Twalekenuhu Kwikala ‘Atooka muMuchima’ Munanu Mafuku Akala

KUTALISHA hanyiloña yawuvumbi yakoñeli mukulumpi waChaachi yaKatolika katataka mwituña daItaly, Vittorio Messori mukwakusoneka nsañu wamuKatolika diyi wahosheli awa mazu nindi, “wonsu wetu tunateli kwiteja netu makonu muChaachi yaKatolika mudi kukala kwakwikala ajila.” Nawa watwalekeluhu nindi, “Iku kukala hiyanateli kukwimanisha kuhitila mukufumisha nshimbi yakwila nawu akulumpi jansakililu ekaleña ajikiku, muloña naambala yeneni yakukala kweniku yabombelamu antu elaña wutumwa, nawa kwesekeja nansañu yasonekeluwu muchipapilu chansañu chaLa Stampa, yakwila nawu nyiloña yawuvumbi yakoñañawu atupristu akabishaña amayala niatwansi awamayala.”

Chakadi nikujina kuvulilaku kwayuma yatama hichinjikijilu ‘chamafuku akukuminina’ chakaayi kamakonu. (2 Tim. 3:1-5) Kwesekeja nachinakumwekesha yileji, yuma yatama yinakumwekana hiyaluwañeshaña hohu antu ejimaku, ilaña niantu aditenaña nawu hiyantu jaNzambi. Nyichima yawu yaheña nawa yatama yayileñelaña kukoña yuma yahamesu bwi-i. (Efwes. 2:2) Yesu wasoñamishili chachiwahi nindi “kumuchima diku kwafumaña yitoñojoka yatama, niwubanji, niwuvumbi, nikubajama, niwukombi, niwunsahu wakutwamba, nikutukana.” (Mat. 15:19) Hela chochu, Yehova Nzambi, wakeñaña nindi ambuñindi akeñeña ‘kutooka mumuchima.’ (Yish. 22:11) Indi mukwaKristu nateli kwikala ñahi wutooka mumuchima munanu mafuku akala?

Chichabalumunaña Kwikala ‘Atooka muMuchima’

MuBayibolu, “muchima” kakavulu awuzatisha muchifwikija. Kwesekeja namukanda wansañu wumu, izu damuBayibolu dazatishawu nawu muchima damwekeshaña “wuntu wamukachi” nawa “chidi chamuntu chalema nankashi kumesu Nzambi, hashindamenaña wubwambu wamuntu naNzambi, waleñelaña kwikala nayililu yayiwahi.” Muchima wamwekeshaña chitwekala. Kwesekeja nachinashimuni mukanda wansañu wutunasoneki hewulu, Yehova washinshikaña mumuchima nawa dichidi chatiyañayi kuwaha mudi ambuñindi.—1 Pet. 3:4.

MuBayibolu, “kutooka” “nikubula majilu” kwamwekeshaña chuma chawunyonji. Ilaña awa mazu ayizatishaña cheñi kuchuma chinabuli kutamishawu, hela kuluwañeshawu, muyililu nimunsakililu. Mumpanji yaHampidi, Yesu wahosheli nindi: “Atooka munyichima anakooleki.” Wadiña nakutena antu akadi majilu mukachi kamuchima. (Mat. 5:8) Kukeña kwawu, yuma yafwilañawu, niyililu yawu yekala yitooka. Kukeña nikuhameka dikwayisañumunaña kwila mwenimu, amukeña Yehova namuchima wawu wejima, chalala, chakadi wunfwikiji. (Luka 10:27) Anenu nawa munakukeña kwikala atooka mumuchima, hidimuku?

Kutwalekahu Kwikala ‘Atooka Mumuchima’ Kwakala Chikupu

Kambuña aYehova hatela kwikala hohu ‘namakasa akadi majiluku,’ ilaña watela kwikala ‘namuchima wutooka.’ (Mas. 24:3, 4) Hela chochu, makonu, chinakuswejelaku kukala hakwila nawu ambuña aNzambi atwalekuhu kwikala ‘namuchima wutooka.’ Satana nikaayi kadi mumakasindi, kushilahu nikubula kuwanina kwetu, kwatushinjilaña chikupu kulonda kutwambula kudi Yehova. Hakwila nawu tushindi idi ikañesha, kukeña ‘kutooka mumuchima’ kwalema nankashi nawa twafwilaña kukakelaku chikupu. Kwila mwenimu kukutukiña nawa kukutukwasha kutwalekahu kwikala amabwambu  jaNzambi. Tunateli kuhemba ñahi muchima wutooka?

Hamukanda waAheberu 3:12, twawanañahu kusoñamisha kwakwila nawu: “Enu ana kwetu, babalenu hakenda kwikala mwinenu wumu wukweti muchima watama wakubula kukuhwelela, wakuleka Nzambi wamumi.” Neyi twikala namuchima “wakubula kukuhwelela” hitunateli kutwalekahu kwikala ‘atooka mumuchimaku.’ Yumanyi yinatandishiyi Satana Diyabolu kulonda kuzeyesha chikuhwelelu chetu mudi Nzambi? Yumiyi yabombelamu ntañishilu yakwila nawu yuma yadileñeli yayeni, kwosi nshimbi yalala yayuma yaloña nayabula kuloñaku, nikujinooka nawu Nyikanda Yajila hiyayonena kudi Nzambuku. Bayi twiteja iyi yitoñojoka yafwana yituluwañeshuku. (Kol. 2:8) Kutañaña Bayibolu ifuku nifuku nikutoñojokañahu chikupu dikwatela kutukiña kuniwu wubanji. Kwiluka kwalala Kwezu daNzambi kukutusañumuna kumukeña Yehova nikwiluka chayakamenañayi antu. Iku kukeña nikwiluka chayakamenañayi antu kwalema nankashi hakwila nawu tukaani yitoñojoka yakutwamba nikwikala nachikuhwelelu chakola kudi Yehova kulonda kutwalekahu kwikala atooka mumuchima.—1 Tim. 1:3-5.

Chakwikala ‘Atooka muMuchima’ Neyi Tutalañana naKufwila kwaChisemwa

Kukala kukwawu kutwatela kumona hamuloña wakufwila kutwalekahu ‘atooka mumuchima’ kwabombelamu kufwila kwachisemwa nikufwila maheta. (1 Yow. 2:15, 16) Kusweja kukeña mali hela kufwila kwikala namaheta amavulu kunateli kutamisha muchima, nawa kukuleñela mukwaKristu kukoña yuma yabula kukeñayi Nzambi. Antu amakwawu hiyekalaña nakashinshi hamudimuku, adimbaña akwawu, hela kwiya mali niyuma yambala.—1 Tim. 6:9, 10.

Munjila yikwawu, kuhitila mukwikala nawoma wakukeña kubula kumuneñesha Yehova, kukeña wuñanji, nikufwila kwikala nachilenji chachiwahi, twamwekeshaña nawu twakeñaña kwikala ‘atooka mumuchima.’ Iku kukeña kwatuleñelaña kutwalekahu ‘kukeña kushakama chakashinshi muyuma yejima.’ (Heb. 13:18) Neyi tumwekesha yililu yayiwahi, nikashinshi tunateli kuhana wunsahu wawuwahi. Emilio, Chinsahu wakuItaly wazataña mudimu wawuñendeshi hakampani yatalaña nyotoka yasendaña  antu, wawanini kafuba mwadiña mali akuAmerica akushika ku($680, U.S.). Akwawu mwazatilañawu ahayamini, hakumona yahani fuba mwadiña mali kudi mukulumpi wamudimu, nkumininaku mukulumpi wamudimu wamwinkeli wajimbesheli fuba yidi yamali. Amabwambu jaEmilio atiyili kuwaha nankashi hakumona yililu yidi yayiwahi nawa akeñeleña kutiya nsañu yamuBayibolu, dichi atachikili kudiza. Chuma chafuminumu, antu atanu nayedi afumini kuyisaka yiyedi etejeli nsañu yalala. Eñañi, kwikala ashinshika chakufuma kumuchima wutooka kunateli kuleñela antu amakwawu kumuhameka Nzambi.—Tit. 2:10.

Chuma chikwawu chinateli kuluwañesha muchima wamukwaKristu wutooka, hikwikala nayitoñojoka yaheña kutalisha hakubulakana kweyala namumbanda. Chineli antu amavulu amonaña nawu kukwata wujila niwutumwa hiyililu yayiwahi, yumiyi yinateli kuluwañesha muchima wamukwaKristu. Muntu wadiñijaña muyililu yawuvumbi muwunfwikiji nateli kwikala nachihandilu chambadi jiyedi, chakusweka nshidi jakoñañayi. Mwalala yililu yamuchidiwu hiyinateli kumwekesha ‘kutooka mumuchimaku.’

Gabriele amupapatishili hampinji yadiñayi nayaaka 15 yakuvwalika nawa mumpinji yantesha watachikili wupayiniya. Hela chochu, chimwahitili mpinji watachikili kudikunda nawamabwambu atama kumatala akunwina nikuhañana nawufuku. (Mas. 26:4) Dihatachikiliyi chihandilu chatama, chawunfwikiji, nawa amuhañili muchipompelu chawakwaKristu. Iku kufumba kwakufuma kudi Yehova kwamuleñeleli kutoñojokahu nankashi. Gabriele wahosheli nindi: “Natachikili kusha maana kuyuma yejima yinabulileña kulemesha hatachi. Natachikili kutaña Bayibolu ifuku nifuku, nakweseka kwiluka yuma yatulejañayi Yehova, nikudiza chikupu nyikanda yateokalatiki. Nelukili nami kudiza kwahalwami kwankwashaña nikunzañalesha chikupu nawa kutañaña Bayibolu nikulomba kwakufuma hamuchima kwankoleshaña.” Kwila mwenimu kwamukwashili Gabriele kuleka yililu yindi yatama nikukwata cheñi wubwambu windi naYehova.

Chayinu mpinji Gabriele nakukalakala cheñi neyi payiniya, hamu niñodindi. Chuma chamumwekeneni chamwekeshaña nawu kudiza Bayibolu ninyikanda yafumaña kudi ‘nduñu wamaana nikashinshi’ kunateli kukwasha muntu kwikala wutooka mumuchima nikukaana yililu yatama.—Mat. 24:45; Mas. 143:10.

Kwikala ‘Atooka muMuchima’ muMpinji Yakweseka

Ikakeja dawakwakudimbulula, kukala kwansañu jamali, niyikatu yamaneni yinazeyeshi ambuña aNzambi amakwawu. Mpinji yikwawu, nyichima yawu yaluwankanaña. Mwanta Davidi niyena wamweni kukala kwamuchidiwu wahosheli nindi: “Spiritu yami jinamukañi dehi mukachi kami; muchima wami wafwa dehi puchi mwivumu.” (Mas. 143:4) Chumanyi chamukwashili kushinda kukala kwamuchidiwu? Davidi watoñojokeleña chikupu hayuma yakoñeleliyi Yehova antu jindi nichamupulwishiluwu yena. Watoñojokeleña hayuma yakoñeliyi Yehova kulonda kulemesha ijina Dindi dabadika. Davidi washili maana kunyidimu yaNzambi. (Mas. 143:5) Munjila yoyimu, kutoñojokaña hadi Nleñi yetu nihayuma yejima yatukoñelayi niyichidi kutukoñelayi kukutukwashaña hampinji yitudi mukweseka.

Neyi atwila katama, tunateli kuhila. Kutwalekahu nakutoñojoka hayuma yamwekana kunateli kutuleñela kuhilila amana kwetu. Tunateli kuleka kudikunda nawantu amakwawu, kudambulaku nikubula kukeñesha antu amakwawu. Komana yililu yamuchidiwu, yinateli kutuleñela kwikala ‘atooka mumuchima’? Mwalala, chikonkwanyi chakwikala namuchima wutooka chabombelamu kutiyañana nawana kwetu akwaKristu nichitwelaña neyi tubobola.

Mwituña dinakusweja kutaminaku nikuluwalala, etu akwaKristu alala twekalaña ambukaku muloña twakeña kwikala “atooka mumuchima.” Chihandilu chetu chekalaña chachiwahi chitwamonaña kuwunda kwafumaña mukwila kukeña kwaNzambi. Sweje-e dinu, twekalaña nawubwambu wawuwahi naNleñi yetu, Yehova Nzambi, wakeña antu “atooka mumuchima.” (Mas. 73:1) Eñañi, tunateli kwikala hakachi kawantu akekala amuzañalu muloña, Yesu wakanini nindi, “akamona Nzambi,” chakakwashañayi antu akeña kwikala “atooka mumuchima.”—Mat. 5:8.