Amana Kwetu—Kuwilenuña kuSpiritu Kulonda Mutweshi Kukalakala!

‘Muntu wukukuwila chisemwa chindi chaheseki, wakadya kutoka kuchisemwa chaheseki; hakwila yena wukukuwila spiritu, wakadya wumi wahaya nyaka kudi spiritu.’—ŊAL. 6:8.

1, 2. Indi mukanda waMatewu 9:37, 38 wunakushikijewa ñahi, nawa wunaleteshi kwikali kukaankila kwamuchidinyi muyipompelu?

 MUNAKUSHIMWINA yuma yinakumwekana yakanukañawu antu haya nyaka! Mudimu washimwiniyi Yesu Kristu anakuwuzata chikupu. Yesu wahosheli nindi: “Chalala mbutu jajivulu jinahi dehi, ilaña akwakukalakala anakehi. Dichi lombenu kudi Mwanta wakumuna atemeshi akwakukalakala kukumuna kwindi.” (Mat. 9:37, 38) Yehova Nzambi nakwakula kulomba kwamuchidiwu munjila yakuhayamisha. Muchaaka chamudimu cha 2009, yipompelu yawaYinsahu jaYehova yavulililuku nayipompelu 2,031, nawa yejima yashikili 105,298. Dikwila nawu antu akushika ku, 757 ayipapatishileña hefuku hefuku!

² Hamuloña wakuvula kwawantu, amana kwetu anakukeñeka kushikahu kulonda alomboleña munyidimu yakutañisha nikubiña muyipompelu. (Efwes. 4:11) Hayaaka yayivulu yinahituhu, Yehova nanyamuni amayala ashikahu kwakamena nyikoku yindi, nawa tunakuhweleli netu wukutwalekahu kuyinyamuna. Wuprofwetu wasonekawu haMika 5:5 watukonkomwenaña nawu mumafuku akukuminina, antu jaYehova akekala ‘nawatubiña atanu nayedi, niatulamba atanu nasatu,’ anakwimenaku naambala yawamayala atelela kuyilombola.

3. Lumbululenu mwatalisha nhoshelu yakwila nawu ‘kukuwila kuspiritu.’

³ Neyi wudi Chinsahu chaYehova weyala wapapatishewa, chumanyi chikuyikwashaku kufwila kukalakala nyidimu yamuchipompelu? Chuma cheneni yowu ‘kukuwila kuspiritu.’ (Ŋal. 6:8) Kwila mwenimu kwabombelamu kudihemba munjila yikuleñela spiritu yajila yaNzambi yiyilomboleña chiwahi muchihandilu chenu. Fwilenu kutondolwela ‘kukuwila kuchisemwa.’ Tondolwelenu yuma yidi neyi maheta, kuhema, niyisela yatela kukañesha kufwila kwenu kwakukalakala mumudimu waNzambi. AkwaKristu ejima atela ‘kukuwila kuspiritu,’ nawa mukuhita kwampinji, amayala elaña mwenimu anateli kushikahu hakukalakala nyidimu muchipompelu. Muloña wakwila kudi kukankila kweneni kwawankoñi akuzatila niaeluda makonu, achinu chibaaba chikuhosha nankashi hadi amayala akwaKristu. Dichi, amana kwetu, tunayikoleshi netu mutoñojokuhu nikulombelahu haniyi nsañu.

Fwilenu Kukalakala Mudimu Wawuwahi

4, 5. (a) Nyidimwinyi yinalejuwu amayala apapatishewa kufwila kukalakala muchipompelu? (b) Indi muntu nateli kushikahu ñahi hakukalakala nyidimu muchipompelu?

⁴ Iyala mukwaKristu hashikenaña dakwikala nkoñuku. Watela kufwila kukalakala iwu “mudimu wawuwahi.” (1 Tim. 3:1) Iwu mudimu wabombelamu kukalakela akwenu akakwitiya kuhitila mukuyilila yuma yinakukeñawu namuchima wumu. (Tañenu Isaya 32:1, 2.) Iyala washikañahu hakukalakala namuchima wumu hekalaña nechimaku. Ilaña, wekalaña nampwila yakukeña kukwasha amakwawu.

 ⁵ Muntu nateli kwikala nkoñi wakuzatila nikufwila kwikala cheñi eluda kuhitila mukuwanisha yuma yakeñekaña yasonekawu muBayibolu. (1 Tim. 3:1-10, 12, 13; Tit. 1:5-9) Neyi wudi iyala wadihana, dihuli neyi: ‘Komana nakalakalaña chikupu mumudimu wakushimwina, nawa nakwashaña amakwawu kushimwina chikupu? Komana nakoleshaña akwetu akwakudifukula kuhitila mukukeña kwiluka chinakuhandawu? Komana añiluka nawu nadizaña nankashi Izu daNzambi? Komana ñakwilu yami hakupompa yamwekeshaña nawu inakuyilaku hambidi? Komana nazataña chachiwahi nyidimu yanyikañawu aeluda?’ (2 Tim. 4:5) Mwatela kutoñojokahu nankashi hanawa malwihu.

6. Chumanyi chacheni chakeñekaña hakwila nawu mushikuhu kukalakala nyidimu yamuchipompelu?

⁶ Njila yikwawu yakushikahu kuzata nyidimu yamuchipompelu yidi ‘yakwiteja muntu wenu wamukachi kukola nañovu yaspiritu yaNzambi.’ (Efwes. 3:16) Kwikala nkoñi wakuzatila hela eluda muchipompelu chawakwaKristu bayi neyi hikuyitonda hohu kulonda mwikali hachifuluku. Muntu amutondaña kwikala nkoñi wakuzatila hela eluda muloña wakwikala nawubwambu wawuwahi naYehova. Muntu nateli kwikala ñahi nawubwambu wawuwahi naYehova? Njila yimu yidi ‘yakwenda chakuyendesha kudi spiritu,’ nikusoña mukabu waspiritu. (Ŋal. 5:16, 22, 23) Chimukumwekeshaña yililu yakuspiritu yakeñekaña kulonda mutweshi kuzata nyidimu yikwawu nichimukuzatisha kufumba kwayilejañawu kutalisha hakupama, ‘chimukuyaña kumbidi chikumwekanaña kudi antu ejima.’—1 Tim. 4:15.

Ikalenu naYililu yaKudihana

7. Yumanyi yakeñekaña mukukalakela amakwawu?

⁷ Mwatela kuzata nañovu nikwikala nayililu yakudihana hakwila nawu mukalakeli akwenu. Hamuloña wakwila ankoñi akwaKristu akalakalaña neyi atubiña muchifwikija, kukala kwamonañawu anyikoku kwayineñeshaña chikupu. Talenu kukala kwamweneñayi kapostolu Pawulu mumudimu windi wakubiña. Walejeli akwawu akakwitiya muKorinda nindi:  “Nayisonekeleli namadilu amavulu nilukadi lwakutiya nikumuchima bwi; hinalondeli kuyineñeshaku, nalondeli nami mwiluki kukeña kunaswejaña kuyikeña.” (2 Kor. 2:4) Chinamwekani hatooka nawu Pawulu washili muchima kumudimu windi.

8, 9. Hanenu chakutalilahu chinakumwekesha amayala chakalakelañawu amakwawu.

⁸ Yililu yakudihana hichinjikijilu chamwekeshañawu amayala akalakelaña ambuña aYehova. Chakutalilahu, Nowa halejeleña chisaka chindi nindi: ‘Chimwamanisha kutuña watu munleji kulonda ninzi niñilumuku.’ Mosi niyena halejeli aIsarela muEjipitu nindi: ‘Tukahumañena kuKaluñalwiji Kachinanaku. Mukwiluka enu aweni chimukwenda.’ Yoshuwa niyena hahosheluhu nindi: ‘Munlejaña neyi mbañu yaYeriku yinahumukiku.’ Nawa Isaya niyena hateneni muntu wacheñi nindi: ‘Owu wudohu, Mutemeshenuku!’—Isa. 6:8.

⁹ Yesu Kristu diyi chakutalilahu chetu wetejeli spiritu yaNzambi yimusañumuni. Watambwilili mudimu windi neyi Mukwakukula namuchima wejima. (Yow. 3:16) Komana kwila yililu yaYesu yakukeña yitusañumuna ninetu kudihana nehi? Hampinji yalumbulwiliyi chamweneñayi anyikoku, eluda wunazati hadi yaaka yayivulu wahosheli nindi: “Mazu ahosheliyi Yesu kudi Petulu nindi, biñaña anyikoku jami, ansañumwini chikupu. Hayaaka yinahituhu, neluki chichalemena kuhosha mazu akukeña hela kumwekesha luwi chikwatela kumukolesha muntu. Nadiluñishaña chikupu namudimu wakubiña.”—Yow. 21:16.

10. Chumanyi chatela kusañumuna amayala akwaKristu kwimbujola chakutalilahu chaYesu chakukalakela akwawu?

¹⁰ Hakwakamena nyikoku yaNzambi, amayala adihana muchipompelu afwilaña kwimbujola chikupu yililu yaYesu, wahosheli nindi: “Nukuyinookesha.” (Mat. 11:28) Muloña wakumukuhwelela Nzambi nikukeña chipompelu, kwasañumunaña amayala akwaKristu kushikahu kukalakala iwu mudimu wawuwahi, chakadi kutoñojoka nawu yuma yikushiyawu yayivulu hela nawu himudimu wakola nankashi. Indi neyi muntu hakeñaña kushikahu kukalakala iwu mudimuku? Komana mana kwetu nateli kwikala nampwila yakukalakala muchipompelu?

Ikalenu Nampwila Yakukalakala

11. Indi muntu nateli kwikala ñahi nampwila yakukalakela akwawu?

¹¹ Neyi mwatoñojokaña nenu himukutwesha kukalakala iwu mudimuku, chikuwaha neyi mukulomba spiritu yajila. (Luka 11:13) Spiritu yaYehova yikuyikwasha kulonda mubuleña kudakamena. Mpwila yayeni yakukalakela amakwawu yafumaña kudi Nzambi, muloña spiritu yaYehova diyi yasañumunaña mana kwetu kulonda yashikuhu kukalakala nikumwinka ñovu yakuzata mudimu wajila. (Fwi. 2:13; 4:13) Komana, chachiwahi kumulomba Yehova kulonda yayikwashi kwikala nampwila yakwiteja nyidimu yamuchipompelu.—Tañenu Masamu 25:4, 5.

12. Indi muntu nateli kuheta ñahi maana kulonda yakameneña nyidimu yamwinkawu?

¹² MukwaKristu nateli kukaana kukalakela akwawu, muloña wakutoñojoka nindi nyidimu yakwakamena anyikoku yakala nawa yikumumanishilaña mpinji. Hadaha nateli kutoñojoka nindi hakweti kashinshi kakuzata iyi nyidimuku. Neyi nakutoñojoka mwenimu, hadaha nateli kwikala nakashinshi kuhitila mukudiza chikupu Izu daNzambi ninyikanda yashindamena haBayibolu. Nateli kudihula cheñi nindi, ‘Komana nekalaña nampinji yakudiza Izu daNzambi, nikulomba maana?’ Kambanji Yakoba wasonekeli nindi: “Mwinenu nabuli maana, alombi kudi Nzambi, wahanaña kudi antu ejima makasa ayedi, hahosholañaku; akumwinkawu.” (Yak. 1:5) Komana mwakuhwelela munawa mazu onenawu? Hakwakula kulomba kwaSolomoni, Nzambi wamwinkeli “muchima wamaana nakashinshi” kamukwashili kwambula yayiwahi nayatama hakusompesha. (1 Anya. 3:7-14) Eñañi, chuma chamumwekeneni Solomoni chadiña chambukaku. Hela chochu, tunateli kukuhwelela netu Nzambi wukuyinka amayala maana enkawu nyidimu  muchipompelu kulonda akameneña nyikoku yindi chachiwahi.—Yish. 2:6.

13, 14. (a) Lumbululenu chatiyiliyi Pawulu ‘nakukeña kwaKristu.’ (b) Indi “kukeña kwaKristu” kwatela kutuleñela etu kwiladi?

¹³ Chuma chikwawu chatela kutukwasha kwikala nampwila yakukalakela amakwawu chidi chakutoñojoka chikupu hayuma yatwililayi Yehova niMwanindi. Chakutalilahu, talenu 2 Akorinda 5:14, 15. (Tañenu.) Indi “kukeña kwaKristu kwatukakejaña” ñahi? Kukeña kwamwekesheliyi Kristu kuhitila mukutufwila kwesekeja nakukeña kwaNzambi kwabadika nankashi chakwila chitwasweja kuhameka, kwasañumunaña nyichima yetu nankashi. Pawulu wetejeli kukeña kwaKristu kumulombola. Kukeña kwamukañesheleña kubula kwikala nalwisu nawa kwamukwashili kukakela kuyikonkwanyi yindi yakumukalakela Nzambi niakwawu muchipompelu niantu abula kwitiya.

¹⁴ Dichi neyi tukutoñojokaña hakukeña kwaKristu kwakeñayi antu kukutuleñelaña twikali namuchima wakuhameka. Chafumañamu, twelukaña netu tukuluwañesha neyi ‘tukukuwila kuchisemwa’ kuhitila mukufwila yikonkwanyi yakumujimba nikufwila kudiluñisha etu aweni. Ilaña, twahimpaña chihandilu chetu kulonda tutwamijuku mudimu watwinkayi Nzambi. Twafwilaña ‘kukalakela’ ana kwetu muloña wakukeña. (Tañenu Aŋalija 5:13.) Neyi tukudimonaña netu tudi anduñu anakuzatila ambuña Yehova adihana, dikwila nawu tukulemeshaña akwetu chikupu. Hitukwikala nayililu yakeñayi Satana yakukalisha nawa yakudisompesha-sompeshaku.—Chim. 12:10.

Chisaka Chatela Kuzatila Hamu

15, 16. Indi chisaka chinateli kukwasha ñahi iyala kulonda amutondi kwikala nkoñi wakuzatila hela eluda?

¹⁵ Neyi mana kwetu wasumbula nawa wukweti nyana, yililu yamwekeshaña chisaka chindi niyena atela kuyihanjekahu neyi hiyakufuukula nawu yekali nkoñi wakuzatila hela eluda. Mwalala, neyi chisaka chindi chikweti ñimenu yayiwahi kuspiritu nijina dadiwahi akumutonda. Ichi chinakumwekesha chikupu nawu chisaka chatela kukwashaña iyala hamu neyi tata yawantu chikufwilañayi kukalakela chipompelu neyi nkoñi wakuzatila hela eluda.—Tañenu 1 Timotewu 3:4, 5, 12.

¹⁶ Yehova wazañalalaña neyi antu ejima muchisaka chawakwaKristu azatilaña hamu. (Efwes. 3:14, 15) Mutu wachisaka watela kwiluka mwakukumina hakwila nawu yakalakaleña nyidimu yamuchipompelu nikuyula chisaka chindi “chachiwahi.” Dichi, eluda hela nkoñi wakuzatila watela kudizaña Bayibolu hamu nañodindi nianyana kulonda aheteleñamu muKudifukula kwaChisaka mulungu nimulungu. Watela kuyaña nawu nakushimwina kakavulu. Cheñi nawa, chisaka chatela kutiyilila munafuukuli mutu wachisaka.

Komana Munateli Kukalakala Cheñi?

17, 18. (a) Neyi mana kwetu hanakushikahu hakumutondaku, chumanyi chatela kwilayi? (b) Mana kwetu wakalakeleña neyi eluda hela nkoñi wakuzatila kunyima watela kwikala nayitoñojoka yamuchidinyi?

¹⁷ Hadaha mwadiña aeluda hela nkoñi wakuzatila mpinji yakunyima ilaña ichi mudi hohu mukwakushimwina. Mwamukeña Yehova nawa mwatela kukuhwelela nenu wuchidi kuyakamena. (1 Pet. 5:6, 7) Komana ayilejeli nawu mwatela kuhimpa muyuma yimu? Itejenu mumwaluwañeshaña nawa zatilenuhu  nawukwashu waNzambi. Bayi muhilañaku. Ikalenu nakashinshi, nawa mwekeshenu yililu yayiwahi. Eluda wakalakeli hadi yaaka yayivulu, ilaña walekeli, wahosheli nindi: “Nafwilileña kutwalekahu kupompa mpinji yejima neyi chinapompeleña, nikuya mwiha, nikutañaña Bayibolu neyi chochinelileña hampinji yinadiña eluda—nawa natwesheli kwila mwenimu. Nadizili kudiwunjika muloña nelukili nami nakekala cheñi eluda hanyima yachaaka chimu hela yiyedi, ilaña nekalili cheñi eluda chimwahitili yaaka yitanu nayiyedi. Mpinji yejimiyi kwikala namuchima wakutwalekahu wankwashili nankashi.”

¹⁸ Neyi wudi mana kwetu wakalakeleña neyi eluda ilaña ichi himunakukalakalaku, bayi muzeyaku. Toñojokenu chinakukiswilayi Yehova mudimu wenu wakushimwina nichisaka chenu. Koleshenu wuspiritu wachisaka chenu, hempulenuña ayeji, nikukolesha azeya. Sweje-e dinu, lemeshenu chikupu kukooleka kumukweti kwakumushimeka Nzambi nikushimwina nsañu yayiwahi yaWanta neyi Chinsahu chaYehova. *—Mas. 145:1, 2; Isa. 43:10-12.

Dishinshikenu Cheñi

19, 20. (a) Indi amayala apapatishewa ejima anayikonkomweni kwiladi? (b) Chumanyi chitukahanjekahu muchibaaba chinalondeluhu?

¹⁹ Makonu aeluda niankoñi akuzatila anakukeñewa nankashi. Dichi tunakukolesha amayala apapatishewa kushinshika cheñi hachihandilu chawu nikudihula nawu, ‘Chineli hinakukalakala neyi nkoñi wakuzatila hela eludaku, komana chumanyi chinakunkañesha kulonda nibuleña kukalakala neyi eluda hela nkoñi wakuzatila?’ Itejenu spiritu yaNzambi yiyikwashi kutoñojoka chachiwahi haniyi nsañu yalema.

²⁰ Antu ejima muchipompelu akuhetelamu munyidimu yadikitañawu akwawu akakwitiya akweti nyichima yakudihana kudi Nzambi. Neyi tuzataña nyidimu yayiwahi, chakubula lwisu, chafumañamu twekalaña namuzañalu wafumaña mukukalakela akwetu nikukuwila kuspiritu. Hela chochu, chibaaba chinahiñuhu chinakutuleja nawu bayi tuneñeshaña spiritu yaNzambi yajilaku. Tunateli kutondolwela ñahi kuneñesha spiritu yaNzambi?

[Tumazu twaheshina]

Mukwakula Nenudi?

• Indi wuprofwetu wasonekawu haMika 5:5 watulejaña nawudi?

• Lumbululenu mwatalisha yililu yakudihana.

• Indi muntu nateli kwikala ñahi nampwila yakukalakela akwawu?

• Hakwila nawu iyala yashikuhu kukalakala neyi nkoñi wakuzatila hela eluda muloñadi chichalema chisaka kuzatila hamu?

[Malwihu aKuzatisha haKudiza]

[Nyevulu yidi hefu 25]

Chumanyi chimwatela kwila kulonda mushikuhu hakukalakala?