Kuumika Kweseka Kwatuleñeleli Kumukuhwelela Chikupu Yehova

Mukwakushimuna Ada Dello Stritto

Namanishili hohu kusoneka nsona yefuku mumukanda wami wakusonekamu nsañu. Nidi nayaaka yakusemuka 36, ilaña hakusoneka nyikuku yamazu yeniyi namanishili maora ayedi. Muloñadi? Amama akulumbulula.—Joel

AMI NINFUMWAMI twapapatisheweli hamu neyi aYinsahu jaYehova mu 1968. Hanyima yakuvwala anyana ayedi awamayala akola kumujimba David niMarc, navweli mwana weyala wamuchisatu wejina daJoel. Wavwalikili wamwisu mu 1973 muchipatela chamunkambi yaBinch muBelgium, hadiña makilomita kwakwihi na 60 kukabeta kambwela kaBrussels. Wadiña namakeji 1.7. Hampinji yamfumishiluwu muchipatela, Joel washeli muchipatela kulonda yaswijuku makeji.

Chimwahitili nyilungu chakadi kuhimpika, ami ninfumwami Luigi, twamutweli kudi ndotolu wakuluka yitembi mukuuka nyana yanyanya. Hanyima yakukeñakeña chikatu chakatileñayi Joel, ndotolu wahosheli nindi: “Chawushona hama. Joel namwekani neyi wudi nakukala kweneni.” Ndotolu chatulejeliyi mwenimu, twamweneni kwanzo-o. Haniyi mpinji, dihu nelukili nami mwanetu wukweti kukala kweneni. Kufumahu, ndotolu wamutambikili nfumwami kumbadi nakumuleja nindi: “Mwaneyi wudi nachikatu chatenañawu nawu trisomy 21,” hela nawu Down syndrome. *

Chelili ndotolu wakuluka yitembi mukuuka anyana nawani dehi chikatu chenichi, twafuukwiluhu kwihula ndotolu mukwawu wakuluka yitembi mujakuuka. Wakeñakeñeli nakanañachima chikatu chakatileñayi Joel kwakwihi naora yimu chakadi kuhoshahu nizu dimu. Ami niLuigi twatoñojokeli netu jinatwikumi dehi. Nkumininaku, ndotolu wenukili nakuhosha nindi, “Mwanenu wakashindamena hohu hadenu.” Kufumahu, wahosheli mazu akukolesha, nakubombelahu nindi, “Ilaña Joel, wakazañalala muloña anvwali jindi amukeña chikupu.” Chinatiyili mazu wenawa, namwakatili Joel nakufunta kwitala. Haniyi mpinji, wadiña nanyilungu yitanu nayisatu yakusemuka.

 Kupompa kwawakwaKristu niMudimu waKushimwina Kwatukolesheli

Kusandujola kukwawu kwamwekesheli nawu Joel wadiña nachikatu chikwawu chakunana muchima nikwikala namafwaha amwovu. Hamuloña wakwikala namuchima weneni, washintakesheleña heshina mapwapwa nakukojeja nyisoñu yikwawu. Hashimbwili wanyi, hadiñayi natukweji tuwana twakusemuka, Joel wakatili chikatu chabronchial pneumonia [chikatu chakukañanya koona chiwahi] nawa twamufuntishili cheñi kuchipatela, kwamutentekeluwu mukapeka kakankawindi. Twatiyileña kutama hakumona chakabakeneñayi. Twakeñeleña kumwakata nikumwakamena, ilaña hiyatwitejeleña kumukwata hadi nyilungu ikumuku. Ami niLuigi twamutalileña hohu, twadikwatileña kumakasa nanfumwami nakulomba.

Hampinji yakukala kweniku, twatwalekeluhu kuyaña kukupompa kwachipompelu hamu naDavid wadiña nayaaka 6 niMarc wadiña nayaaka 3. Neyi tudi Hetala daWanta, twatiyileña neyi Yehova natukwati kumakasa. Hamaora itwadiña Hetala daWanta, hadi amana kwetu niahela, twatiyileña neyi tunakumutwika Yehova chitelu chitwadiña nachu, nawa twawundishileña nyichima yetu chikupu. (Mas. 55:22) Niamanansi awambanda adiña nakumwakamena Joel niwena elukili nawu kuyaña kukupompa kwawakwaKristu kwatukwashili kwikala akola.

Hampinji yeniyi, cheñi nalombeli chikupu kudi Yehova kunkolesha kulonda niyeña mumudimu wamwiha. Chatela nishakameña hohu hetala nakudila, nakeñeleña kuhanjekaña nawantu nikuyileja muloña wanleñeleli nikuhweleli chikupu muchikaninu chaNzambi chetuña mukabula yikatu. Mpinji yejima inakalakeleña mumudimu wakushimwina, nelukileña nami Yehova naakuli kulomba kwami.

“Chumichi Chakuhayamisha!”

Twazañaleli chikupu chamufumishiluwu Joel muchipatela nakuya hamu nindi kwitala. Ilaña hefuku dahiñiluhu twaneñeli cheñi. Joel wakatili nankashi nawa twamufuntishili kuchipatela mukunyakashana. Hanyima yakwila ndotolu namutalatali dehi, watulejeli nindi: “Joel nashali hohu natukweji tutanu nakamu nakufwa.” Chimwahitili tukweji tuyedi, henohu wudi natukweji tutanu natusatu twakusemuka, mazu atulejeliyi ndotolu amwekeni neyi alala muloña Joel wakatili nankashi. Dichi ndotolu washakamini hamu nanetu nakuhosha nindi: “Chawushona hama. Kwosi njila jikwawu mutwatela kumukwashilamu.” Kufumahu, wabombeleluhu nindi: “Hayinu mpinji, Yehova hohu diyi watela kumukwasha.”

Nayili cheñi mukapeka kamuchipatela mwamutentekeluwu Joel. Hela chakwila nazeyeli muyitoñojoka nikumujimba, hinakeñeleña kufuma kukadidi kwadiñayuku. Ahela akwaKristu amavulu enjileña nakushakama nanami, nawa Luigi wakameneneña anyanetu awamayala ayedi. Hahitili mulungu wumu. Mukukasumwisha, Joel wakatili chikatu chamuchima. Amanansi atemukilili mukapeka mwadiñayi ilaña hiyamweni njila mwakumukwashilaku. Chimwahitili jiminiti jantesha, nansi wumu wahosheli chovu nindi, “Nasumi kumwemba.” Ñovu jamanini, nawa nadilili ikuumbu nakufuma mukapeka. Nesekeli kulomba kudi Yehova, ilaña hinadiñi namazu akumuleja chinatiyileñaku. Chimwahitili jiminiti 15, nansi wantambikili nakuhosha nindi, “Joel napapuki.” Wankwatili kuchikasa nakuhosha nindi, “Twaya wumutali.” Chineñilili nakumutala Joel, hamuchima windi heteleña cheñi. Nsañu yakusañuka yatandili mukunyakashana. Amanansi, niandotolu niantu amavulu enjili nakumumona nakuhosha nawu, “Chumichi chakuhayamisha!”

 Hadiñayi Nayaaka Yiwana, Kwamwekeni Chuma Chakuhayamisha

Muyaaka yakusambila yachihandilu chaJoel, ndotolu wakuluka yitembi mukuuka anyana watulejeleña nindi, “mwatela kusweja kumukeña Joel.” Chineli Yehova watwakameneni hanyima yakuvwalika kwaJoel, anetu nawa twakeñeleña kumwakamena chikupu mwanetu. Twadiña nanjila jajivulu jakumwekamenamu muloña wakeñekeleña kumukwasha muyuma yejima yelileñayi.

Twamweneña kukala kwokumu hachaaka nichaaka hadi yaaka yitanu nayiyedi kufuma havwalikiliyi Joel. Hakachi kaOctober naMarch, wakabakeni nayikatu yoyimu, nawa twadiñi nakuzebela kuchipatela. Hampinji yoyimu, nadiña nakwakamena cheñi anyanetu awamayala David niMarc. Kufumahu, niwena atachikili kumukwashaku Joel kulonda yakoli, nawa mwafumini yuma yayiwahi. Chakutalilahu, andotolu amavulu atulejeli nawu Joel hamba kendaku. Ilaña ifuku dimu Joel hadiñayi nayaaka yiwana yakusemuka, mwanetu weyala Marc wamulejeli Joel nindi, “Imanaku, yileji amama neyi wunateli kwenda.” Chakuhayama, Joel watamwini mwendu. Twazañaleli hama chakwila chisaka chejima twalombeli kudi Yehova kulonda kumusakilila chakufuma hamuchima. Twamuhamekeleña Joel mpinji yejima neyi chakwila nakoñi chuma chidi chejima.

Kumudizisha Joel Hadi Nzambi Kufuma Kuwukeki Mwafumini Yuma Yayiwahi

Twayileña naJoel kukupompa Hetala daWanta. Hakumukiña kutububu tunateli kumuletela yikatu, twamusendeleleña mukakinga katufumbu tuwana mwasendelañawu anyana nawa mwajikika chiwahi. Hela chakwila washakamineña mwenimu, watiyileña kuwaha kwikala hakachi kawamana kwetu.

Amana kwetu niahela akwaKristu atukolesheleña hama, nakutumwekeshela kukeña nikutukwasha munjila jashiyashana. Mana kwetu wumu watwanukishileña mazu ekala haIsaya 59:1 akwila nawu: “Tiyenu, chikasa chaYehova hichinehihi mwaka chikañanyi kwamwinaku; hela matu indi hiyanalemendendi mwaka akañanyi kutiyaku.” Awa mazu akukolesha atuleñeleli kumukuhwelela Yehova.

Joel chakuliliyi, twamukwashili chikupu kulonda kumukalakelaña Yehova muchihandilu chindi. Twahanjekeleña nindi, twahosheleñanindi hadi Yehova munjila yatela kumukwasha Joel kumukeña chikupu Tata yindi wamwiwulu. Twalombeleña kudi Yehova chikupu kutukiswila kulonda yuma yitwamudizishileña Joel hadi Nzambi yikasoñi nyikabu yayiwahi.

Chashikiliyi muyaaka yamuma 13, twatiyileña kuwaha hakumona Joel nakulejaku antu abulakeneñayi chalala chamuBayibolu. Chatachikili kukusuka chilonda chamuladikiluwu henohu wudi nayaaka 14 yakusemuka, nazañaleli hama hampinji yañihwiliyi Joel nindi, “Mama, nimwinki mukwakuladika iwu mukanda wawundeli wahoshaña nawu Live Forever [Kushakama Haya Nyaka?] Chimwahitili yaaka yantesha, Joel amuladikili cheñi. Twelukili chikupu netu haniyi mpinji hanateli kuhandaku. Henohu kanda amuladiki, Joel wayinkeli andotolu mukanda wutwasonekeleli hamu nayena. Mukanda weniwu walumbulwili yuma yakuhwelelayi kutalisha hakuzatisha mashi. Mukwakuladika wamwihwili Joel nindi: “Wuneteji chinakuhosha iwu mukanda?” Joel wamwakwili nindi, “Eña mwani.” Twazañaleli nankashi hakumona mwanetu chamukuhwelelayi  chikupu Nleñi yindi nichafwilañayi kumutiyisha kuwaha. Akwanyidimu amuchipatela atukwashila hama, nawa twasakililili chikupu.

Joel Chayililuku Hambidi kuSpiritu

Joel hadiñayi nayaaka yakusemuka 17, wadihanini kudi Nzambi kuhitila mukupapatishewa mumenji. Hitwamba kadijimbala ifuku deniduku. Neyi tumona chinakuyilaku hambadi kuspiritu, twazañalalaña nankashi. Kufuma hayina mpinji, watwalekahu kumukeña chikupu Yehova nichalala. Kafwampi, Joel neyi nawani muntu wudi wejima, wakeña kuhosha nindi, “Chalala chamuBayibolu diwumi wami.”

Kukumana kwayaaka yindi yawukampululu, Joel wadizili kutaña nikusoneka. Chakeñekeleña kuzata nañovu kwamu. Hichadiña chapela kusoneka izu didi dejimaku. Kufuma hayina mpinji, watachikili kutañaña nsona yefuku mafuku ejima kufuma mumukanda waKutalatala muNsona Hefuku Hefuku. Kufumahu, wasandujoleleña nakanañachima hansona jasonekeleñayi mumukanda windi, chakwila chayinu mpinji mwekala nsañu yayiwahi.

Hamafuku akupompa, Joel wakeñaña chikupu nindi tuyeñahu dehi Hetala daWanta muloña wakeñaña kushikijaña antu ejima anakwiñila Mwitala daWanta. Watiyaña kuwaha kwakulahu hakupompa nikumuzatishaña muyimwenu. Cheñi, amuzatishaña kuyihosheli nimunyidimu yikwawu. Neyi nakutiya chiwahi kumujimba, twayaña nindi mumudimu wakushimwina mulungu nimulungu. Muchaaka cha 2007, abidikili kuchipompelu nawu Joel anamutondi kwikala nkoñi wakuzatila. Twadilili hamuloña wamuzañalu. Yehova watukiswilili chikupu.

Tweluka Chikupu Netu Yehova Watukwashaña

Muchaaka cha 1999 twadiña nakukala kukwawu. Motoka yetu ayihumini kudi motoka yañendeshi wendesheleña chatama, nawa nfumwami Luigi amukatishili chikupu. Amuketwili mwendu wumu, nawa moñololu windi awuladikili kapampa kakavulu. Cheñi, kumukuhwelela Yehova, kwatuleñeleli kukola chikupu. (Fwi. 4:13) Hela chakwila Luigi wekala chifwayi, hitwadishonañaku. Chineli hatweshaña kuzata mudimu wakumujimbaku, kakavulu diyi wamwakamenaña Joel. Chumichi chanleñelaña kudikitaña chikupu munyidimu yakuspiritu. Luigi niyena wakamenaña nankashi chisaka chetu kuspiritu niantu amuchipompelu chetu, mwakalakalañayi neyi nloñeshi wezanvu dawaeluda.

Hamuloña wayuma yatuholokela, twahanjekaña mpinji yeneni hamu neyi chisaka. Muyaaka yinahituhu, tunadizi kwikala naluwi nikubula kudikuhwelela kuzata kubadika hakumina ñovuku. Neyi tunaneñi, twalombaña kudi Yehova. Chawushona, anyanetu David niMarc chakuliluwu nakutachika kudishakamina, alekeli kumukalakela Yehova. Tunakuhweleli netu akatachika cheñi kumukalakela Yehova.—Luka 15:17-24.

Muyaaka yejima yinahituhu, tuneluki netu Yehova watukwashaña nawa twashindamenaña hadi yena mukukala kwejima kutwamonaña. Mazu ekala haIsaya 41:13 atukoleshaña chikupu: “Muloña ami Yehova Nzambi yeyi nakakukwataña kuchikasa cheyi chachidiilu, nakakwilaña nami, Bayi wutiya womaku, nukukukwashañaku.” Hakwiluka netu Yehova watukwataña kuchikasa, twakoleshewaña. Mwamweni, tunateli kuhosha netu kuumika kweseka kwatuleñeleli kumukuhwelela chikupu Tata yetu wamwiwulu, Yehova.

[Tumazu twaheshina]

[Nyevulu yidi hefu 17]

Joel namama yindi, Ada

[Mwevulu wudi hefu 18]

Ada, Joe niLuigi

[Mwevulu wudi hefu 19]

Joel watiyaña kuwaha kushikija amana kwetu niahela Hetala daWanta