Atwansi—Fwilenu Chikupu Kumukalakela Yehova

‘Anukaña nawa Nleñi yeyi mumafuku awukwenzi weyi.’—MUKWA. 12:1.

1. Indi anyana amuIsarela ayilejeli kwiladi?

 YAAKA 3,500 yinahituhu, kaprofwetu kaYehova Mosi, walejeli atupristu niamayala akulumpi amuIsarela nindi: “[M]wakapompeshaña antu ejima, niamayala, niambanda, niatwansi, . . . , kulonda akatiyi, akadizi, akatiyi Yehova Nzambi yenu woma, akashuku muchima wakwila mazu ejima anshimbiji.” (Kuhit. 31:12) Talenu antu alejeluwu kupompaña kulonda kudifukula: amayala, ambanda, niatwansi. Eña, atwansi niwena adiña hakachi kawantu alejeluwu kutiyilila, kudiza nikulondela nshimbi jaYehova.

2. Indi Yehova wakameneni ñahi atwansi amuchipompelu chawakwaKristu akusambila?

² Muyaaka nkulakaji yakusambila, Yehova watwalekeluhu kwakamena atwansi amwakameneña. Chakutalilahu, wamoneneni kapostolu Pawulu kulonda kubombelamu nshimbi jahosheleña hohu hadi atwansi munyikanda yikwawu yatemesheleliyi yipompelu. (Tañenu Aefwesesa 6:1; Akolosi 3:20.) Atwansi alondeleli kufumba kweniku atachikili kumuhameka Tata yawu wamwiwulu wukweti kukeña nawa atambwilili nkisu.

3. Indi atwansi makonu anakumwekesha ñahi mpwila yawu yakufwila kumukalakela Nzambi?

³ Komana makonu, atwansi ayitambikaña kupompa kulonda kudifukula kudi Yehova? Eña. Dichi, antu jaNzambi ejima azañalalaña hama hakumona nawu atwansi amavulu amukalakelaña Nzambi mukaayi kejima anakulondela kukonkomwena kwaPawulu kwakwila nawu: “Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi. Bayi tuleka kupompa neyi chelañawu amakwawuku, chiña kudilejaleja, chisweji nankashi nanichi chimunamoni ifuku odu hidikwinza nakuswila kwakwihi.” (Heb. 10:24, 25) Kubombelahu, anyana amavulu akalakelaña hamu nawanvwali jawu mumudimu wakushimwina nsañu yayiwahi yaWanta waNzambi. (Mat. 24:14) Nawa, hakumwekesha kukeña kwawu kudi Yehova, atwansi amavulu adihanaña kuhitila mukupapatishewa hachaaka nichaaka nikudiluñisha nkisu jenzaña hamuloña wakwikala kambanji kaKristu.—Mat. 16:24; Maku 10:29, 30.

Ayinu Diyi Mpinji Yakwiteja Mutambi

4. Indi atwansi atela kwikala nayaaka yiñahi yakusemuka hakwila nawu eteji mutambi wakumukalakela Nzambi?

⁴ Mukanda waMukwakutaŋisha 12:1 wahosha nawu: “Anukaña nawa Nleñi yeyi mumafuku awukwenzi weyi.” Indi atwansi atela kwikala nayaaka yiñahi yakusemuka hakwila nawu eteji iwu mutambi wawuwahi wakudifukula nikumukalakela Yehova? Nsona hijashimuna yaaka yatela kwikalawu nayuku. Dichi, bayi mufunta hanyima hamuloña wakutoñojoka nenu muchidi atwansi chakwila himunateli kumutiyilila Yehova nikumukalakelaku. Hichikweti muloña nayaaka yakusemuka yimukwetuku, anayikoleshi kwiteja iwu mutambi chakadi kulaba.

5. Indi anvwali anateli kukwasha ñahi anyanawu kuyilaku hambidi kuspiritu?

⁵ Enu amavulu ayikoleshaña kudi anvwali jenu kuyilaku hambidi kuspiritu. Kwila mwenimu, mudi neyi Timotewu wadiñaku mumpinji yakunyaka. Hampinji yadiñayi mukeki, amulejeli nyikanda yajila kudi mama yindi Yunisi ninkaka yindi Lowisi. (2 Tim. 3:14, 15) Chochimu, anvwali jenu anakuyidizisha munjila yoyimu kuhitila mukudizaña Bayibolu nanenu,  kulombaña nenu hamu, kuyisendaña kukupompa kwachipompelu nikukupompa kwamaneni kwawantu jaNzambi, nikukalakalaña nenu mumudimu wakushimwina. Mwamweni, kuyidizisha njila jaNzambi himudimu walema nankashi wayinkawu anvwali jenu kudi Yehova. Komana mwayihamekaña hakukeña kwayikeñawu nichayakamenañawu?—Yish. 23:22.

6. (a) Kwesekeja naMasamu 110:3, kudifukula kwamuchidinyi kwamuzañaleshaña Yehova? (b) Yumanyi yitukudizahu?

⁶ Hela chochu, enu atwansi chimunakukula, Yehova nakukeña nindi ‘mushinshiki mwaya muchima waNzambi, wawuwahi, watiyishaña kuwaha, walala chikupu,’ neyi cheliliyi Timotewu. (Rom. 12:2) Neyi mwila mwenimu, mukukalakala nyidimu yamuchipompelu, bayi neyi muloña anvwali jenu anakukeña nawu mwileña mwenimuku, ilaña muloña munakukeña kwila yuma yakeñañayi Nzambi. Neyi mumukalakelaña Yehova mukudikeñela, mukumuzañaleshaña. (Mas. 110:3) Hanu dinu, munateli kumwekesha ñahi nenu munakufwila chikupu kumutiyilila Yehova nikulondela kufumba kwindi? Tukudiza hanjila jisatu jalema jatela kuyikwasha kwila mwenimu. Njila jeniji hikudiza, kulomba, niyililu. Tushinshikenu hanjila jeniji yimu hakampinji.

Mwilukenu Yehova Hamu Neyi Himuntu

7. Indi Yesu wemikili ñahi chakutalilahu hamu neyi kadizi waNsona, nawa chumanyi chamukwashili kwila mwenimu?

⁷ Njila yimu mumwatela kumwekeshela nenu munakufwila kumukalakela Yehova, hikuhitila mukutaña Bayibolu mafuku ejima. Munateli kumanisha mpwila yenu yakuspiritu nikwiluka nsañu yayiwahi yamuBayibolu kuhitila mukutaña Izu daNzambi mafuku ejima. (Mat. 5:3) Yesu waheni chakutalilahu. Hampinji yimu henohu wudi nayaaka yakusemuka 12, anvwali jindi amuweni mutembeli, ‘nashakami mukachi kawankuluñaña nakutiyilila nikuyihujola.’ (Luka 2:44-46) Hadiñayi kansi, Yesu wakeñesheli chikupu kwiluka Nsona. Chumanyi chamukwashili kwila mwenimu? Chakadi kujina, mama yindi Mariya nitata yindi Yosefu, akoñeli mudimu weneni. Adiñi ambuña aNzambi amudizishili Yesu hadi Nzambi kufuma tuhu kuwukeki windi.—Mat. 1:18-20; Luka 2:41, 51.

8. (a) Mpinjinyi yatela kutachikawu anvwali kutañisha anyanawu kukeña Izu daNzambi? (b) Shimunenu chakutalilahu chinakumwekesha kulema kwakutachika kutañisha anyana kufuma kuwukeki wawu.

⁸ Chochimu, anvwali amwakamaña Nzambi makonu, eluka kulema kwakutañisha anyanawu chakashinshi kulonda kwiluka chikupu chalala chamuBayibolu kufuma kuwukeki wawu. (Kuhit. 6:6-9) Dichuma chelili muheletu mukwaKristu wejina daRubi, helili tuhu Yosefu, mwanindi watachi weyala yovwaliki. Ifuku niifuku wamutañilileña Mukanda Wami Wampinji Jamu Bayibolu. Chakulileñayi, wamukwashili kuhembela kumutu nsona jashiyashana. Komana Yosefu wahetelelumu hakumudizisha muniyi njila? Chatachikiliyi kuhosha, washimwineña nsañu jajivulu jamuBayibolu mumazu indi. Chashikijiliyi yaaka yakusemuka 5, waheni mpanji yindi yatachi muShikola yaMudimu waTeokalatiki.

9. Muloñadi chichalemena kutaña Bayibolu nikutoñojoka hayuma yimunakutaña?

⁹ Hakwila nawu muyiluku hambidi kuspiritu, enu atwansi mwatela kwikala nachaaku chakutañaña Bayibolu mafuku ejima kufuma tuhu kuwunkaña hela kuwukwenzi wenu ndo-o nikuwukulumpi. (Ps. 71:17) Muloñadi kutañaña Bayibolu chikunateli kuyikwashila kuyilaku hambidi? Talenu chahosheliyi Yesu halombeliyi kudi Tata yindi nindi: “Wumi wahaya nyaka woweniwu, wakukwiluka eyi Nzambi walala wumu hohu.” (Yow. 17:3) Mwamweni, chimukudizaña chikupu hadi Yehova, mukumwiluka hamu neyi Muntu yomweni nawa mukuswejesha kumukeña. (Heb. 11:27) Dichi, mpinji yejima imukutañaña Bayibolu, zatishenu iyi mpinji kulonda kudiza yuma yayivulu hadi Yehova. Dihulenu nenu: ‘Indi iyi nsañu yinakundizishadi hadi Yehova hamu neyi Muntu? Indi iyi nsañu yamuBayibolu yinakumwekeshadi hakukeña kwaNzambi nichañakamenañiyi?’ Kwikala nampinji yakutoñojoka hamalwihu amuchidawa kukuyikwasha kwiluka chatoñojokañayi Yehova nichatiyañayi  nawa niyuma yakeñañayi kudenu. (Tañenu Yishimu 2:1-5.) Kufwana kansi Timotewu, ‘mukushinshikaña’ hayuma yimwadizaña muNsona, nawa chikuyileñela kudifukula kudi Yehova mukudikeñela.—2 Tim. 3:14.

Kulomba Chikunateli kuyileñela Kumukeña Nankashi Yehova

10, 11. Indi kulomba kwayikwashaña ñahi kufwila kumukalakela Nzambi chikupu?

¹⁰ Njila yamuchiyedi mumwatela kufwila chikupu kumukalakela Yehova namuchima wejima hikuhitila mukulomba. HaMasamu 65:2, twatañañahu nawu: “Yeyi watiyaña mwalombañawu antu, antu ejima akwinza kudeyi.” Nihampinji aIsarela hadiñawu antu jaNzambi adikaniniyinawu, añinza enjileña kutembeli yaYehova alombeleña kudi yena. (1 Anya. 8:41, 42) Nzambi hekala nachaambuku. Antu ahembaña nshimbi jindi akuhwelelaña nawu wukuyitiya. (Yish. 15:8) Mwamweni, “antu ejima” abombelamu ninenu atwansi.

¹¹ Mweluka nenu wubwambu waweni washindamena hakuhanjeka chachiwahi. Hadaha, mwatiyaña kuwaha kuhanjeka nebwambu denu imwakeñesha chikupu hayuma yimwatoñojokaña, yuma yimwakamenaña nichimwatiyaña. Chochimu, neyi mulombaña chakufuma hamuchima, dikwila nawu munakuhanjeka naNleñi yenu Muneni. (Fwi. 4:6, 7) Hoshenuña naYehova neyi chimwahoshaña nawanvwali jenu akweti kukeña hela ibwambu denu imwakeñesha. Kafwampi, hekala kudifwana chikupu hakachi kachimwalombaña nachimwatiyaña kutalisha hadi Yehova. Mukumona kwila nenu, neyi wubwambu wenu naYehova wukola chikupu, mukulombaña chakufuma hamuchima.

12. Muloñadi kulomba kwakufuma hamuchima chikwabadikila hakutena hohu mazu? (b) Chumanyi chikuyikwasha kwiluka nenu Yehova wudi kwakwihi nanenu?

¹² Dichi mwatela kwiluka nenu, kulomba kwakufuma hamuchima kwabadika hakutena hohu mazu. Kwabombelamu chimwatiyaña mumuchima. Neyi munakulomba, mwekeshenu nenu mwamukeña nankashi Yehova, mwamulemesha nawa mwashindamena chikupu hadi yena. Neyi mwiluka Yehova chaakulañayi kulomba kwenu, mukwiluka chikupu nenu “Yehova wudi kwakwihi nawantu ejima akumutambika.” (Mas. 145:18) Eña, Yehova wukuswila kwakwihi nanenu, nakuyikolesha kulonda kudikaña naDiyabolu nikufuukulahu yuma yayiwahi muchihandilu.—Tañenu Yakoba 4:7, 8.

13. (a) Indi kwikala ibwambu daNzambi kwamukwashili ñahi muheletu wumu? (b) Indi kudikwata wubwambu naNzambi kwayikwashaña ñahi kushinda ikakeja dawakwenu?

¹³ Shinshikenu hachuma chamuleñeleli Cherie kukola hamuloña wakwikala nawubwambu wakola naYehova. Hadiñayi kushikola yasekondali amwinkeli yawaana muloña wazatili chiwahi munyidimu yashikola nawa welileña chiwahi muyisela yahashikola. Chamanishiliyi shikola, amutondeli kulonda kumutañisha shikola yahewulu chawaana. Cherie wahosheli nindi: “Chawaana chenichi chadiñi hikweseka, nawa antañishi niakwetu akashikola anyinkeli mwiyena chikupu kulonda nichiteji.” Hela chochu, welukili nindi kutaña shikola yahewulu chakeñekeleña kwikala nampinji yeneni yakutaña nikudikita chikupu muyisela, nikwikala nampinji yantesha yakumukalakela Yehova.  Chumanyi cheliliyi Cherie? Wahosheli nindi, “Hanyima yakulomba kudi Yehova, nakaanini chawaana chenichi nakutachika kukalakala mudimu wawupayiniya wampinji yejima.” Chayinu mpinji, nakalakali mudimu wawupayiniya hadi yaaka yitanu. Wahosheli nindi, “hinaditoñeshañaku. Nazañalalaña hakwiluka nami nafuukwiluhu chuma chamuzañaleshaña Yehova. Chalala, neyi musambila kukeña Wanta Nzambi, niyuma yejimiyi akayishilaku.”−Mat. 6:33.

Yililu Yayiwahi Yamwekeshaña Nawu Mukweti ‘Muchima Wutooka’

14. Muloñadi kwikala nayililu yayiwahi chikwalemena kumesu aYehova?

¹⁴ Njila yamuchisatu mumwatela kumwekeshela nawu munakumukalakela Yehova namuchima wumu, hikuhitila muyililu. Yehova wakiswilaña atwansi akweti yililu yayiwahi. (Tañenu Masamu 24:3-5.) Samweli hadiñayi kansi, wakaanini kwimbujola yililu yatama yawanyana kaKapristu Muneni Eli. Samweli amwilukili nawu wadiñi nayililu yayiwahi. Bayibolu yahosha nawu: “Owu mwana Samweli wayilaña nakukula hohu amutiyili kuwaha nikudi Yehova nikudi antu.”—1 Sam. 2:26.

15. Yumanyi yayileñelaña mwikali nayililu yayiwahi?

¹⁵ Tunakushakama mukaayi munenzali antu adikeña, adinka wanta, abulaña kwovwahila anvwali jawu, abulaña kusakilila, abula kujila, asweja kuzuwa, akwakuditohesha, akeñaña yakuditiyisha aweni kuwaha, kukeña Nzambi nehi, iyi diyi yuma yikwawu yateneniyi Pawulu. (2 Tim. 3:1-5) Dichi, chinateli kuyikalila chikupu kwikala nayililu yayiwahi hamuloña wakwila mwashakamaña mudinu ituña datama. Hela chochu, mpinji yidi yejima yimukukoña chuma chachiwahi nikukaana kukoña yililu yatama, mwamwekeshaña nenu mudi kukabadi kaYehova kutalisha hansañu yakuleña kwejima. (Yoba 2:3, 4) Cheñi mukuzañalala hakwiluka nenu munakwiteja kukolesha kwaYehova kwakwila nawu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” (Yish. 27:11) Kubombelahu, neyi mwiluka nenu mukweti wuselewa waYehova, mpwila yenu yakufwila kumukalakela Yehova yikuswejelaku.

16. Indi muheletu wumu watiyishili ñahi muchima waYehova kuwaha?

¹⁶ Hadiñayi kansi, muhela mukwaKristu wejina daCarol wahembeli nshimbi jamuBayibolu hampinji yayileñayi kushikola, nawa yililu yindi ayilukili. Yumanyi yamwekeni? Carol amusekesheleña kudi akwawu akashikola muloña chinleji chindi chadizishewa naBayibolu hichamwitejeleña kwanakana mafuku akunooka niyidika yatwamijañaku yisemwaku. Hampinji jamuchidiwu, wazatishileña mpinji yeniyi kulonda kulumbulwilaku akwawu yuma yakuhwelelayi. Chimwahitili yaaka, Carol watambwilili kaadi kufuma kudi mukwawu mukashikola muyatañilileñawu, wasonekeli nindi: “Mpinji yejima nafwilaña kudimona naneyi kulonda kukusakilila. Hamuloña wakwikala nayililu yayiwahi nichakutalilahu cheyi hamu neyi mukwaKristu wakansi, nihakwikala nachikuhwelelu chakola kutalisha hamafuku akunooka, antu ejima akwilukili. Yeyi wadiña Chinsahu chaYehova watachi kudimonaneyi.” Chakutalilahu chaCarol chamutapili kumuchima mukwawu mukashikola chakwila kumafuku akumbidi, watachikili kudiza Bayibolu. Hakaadi yamusonekeleliyi Carol, wasonekeluhu nindi hiChinsahu wapapatishewa hadi yaaka kubadika 40. Kufwana Carol, makonu enu atwansi mwahembaña nshimbi jamuBayibolu,  munateli kusañumuna antu akweti nyichima yayiwahi kumwiluka Yehova.

Atwansi Anakumuhameka Yehova

17, 18. (a) Mwatiyaña ñahi hadi atwansi amuchipompelu chenu? (b) Yumanyi yatalilañawu atwansi amwakama Nzambi?

¹⁷ Ejima wetu twekala mukuloñesha kwaYehova kwamukaayi kejima twazañalalaña hama hakumona atwansi amavulu akweti iyena anakumukalakela Yehova mukudifukula kwalala. Atwansi wenawa afwilaña chikupu kudifukula kudi Yehova kuhitila mukutañaña Bayibolu mafuku ejima, kulombaña nikwila yuma yakeñañayi Nzambi. Atwansi amuchidiwu azañaleshaña anvwali jawu niantu jaYehova ejima.—Yish. 23:24, 25.

¹⁸ Kumpinji yakumbidi, atwansi ashinshika akekala hakachi kawantu akapuluka nakwikala mwituña dadiha dakanayi Nzambi. (Chim. 7:9, 14) Mwituña denidi, akatambwila nkisu jajivulu chiyakatwalekahu kumuhameka Yehova, nawa akatwesha kumuhameka haya nyaka.—Mas. 148:12, 13.

Munateli Kulumbulula?

• Indi atwansi anateli kumukalakela ñahi Yehova mukudifukula kwalala makonu?

• Hakwila nawu muhetelumu mukutaña Bayibolu, muloñadi chichalemena kutoñojoka nankashi hayuma yimunakutaña?

• Indi kulomba kwayikwashaña ñahi kuswila kwakwihi naYehova?

• Yumanyi yafumaña muyililu yayiwahi yamukwaKristu?

[Malwihu aKuzatisha haKudiza]

[Mwevulu wudi hefu 5]

Komana mwekala nachaaku chakutañaña Bayibolu mafuku ejima?