Yehova Wakeñaña Nindi Mwikali “Chachiwahi”

NEYI kukala kwabadika kutachika, Nzambi waÑovu jejima wakamona kwila nindi antu ejima akweti wuselewa windi ‘akapuluka.’ (Yoweli 2:32) Kuhosha mwalala, Yehova wakiñaña antu jindi kuwubanji. Chineli “kudi [yena] kwokudi kaseloki kawumi,” walemeshaña antu ejima, nikuyikiña.—Mas. 36:9.

Ambuña aNzambi akushankulu niwena alemesheli wumi neyi chawulemeshayi Nzambi. Kwesekeja namukanda waKutachika 33:18, Yakoba nichisaka chindi endeli “chachiwahi” lwendu lwawu mwadiña wubanji. Yakoba washindameneni hadi Yehova kulonda yamukiñi, hela chochu niyena waweni njila yakukiñilamu antu ejima ayileñayinawu. (Kutach. 32:7, 8; 33:14, 15) Neyi muzatishaña nshimbi jamuBayibolu, munateli kudikiña enu aweni niantu amakwawu. Tushinshikenu hamazu wenawa chiyazatikaña kudi antu azataña mudimu wakutuña Matala aWanta ninyidimu yikwawu yadifwanaku nikukwasha antu adi mukukala.

Chadikiñileñawu aIsarela Kuhitila muNshimbi Jayinkeluwu Kuhitila Mudi Mosi

Munshimbi jayinkeluwu aIsarela kuhitila mudi Mosi, antu jaNzambi ayilejeli kulondela njila jakudikiñilamu. Chakutalilahu, neyi kaIsarela nakutuña itala amulejeleña kukolekaku ikoli, mbañu yayihi hela mbañu yakutuña nayikuñu kunyeñumuna munsa yachisu. Chineli antu avulileña kuhanjekela hewulu dayisu yamatala awu, ikoli dayikiñileña kulonda kubula kuholoka. (1 Sam. 9:26; Mat. 24:17) Neyi kumwekana maposu hamuloña wakubula kwovwahila iyi nshimbi yahosheleña hakudikiña, Yehova wamwinkeleña mwiniitala muloña.—Kuhit. 22:8.

Nshimbi jeniji cheñi ajizatishileña neyi muntu anamukatishi kudi yimuna. Neyi chizamba chañombi chijaha muntu kuhitila mukumwasa nseñu, mwini chizamba chenichi wachijahileña kulonda kubula kujaha antu amakwawu. Chineli mwini chizamba chenichi hateleli kudya mbiji hela kuyilandisha kudi akwawuku, neyi achijaha dikwila nawu kwosi chuma chawaninineñamu. Indi neyi chizamba chinakatishi muntu, nawa mwini chimuna hachikiñileñaku? Chumanyi chazatikileña? Neyi chizamba chenichi chijaha muntu mukwawu cheñi, achijahileña hamu nankaka yachu. Nshimbi yeniyi yaleñeleli muntu wejima wabulileña kuhemba yimuna yindi chiwahi kushaku maana kukuhemba yimuna yindi.—Kwid. 21:28, 29.

Nshimbi yeniyi, cheñi yakolesheleña antu kuzatishaña chiwahi yitwa. A Isarela amavulu azatishileña yizembi kulonda kuchaya nachu nchawa. Neyi chizembi chizokoka mumuhinyi mumaposu nakujaha muntu wunemani kwacheñi, mukwakuchaya nchawa watemukilileña kumukala wakupulukila. Washakamineña kumukala  weniwu sampu kapristu muneni nafwi, chatalishili mukwila nawu muntu wajahañeni wambukili nachisaka chindi nimukala windi hadi yaaka yayivulu. Iji nshimbi jaleñeleli munza kwiluka nawu wumi wajila kudi Yehova. Muntu walemesheli wumi neyi chawulemeshayi Nzambi wawahishileña yitwa yindi nikuyizatisha chachiwahi.—Kuch. 35:25; Kuhit. 19:4-6.

Kuhitila munshimbi jeniji, Yehova washimwini hatooka nindi wakeñeleña antu jindi kudikiñaña hamukala nikunji yamukala. Antu ajahañeneña nikukatisha akwawu, hela kuhitila mumaposu, adiña namuloña kudi Yehova. Yehova hahimpa nshimbi jindi kutalisha hansañu yakudikiñaku. (Mal. 3:6) Wuchidi kukeña antu kutondolwela kudikatisha aweni niakwawu. Chumichi  chazatikaña sweje-e neyi tunakutuña nikuwahisha matala akudifukwilamu kudi Yehova.

Chakudikiña haMudimu Wakutuña

Mudimu wakutuña nikuwahisha Matala aWanta, Matala akupompelamu Kupompa kwamaneni nimatala ahaBeteli twawumoneña netu hikukooleka hama. Hohamu nimudimu wutwakalakalaña hakukwasha antu anaholokeli mukukala. Mpinji yejima, twatela kukalakala nyidimu yetu chachiwahi muloña neyi tukalakala yuma yabula kuha, ninyidimu yapela, yinateli kutuletela wubanji niakwetu. (Mukwa. 10:9) Mwamweni, neyi twikala nachaaku chakudikiña hakuzata, tunateli kutondolwela wubanji.

Bayibolu yahosha nawu: “Kuwaha kwawanyikwenzi jojiñovu jawu; lubanji lwawatushinakaji jojinvu jawu.” (Yish. 20:29) Akwenzi akeñekaña hakwila nawu nyidimu yakola yizatiki chiwahi. Ilaña atushinakaji akuluka yitembi munyidimu yakutuña, azataña nyidimu yakutuña nawukalawenu. Hampinji yimu, atushinakaji wenawa hiyadiña akwenzi adiña nakuzata nyidimu yakola. Neyi mudi amaha mumudimu wakutuña, shinshikenuña chiyazatañawu antu akuluka yitembi munyidimu yakutuña nikulondela munakuyilejawu. Neyi munakukeña kudiza nyidimu, amana kwetu akuluka yitembi munyidimu yakutuña akuyidizisha yuma yayivulu. Nyidimu yeniyi yabombelamu kwiluka  chakuzatisha yitwa yafwana nikunyamuna yitelu yalema. Neyi mwila mwenimu mukukalakalaña chiwahi, mukwikala amuzañalu nawa mukwiluka chakudikiña.

Akwakuzata anakutuña atela kwikala asoñama mpinji yejima. Yuma yahimpikaña swayi-swayi. Heluña hadiñi hakola, hanateli kwikala wina. Akwakuzata amakwawu anateli kufumishahu ndalu, mbawu hela mbeketi yawulombu. Neyi ayiluwañesha, munateli kudikatisha. Nshimbi jahosha hakudikiña kakavulu jakeñekaña akwakuzata kuzatisha yitwa yakudikiña nachu. Malolu akudikiña nachu, itepa dakola ninsapatu jatelela kuzata nachu jinateli kuyikiña kuwubanji washiyashana hampinji yakutuña. Hela chochu, munateli kudikiña hohu neyi muhembaña chiwahi yozelu yeniyi nikuyivwala hampinji imunakuzata.

Hela chakwila yitwa yayivulu yamwekana neyi hiyafwanaku, chakeñekaña kwiluka chikupu chakuyizatisha chiwahi nichakudikiña kuyitwa yeniyi. Neyi himweluka chakuzatisha chitwa chimunakukeña kuzatisha, ihulenu mana kwetu wunakulombola mudimu yayileji chakuchizatisha. Wukuyileja chakuchizatisha chiwahi. Kudizoza, hela kwiluka mwakumina ñovu jenu, hichililu chachiwahi hama. Chililu chenichi chekala chalema neyi munakukeña kutondolwela kudikatisha enu aweni niantu amakwawu adi hamudimu wakutuña.—Yish. 11:2.

Antu amavulu adikatishaña hamuloña wakuholoka hamudimu wakutuña. Henohu kanda mukandami handalu hela hachinañamu, mwatela kwiluka chikupu nenu ndalu yenoyu yakola chikupu. Neyi munakuzatila hachinañamu hela hachisu chetala, mwatela kudikasa yozelu yakukañesha nachu kuholoka hela kushaku ikoli. Ihulenu nkoñi wunakulombola mudimu neyi mukweti malwihu kutalisha hachakuzatila hewulu. *

Antu anakumukalakela Yehova chiyanakuvulilaku mukaayi kejima, nimudimu wakutuña Matala aWanta nimatala amakwawu akudifukwilamu niwena wunakutohelaku. Amana kwetu alombolaña nyidimu yakutuña Matala aWanta ninyidimu yikwawu ayinka mudimu wakukiña nyikoku jaYehova iyazatañanawu. (Isa. 32:1, 2) Neyi ayinka mudimu wakulombola amana kwetu niahela hamudimu wakutuña, bayi mujimbala kulema kwakudikiñaku. Mwatela kwiluka chikupu nenu heluña himunakuzatila hawunyonji nawa hosi yozelu yamukunkulwayi. Yilumbulwilenu antu imunakuzatanawu chakudikiña hakuzata munjila yayiwahi ilaña chakadi kuhita mumbadi. Bayi mwiteja atwansi hela akwanyidimu abula kukuluka yitembi kukandama hahalehuku. Mwatela kwilukila chadimu wubanji wunateli kumonawu antu anakuzata, nikuyileja chakuzata chiwahi. Anukenu nenu, chikonkwanyi chetu chakumanisha mudimu wakutuña chakadi kudikatisha.

Kukeña Chikwalemena

Kutuña Matala aWanta nimatala amakwawu akudifukwilamu kwabombelamu nyidimu yawubanji. Dichi, antu azataña munyidimu yamuchidiwu atela kubabala hakuzata. Neyi mulemeshaña nshimbi jamuBayibolu, kwovwahila nshimbi jahanawu hakuzata mudimu nikubabala hakuzata, mukutondolwelaña wubanji nawa mukukiñaña akwenu imunakuzatanawu.

Lushimbinyi lwatuleñelaña kudikiña chikupu? Hikukeña. Eña, kukeña kutwamukeña Yehova kwatuleñelaña kulemesha wumi neyi chawulemeshayi Yehova. Nawa kukeña kutwayikeña antu kwatuleñela kubula kwila yuma yinateli kukatisha antu amakwawu. (Mat. 22:37-39) Dichi, tuzatenuña nañovu kulonda kukiña “chachiwahi” antu anakuzata nyidimu yetu yakutuña.

[Tumazu twaheshina]

[Chikasha/Mwevulu wudi hefu 30]

Chakuzata Chiwahi Handalu

Muchaaka chinahituhu, akwakuzata akubadika ha 160,000 adikatishili hamuloña wakuholoka handalu. Kubombelahu, antu akushika ku 150 afwili hamuloña wakuholaka handalu. Nshimbi jidi heshina jinateli kuyikwasha kubula kuholokaña handalu kudi kwejima kumwashakamaña nikuzatila.

◇ Bayi muzatishaña ndalu yabula kukola hela yamana mudimu, nawa bayi muloñesha ndalu yamuchidiwuku. Mwatela kuyinata.

◇ Ndalu yidi yejima ayituña kwesekeja nakulema kwachuma chatela kuyahu. Mwatela kwiluka chikupu nenu kulema kwamujimba wenu niyitwa kunesekani nakulema kwayuma yatela kuya handalu.

◇ Shenu ndalu yenu heluña holoka nawa hakola. Bayi muyisha hayuma yabula kukolaku, chidi neyi hachinañamu hela hewulu dambeketi niyikasha.

◇ Neyi munakukandama hela munakusuluka handalu, mpinji yejima mwatela kutalishaña chamesu kundalu.

◇ Bayi mwimanaña hela kushakama hewulu hakumina ndaluku.

◇ Neyi munakuzatisha ndalu kulonda kukandama hela kusuluka hachisu, ndalu yatela kusompoka hewulu dachisu namita yimu kubadika hachisu hanashindameni ndalu. Mwatela kushimika ndalu hakola kuhitila mukuyikasa kwishina hela kupopelaku mbawu kuchina kuselumuka. Neyi himunateli kwila mwenimuku, mwatela kuleja muntu kulonda yayikwatiluku ndalu hampinji yimunakuzata. Mwatela kukasa ndalu kwiwulu kulonda yibuli kuselumukila mumbavu.

◇ Bayi mushindamena handalu yakutuña nambawu kwikala chinañamu hakuzatilaku.

◇ Neyi mwolola makasa hela nyendu henohu munakuzatila hewulu, munateli kuleñela ndalu kutachika kunyinkesha. Tondolwelenu yuma yafwana yamuchidiwu. Neyi chinatwesheki, mwatela kuswijaña ndalu kwakwihi naheluña himunakuzatila.

◇ Neyi munakuzatila handalu yidi kumbidi yachisu chakwenzela, mwatela kushahu chinjikijilu hachisu nikukiyaku. Neyi himunateli kukiyakuku, lejenu muntu kwimana hachisu kulonda yasoñamisheña antu anakukeña kuhita.

◇ Handalu hatela kukandama hohu muntu wumu, chiña neyi ndalu yenoyu ayituña kulonda kukandamahu akwakuzata ayedi. *

[Tumazu twaheshina]

[Mwevulu wudi hefu 29]

Nshimbi jayinkeluwu aIsarela kuhitila mudi Mosi jalejeli aIsarela kukoleka ikoli kuyisu yamatalawu