AkwaKristu aKusambila niaNzambi amuRoma

PLINY, wakansi, ñuvulu wamumusumba waBitiniya, wamusonekeleli Mwanta wamuRoma wejina daTrajan nindi: “Imu dimu mwinafuukuli kutalisha hadi antu aleteluwu kumeswami nawu hiyakwaKristu. Nadiñi nakuyihula neyi mwalala hiyakwaKristu, neyi eteja, nayihwileña kamuchiyedi hela kamuchisatu nikuyitiyisha woma nami nukuyibabesha. Neyi atwalekahu kuhosha nawu hiyakwaKristu, nahanineña lushimbi lwakuyijaha.” Ilaña antu akaanineña wuKristu nakumushiña Kristu nakutachika kudifukula kudi mwanta niyifwikija yawankishi aleteliyi Pliny muchota, Pliny wasonekeli nindi: “Natoñojokeleña nami chachiwahi kuyumbaku hohu.”

AkwaKristu akusambila ayikabishileña muloña wakukaana kudifukula kudi mwanta niyifwikija yawankishi ashiyashana. Indi nsakililu jikwawu jadiña muWanta wejima waRoma? Adifukwileña kudi anzambi amuchidinyi, nawa aRoma ayimweneña ñahi? Muloñadi akwaKristu chayikabishilileñawu hakukaana kulambula nyilambu kudi anzambi amuRoma? Chitweluka ñakwilu yanawa malwihu chikutukwashaku kwiluka mwakwilila neyi kukala kwamuchidiwu kwakumwovwahila Yehova kutumwekena.

Nsakililu yamuWanta waRoma

Anzambi ambokamboka adifukwileñawu muWanta waRoma wejima adiñi amavulu kwesekeja nanyichidi niyisemwa yadiñamu. Hela chakwila nsakililu yawaYudeya hiyayilukili kudi aRomaku, ilaña ayimweneña nawu hireligio licita, hela nsakililu yetejawu, nawa ayihakwilileñaku. Mapampa kayedi hefuku mutembeli yamuYerusalema, alambwileña nyikoku yiyedi niñombi wumu kudi Kesari nikumunza wawaRoma. Hela chakwila iyi nyilambu yazañalesheleña nzambi wumu hela amavulu, aRoma wena hiyashileñaku muchimaku. Wena ashili muchima kumulambu wawaYudeya muloña wamwekesheleña nawu adiña nakwovwahila aRoma.

Mumazanvu ansakililu ambokamboka mwenzeli wusenji washiyashana. Tushidikilu twachiGriki twatandili chikupu, nawa kuhoña nikwena kwelili niwo-o. Nsakililu yikwawu yabulili kwilukawu yafumini kuMusela yakanini antu jawu nawu hiyakafwañaku, akabalumukaña hohu, nawa akayaña kudi anzambi munyijiminu. Iyi nsakililu yatandili muwanta wejima. Mumwaka wakusambila C.E. mwaswejeli mazanvu ansakililu adifukwileña kudi nzambi wakuEjipitu Serapis ninzambi wamumbanda Isis, ninzambi wamumbanda wanshi waweniSiliya Atargatis, ninzambi wetañwa wawaPersia, Mithra.

 Mukanda wamuBayibolu waYililu walumbulula jiika wusenji wadiñaku hampinji yatachikili nsakililu yawuKristu yakusambila. Chakutalilahu, Mwanta waBoma Cyprus wamuRoma wadikundileña namukwakuhoña wamuYudeya. (Yil. 13:6, 7) Antu amuLisitira atoñojokeli nawu Pawulu niBaranaba adiña anzambi awaGriki aHeremi niZewusi. (Yil. 14:11-13) Hampinji yadiñayi Pawulu muFwilipi, wadibulakeni nachañadima wamumbanda wazakukileña demoni wakuhoña. (Yil. 16:16-18) Chadiñayi muAtenisi kapostolu wahosheli nindi antu amunidi iluña ‘asweja kukeña kupeshapesha.’ Muniwu musumba wamweni cheñi kameña kakusoneka nawu, “Kameña kaNzambi wakadi kwilukewa.” (Yil. 17:22, 23) Antu amuEfwesesa adifukwileña kudi nzambi wamumbanda Diyana. (Yil. 19:1, 23, 24, 34) Hachitutu chaMelita, antu ahosheli nawu Pawulu wadiña nzambi muloña chamusuminuwu kudi kapela hatiyili kukataku. (Yil. 28:3-6) Munsañu jamuchidiwu, akwaKristu atela kwikala asoñama kulonda kutondolwela yuma yatela kutamisha kudifukula kwawu kwalala.

Nsakililu yawaRoma

Chelili wanta wawu wutoheluku, aRoma atachikili kwiteja anzambi amakwawu amweneñawu, nakukuhwelela nawu adiña anzambi wowamu elukiluwu ilaña munjila yacheñi. Chatela afumishi mazanvu ansakililu abulili kwilukawu, antu amuRoma ayulileña ayitejeli nawa ayitambwilili. Dichaleñeleli nsakililu yaRoma kwikala yambokamboka neyi chochambukili nyichidi yawantu. Kudifukula namuchima wumu hikwadiña kwalema munsakililu yawaRomaku. Antu adiña nakudifukula kudi anzambi amboka-mboka hampinji yoyimu.

Jupiter diwadiña nzambi wabadika anzambi ejima amuRoma, wateneneñawu nawu Optimus Maximus, wabadika nawa muneni. Antu atoñojokeleña nawu wamwekeneneña mumpepela, munvula, mukukenashana nimunzaji. Muhela Jupiter niñodindi, Juno, wafwanisheleñawu nakakweji, amumweneña nawu diwakiñileña ambanda. Mwanindi wamumbanda Minerva diwadiña nzambi wamumbanda wayuma yakuwumba-wumba, nyidimu, kuleñaleña, ninjita.

Aroma adiña akuhwelela mudi anzambi amavulu. Lares niPenates adiñi anzambi ayisaka. Vesta wadiñi nzambi wamumbanda watalileña hakukola kwamujimba. Janus wamahama ayedi wadiñi nzambi wantachikilu yayuma yejima. Nyidimu yejima yadiñi nanzambi wayitalileña. A Roma akuhweleleli mudi anzambi ayinkeleña maana  adi ejima. Pax wadiñi nakuhemba kuwunda, Salus watalileña hakukola kwamujimba, Pudicitia wadiñi nzambi wakudizoza nikubula kubajama, Fides wadiñi nzambi wakashinshi, Virtus wadiñi nzambi wawulobu, nawa Voluptas nzambi wachiseki. Yuma yejima yakoñeleñawu aRoma kumbadi hela hatooka ayimweneña nawu yazatikileña kwesekeja nakukeña kwawanzambi. Hakwila nawu mufumi yuma yayiwahi munyidimu yakoñeleñawu antu chiña amuzañalesha nzambi wanowu mudimu wunakwilawu kuhitila mukulomba, nikumwinka nyilambu, nikwila yidika.

Njila yimu yelukilileñamu kukeña kwawanzambi yadiñi yakukeña chinjikijilu. Njila yayeni yakwilukilamu chinjikijilu yadiña yakushinshika yidi yamwivumu yawatunyama alambwileñawu. Atoñojokeleña nawu iyi yidi chiyadiña nichiyamwekeneña yamwekesheleña neyi anzambi anakaani hela aneteji mudimu wudi wejima wunakukeñawu kwila.

Kukuma kwayaaka nkulakaji yamuchiyedi B.C.E., Aroma elukili nawu anzambi jawu amaneni adiña hohamu nawanzambi awaGriki, chidi neyi Jupiter naZewusi, Juno naHera, nianzambi amakwawu. Aroma atachikili tushidikilu twendeleleña hamu nawanzambi awaGriki. Chakadi nikujina itu tushidikilu twaleñeleleña anzambi wenawa amwekaneña neyi akadi majilu komana nehi. Chakutalilahu, Zewusi amumwekesheleña nawu wadiña nakukwata ambanda nawa wakamineña nawanyana nikwila wuvumbi nawantu afwaña niantu abulaña kufwa. Yuma yahamesu bwi yakoñeleñawu awa anzambi, kakavulu yashikileña nimumatala ayisela akushankulu, yaleñeleli antu jawu kutoñojoka nawu anateli kudiñija mukwila yuma yomisha mbaña.

Hadaha, antu antesha ataña diwu akuhweleleli tushidikilu twenitu. Amakwawu atumweneña hohu nawu hiyishimu. Chumichi chinalumbululi lwihu lwalema lwehwiliyi Pontusi Pilatu nindi, “Nsañu yalala yika?” (Yow. 18:38) Alwihulaña hakumwekesha “yitoñojoka yawantu ataña, yakwila nawu kwiluka walala hansañu yidi yejima kwakala chikupu.”

Kudifukula Kudi Mwanta

Muchiyuulu chaAugustus (kufuma mu 27 B.C.E. nakushika mu 14 C.E.) diyi mpinji yatachikiluwu antu kudifukula kudi mwanta. Sweje-e mutubeta twaKumusela mwahosheleñawu idimi dachiGriki, antu amavulu amuhamekeli Augustus nankashi, waleteli maheta nikuwunda hadi mpinji yeneni hanyima yanjita. Antu akeñeleña kuyikiña chikupu kudi muntu wakumona namesu. Akeñeleña chota chatela kumanisha chaambu chansakililu, kukolesha antu kukeña ituña dawu, nikunuñañesha kaayi kuhitila mudi “nkuli” yakaayi. Chafuminumu, mwanta atachikili kumumona neyi hinzambi.

Hela chakwila Augustus hetejeleña akwawu kumutambika nawu nzambi henohu kanda yafwiku, wakanjikijili antu nindi adifukuleña kuchifwikija chaRoma chanzambi wamumbanda, Roma Dea. Chafwiliyi Augustus amutenini nawu hinzambi. Mazu ahosheleña nsakililu yamudina iluña niyipompelu yajipolitiki mukana kabeta yonsu yatachikili kushindamena hawanta nianyuli. Kudifukula kudi mwanta kwatachikili kutanda mutubeta twonsu, nawa kwekalili njila yimu yakumuhamekelamu nikwovwahila Ituña.

Domitian, mwanta wayulili kufuma mu 81 kushika mu 96 C.E., diwadiñi mwanta waRoma watachi kuleja antu kudifukula kudi yena neyi nzambi. Muchiyuulu chindi, aRoma elukili akwaKristu niaYudeya nawa akaanineña izanvu dansakililu dateneneñawu nawu dadiha. Hadaha muchiyuulu chaDomitian dihamutwaliluwu kapostolu Yowanu muwunkoli hachitutu chaPatamosa kukola ‘kushimuna nsañu yaYesu.’—Chim. 1:9.

Mukanda waChimwekeshu awusonekeli hampinji yadiñi Yowanu muwunkoli. Mumukanda waChimwekeshu, Yowanu wahosheli hadi Antipasi, mukwaKristu wajahiluwu muPerigamu, musumba weneni mwadifukwileñawu kudi mwanta. (Chim. 2:12, 13) Hayina mpinji, nfulumendi  yamwanta yatachikili kukanjikija akwaKristu kulondela tushidikilu twansakililu Yetuña. Hela dimwakoñeleñawu hela nehi, kwakwihi na 112 C.E., neyi chinamwekeshi mukanda wamusonekeleluwu Trajan wutwatena hakutachika mpanji yetu, Pliny wakanjikijileña akwaKristu muBitiniya kulondela tushidikilu twenitu.

Trajan wahamekeli njila yahakwilileñamu Pliny nyiloña yamuleteleleñawu nakuhana lushimbi lwakujaha akwaKristu akaanineña kudifukula kudi anzambi amuRoma. Trajan wasonekeli nindi, “Hela chochu, neyi muntu yakaana nindi himukwaKristuku, nawa yamwekesha chikupu nindi himukwaKristuku, kuhitila mukulemba kudi anzambi jetu, (chakabula kumujinoka) chabalumukayi mwanakenenu.”

Aroma muyitoñojoka yawu hiyelukiluhu nsakililu yakeñeleña antu jawu kudifukulaña chikupu kunoyu nsakililuku. Nawa anzambi awaRoma hiyakeñeleña nsakililu yamuchidiwuku, dichi muloñadi Nzambi yawakwaKristu chakeñeleñayi antu akudifukula kudi yena hohu? Atoñojokeleña nawu kudifukula kudi anzambi Etuña chamwekesheleña kalemesha kuchiyuulu chetuña. Dichi, neyi muntu yakaana kudifukula kudi awa anzambi amwinkeleña muloña wakufutukila ituña. Kwesekeja nachachimweniyi Pliny, akwaKristu amavulu hiyateleleli kuyikanjikija kulondela mwakeñeleñawuku. Muloña akwaKristu elukili nawu neyi adifukula kudi anzambi akumuneñesha Yehova, nawa akwaKristu amavulu akusambila atondeluhu kufwa kubadika kudifukula kumukishi wamwanta.

Muloñadi chitwatela kushilaku maana makonu? Mumatuña amakwawu, enimbu amwituña atela kulemesha yifwikija yetuña. Hakwikala akwaKristu, twalemeshaña chikupu chiyuulu chanfulumendi yetuña. (Rom. 13:1) Hela chochu, neyi kudi yidika yakuhameka mpandelu, kukonkomwena kwaYehova Nzambi kwakukeña kumwakamaña yena hohu nikufumba kwaMwizu dindi dikwatusañumunaña ‘kutemuka kupesha’ ‘nikudihemba kunsañu jawankishi.’ (1 Kor. 10:14; 1 Yow. 5:21; Nahu. 1:2) Yesu wahosheli nindi: “Kadifukulaña kudi Yehova Nzambi yeyi, diyi wakakalakelaña kanka windi hohu.” (Luka 4:8) Dichi tutwalekuhu kuhemba kashinshi ketu kudi Nzambi itwalombaña.

[Mazu ekoku adi hefu 5]

AkwaKristu alala adifukulaña hohu kudi Yehova

[Nyevulu yidi hefu 3]

AkwaKristu akusambila akaanini kudifukula kudi mwanta hela kuyifwikija yawanzambi

Mwanta Domitian

Zewusi

[Mazu aKusakilila]

Emperor Domitian: Todd Bolen/Bible Places.com; Zeus: Photograph by Todd Bolen/Bible Places.com, taken at Archaeological Museum of Istanbul

[Mwevulu wudi hefu 4]

AkwaKristu muEfwesesa akaanini kudifukula kudi nzambi wamumbanda wayili mpuhu Atemesi.—Yish. 19:23-41