Bayi Muneñeshaña Spiritu Yajila yaYehovaku
Bayi Muneñeshaña Spiritu Yajila yaYehovaku
‘Bayi muneñeshaña spiritu yaNzambi yajilaku, mudi yena dimu mwayifundawu.’—EFWES. 4:30.
1. Chumanyi chakoñelayi Yehova antu amavulu, nawa mudimwinyi wukwetuwu?
YEHOVA wakoñela yihita yawantu adi mukanu kaayi katama chuma cheneni nankashi. Nayikwashi antu kukundama kwakwihi nayena kuhitila mudi Mwanindi wumu hohu, Yesu Kristu. (Yow. 6:44) Ninenu mudi hakachi kanawa antu neyi chakwila mwadihana kudi Nzambi nawa munakuhemba kudihana kwenu. Chineli ayipapatisha mwijina daspiritu yajila, mukweti mudimu wakudihemba kwesekeja nawunlomboli waspiritu.—Mat. 28:19.
2. Malwihwinyi itukuhanjekahu?
2 Etu ‘twakuwilaña kuspiritu’ twavwalaña wuntu wawuha. (Ŋal. 6:8; Efwes. 4:17-24) Ilaña kapostolu Pawulu watufumba nikutusoñamisha nindi bayi tuneñeshaña spiritu yajilaku. (Tañenu Aefwesesa 4:25-32.) Ichi dinu tushinshikenu haniyi nsañu yitunatañi. Indi Pawulu watalishili mudihi hakuhosha hansañu yakuneñesha spiritu yaNzambi? Indi muntu wadihana kudi Yehova natela kuneñesha ñahi spiritu yaNzambi? Nawa tunateli kutondolwela ñahi kuneñesha spiritu yaYehova?
Mwatalishiliyi Pawulu
3. Munateli kulumbulula ñahi mwatalisha mazu asonekawu haAefwesesa 4:30?
3 Chatachi, talenu mazu aPawulu asonekawu haAefwesesa 4:30. Wasonekeli nindi: ‘Bayi muneñeshaña spiritu yaNzambi yajilaku, mudi yena dimu mwayifundawu kushika nikwifuku dakukuula.’ Pawulu hakeñeleña nindi akwawu akakwitiya ashi wuspiritu wawu hakatoñaku. Spiritu yaYehova diyaleñeleli ‘ayifundi kushika nikwifuku dakukuula.’ Spiritu yajila yaNzambi diyayifundili nawa yichidi kufunda nihanu, hela dichinjikijilu ‘chayuma yakumbidi’ yawantu awayishewa akweti kashinshi. (2 Kor. 1:22) Mufunda wamwekeshaña nawu hiyantu ambala aNzambi nawa akatambwila wumi wamwiwulu. Antu alamikiluwu chilamiki ekala 144,000.—Chim. 7:2-4.
4. Muloñadi kubula kuneñesha spiritu yaNzambi chikwalemena?
4 Kuneñesha spiritu diyi njila yatachi yaleñelaña mukwaKristu aleki kumulombola kudi ñovu yaNzambi yazatikaña muchihandilu chindi. Chumichi chinateli kumwekana neyi chahosheliyi Davidi hanyima yakwila nshidi naBatisheba. Davidi wamulembeleleli Yehova nakumwekesha kudanakena nindi: ‘Bayi wuñumbila kwakulehi nanoku kuwekalaku; bayi wuntambula spiritu yeyi yajilaku.’ (Mas. 51:11) Antu awayishewa hohu anamwekeshi ‘kashinshi ndo nikukufwa,’ diwu akatambula “chibaaba” chawumi wahaya nyaka mwiwulu. (Chim. 2:10; 1 Kor. 15:53) AkwaKristu achiñejaña kushakama hamaseki niwena akeñaña spiritu yajila kulonda yiyikwasheñaku kwikala ashinshika kudi Nzambi nawa akatambwila chawana chawumi kuhitila mukukuhwelela mwifutu danyiloña daKristu. (Yow. 3:36; Rom. 5:8; 6:23) Dichi, wonsu wetu bayi tuneñeshaña spiritu yajila yaYehovaku.
Indi mukwaKristu Nateli Kuneñesha ñahi Spiritu?
5, 6. Indi mukwaKristu nateli kuneñesha ñahi spiritu yaYehova?
5 Chineli tudi akwaKristu adihana, tunateli kutondolwela kuneñesha spiritu. Tunateli kwila mwenimu neyi ‘tutwalekahu kwenda nikulombolewa naspiritu,’ chitwela mwenimu tukashinda yililu yachisemwa nawa hitukumwekeshaña yililu yatamaku. (Ŋal. 5:16, 25, 26) Yililu yetu yinateli kuhimpika. Tunateli kuneñesha spiritu yaNzambi neyi tutachika kuheñuka chovu-chovu nakwila yililu yahishawu Mwizu daNzambi donenawu naspiritu, hadaha munjila yakadi kwiluka.
6 Neyi tutwalekahu kwila yuma yabula kwitejewa naspiritu yajila, tukuneñeshaña spiritu niYehova, Mwini spiritu. Dichi tushinshikenu mukanda waAefwesesa 4:25-32 kulonda wutuleji chitwatela kudihemba, nawa wukutukwasha kutondolwela kuneñesha spiritu yaNzambi.
Chitwatela Kutondolwela Kuneñesha Spiritu
7, 8. Lumbululenu muloña wutwatela kuhoshelaña mwalala.
7 Twatela kuhoshaña mwalala. Kwesekeja nachahosha Aefwesesa 4:25, Pawulu wasonekeli nindi: “Dichi lekenu kutwamba, hoshenuña nsañu yalala nawakwenu; muloña tunekali dehi yidi yimu nawakwetu.” Chineli “tunekali dehi yidi yimu nawakwetu,” dichi bayi twikalaña ayipwapoki hela kudimba akwetu akwakwitiya mumushikilaku, muloña chochimu nakutwamba. Muntu wukutwalekahu nakwila yumiyi hanateli kwikala nawubwambu naNzambuku.—Tañenu Yishimu 3:32.
8 Mazu akutwamba niyililu yinateli kuluwañesha kunuñañana kwamuchipompelu. Dichi, twatela kwikala ashinshika neyi kaprofwetu Danyeli, akañenyuwu kuwana nachiluwa. (Dan. 6:4) Nawa twatela kwanukaña kufumba kwaPawulu kwafumbiliyi akwaKristu akweti kuchiñeja kwakuya mwiwulu nindi muntu wejima wekala “[mu]mujimba waKristu” wakundama kudi akwawu ejima nawa watela kunuñañana nawatumbanji ashinshika awayishewa aYesu. (Efwes. 4:11, 12) Neyi twakuhwelela kushakama haya nyaka muParadisa hamaseki, ninetu twatela kuhoshaña mwalala, kulonda twikali anuñañana nawana kwetu mukaayi kejima.
9. Muloñadi chichalemena kulondela mazu ekala haAefwesesa 4:26, 27?
9 Twatela kudikaña naDiyabolu, kulonda yabuli kuwana hakukisañena wuspiritu wetu. (Yak. 4:7) Spiritu yajila yatukwashaña kudikaña naSatana. Chakutalilahu, tunateli kudikaña naSatana kuhitila mukuleka ndulu yakadi kumana. Pawulu wasonekeli nindi: ‘Zuwenu kuzuwa kwakadi kuvulumuna, bayi muhumisha itañwa iku saña mwahililaku. Bayi mumushila Diyabolu hakushakamaku.’ (Efwes. 4:26, 27) Neyi tuhila hamuloña wakutuvulumuna, twatela kulomba swayi wumweneni kulonda ‘tudiwunjiki mumuchima,’ nikudihemba chatela twili yuma munjila yatela kuneñesha spiritu yaNzambi. (Yish. 17:27) Dichi bayi tuhilashanaña mwana wejimaku muloña tukumushila Satana iluña nakumuletesha yatuleñeli kwila yuma yatama. (Mas. 37:8, 9) Njila yimu yakudikañilamu nindi yidi yakunyakalaña kumanisha yikonkojola neyi chahosheliyi Yesu.—Mat. 5:23, 24; 18:15-17.
10, 11. Muloñadi chitwabulilaña kwiya hela kwikala ayipwapoki?
10 Bayi tudiñija mukweseka kudi kwejima kwakwiya hela kubula kashinshuku. Pawulu wasonekeli hansañu yawukombi nindi: “Muntu wadiñi ikombi, kwiya nawa cheñi chinjila; akalakali mudimu wawuwahi namakasindi, kulonda aheti yuma yakuyinka akwawu anabuli.” (Efwes. 4:28) Neyi mukwaKristu wadihana yeya, dikwila nawu wukuleñela ‘ijina daNzambi kuditena chatama’ nakudisawula. (Yish. 30:7-9) Hela tuhu wuzweñi hiwunateli kuleñela muntu kwiyaku. Antu amukeña Nzambi niatuñi nawu eluka nawu kwosi chuma chatela kuyileñela kwiyaku.—Maku 12:28-31.
11 Pawulu hashimwini hohu chuma chitwatela kubula kwilaku; wateneni niyuma yitwatela kwila. Neyi tunakushakama nikwenda chakutwendesha kudi spiritu, tukuzataña nañovu kulonda twakameneña chisaka chetu nikwikala ‘nayuma yakuyinka akwetu anabuli.’ (1 Tim. 5:8) Yesu niapostolu indi ahembeli mali akukwasha nachu ahutwa, ilaña Yudasi Isakaroti nfukeji wanoneluhu mali. (Yow. 12:4-6) Yudasi hiyamulombweleña kudi spiritu yajilaku. Etu alombolañawu kudi spiritu yaNzambi “tunakeñi kushakama chakashinshi muyuma yejima,” neyi chadiñayi Pawulu. (Heb. 13:18) Twatondolwelaña kuneñesha spiritu yaYehova yajila.
Njila Jikwawu Jakutondolwelamu Kuneñesha Spiritu
12, 13. (a) Nhoshelu yamuchidinyi yitwatela kutondolwela kwesekeja nachinahoshi Aefwesesa 4:29? (b) Indi nhoshelu yetu yatela kwikala yamuchidinyi?
12 Twatela kuhemba nhoshelu yetu. Pawulu wahosheli nindi: “Kuhosha mazu [atoka] chinjila, chiña mazu amawahi anatweshi kukolesha antu hakumonawu kukala, kulonda akwashi naluwi awa akuyitiya.” (Efwes. 4:29) Cheñi, kapostolu hanatuleji hohu yuma yitwatela kubula kwilaku; ilaña natuleji yuma yitwatela kwilaña. Nawukwashu waspiritu yaNzambi, anetu ‘tukuhoshaña mazu amawahi anatweshi kukolesha antu hakumonawu kukala, kulonda akwashi naluwi awa akuyitiya.’ Cheñi nawa hitukwiteja “mazu [atoka]” edikeña mukanwa ketuku. Izu dachiGriki dabalumunawu ‘kutoka’ adizatishaña hakutena mukabu, inshi, nimbiji yatooka. Neyi chochitwabulaña kudya yakudya yatoka, twahela nhoshelu yamonañayi Yehova nindi yatama.
13 Nhoshelu yetu chiña yikalaña yayiwahi, yawushona, ‘yakutoweja namuñwa.’ (Kol. 3:8-10; 4:6) Antu chatiyawu yuma yitunakuhosha atela kwiluka nawu twambukaku. Dichi tukwashenu akwetu kuhitila ‘mukuhosha yuma yakukolesha akwetu.’ Nawa twatela kutiya neyi chatiyiliyi ñimbi yamasamu nindi: “Nimazu amukanwa kami, niyitoñojoka yamumuchima wami yiikali yakukutiyisha kuwaha, eyi Yehova, yeyi ilola dami, yeyi nkuuli yami.”—Mas. 19:14.
14. Kwesekeja naAefwesesa 4:30, 31, yumanyi yitwatela kuleka?
14 Twatela kuleka ndulu, kuzuwa, nhoshelu yatama niyuma yejima yatama. Hanyima yakuhosha mazu akusoñamisha akuneñesha spiritu yaNzambi, Pawulu wasonekeli nindi: “Lekenu ndulu yejima, nindombu, nikuzuwa, nimapumba, nikutukana, ninkunyi yejima.” (Efwes. 4:30, 31) Chineli tudi antu abula kuwanina, wejima wetu twatela kuzata nañovu kulonda tuyuleña nhoshelu yetu ninzatilu. Neyi twikalaña ‘nandulu, nindombu, nikuzuwa,’ tukuneñeshaña spiritu yaNzambi. Chochimu neyi tuhembaña yiluwa yejima yinatuvulumunuwu, nikwila katama nakatama, nikukaana kwanakena muntu wunatuvulumuni. Neyi tutachika kukaana kufumba kwamuBayibolu, tunateli kwikala nayililu yikuletesha tuvulumuni spiritu nawa munateli kufuma yuma yatama nankashi.
15. Chumanyi chitwatela kwila neyi atwila katama?
15 Twatela kwikala naluwi, niwushona, nikwanakena. Pawulu wasonekeli nindi: “Dikokwejenu muntu namukwawu; ikalenu namuchima wawushona; danakenenu muntu namukwawu neyi chayanakenenuwu kudi Nzambi mudi Kristu nawa.” (Efwes. 4:32) Hela chakwila kumuchima kunakukata nachuma chinatukoñuwu, tudanakenenu neyi chatwanakenañayi Nzambi. (Luka 11:4) Neyi mukwetu mukwaKristu natuhoshi chatama, hakwila nawu tumanishi iyi nsañu twatela kumuwana. Neyi yaneña nakulomba kwanakena, twatela kumwanakena, ilaña kudi yuma yikwawu yitwatela kwila. Alevi 19:18 yahosha nawu: “Kuditenda chinjila; kushila anyana kawantaña jeyi nkunyi kumuchima chinjila, chiña wakakeñaña mukwenu neyi chiwadikeñaña eyi aweni; yami Yehova.”
Twatela Kwikala Asoñama
16. Shimunenu chakutalilahu chinakumwekesha nawu twatela kuhimpa yililu yetu kulonda tubuleña kuneñesha spiritu yaYehova.
16 Hela tudi nkawetu, tunateli kukoña chuma chikumuneñesha Nzambi. Chakutalilahu, mana kwetu nateli kwikala nachaaku chakutiyilila kutumina twatama. Nkumininaku, chinleji chindi hichikumukabisha muloña wakukaana kufumba kwamuBayibolu kwasonekawu munyikanda ‘yanduñu wamaana nikashinshi.’ (Mat. 24:45) Nateli kulombela haniku kukala nawa nateli kwanuka mazu aPawulu asonekawu haAefwesesa 4:30. Hakufuukulahu kubula kwila chuma chikuleñela kuneñesha spiritu yaNzambi, kufuma haniyi mpinji nadishiñi chikupu nindi hakutiyililaña kutumina twamukunkulwayuku. Yehova wukumukiswila neyi yamwekesha yililu yamuchidiwu. Dichi, twikalenu namuchima wakubula kuneñesha spiritu yaNzambi.
17. Chumanyi chinateli kumwekana neyi tukañanya kwikala atona nikulombaña?
17 Neyi tukañanya kwikala atona nikulombaña, tunateli kudiñija muyililu yawuzondu nawa yatama yikuneñesha spiritu. Chineli spiritu yajila yasoñaña yililu yamwekeshaña chekalayi Tata yetu wamwiwulu, neyi tuneñesha spiritu, dikwila nawu tunakumutiyisha Nzambi kutama, nawa hitunakukeña kwila chuma chamuchidiwuku. (Efwes. 4:30) Ansoneki awaYudeya amunkulakaji yakusambila avulumwini hakuhosha nawu yihayamisha yaYesu yadiña yaSatana. (Tañenu Maku 3:22-30.) Awa ayilumbu jaKristu ‘atukili spiritu yajila’ nawa avulumwini nshidi yakadi kwanakena. Chinjila kwila chuma chamuchidiwu!
18. Tunateli kwiluka ñahi netu hitunavulumini nshidi yakadi kwanakenaku?
18 Chineli hitunakukeña kushika kwakwihi nakwila nshidi yakadi kwanakenaku, twanukeña mazu ahosheliyi Pawulu kutalisha hakubula kuneñesha spiritu. Indi neyi tunavulumuni chikupu? Neyi tubalumuka mumuchima nawa aeluda anatukwashi, tunateli kwiluka netu Nzambi natwanakeni nawa hitunavulumuni spiritu yajilaku. Nawukwashu waNzambi, tunateli kutondolwela kuneñesha spiritu yaNzambi munjila yidi yejima.
19, 20. (a) Yumanyi yitwatela kutondolwela? (b) Twatela kufuukulahu kwila chumanyi?
19 Kuhitila muspiritu yindi yajila, Nzambi wazatishaña spiritu yindi yajila kulonda yasañumuni kukeña, muzañalu, nikunuñañana hakachi kawantu jindi. (Mas. 133:1-3) Dichi, bayi tuneñeshaña spiritu kuhitila mumatuñu hela kuhosha yuma yakusawula atubiña atondawu naspirituku. (Yil. 20:28; Yuda 8) Ilaña, twatela kuleta kunuñañana nikudilemesha wumu namukwawu muchipompelu. Eñañi, bayi tudikuñululaña mutumazanvu hakachi kawantu jaNzambuku. Pawulu wasonekeli nindi: “Enu ana kwetu, nayilembeleli mwijina daMwanta wetu Yesu Kristu, nami hoshenu mazu wowamu wejima wenu; bayi mwambuka aha chendu chimu, aha chendu chikwawuku; chiña kudibomba hamu nayitoñojoka yimu nikutiyañana kumu.”—1 Kor. 1:10.
20 Yehova wakeñaña nawa wafwilaña kutukwasha kulonda tubuleña kuneñesha spiritu yindi. Tutwalekenuhu kulomba spiritu yajila nikufuukulahu chikupu kubula kuneñesha spiritu. Tutwalekuhu ‘kukuwila kuspiritu,’ nakukeña chikupu wunlomboli waspiritu makonu nihaya nyaka.
Mukwakula Nenudi?
• Indi kuneñesha spiritu yaNzambi kwatalisha mudihi?
• Indi muntu wadihana kudi Yehova nateli kuneñesha ñahi spiritu yindi?
• Njilanyi mutwatela kutondolwela kuneñesha spiritu yajila?
[Malwihu aKuzatisha haKudiza]
[Mwevulu wudi hefu 30]
Nyakalenu kumanisha yikonkojola
[Mwevulu wudi hefu 31]
Mukabu wumu yodihi wunakumwekesha chekala nhoshelu yenu?