Indi Yehova Wazatishaña Ñahi Spiritu Yajila haKukalakala Yuma Yakeñañayi?

‘Dichi chakekala izu dami dakafuma mukanwa kami . . . dakakoña chachiwahi mudimu wadu wunaditemesheleli.’—ISA. 55:11.

1. Shimunenu chaambu chekala hakachi kakufuukula nikufwila kwila chuma.

 FWIKIJENU amayala ayedi anakudiloñesha kulonda kuya halwendu kuhitila mukuzatisha nyotoka. Iwu wumu yafunda njila mukuhitilayi hakuya kwiluña kunakuyayi. Mukwawu nawa weluka kwiluña kunakuyayi, weluka cheñi njila jikwawu jatela kuzatishayi. Nadiloñeshi kuzatisha njila yikwawu. Munjila yikwawu, njila jashiyashana jinazatishuwu amayala wenawa jinakumwekesha chaambu chekala hakachi kakufuukula nikukeña kwila chuma. Kufuukula anateli kukwesekeja kukufunda njila, ilaña kufwila kwila chuma kunateli kubombelamu kwimika chikonkwanyi ilaña himukuzatisha hohu njila yimu yakushikijilamu chikonkwanyi chenichuku.

2, 3. (a) Yumanyi yabombelamu muyuma yafwilaña kwilayi Yehova, nawa munjilanyi mwakoñeleliyi kukala kweniku kwamwekeni hampinji Adama naEvu yavulumwinuwu? (b) Muloñadi wutwatela kwilukila nikukalakala kwesekeja nayuma yafwilaña kwilayi Yehova?

² Neyi Yehova nakufwila kwila chuma chinakukeñayi, hafuukulaña hohu njila yimuku, ilaña wafuukulaña chuma chakakoñayi mukuhita kwampinji. (Efwes. 3:11) Chuma chakeñañayi kwila chabombelamu yuma yakeñeleñayi kukoñela antu nidinu iseki hakutachika, dikwila nawu kubalumuna dinu iseki kwikala mukala  waparadisa, mwakashakama antu awanina mukuwunda nawa nikwikala amuzañalu haya nyaka. (Kutach. 1:28) Adama naEvu chavulumwinuwu, Yehova wakoñeluhu chuma nikuloñesha njila kulonda yuma yakeñeleñayi kwila yikashikijewa chikupu. (Tañenu Kutachika 3:15.) Yehova wafuukwiluhu nindi mumbanda windi wachifwikija wakavwala ‘lubutu,’ hela Mwana, wakajilumuna Satana, waleteli kukala kweniku, nikumanisha kukala kwejima kwaletayi.—Heb. 2:14; 1 Yow. 3:8.

³ Kwosi chuma nichimu chamwiwulu hela chaheseki chinateli kumukañesha Nzambi kukoña yuma yafwilaña kwilayuku. (Isa. 46:9-11) Muloñadi chitukuhoshela mwenimu? Muloña Yehova wazatishaña spiritu yindi yajila. Iyi ñovu yabadika yaleñelaña ‘kukoña chachiwahi mudimu’ kutalisha hayuma yakeñaña kwilayi Nzambi. (Isa. 55:10, 11) Twatela kwiluka nikukalakala kwesekeja nayuma yakeñaña kwilayi Nzambi. Chihandilu chetu chakumbidi chashindamena hayuma yikakoña spiritu. Kubombelahu, chikuhwelelu chetu chakolaña hakumona Yehova chazatishañayi spiritu yajila. Ichi dinu, tushinshikenu mudimu wazatileña spiritu kumafuku akunyima, mudimu wazataña spiritu makonu, nimudimu wukazata spiritu kumpinji yakumbidi hakukalakala yuma yakeñañayi kwila.

Mudimu Wazatileña Spiritu Yajila kuMafuku Akunyima

4. Indi Yehova wasolweleña ñahi yuma yakeñañayi kwila?

⁴ Mumpinji yakushankulu, Yehova wamwekesheli yuma yakeñeleñayi kwila. Hakutachika, Lubutu lwakaninuwu lwadiña ‘lwakujiinda.’ (1 Kor. 2:7) Chimwahitili yaaka 2,000 Yehova wateneni cheñi halubutu lwenilu. (Tañenu Kutachika 12:7; 22:15-18.) Yehova wamukanini Abarahama chikaninu chakaleñela yuma yayivulu kushikijewa. Nhoshelu yakwila nawu ‘mudi lubutu lweyi’ yamwekesheli hatooka nawu Lubutu lwakenza hamu neyi muntu, mwana kaAbarahama. Tunakuhweleli netu Satana wamweneña halumbulwileñawu nsañu yeniyi kulonda kwiluka yuma yazatikileña. Chakadi nikujina, iwu chilumbu wakeñeleña kujilumuna hela kukisañana mutaña waAbarahama kulonda kukañesha yuma yakeñeleña kwilayi Nzambi. Ilaña chumichi hichazatikiluku, muloña spiritu yaNzambi yakamonewaña yazatikileña. Munjilanyi?

5, 6. Indi Yehova wazatishili ñahi spiritu yindi kulonda kukiña mutaña waAbarahama ndo-o nikukuvwalika kwaLubutu?

⁵ Yehova wazatishili spiritu yindi kulonda kukiña antu amumutaña waAbarahama ndo-o nikukuvwalika kwalubutu. Yehova wamulejeli Abarama (Abarahama) nindi: “Ami yami nkebu yeyi.” (Kutach. 15:1) Awa mazu hiyadiña amukunkulwayuku. Chakutalilahu, shinshikenu hachuma chazatikili kukamwihi nachaaka cha 1919 B.C.E. helili Abarahama naSara ayi nakushakama kuGerari hakapinji kantesha. Hakubula kwiluka nindi Sara wadiña iñoda Abarahama, Abimeleki, mwanta wakuGerari, wamusendeli Sara kulonda yekali iñodindi. Komana Satana wadiña nakuyuula yuma chakadi wena kwiluka, nakumukañesha Sara kubula kuvwala lubutu lwaAbarahama? Bayibolu hiyashimunaku. Chuma chiyashimuna chakwila nawu Yehova wadiñijilumu munsañu yeniyi. Muchilota, Yehova wamubabesheli Abimeleki kulonda kubula kukwata hamujimba waSara.—Kutach. 20:1-18.

⁶ Iyi hidiyi hohu mpinji yayikiñiluwu kudi Yehovaku. Yehova wamupulwishili Abarahama nichisaka chindi kapampa kakavulu. (Kutach. 12:14-20; 14:13-20; 26:26-29) Ñimbi yamasamu wahosheli kutalisha hadi Abarahama nianyanindi nindi: “[Yehova] hetejeli muntu kuyila chatamaku; mwalala hela anyanta ankanu wayihosholeli hanyijimba yawu; Nakuyila nindi, Bayi mukwataña chikasa hadi antu ami akuwayisha dehi manjuku, hela atuprofwetu twami bayi muyilaña chuma chatamaku.”—Mas. 105:14, 15.

7. Munjilanyi Yehova mwakiñililiyi munza waIsarela?

⁷ Kuhitila mukuzatisha spiritu yindi, Yehova wakiñili munza waIsarela wakushankulu, Mwavwalikilili Lubutu lwakaninuwu. Kuhitila mukuzatisha spiritu yindi, Yehova wayinkeli aIsarela Nshimbi jindi, jakiñili kudifukula kwalala nikuyikiña aYudeya kuspiritu, kuyililu, nikwikala awunyonji kumujimba. (Kwid. 31:18; 2 Kor. 3:3) Mumpinji yawaNsompeshi, spiritu yaYehova yakwashili  amayala amakwawu kupulwisha Isarela kudi ayilumbu jindi. (Ansomp. 3:9, 10) Munkulakaji jayaaka jashikili ndo-o nikukuvwalika kwaYesu, mbadi yatachi yalubutu lwaAbarahama, spiritu yajila yatela yakiñili Yerusalema, Betelemi, nitembeli, yuma yejimiyi yalombweli kukushikijewa kwawuprofwetu kutalisha hadi Yesu.

8. Yumanyi yamwekeshaña nawu spiritu yamulombweleña Mwana kaNzambi muchihandilu chindi nimumudimu wakushimwina?

⁸ Spiritu yajila yamulombweleña Yesu muchihandilu chindi nimumudimu wakushimwina. Spiritu yajila yazatikili mwivumu damujiki Mariya, nakukoña chuma chakadi kumonañahu dehi. Yaleñeleli mumbanda wabula kuwanina kubaaba ivumu nakuvwala Mwana weyala wawanina, wabulili kufwa hamuloña wanshidi. (Luka 1:26-31, 34, 35) Mukuhita kwamafuku, spiritu yakiñili mukeki Yesu kulonda kubula kufwa swayi. (Mat. 2:7, 8, 12, 13) Yesu hadiñayi nayaaka yakusemuka 30, Nzambi wamuwayishili spiritu yajila, nakumutonda kwikala nswana wetanda daDavidi nikumwinka mudimu wakushimwina. (Luka 1:32, 33; 4:16-21) Spiritu yajila yamwinkeli ñovu Yesu kulonda kukoña yihayamisha, kubombelahu nikuuka akata, kudyisha mazaza, nikusañula afu. Iyi yuma yabadika kulema yamwekesheleña nkisu jitukatambwila muchiyuulu chikayuulewaña naYesu hamu neyi mwanta.

9, 10. (a) Indi spiritu yazatikili ñahi hadi atumbanji twaYesu amuyaaka nkulakaji yakusambila? (b) Chumanyi chachiha chamwekeni muyaaka nkulakaji yakusambila C.E. kutalisha hanjila Yehova yakakoñelamu yuma yakeñañayi kwila?

⁹ Kutachika haPentekosta 33 C.E., Yehova wazatishili spiritu yindi kulonda kuwayisha mbadi yamuchiyedi yalubutu lwaAbarahama, antu amavulu hiyafumini kumutaña waAbarahamaku. (Rom. 8:15-17; Ŋal. 3:29) Spiritu yajila yazatikileña hadi atumbanji twaYesu amuyaaka nkulakaji yakusambila, nakuyileñela kushimwina neyena nikuyinka ñovu yakukoña nyidimu yamaneni. (Yil. 1:8; 2:1-4; 1 Kor. 12:7-11) Chineli atambwilili yawaana yayihayamisha yaspiritu, chumichi chamwekesheli chuma chachiha kutalisha hanjila Yehova yakakoñelamu yuma yafwilaña kwilayi. Yehova hakeñeleña antu kudifukulaña neyi chayilejeliyi kudifukulaña munkulakaji jayaaka jadiñaku kwadifukwilileñawu mutembeli yadiña muYerusalemaku. Washili maana hachipompelu chawakwaKristu chachiha. Kufuma hayina mpinji, Yehova wazatishaña chipompelu chenichi chawayishewa kulonda kushikija yuma yafwilaña kwilayi.

¹⁰ Kukiña, kwinka ñovu, nikuwayisha, hinjila jantesha hohu mwazatishililiyi Yehova spiritu yindi yajila mumpinji yakushankulu kulonda yuma yakeñañayi kwila yikashikijewi. Indi makonu, Yehova wazatishaña ñahi spiritu yindi kulonda kukoña yuma yakeñañayi kwila? Twatela kwiluka, muloña tunakukeña kuzata kwesekeja nachazataña spiritu. Ichi dinu, tushinshikenu hanjila jiwana mwazatishilañayi Yehova spiritu yindi makonu.

Mudimu Wazataña Spiritu Yajila Makonu

11. Chumanyi chamwekeshaña nawu spiritu yajila yakwashaña antu jaNzambi kwikala awunyonji, nawa munateli kumwekesha ñahi nenu munakulondela munakuyilombola spiritu yeniyi?

¹¹ Chatachi, spiritu yajila yakwashaña antu jaNzambi kwikala awunyonji. Antu jaNzambi amukalakelaña kwesekeja nachakeñañayi nawa akahetela muyuma yakeñañayi kwila, atela kwikala nayililu yayiwahi. (Tañenu 1 Akorinda 6:9-11.) Antu amakwawu ekalaña akwaKristu, hakusambila adiña nakukoña yuma yatama yindi neyi wuvumbi niwutumwa. Kufwila kwatama kwabaabaña ivumu kwaleñelaña kukoña yuma yatama kunateli kuswejelaku. (Yak. 1:14, 15) Ilaña, antu wenawa “ayiwelesheli,” chinakumwekesha nawu anahimpi muchihandilu chawu kulonda kumutiyisha Nzambi kuwaha. Chumanyi chaleñelaña muntu wamukeña Nzambi kukaana chikupu yitoñojoka yakufwila kwila yuma yatama? 1 Akorinda 6:11, yahosha nawu: “Spiritu yaNzambi yetu.” Neyi mwikala nayililu yayiwahi, dikwila nawu munakwiteja spiritu yeniyi kulonda yiyilomboleña muchihandilu chenu.

12. (a) Kwesekeja nachimwenu chaEzekeli, indi Yehova walombolaña ñahi kuloñesha kwindi? (b) Munateli kumwekesha ñahi nenu munakulondela mwayilombolaña spiritu?

¹² Chamuchiyedi, Yehova wazatishaña spiritu yindi kulonda kulombola kuloñesha kwindi  munjila yinakukeñayi. Muchimwenu chamweniyi Ezekeli, mbadi yakuloñesha kwaYehova kwamwiwulu ayimenañaku kudi ikalu damwiwulu dasweja ñovu dinakwenda kulonda kukoña yuma yakeñaña kwilayi Yehova. Chumanyi chaleñelaña ikalu kuya kwiluña dindi dejima? Spiritu yajila. (Ezek. 1:20, 21) Twatela kwiluka netu kuloñesha kwaYehova kwatuñewa nambadi jiyedi, mbadi yimu yamwiwulu nawa yikwawu yahamaseki. Neyi chakwila mbadi yamwiwulu ayilombolaña kudi spiritu yajila, dikwila nawu, nimbadi yahamaseki niyena ayilombolaña kudi spiritu yajila. Neyi mwovwahilaña nikwikala ashinshika kuwunlomboli wumwatambwilaña kufuma kumbadi yakuloñesha kwaNzambi kwahamaseki, dikwila nawu munakwendela hamu nekalu daYehova dakwiwulu nawa munakulondela mwayilombolaña spiritu yajila.—Heb. 13:17.

13, 14. (a) Hiyanyi atuña “chisakichi” chateneniyi Yesu? (b) Shimunenu chakutalilahu chinakumwekesha nawu spiritu yajila yinakuleñela chalala chamuBayibolu kwikala chatiyakana chikupu. (Talenu chikasha chinakwila nawu “Komana Munakulondela Chejeji chakuSpiritu Chinakutoñekelaku?”)

¹³ Chamuchisatu, Yehova wazatishaña spiritu yindi kulonda kutukwasha kwiluka chalala chamuBayibolu. (Yish. 4:18) Ayinu magazini anayizatishi hadi yaaka yayivulu kudi ‘nduñu wamaana nikashinshi’ hamu neyi njila yalema yakulumbulwilamu chalala chamuBayibolu. (Mat. 24:45) Chakutalilahu, shinshikenu hachalala chitweluka kutalisha hadi antu atuña “chisakichi” chateneniyi Yesu. (Tañenu Matewu 24:32-34.) Indi Yesu wateneneña chisakanyi? Chibaaba chinakwila nawu “Indi Kwinza kwaKristu—Kunayilumbulukilidi?” chalumbulwili nawu Yesu hateneneña antu atamaku, ilaña wateneneña atumbanji twindi, adiña kukamwihi nakuyiwayisha naspiritu yajila. * Atumbanji twaKristu awayishewa, amuyaaka nkulakaji yakusambila niamakonu, akamona chinjikijilu nikwiluka chichalumbuluka, chakwila nawu Yesu “wudi kwakwihi, kwokuyisu kachi.”

¹⁴ Indi mazu wenawa anakulumbulukadi kudetu? Hela chakwila hitunateli kwiluka chikupu yaaka yikahitahu hakwila nawu “chisakichi” chikakumuku, twatela kwiluka yuma yayivulu kutalisha hezu dakwila nawu ‘chisaka’: Kakavulu dakundama kudi antu ashiyashana yaaka yakusemuka. Akulumpi atwalekañahu kuhanda muyaaka yawu yakumelela, ilaña atwansi azabukaña muyaaka yawu yakubudidi. (Kwid. 1:6) Indi Yesu watalishili mudihi chahosheliyi nindi “chisakichi”? Watalishili mukwila nindi ikiñu daawayishewa adiñaku hampinji yatachikili kumwekana chinjikijilu mu 1914 dikatwalekahu  nakushika mwikiñu daawayishewa akamona kutachika kwehuñu deneni. Chisaka chenichi chadiña nantachikilu, nawa chakadi nikujina chakakuma. Chineli yuma yayivulu yinakwimenaku chinjikijilu yinakushikijewa, chinakumwekesha hatooka nawu ihuñu dasweja didi kukamwihi. Neyi mwikala atona, dikwila nawu munakuyilaku hambidi mukwiluka chalala chamuBayibolu nawa munakulondela munakuyilombola spiritu yajila.—Maku 13:37.

15. Chumanyi chinakumwekesha nawu spiritu yajila diyi yatwinkaña ñovu kulonda kushimwina nsañu yayiwahi?

¹⁵ Chamuchiwana, spiritu yajila yatwinkaña ñovu kulonda kushimwina nsañu yayiwahi. (Yil. 1:8) Komana kuduhu chuma chikwawu chinakumwekesha nsañu yayiwahi chiyanakuyishimwinawu mukaayi kejima? Toñojokenu hanichi. Hadaha mwekala hakachi kawantu atoñojokeleña nawu ‘hiyanateli kuya nakushimwina kwitala nikwitalaku’ hamuloña wansonyi hela woma. Ilaña chayinu mpinji munakudikita chikupu mumudimu weniwu. * A Yinsahu jaYehova amavulu ashinshika anatwelekuhu kushimwina mumpinji yekañesha hela makabi. Spiritu yajila yaNzambi diyi yinateli hohu kutwinka ñovu yakushinda ikañesha nikwila yuma yitunateli kubula kwila muñovu jetu. (Mika 3:8; Mat. 17:20) Neyi muzataña chikupu mumudimu wakushimwina, dikwila nawu munakulondela munakuyilombola spiritu yeniyi.

Mudimu Wukazata Spiritu Yajila kuMpinji yaKumbidi

16. Muloñadi wutwatela kukuhwelela chikupu netu Yehova wakakiña antu jindi hampinji yehuñu dasweja?

¹⁶ Kumpinji yakumbidi, Yehova wakazatisha spiritu yindi yajila munjila jakuhayamisha kulonda kukoña yuma yakeñañayi kwila. Shinshikenu ntahi hansañu yakukiña. Neyi chitunadizi, Yehova wazatishili spiritu yindi yajila kulonda kukiña antu jindi kubombelahu nimunza waIsarela. Chumichi chatuleñelaña kukuhwelela netu wakazatisha spiritu yabadika ñovu kulonda kukiña antu jindi hampinji yehuñu dasweja. Hitwatela kubokaña njila yakatwikiñilamu Yehovaku. Ilaña, twatela kukuhwelela chikupu netu mesu aYehova akekalaña hadi antu amukeña nawa spiritu yajila yikayikiñaña mpinji yejima.—2 Kushi. 16:9; Mas. 139:7-12.

17. Indi Yehova wakazatisha ñahi spiritu yindi yajila mwituña dadiha?

¹⁷ Indi Yehova wakazatisha ñahi spiritu yindi yajila mwituña dadiha dinakwinza? Spiritu yeniyi akayizatisha chikupu hakabakulawu nyikanda yayiha hayina mpinji. (Chim. 20:12) Yumanyi yikasonekawu munyikanda yeniyi? Akasonekamu nshimbi jaYehova jitukalondelaña mwikombakaji dayaaka. Komana mwatalilaña kulonda kutaña yuma yakasonekawu munyikanda yeniyi? Twatalilaña chikupu ituña dadiha denidi. Iyi yakekala mpinji yayiwahi chikupu hakazatishayi Yehova spiritu yindi yajila kulonda kukoña yuma yakeñañayi kwila hanu hamaseki nikudi muchidi wamuntu.

18. Chumanyi chimunakufwila kwila?

¹⁸ Twatela kwiluka netu yuma yakeñañayi Yehova kwila yakashikijewa, muloña wazatishaña spiritu yindi yajila, ñovu yabadika mukuleña kwejima, kulonda kwila yuma yakeñañayi kwila. Anenu nawa mwekala hakachi kayuma yakeñañayi Yehova kwila. Dichi, fwilenu kulombaña spiritu yaYehova nikulondelaña muyinakuyilombola. (Luka 11:13) Neyi mwilaña mwenimu, munateli kwikala nakuchiñeja kwakushakama neyi chakeñeleñayi Yehova nindi antu ashakameña, haya nyaka muParadisa hanu hamaseki.

[Tumazu twaheshina]

Munakwanuka?

• Munjilanyi Yehova mwazatishililiyi spiritu yindi yajila kushankulu kulonda kushikija yuma yakeñañayi kwila?

• Indi Yehova nakuzatisha ñahi spiritu yindi makonu?

• Indi Yehova wakazatisha ñahi spiritu yindi kumpinji yakumbidi kulonda kukoña yuma yakeñañayi kwila?

[Malwihu aKuzatisha haKudiza]

[Chikasha chidi hefu 10]

Komana Munakulondela Chejeji chakuSpiritu Chinakutoñekelaku?

Yehova nakutwalekahu kulumbulula chalala chamuBayibolu kudi antu jindi. Kuhimpikanyi kwasonekawu muKaposhi Kakutalila?

▪ Indi chishimu chaYesu cheluñi chahosha hayumanyi yayiwahi yakundama hakukula kuspiritu? (Mat. 13:33)—July 1, 2008, mafu 27-28.

▪ Indi mutambi wawakwaKristu wakuya mwiwulu wamanaña mpinjinyi?—Kaposhi Kakutalila kaChibemba kaMay 1, 2007, mafu 30-31.

▪ Indi kudifukula kudi Yehova “muspiritu” kwalumbulukadi? (Yow. 4:24)—Kaposhi Kakutalila kaChibemba kaJuly 15, 2002, ifu 15.

▪ Muchipañwinyi mwakalakelañawu ezaza deneni? (Chim. 7:15)—Kaposhi Kakutalila kaChibemba kaMay 15, 2002, mafu 30-31.

▪ Indi kwambula anyikoku nawampembi kwatachikaña mpinjinyi? (Mat. 25:31-33)—Kaposhi Kakutalila kaChibemba kaOctober 15, 1995, mafu 18-28.