Munakwanuka?

Komana munahetelumu mukutaña yibaaba yakatataka yaKaposhi Kakutalila? Talenu neyi mukutwesha kwakula awa malwihu:

• Muloñadi Mesiya chafwililiyi?

Iyi diyi yuma yiyedi yaletesheli Yesu yafwi: Kufwa kwaYesu kwamwekesheli nawu muntu wawanina nateli kutwalekahu kumwakama Nzambi hela chakwila nakumona makabi asweja. Cheñi, waheni wuloku hamuloña wanshidi yaswanawu anyana kaAdama, nakwenzununa njila yaya kuwumi wahaya nyaka.—12/15, ifu 22-23.

• Yumanyi yinateli kukwasha muntu kubula kusweja kunwaña walwa?

Kulomba nikudiza Bayibolu kunateli kumukwasha. Cheñi, kwikala nachililu chakudihemba, kukakela chikupu kuchuma chinafuukuliyi muntu, nikwikala nawamabwambu amawahi kunateli kumukwasha. Dichi, muntu wunakukeña kunwa walwa, watela kwiluka mwakukumina hela kukaana.—1/1, mafu 7-9.

• Yumanyi yekala mukuhanjeka chiwahi nawanyana?

Chatela muhosheña hohu nawu, mwatela kuzatishaña malwihu nikushaku muchima wakutiyilila chinakwakulawu. Anvwali amavulu anachiwani neyi mpinji yakudya yakudya diyawahaña kuhanjeka.—1/15, ifu 16.

• Yehova waloña, hanu watela kufutumuka ñahi?

Mpinji jikwawu, Yehova wahimpaña yitoñojoka hadi antu. Chakutalilahu, aIsarela akushankulu amufutaleleli Yehova mapampa kakavulu nakudifukulaña kudi ankishi. Yehova niyena walekeli kuyikiña. Hela chochu, chelili adihombi muloña wanshidi yawu nakumutambika Nzambi nawu yoyikwashi, Nzambi wahimpili yitoñojoka yindi hela ‘wafutumukili.’ (Ansomp. 2:18)—2/1, ifu 21.

• Yumanyi yinateli kuleñela muntu kupapatishewa kamuchiyedi?

Muntu anateli kumupapatisha kamuchiyedi neyi hampinji yachipapatishu muntu yeniwu wadiña nakukoña yuma yadi kumuleñela amuhañi muchipompelu neyi chakwila wadiñi wapapatishewa dehi.—2/15, ifu 22.

• Yiluwanyi yisatu yashimunañawu antu hakudikala hamuloña wakubula kashinshi?

Antu amakwawu eyaña hamuloña wakwila ekala atuzweñi. Amakwawu ahoshaña nawu, “Muntu wejima dichelañayi.” Nawa amakwawu aweni maheta nikuyihemba, ahosheli nawu, “Yakunona chakunona.” Bayibolu hiyeteja yitoñojoka yamuchidiwuku.—3/1, mafu 12-14.

• Muchishimu chaYesu chatidiku nimatahu, indi kukuwa hela kutumba mbutu yayiwahi kwemenañaku yumanyi?

Yesu, mwana kamutu waloñesheli iha dakutumbamu hampinji yamudimu windi wakushimwina wahamaseki. Kutachika haPentekosta 33 C.E., mbutu yayiwahi ayikuwili hampinji yayiwayishiluwu akwaKristu kwikala anyana kaNzambi awamayala, anyana awamayala aWanta.—3/15, ifu 22.

• Indi tidiku yachifwikija anakuyikuñwila ñahi munkalaña yaYehova? (Mat. 13:30)

Kushikijewa kwawuprofwetu weniwu kunatwalekuhu muyinu mpinji yakukuma kwanyaka yinu. Anyana awamayala awayishewa aWanta, tidiku yachifwikija, ayiletaña munkalaña yaYehova neyi ayileta muchipompelu chawakwaKristu chatuñulwiluwu hela neyi anatambwili wuloku wawu wamwiwulu.—3/15, ifu 22.

• Anyi etejeli nawu Nyikanda yachiGriki yawakwaKristu ayonena?

Hiyadiña anlomboli jamachaachi hela akakwitiya kwakutwambaku. Ilaña, akwaKristu alala, alombweluwu naspiritu yajila yaNzambi, etejeli nawu mwamweni nyikanda yeniyi ayoneneni. Chumichi chinesekani nawalala wakwila nawu yawaana yayihayamisha yaspiritu yenkeluwu antu amuchipompelu chawakwaKristu muyaaka yakusambila yadiña “[ya]kushinshika aspiritu eñi naeñi.” (1 Kor. 12:4, 10)—4/1, ifu 28?