Muloñadi Chitwatela Kulemeshela Atushinakaji?

KUCHIKUMU chakuCalifornia, ku U.S.A, kwekala mutondu wekala hakachi kanyitondu yaswejawu antu kukwata nyevulu mukaayi. Awutenaña nawu Lone Cypress. Kwesekeja nachashimunañawu antu, iwu mutondu wunashakami yaaka yakubadika 250. Iwu mutondu walubanji awakamenaña munjila jajivulu, muloña wakukola. Chakutalilahu, awukasa nansambu nawa akiñikaku malola kwishina kulonda wubuli kuchañuka.

Mutondu waLone Cypress watela kutwanukisha akwaKristu atushinakaji itudi nawu, omikaña chikupu. Njila yabadika mwamwekeshelañawu kuumika yekala yakushimwina nsañu yayiwahi. Kaprofwetu Yoweli washimwineñahu dehi nindi, ‘mapala awamayala’ akashimwinaña nsañu yamuBayibolu. (Yoweli 2:28-32; Yil. 2:16-21) Toñojokenu hamaora amavulu azatañawu hakukwasha antu kudiza ‘nsañu yayiwahi yawanta’! (Mat. 24:14) Atushinakaji amakwawu akwakushimwina aWanta anomiki makabisha nikukala kukwawu hadi yaaka yayivulu. Neyi chakwila mutondu wacypress awiluka nawu wakola nawa awukolesha namalola ninsambu, atushinakaji itudi nawu twatela kuyakamena nikuyilemesha nankashi!

Yehova Nzambi walejeli antu akushankulu nindi: “Neyi kukwinza muntu wukweti mutu wanvu wakanyamukaña wakalemeshaña ipala kumesu indi.” (Lev. 19:32) Hakachi kawambuña  aYehova makonu, tukweti yakutalilahu yayiwahi yawantu ashinshika ‘anendi naNzambi’ hadi yaaka yayivulu. (Mika 6:8) Hampinji yinakutwalekawu kuzatisha nshimbi jamuBayibolu, mwalala invu jawu “hichibañula chalubanji.”—Yish. 16:31.

Kapostolu Pawulu wamulejeli mukwenzi Timotewu nindi: “Bayi wuhoshola mukulumpuku.” Ilaña, Timotewu wateleleli ‘kumulembelela neyi hitata yindi’ nawa ‘akulumpi awambanda neyi hiyamama jindi.’ (1 Tim. 5:1, 2) Mwamweni, Timotewu wateleleli ‘kunyamuka’ chamonayi mutu wanvu. Dichi, Yehova wakeñaña nindi nhoshelu yetu yimwekesheña kalemesha.

Mukanda waRoma 12:10 wahosha nawu: “Itejenu mwinenu abadiki kulema.” Mwalala aeluda muchipompelu alemeshaña akwaKristu atushinakaji. Ilaña wonsu wetu twatela kwimika chakutalilahu hakudilemesha wumu namukwawu.

Hela chochu, chisaka chikweti mudimu weneni wakwakamena anvwali niankaka jawu. Antu akeñakeñaña njila jakukoleshelamu mutondu waLone Cypress, nawa achidi kutwalekahu kuwukiña. Komana ninetu twatela kukeña njila jakulemeshelamu anvwali jetu niankaka jetu ashinakaja dehi. Chakutalilahu, twatela kutiyililaña neyi anakuhosha chatela tukeñeña kwila yuma yitunakukeña chakadi kuyihula jinakutoñojokawu.—Yish. 23:22; 1 Tim. 5:4.

Atushinakaji itudi nawu alema chikupu kumesu aYehova. Hayishiyaña chisayikilaku. (Mas. 71:18) Nzambi walala wayikoleshaña nindi atwalekeñahu kumukalakela nakashinshi. Anetu nawa tutwalekuhu kukwasha atushinakaji nikuyilemesha.

[Nyevulu yidi hefu 7]

Neyi chochiyakoleshañawu mutondu waLone Cypress, atushinakaji niwena twatela kuyilemesha

[Mazu aKusakilila]

American Spirit Images/age fotostock