Komana Mwamwitejaña Yehova Kuyihula?

BAYIBOLU yikweti malwihu ashikaña hanyichima yawantu. Kafwampi, Yehova Nzambi wazatishaña malwihu kulonda kudizisha chalala. Chakutalilahu, Yehova wazatishili malwihu amavulu hampinji yamusoñamishiliyi Kena kulonda kumufumba hachuma chaluwa chakeñeleñayi kwila. (Kutach. 4:6, 7) Hampinji jikwawu, Yehova wehwileña hohu lwihu lumu kulonda kuleñela muntu kukoñahu chuma. Chatiyiliyi Yehova nakwihula nindi: “Nukutemeshanyi? Wukutuyila hinyi?” kaprofwetu Isaya waakwili nindi: “Yamonu ntemeshami.”—Isa. 6:8.

Yesu, Ntañishi Muneni, niyena wenhwileña chikupu malwihu. Munsañu yayiwahi mwekala malwihu akubadika ha 280 enhwiliyi Yesu. Hela chakwila hampinji jikwawu wazatishileña malwihu kulonda kumwenesha akwakudimbulula, kakavulu wakeñeleña kushika hanyichima yawantiyilili jindi, nakuyileñela kutoñojoka hawuspiritu wawu. (Mat. 22:41-46; Yow. 14:9, 10) Chochimu, kapostolu Pawulu wasonekeli Nyikanda yawakwaKristu yachiGriki 14, niyena wazatishileña malwihu munjila yakushinjila. (Rom. 10:13-15) Chakutalilahu, mukanda windi wasonekeleliyi Aroma mwekala malwihu amavulu. Malwihu enhwiliyi Pawulu aleñelaña antañi jindi kuhameka ‘maheta amaana nayuma yelukayi Nzambi, yakunama.’—Rom. 11:33.

Malwihu amakwawu aleñelaña kwakula, ilaña amakwawu aleñelaña muntu kutoñojokahu chikupu. Munsañu yayiwahi asonekamu ochu Yesu chazatishiliyi malwihu kulonda kuleñela antu kutoñojokahu chikupu hayuma yahosheleñayi. Hampinji yimu, Yesu wababesheli atumbanji twindi nindi: “Shinshikenu mubabeli iluñi dawaFwarisi niiluñi daHerodi,” dikwila nawu wunfwikiji wawu nintañishilu yakutwamba. (Maku 8:15; Mat. 16:12) Atumbanji twaYesu hiyelukili mwatalishiliyi Yesuku, chakwila atachikili kuditadikisha hamuloña wakwila alalameni kusenda mankendi. Talenu Yesu chazatishiliyi malwihu mukuhanjeka kwakwihi kwalondeleluhu. “Hakuyila nindi, Mwenda mudihujoleladi nenu chochitunabuli mankendi? Nihanu kanda mushinshiki, kanda mwiluki? Nyichima yenu saña yachinchikila? Mesu mukweti, himwamonañaku? Matu mukweti, himwatiyañaku? Himwaanukañaku? . . . Nihanu kanda mwiluki?” Malwihu enhwileñayi Yesu aleñeleleña atumbanji twindi kutoñojoka, nakuleñela atumbanji twindi kutoñojoka hachalumbulukili mazwindi ahosheleñayi.—Maku 8:16-21.

“Nakeñi kukwihula”

Yehova Nzambi wazatishili malwihu kulonda kuhimpa yitoñojoka yakambuñindi Yoba. Kuhitila mukumwihula malwihu amavulu, Yehova wamulejeli Yoba nindi halema kubadika Nleñi yinduku. (Yoba, tupe. 38-41) Komana Yehova wakuhweleleli kutiya ñakwilu yamalwihu wenawa? Hidimuku. Malwihu adi neyi “Hinaalili chikuku cheseki eyi wadiñi kudihi?” chakadi nikujina adiña akumuleñela Yoba kutoñojokahu chikupu. Hanyima yakumupopa malwihu wenawa, Yoba washalili kwamukanwa boku. Wakuminini dakuhosha nindi: “Nukukwakula namidi? Nakumini dehi dakukwata chikasa kukanwa.” (Yoba 38:4; 40:4) Yoba watiyili chikuma nawa wadikehesheli. Hela chochu, Yehova hamudizishileña hohu Yoba kudikeheshaku. Cheñi Yoba amufumbili muyitoñojoka. Munjilanyi?

Hela chakwila Yoba wadiña “iyala walala woloka” mpinji jikwawu mazu indi amwekesheleña yitoñojoka yaheña, yaleñeleli Elihu yamuzuwili hamutiyiliyi Yoba ‘nakudiyiñisha yomweni chatela kuyiñisha Nzambi.’ (Yoba 1:8; 32:2; 33:8-12) Malwihu enhwiliyi Yehova  amuleñeleli Yoba kwiluka chiwahi yuma. Hakuhosha naYoba kuhitila muchinjimbi, Nzambi wahosheli nindi: “Yeniwu wudi nakwiyilisha mpuña namazu akadi kwiluka hinyi? Pimpilaku mahineyi neyi iyala; muloña nakeñi kukwihula wunleji.” (Yoba 38:1-3) Kuhitila mukumwihula Yoba malwihu, Yehova washili maana hañovu jindi nimaanindi akeha kwesekeja nanyidimu yindi yayiwahi. Iyi yuma yelukiliya Yoba yamukwashili kukuhwelela muwunsompeshi waYehova ninjila mwakoñelañayi yuma. Yoba wamweni chuma chekomwesha, kumwihula kudi Nzambi waNovu jejima.

Chitwatela Kumwiteja Yehova Kutwihula Malwihu

Indetu? Komana anetu tunateli kuhetela mumalwihu asonekawu muBayibolu? Eña! Neyi awa malwihu atwileñelaña kutoñojoka, tukuhetelamu chikupu kuspiritu. Malwihu ashikaña hamuchima ekala Mwizu daNzambi ekala hakachi kayuma yaleñelaña Izu denidi kwikala dañovu. Mwamweni, ‘izu daNzambi . . . dikweti ñovu . . . dasweja kushinshika yitoñojoka niyafuukulaña muchima.’ (Heb. 4:12) Hela chochu, hakwila nawu tuhetelumu, twatela kudihula malwihu wenawa hamuntu hamuntu neyi kwiji Yehova diyi wunakutwihula. (Rom. 15:4) Tushinshikenu hayakutalilahu yikwawu.

“Mukwakusompesha iseki dejima abuli kwila mwaloña?” (Kutach. 18:25) Abarahama wamwihwili Yehova lwihu lwenilu hampinji Nzambi hasompesheliyi mukala waSodoma naGomora. Abarahama watoñojokeli nindi chikwikala chaheña kumesu aYehova kujilumuna antu aloña hamu nawantu atama. Malwihu enhwileñayi Abarahama amwekesheli nawu wamukuhwelela Yehova nindi waloña.

Makonu, antu amakwawu abokaña kutalisha hawunsompeshi waYehova wakumpinji yakumbidi, chidi neyi anyi akapuluka haAmagedoni hela nawu anyi akasañuka. Chatela twitejeña yitoñojoka yamuchidiwu kutuluwañesha, twatela kwanuka lwihu lwehwiliyi Abarahama. Kumwiluka Yehova netu hiTata yetu wamwiwulu nikwiluka netu wahakulaña mwaloña nawa wukweti wushona, neyi cheliliyi Abarahama, chikutuleñela kubula kumanisha mpinji niñovu nakwakamena yuma yamukunkulwayi, nikujinoka, nikutadeka hayuma yakadi mudimu.

“Mwinenwinyi wukwila akame-e, anuña kuchiminu chindi chikunku chakweseka munkotweli yachikasa yimu?” (Mat. 6:27) Yesu hahosheleñayi kwizaza deneni kubombelahu niatumbanji twindi, wehwili ilu lwihu kulonda kukonkomwena hamuloña wuyatela kushindamenenawu hadi Yehova. Mafuku akukumininaku anshakaminu yamakonu atwileñelaña kwakama, dichi kutoñojokaña  hayuma yeniyi hikukutuleñela kushakama yaaka yayivulu hela kuwahisha chihandilu chetuku.

Neyi tutachika kwakama etwaweni hela hadi antu itwakeña, kwanuka lwihu lwehwiliyi Yesu kunateli kutukwasha kumona yuma yitunakwakama munjila yayiwahi. Yinateli kutukwasha kuleka kwakama nikutoñojoka yuma yatama yatuneñeshaña muyitoñojoka nikumujimba. Kwesekeja nachatukaniniyi Yesu, Tata yetu, wadyishaña atujila amwiwulu nikuvwika matahu amwisaña, weluka yuma yitwakeñaña.—Mat. 6:26-34.

‘Muntu asha kesi hatulu yindi mahinindi hiyakuhaku?’ (Yish. 6:27) Tupetulu tutanu natuwana twamukanda waYishimu mwekala mpanji jajihi jahosha hadi tata yawantu wunakuleja mwanindi weyala maana. Lwihu ludi hewulu lunakuhosha hayuma yatama yafumaña mukwila wuvumbi. (Yish. 6:29) Neyi twiluka netu tunakudiñija muyililu yakufwila kwila wuvumbi, ilu lwihu lwatela kutusoñamishaña kuwubanji. Nkisu jafumaña mukudihula lwihu lwenilu jekala jajivulu nawa jinateli kutukwasha kubula kudiñija muyililu yakufwila kwila wuvumbi. Lwihu lwenilu lwakonkomwenaña halushimbi lwaluwahi lwamuBayibolu lwakwila nawu: ‘Wakadya yuma yiwadimini.’—Ŋal. 6:7.

“Eyi wukusompesha ñamba yambala, yeyinyi?” (Rom. 14:4) Mumukanda windi wasonekeleliyi Aroma, Pawulu wahosheli hakukala kwamwekeni muchipompelu chamuyaaka nkulakaji yakusambila. AkwaKristu amakwawu afumineña kuyisemwa yashiyashana, adiña nachaaku chakusompesha akwawu akakwitiya hayuma yafuukwileñawu nikukoña. Lwihu lwaPawulu lwayanukishili kumwekesha chisambu kudi wumu namukwawu nikushiya wunsompeshi mumakasa aYehova.

Chochimu nimakonu, antu jaYehova afumaña kuyisemwa yashiyashana. Hela chochu, Yehova watuleta hamu. Komana twazataña nañovu kulonda kwikala anuñañana? Neyi twekala nachaaku chakusekesha yuma yinafuukuliyi mana kwetu, chachiwahi kudihula lwihu lwaPawulu ludi hewulu.

Malwihu Atukundamishaña Kwakwihi naYehova

Iyi yakutalilahu yantesha yinakumwekesha ochu malwihu ekala Mwizu daNzambi chiyanateli kuleñela muntu kudishinshika chikupu. Kwiluka nsañu yidi mulwihu ludi lwejima kunateli kutukwasha kwiluka mwakuzatishila chiwahi nsañu yenoyu muchihandilu chetu. Nawa chitukutañaña Bayibolu, tukwilukilahu malwihu amakwawu anateli kutukwasha.—Talenu chikasha chidi hefu 14.

Neyi twiteja malwihu ashikaña hamuchima ekala Mwizu daNzambi kutwishika hamuchima chikupu, akutukwasha kutoñojokaña kwesekeja nanjila jaYehova jaloña. Hanyima yakwila Yehova namwihuli dehi, Yoba wetejeli nindi: “Nakutiyili kwamumatu hohu, ichi dinu nakumoni namesu ami.” (Yoba 42:5) Chakadi nikujina, Yoba wamwilukili Yehova chikupu, wukwila neyi wadiña nakumumona namesu kapu. Kambanji Yakoba niyena washimwini muniyi njila nindi: “Kundamenu kwakwihi naNzambi, niyena wukukundama kwakwihi nanenu.” (Yak. 4:8) Dichi, twatela kuzatishaña nsañu yekala Mwizu daNzambi kubombelahu nimalwihu ekalamu, kulonda kutukwasha kuyilaku hambidi kuspiritu ‘nikumumona’ Yehova chikupu.

[Chikasha chidi hefu 14]

Indi kudihula awa malwihu kunateli kuyikwasha ñahi kumona yuma neyi chayimonañayi Yehova?

▪ “ Komana Yehova watiyaña kuwaha nanyilambu yakushita, niyimuna yakuketula chakweseka nakwovwahila izu daYehova tahindi?”—1 Sam. 15:22.

▪ “ Wawumbili disu, abuli kumona?”—Mas. 94:9.

▪ ‘ Antu neyi akudikeñakeñela kulema kwawu awenawu, komana dikulema?’—Yish. 25:27.

▪ “ Chachiwahi chiwukuzuwa?” —Yona 4:4.

▪ “ Neyi muntu wukuheta mpata yamunu mwishina yejima, ajimbeshelaku wumi windi, wakadiila kwodi?” —Mat. 16:26.

▪ “ Wukutwambula kukukeña kwaKristu hinyi?”—Rom. 8:35.

▪ “ Chuma chiwukweti chiwunabuli kutambula chumanyi?”—1 Kor. 4:7.

▪ “ Chejeji namwidima akutwesha kutiyañana?”—2 Kor. 6:14.

[Mwevulu wudi hefu 15]

Yumanyi yadiziliyi Yoba kumalwihu amwihwiluwu kudi Yehova?