Muloñadi Ambanda Chatela Kwovwahilawu wuMutu?

‘Mutu wamumbanda diyi iyala.’—1 KOR. 11:3.

1, 2. (a) Yumanyi yasonekeli kapostolu Pawulu kutalisha hakuloñesha kwaYehova kwawumutu nikwovwahila? (b) Malwihwinyi itukuhanjekahu muchinu chibaaba?

 YEHOVA watanjika njila yayiwahi yateneniyi kapostolu Pawulu hasonekeliyi nindi “mutu weyala diyi Kristu” nawa “mutu waKristu diyi Nzambi.” (1 Kor. 11:3) Chibaaba chinafumuhu chahosha nawu Yesu wazañaleleña hakwovwahila Mutu windi, Yehova Nzambi, nawa nawu Kristu diyi mutu wawamayala akwaKristu. Kristu wadiña naluwi, wovwahila nawa hadiñi nachaambu nawantuku. Amayala muchipompelu atela kwikala nayililu yaKristu yakwakamena antu, sweje-e añodijawu.

² Indi ambanda atela kwikala nayililu yamuchidinyi? Indi mutu wawu hinyi? Pawulu wasonekeli nindi: “Mutu wamumbanda diyi iyala.” Indi ambanda atela kumona ñahi awa mazu onenewa? Komana ilu lushimbi lwakundama nikudi amayala abula kwitiya? Komana kwovwahila wumutu weyala chatalisha mukwila nawu mumbanda watela kwikala neyi kamama neyi kudi nsañu yinakufuukulawu mumaluwi? Chumanyi chatela kwilayi mumbanda hakwila nawu amuhameki?

 “Nukumwilila Nkwashi”

3, 4. Muloñadi ntanjikilu yawumutu mumaluwi chiyawahila?

³ Nzambi diyi watondeli muntu watela kwikala mutu muchisaka. Chelili naleñi dehi Adama, Yehova Nzambi wahosheli nindi: “Hichinawahi iyala kushakama kanka winduku; nukumwilila nkwashi wamutelela.” Chamuleñeluwu Evu, Adama watiyili kuwaha hakwikala namulundanindi nawa nkwashi chakwila wahosheli nindi: “Iwu neli dehi ifwaha dami, neli dehi mujimba wami.” (Kutach. 2:18-24) Adama niEvu adiña nakukooleka kweneni kwakwikala anvwali jawantu ejima awanina, nakushakama muparadisa hamaseki namuzañalu nawa haya nyaka.

⁴ Hamuloña wakudikaña kwawanvwali jetu atachi, chihandilu chachiwahi mwitempa daEdeni chamanini. (Tañenu Aroma 5:12.) Ilaña, ntanjikilu yawumutu yatwalekeluhu. Neyi eyala namumbanda alondela iyi ntanjikilu, akwikala namuzañalu mumaluwi. Chikufumamu akutiya neyi chatiyileñayi Yesu hampinji yovwahililiyi Mutu windi, Yehova. Henohu kanda yenzi hamaseki, Yesu ‘wamutiyishileña [Yehova] kuwaha hefuku hefuku.’ (Yish. 8:30) Hamuloña wakubula kuwanina, amayala akañanyaña kwikala nyitu yawanina, ambanda niwena akañanyaña kwovwahila chikupu. Hela chochu, neyi amayala nawañodijawu atwalekahu kuzata nañovu, mumaluwi awu munateli kwikala muzañalu weneni.

5. Muloñadi eyala namumbanda chiyatela kulondelawu kufumba kwekala haAroma 12:10?

⁵ Chuma chabadika kulema chaleteshaña maluwi kukola chidi chakwila nawu eyala namumbanda atela kuzatisha kufumba kwamuNsona kwaloñeshelawu akwaKristu ejima kwakwila nawu: ‘Keñañanenu nawana kwenu nawushona; itejenu mwinenu abadiki kulema.’ (Rom. 12:10) Cheñi eyala namumbanda atela kuzata nañovu kulonda ‘adikokwejeña muntu namukwawu; nikwikala namuchima wawushona; nikudanakena muntu namukwawu.’—Efwes. 4:32.

Neyi Mwinikwenu Hetiyaku

6, 7. Chumanyi chinateli kufumamu neyi mumbanda mukwaKristu yovwahilaña mfumwindi wabula kwitiya?

⁶ Indi neyi mwinikwenu hikambuña Yehovaku? Kakavulu, mukuwana iyala hetiyaku. Neyi hetiyaku, mumbanda watela kushakama ñahi namfumwindi? Bayibolu yakula nawu: “Ambanda, shakamenu nakwovwahila anfumu jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu añodi jawu; chakumonawu chimukushakama nawoma chakubula kubajama.”—1 Pet. 3:1, 2.

⁷ Izu daNzambi dalejaña mumbanda kwovwahilaña mfumwindi wabula kwitiya. Yililu yindi yayiwahi yikuleñela mfumwindi kukeña kwiluka chaleteshaña ñodindi yamwekesheña yililu yayiwahi. Chikufumamu, iyala wakakeña kwiluka yuma yakuhwelelayi ñodindi mukwaKristu nawa nkumininaku waketeja chalala.

8, 9. Chumanyi chatela kwilayi mumbanda mukwaKristu neyi mfumwindi wabula kwitiya hanakuhimpaku hela chakwila yena nakumwekesha yililu yayiwahi?

⁸ Chumanyi chimwatela kwila neyi iyala wabula kwitiya yakaana kuhimpa yililu yindi?  Nsona yakonkomwenaña ambanda etiya kutwalekahu nakumwekesha yililu yawakwaKristu mpinji yejima, hela chakwila hichuma chaswayuku. Chakutalilahu, twatañaña hamukanda wa 1 Akorinda 13:4 nawu: “Kukeña kwadiwunjikaña.” Mumbanda mukwaKristu watela kutwalekahu kumwekesha yililu yayiwahi “nakudizoza kwejima nakwovwaha, nakudiwunjika,” nakuditiyilila nakukeña. (Efwes. 4:2) Munateli kutwalekahu kumwekesha yililu yawakwaKristu hela chakwila mudi mukukala kuhitila muñovu yaNzambi yazatikaña, spiritu yindi yajila.

⁹ Pawulu wasonekeli nindi: “Natweshi kwila yuma yejima mudi Kristu wankoleshaña.” (Fwi. 4:13) Spiritu yaNzambi yaleñelaña mukwaKristu wasumbula hela wasumbuka kwila yuma yayivulu yinateli kukañanyayi halwindi. Chakutalilahu, neyi wumu mumaluwi wazuwa chinateli kuleñela mwinikwindi kufuntisha katama nakatama. Hela chochu, Bayibolu yalejaña akwaKristu ejima nawu: “Bayi mwila mwinenu chatama nakatama kanayiliyuku. . . . Muloña anasoneki nawu, Yehova nahoshi nindi, Yami nukutenda, yami nukufweta.” (Rom. 12:17-19) Cheñi, mukanda wa 1 Atesalonika 5:15 watufumbaña nawu: “Bayi hamwekana muntu wukumwila mukwawu chatama nakatama kanamwiliyuku. Londelenu kwila akwenu chachiwahi, niantu ejima mafuku ejima.” Hamuloña wawukwashu waspiritu yajila yaYehova, yuma yatukalilaña yatupelelaña. Dichi, twatela kulombaña spiritu yajila yaNzambi kulonda yitwinkeña yuma yitwakeñaña.

10. Indi Yesu welili ñahi namazu atama amuhosholeleñawu niyililu yatama yamukoñeleñawu antu?

¹⁰ Yesu waheni chakutalilahu chachiwahi kudi antu amuhosheleña nikumwila yuma yatama. Mukanda wa 1 Petulu 2:23 wahosha nawu: “Yena chamutukiluwu, hafuntishili cheñi matukaku; chamweniyi yihuñu hazuwiluku, ilaña wadikunjikili kudi yena wasompeshaña chaloña.” Anatukoleshi kulondela chakutalilahu chindi chachiwahi. Dichi bayi muhilashanaña muloña wayililu yatama yelañawu antuku. AkwaKristu ejima anayikonkomweni nawu, ‘ikalenu nanyichima yaluwi, nayitoñojoka yakudizoza. Bayi mutamisha mukwenu nanochu chanakutamishiyuku, hela kumutuka nanochu chanakutukiyuku. Chinjila kwila mwenomu.’—1 Pet. 3:8, 9.

Komana Ambanda Atela Kumwenahu Hohu?

11. Indi ambanda amakwawu akwaKristu akakalakalaña mudimwinyi weneni?

¹¹ Komana kwovwahila wumutu weyala chaya mukwila nawu ambanda atela kumwenahu hohu mumaluwi, chakadi kuhoshahu hansañu yakundama kuchisaka nihayuma yikwawu? Inehi. Yehova wayinka ambanda niamayala kukooleka kwakuvulu. Toñojokenu hakukooleka kwekala nawamana kwetu a 144,000 kwakwikala anyanta niatupristu mwiwulu akayula naKristu hadinu iseki! Hanidi izanvu hadi niambanda. (Ŋal. 3:26-29) Chakadi nikujina, Yehova wayinka ambanda mudimu weneni mukuloñesha kwindi.

12, 13. Shimunenu chakutalilahu chinakumwekesha nawu ambanda aprofweteli.

¹² Chakutalilahu, kushankulu, ambanda adiñi nakuprofweta. Mukanda waYoweli 2:28, 29 washimwineñahu dehi nawu: ‘Nakechila spiritu yami hadi antu ejima; anyanenu amayala nawambanda akaprofweta. . . . Hadi ambuñenu amayala nihadi ambuñenu awambanda hamafuku owu nakechila spiritu yami.’

¹³ Atumbanji twaYesu 120 apompeli mukapeka kahewulu muYerusalema hefuku daPentekosta 33 C.E. adiña amayala niambanda. Spiritu yaNzambi ayichilili hanidi izanvu dejima. Dihafumini Petulu kuhosha mazu aprofweteli kaprofwetu Yoweli nakuyikunjika kudi amayala niambanda. Petulu wahosheli nindi: ‘Chuma chimunamoni, chochuma chateneni kaprofwetu Yoweli, nindi, Nzambi nindi, Chakela hamafuku akukuminina, nakechila spiritu yami hadi antu ejima; nianyanenu amayala nawambanda akaprofweta, . . . Mwamweni, nihadi anduñu jami amayala nawambanda nakechila  spiritu yami hamafuku akalondelamu, akaprofweta.’—Yil. 2:16-18.

14. Mudimwinyi wakalakeleñawu ambanda hakutiyakesha ntañishilu yawuKristu?

¹⁴ Muyaaka nkulakaji yakusambila, ambanda akalakeli mudimu walema wakutandisha ntañishilu yawuKristu. Ashimwinineña antu haWanta waNzambi nikukoña yuma yakundamini kumudimu wakushimwina. (Luka 8:1-3) Chakutalilahu, kapostolu Pawulu wamuteneni Fwibi “mukwakukalakela [mu]chipompelu chekala kuKenikiri.” Hakutemesha nyitendi kudi akwawu akanyidimu, Pawulu wateneni ambanda amavulu ashinshika, kubombelahu ‘niaTirifwena naTirifwosa, ambanda akalakalaña chikupu mudimu mudi Mwanta.’ Cheñi wateneni ‘Perisa wakeñewa, wakalakeleña nyidimu yayivulu mudi Mwanta.’—Rom. 16:1, 12.

15. Mudimwinyi wakalakalañawu ambanda wakutiyakesha ntañishilu yawuKristu makonu?

¹⁵ Makonu, antu anakushimwina nsañu yayiwahi yaWanta waNzambi mukaayi kejima hakachi kawantu akubadika hayihita 7, amavulu hiyambanda atwansi niakulumpi. (Mat. 24:14) Hakachi kawu, amavulu hiyakwakukalakala ampinji yejima, amishonali nawa amakwawu akalakelaña haBeteli. Ñimbi yamasamu Davidi wembili nindi: “Mwanta wahanaña izu; niambanda ashimunaña nsañu hinjita [yeneni.]” (Mas. 68:11) Mwamweni awa mazu anakushikijewa! Yehova walemesha mudimu wakalakalañawu ambanda wakushimwina nsañu yayiwahi nikwila mwaya kukeña kwindi. Yehova chalejayi ambanda akwaKristu nindi ovwahileña, hichinayi mukwila nawu atela kwovwahila kuhitila mukumwenahuku.

Ambanda Ayedi Ahosheli Yuma Yatoñojokeleñawu

16, 17. Indi chakutalilahu chaSara chamwekeshaña ñahi nawu ambanda hiyatela kumwenahu mumaluwuku?

¹⁶ Neyi Yehova wayinka ambanda nyidimu yayivulu, komana amayala kwila ehula añodijawu henohu kanda atachiki kufuukula hayuma yamaneni nehi? Chikuwaha neyi akwilaña mwenimu. Nsona yahosha hayuma yayivulu kutalisha hadi ambanda ahosheli hela kukoña yuma chakadi kuyiteja kudi amfumujawu. Shinshikenu hayakutalilahu yiyedi.

¹⁷ Sara, ñoda nkakulula Abarahama, watwelekeluhu kumuleja mfumwindi kulonda yomuhañi ntemena nimwanindi weyala hamuloña wakubula kalemesha. “Chumichi chamutaminini nankashi Abarahama”—ilaña Nzambi hichamutamininuku. Yehova wamulejeli Abarahama nindi: “Bayi chikutamina hansañu yamukwenzi, hela hansañu yanduñu yeyi wamumbandaku; kumina dakutiya mwizu daSara mwejima mwanahoshiyi.” (Kutach. 21:8-12) Abarahama wamwovwahilili Yehova, wamutiyilili Sara nawa welili mwakeñeliyi.

18. Chumanyi cheliliyi Abigayili?

¹⁸ Toñojokenu cheñi hadi Abigayili, ñoda Nabali. Mpinji yatemukileñayi Davidi Mwanta Sawulu wechima, wateekeleli kwakwihi nakwadiñi nyikoku yaNabali. Chatela amutambuluhu iwu samaheta yuma yindi yayivulu, David niantu jindi amuhembeleli yuma yindi. Hela chochu, Nabali ‘wadiñi wakala nawa watama mwelilañayi mwejima’  nawa ‘wayitalumokeleli’ antu jaDavidi. Wadiñi ‘muntu wamukunkulwayi,’ nawa ‘wadiñi wasupa.’ Antu jaDavidi chamulombeluwu yakudya, Nabali wakaanini. Indi Abigayili welilidi chachitiyiliyi? Chakubula kumulejamu Nabali, “Abigayili hakunyakala kutambula makulakaji amankendi ayedi, ninswaha javinyu jiyedi, ninyikoku yakuuwa dehi yitanu, niyesekelu yatidiku yakwocha yitanu, ninyikanji yanyikabu yavinyu yawuma nkulakaji, nimankendi achikuyu chakudima makulakaji ayedi” nakumwinka Davidi niantu jindi. Komana Abigayili welili mwamuwahi? Bayibolu yatulejaña nawu “Yehova hakumweta Nabali, yofwa nikufwa.” Nkumininaku Davidi wamusumbwili Abigayili.—1 Sam. 25:3, 14-19, 23-25, 38-42.

‘Mumbanda Ahamekañawu’

19, 20. Chumanyi chaleteshaña mumbanda nawu amuhamekeña chikupu?

¹⁹ Nsona yahamekaña mumbanda welaña yuma kwesekeja nakukeña kwaYehova. Mukanda waYishimu wahamekaña “mumbanda washinshika” nawu: “Wuseya windi wabadika nankashi marubi. Mumuchima wa[m]fumwindi wamukuhwelela, yena iyala hakabula hawudiiluku. Mumbandowu wukumwilaña [m]fumwindi mwamuwahi hohu mafuku indi ejima akahandayi.” Cheñi nawa, “wajikulaña mukanwa kindi nakuhosha yamana; kwidimi dindi kwekala nshimbi yaluwi. Watalaña chachiwahi mwelaña akwetala dindi; hadyaña kudya kwawukopuku. Anyanindi anyamukaña nakumutena nawu, Wakooleka; [m]fumwindi niyena nawa wamuhamekaña.”—Yish. 31:10-12, 26-28.

²⁰ Chumanyi chaleteshaña mumbanda nawu amuhamekeña chikupu? Mukanda waYishimu 31:30 watulejaña nawu, “Kuwaha kwamujimba kwadimbanaña, nilubanji lwamukunkulwayi tuhu; ilaña mumbanda waakama Yehova diyi akahamekawu.” Kumwakama Yehova kwakeñekaña hakwila nawu mumbanda yovwahili antu enkawu wumutu. “Mutu wamumbanda diyi iyala,” nawa “mutu weyala diyi Kristu,” cheñi “mutu waKristu diyi Nzambi.”—1 Kor. 11:3.

Zañalalenu naChawana Chayinkayi Nzambi

21, 22. (a) Yumanyi yaleñelaña akwaKristu adisumbula kumuhameka Nzambi hakuyinka chawana chamaluwi? (b) Muloñadi chitwatela kulemeshela ntanjikilu yaYehova yawunlomboli niwumutu? (Talenu chikasha hefu 17.)

²¹ Kudi yuma yayivulu yaleteshaña akwaKristu adisumbula kumusakilila Nzambi! Atela kwendelaña hamu neyi eyala namumbanda amuzañalu. Sweje-e dinu atela kumusakilila Nzambi hakuyinka chawana chamaluwi muloña chinayinki kukooleka kwakunuña wumi wawu hamu nakwenda naYehova. (Luti 1:9; Mika 6:8) Ntachiki yamaluwi, weluka chikupu yuma yatela kuleta muzañalu mumaluwi. Mpinji yejima ilenuña yuma kwesekeja nachakeñañayi, nawa ‘muzañalu waYehova wukekala ñovu yenu,’ nimudinu ituña datama.—Nehe. 8:10.

²² Iyala mukwaKristu wakeña ñodindi neyi chadikeña yomweni wazatishaña wumutu windi munjila yayiwahi nawa yakutoñojokelaku ñodindi. Wukusweja kumukeña ñodindi wamwakamaña Nzambi, muloña wukumukwashaña mfumwindi nikumulemesha chikupu. Sweje-e dinu, maluwi awu amawahi akuletaña mpuhu kudi Yehova Nzambi yetu.

Munakwanuka?

• Indi ntanjikilu yaYehova kutalisha hawumutu nihakwovwahila yekala ñahi?

• Muloñadi eyala namumbanda chatela kudilemeshelawu wumu namukwawu?

• Indi mumbanda wetiya watela kwakama ñahi mfumwindi wabula kwitiya?

• Muloñadi amayala chatela kwihwilawu añodi jawu henohu kanda afuukuli hayuma yamaneni?

[Malwihu aKuzatisha haKudiza]

 [Chikasha chidi hefu 17]

Chitwatela Kulemeshela Wunlomboli

Yehova washa ntanjikilu yawunlomboli niwumutu hakachi kayileñaleña yindi yikweti maana. Washaku iyi ntanjikilu kulonda yikwasheña yileñaleña yakuspiritu niantu. Iyi ntanjikilu yayinkaña kukooleka kwakuzatisha wuswa wawu wakufuukula nikumulemesha Nzambi kuhitila mukuzatila hamu mukunuñañana.—Mas. 133:1.

Chipompelu chawakwaKristu awayishewa eluka ñovu niwumutu waYesu Kristu. (Efwes. 1:22, 23) Hamuloña wakwiluka wuswa wukwetiyi Yehova, nkumininaku “Mwana nawa wakamwovwahila Mukwakwovwahisha yuma yejima, kulonda Nzambi akekali diyi hohu kanka windi chikupu, mwejima.” (1 Kor. 15:27, 28) Komana chikuwaha neyi antu adihanaña kudi Nzambi akwovwahilaña ntanjikilu yawumutu muchipompelu nimuchisaka! (1 Kor. 11:3; Heb. 13:17) Neyi tukwovwahilaña wumutu, tukuhetelañamu nikutambwila wuselewa ninkisu yaYehova.—Isa. 48:17.

[Mwevulu wudi hefu 13]

Kulomba kunateli kukwasha mumbanda mukwaKristu kumwekesha yililu yayiwahi

[Nyevulu yidi hefu 15]

Yehova walemesha mudimu wazatañawu ambanda wakutwala Wanta hambidi