

¹⁴ Indi antu akashakama hamaseki muchiyulu chaWanta windi? Akahetelamu munichi chitiyañenu chachiha. (Ŋal. 3:8, 9) Hela chakwila hiyekala amunichi chitiyañenuku, ‘akakelaña’ kunichi chitiyañenu kuhitila mukwovwahila nshimbi, neyi chochashimwineñahu dehi kaprofwetu Isaya nindi: “Niantu akunyuza yacheñi akudibomba kudi Yehova kulonda amukalakeli, akeñi ijina daYehova, ekali ambuñindi, ejima ahembaña sabata abuli kuyijilola, akakelaña mwaya chitiyañenu chami, nakayishikija kumpidi yami yajila, nakayizañalesha mwitala dami dakulombela.” Kuhiñahu Yehova wahosheli nindi: “Muloña itala dami akaditena nawu itala dakulombela danyuza yawantu yejima.”—Isa. 56:6, 7.

Anyi Atela Kudya Kuyifwikija?

15, 16. (a) Indi kapostolu Pawulu wesekejeli chitiyañenu chachiha kuchumanyi? (b) Muloñadi antu akweti kuchiñeja kwakushakama hamaseki chabulilañawu kudya kuyifwikija yahaChanukishu?

¹⁵ Antu ekala muchitiyañenu chachiha ‘hiyakweti woma wakwiñila mwajilaku.’ (Tañenu Aheberu 10:15-20.) Awa diwu ‘atambulaña wanta wakakankishewaña.’ (Heb. 12:28) Dichi antu akekala anyanta niatupristu mwiwulu naYesu Kristu diwu atela kunwa ‘mulupasa’ lwemenañaku chitiyañenu chachiha. Antu wenawa ekala muchitiyañenu chachiha diwu akanawu kusumbuka nakana kaMukoku. (2 Kor. 11:2; Chim. 21:2, 9) Antu ejima ayaña kuChanukishu chahachaaka, atalaña hohu nakalemesha nawa hiyadyaña kuyifwikijaku.

¹⁶ Pawulu niyena watukwasha kwiluka netu antu akweti kuchiñeja kwakushakama hamaseki hiyadyaña kuyifwikija yaChanukishuku. Walejeli akwaKristu awayishewa nindi: “Muloña chejima chimukudyaña dinkendi idi, nichimukunwaña lupasilu, himukutiyakesha kufwa kwaMwanta nichakenzayi.” (1 Kor. 11:26) Indi Mwanta ‘wakenza’ mpinjinyi? Hampinji yakenza nakusendayi izanvu dawasumbuki awayishewa akukumishaku kulonda akayi mwiwulu. (Yow. 14:2, 3) Chakadi nikujina, Kudya kwaMwanta kwaMelela kwekalañaku hachaaka hikwakatwalekahuku. ‘Ashalahu’ hamaseki anyana kamumbanda akatwalekahu kudya kuyifwikija sampu nimpinji yakatambwilawu wejima wawu wuloku wamwiwulu. (Chim. 12:17) Neyi antu akashakama hamaseki atelela kudya makendi, dikwila nawu Chanukishu chikatwalekahu haya nyaka.

“Akekala Antu Ami”

17, 18. Indi wuprofwetu wasonekawu haEzekeli 37:26, 27 washikijewa ñahi?

¹⁷ Yehova washimwineñahu dehi kunuñañana kwawantu jindi munawa mazu nindi: “Nakatiyañana nawu chitiyañenu chakuwunda. Chakekala chitiyañenu chakutiyañana nawu  chahaya nyaka. Nakayishakamisha, nakayivulisha, nakasha malalami mukachi kawu haya nyaka. Akekala nawa natabanaka yami. Ami nakekala Nzambi yawu wena akekala antu ami.”—Ezek. 37:26, 27.

¹⁸ Antu jaNzambi ejima anateli kuhetelamu munichi chikaninu chachiwahi chachiha, dikwila nawu chikaninu chakuleta kuwunda. Eñañi, Yehova wayinka ambuñindi ejima amwovwahilaña kuwunda. Mukabu waspiritu yindi wamwekanaña hakachi kawu. Mumalala indi, munakwimenaku kudifukula kwalala kwawakwaKristu, kudi hakachi kawu. Anekali antu jindi chikupu, muloña aleka nyichidi yejima yakupesha nawa anatonduhu kudifukula hohu kudi Yehova Nzambi.

19, 20. Anyi abombelawu hadi antu atenayi Yehova nindi “antu jami,” nawa chumanyi chakoñaña chitiyañenu chachiha?

¹⁹ Wenowu muzañalu wutukweti hakumona awa mazanvu ayedi anuñañana makonu! Hela chakwila izaza deneni dinakutohelaku hidikweti kuchiñeja kwakuya mwiwuluku, atiyaña kuwaha kudikunda nawawayishewa. Ekala akundama kudi aIsarela ambala aNzambi. Kuhitila mukwila mwenimu, ekala hakachi kawantu atenañayi Yehova nindi “antu jami.” Awa mazu awuprofwetu ashikijewaña hadi awa antu, akwila nawu: “Nyuza yayivulu yakadibomba naYehova, akekala antu ami. Nakashakama mukachi keyi.”—Zek. 2:11; 8:21; tañenu Isaya 65:22; Chimwekeshu 21:3, 4.

²⁰ Kuhitila muchitiyañenu chachiha, Yehova naleñeli yuma yejimiyi kuzatika. Yihita yawantu akunyunza yamboka-mboka anadibombi nawantu jaYehova. (Mika 4:1-5) Afuukulahu kutwalekahu kukakela kuchitiyañenu kuhitila mukwiteja yuma yaloñeshañawu nikwovwahila nshimbi. (Isa. 56:6, 7) Hamuloña wakwila mwenimu, wejima wawu hamu niaIsarela ambala aNzambi, adiluñishaña nkisu jekalaña muniku kuwunda kunakutwalekahu. Tunakuhweleli netu diyi nkisu yimunakudiluñisha hayinu mpinji nawa yimukadiluñisha kumpinji yakumbidi.

[Tumazu twaheshina]

Munakwanuka?

• Indi “nyuza yaIsarela ikumi nayiyedi,” akasompeshawu kudi a 144,000 hiyanyi?

• Wubwambwinyi wekala hakachi kawawayishewa nawanyikoku acheñi kutalisha hachitiyañenu chachiha?

• Komana akwaKristu ejima atela kudyaña kuyifwikija yahaChanukishu?

• Kunuñañanyi kwashimwineñawu dehi nawu kukamwekana munanu mafuku etu?

[Malwihu aKuzatisha haKudiza]

[Girafu/Nyevulu yidi hefu 25]

(Neyi munakukeña kumona ntanjikilu yejima talenu mumukanda)

Antu amavulu anakukalakela hamu nawaIsarela ambala aNzambi

7,313,173

4,017,213

1,483,430

373,430

1950 1970 1990 2009