Twalekenuhu Kufumba Yitoñojoka Yenu

WENOWU muzañalu wutwatiyaña hakumona mukwakuvuboka wakuluka yitembi nakudizuya chiwahi chakadi kumona kukala! Bayibolu yakoleshaña akwaKristu kufumba yitoñojoka yawu neyi chochafumbañayi mukwakuvuboka mujimba windi.

Mumukanda wayisonekeleliyi aHeberu, kapostolu Pawulu wasonekeli nindi: “Kudya kwakola kwambala kwawantu apama dehi; wowu afumba dehi yitoñojoka yawu, enjilila dehi [neyi mukwakuvuboka] kwambula yayiwahi nayatama.” (Heb. 5:14) Muloñadi Pawulu chayikonkomweneniyi aHeberu akwaKristu kufumba yitoñojoka yawu neyi chochakoleshañayi mukwakuvuboka ntafu jindi? Tunateli kufumba ñahi yitoñojoka yetu?

‘Mwatela Kwikala Antañishi’

Hakulumbulula chifulu chaYesu nindi “diyi kapristu muneni wafwana neyi Melekizedeki,” Pawulu wasonekeli nindi: “Tukweti yuma yayivulu yakumutena yena, yakala kulumbulula muloña muneli akwakutiya nakuhuwañesha. Hanu mutenowu mwela dehi ankuluñaña, heseka munakeñi cheñi wakuyileja mwaya nsañu jamazu aNzambi jatachi; mwabalumuka dehi kwikala akwakukeña mayeli hohu bayi kudya kwakolaku.”—Heb. 5:10-12.

Mwalala, akwaKristu aYudeya amakwawu amuyaaka nkulakaji yakusambila hiyashikili hakutiyishaku nawa akañenyi kukula kuspiritu. Chakutalilahu, chayikalili kwiteja chejeji chatoñekeleli haNshimbi nihakwalamisha. (Yil. 15:1, 2, 27-29; Ŋal. 2:11-14; 6:12, 13) Antu amakwawu chayikalilileña kuleka yaaku yachisemwa yaSabata yamulungu nimulungu niIfuku daKubuta Hanshidi dahachaaka. (Kol. 2:16, 17; Heb. 9:1-14) Dichi Pawulu wayikolesheli kufumba yitoñojoka yawu kulonda atweshi kwambula yayiwahi nayatama nawa wayilejeli nindi ‘akuli nakupama.’ (Heb. 6:1, 2) Mazu ayifumbiliyi atela asañumwini antu amakwawu kushinshika chazatishileñawu yitoñojoka yawu nawa chatela chayikwashili kukulilaku kuspiritu. Ndochu etu?

Fumbenu Yitoñojoka Yenu

Tunateli kufumba ñahi yitoñojoka yetu kulonda twikali apama kuspiritu? Pawulu wahosheli nindi, ‘kuhitila mukwinjilila.’ Kufwana akwakuvuboka, adinyikaña nakukolesha nyijimba yawu kulonda avubokeña chachiwahi nawa munjila yakala, anetu twatela kufumba yitoñojoka yetu kulonda twambuleña yayiwahi nayatama.

John Ratey, ndotolu wakuluka yitembi wahaChipatela chaShikola yaHarvad chokaña antu azaluka wahosheli nindi, “Kunyika mujimba diyi njila yayiwahi yakufumbilamu woñu wenu.” Kwesekeja nachahosheli Gene Cohen, mukulumpi watalaña Center on Aging, Health and Humanities haGeorge Washington University, wahosheli nindi, “neyi tutoñojokaña hayuma yakola, masewuzi amuwoñu atuñaña nyijila yikwawu yaletaña nsañu mumasewuzi, nakuletesha woñu kwikala nañovu yakuhemba nikwiluka yuma.”

Dichi, twatela kufumba yitoñojoka yetu nikwiluka Izu daNzambi nankashi. Neyi twila mwenimu, tukwikala antu afumbewa kwila  “mwaya muchima waNzambi.”—Rom. 12:1, 2.

Ikalenu naNzala ‘yaYakudya Yakola’

Neyi tunakukeña ‘kukula nakupaminaku,’ twatela kudihula netu: ‘Komana inakupaminaku mukutiya chalala chamuBayibolu? Komana antu anmonaña nawu nidi muntu waha kuspiritu?’ Mama yawantu watiyaña kuwaha kwamusha mwanindi wamukeki nikumudyisha yakudya yadishañawu anyikeki. Ilaña toñojokenu chikwakamenayi mama yawantu neyi chakwila muhita yaaka mwanindi chadyayi kapudi hohu. Munjila yoyimu, twazañalalaña hakumona muntu itwadizaña nindi Bayibolu nakupaminaku nakudihana nikupapatishewa. Ndochu neyi kadizi yeniwu yafunta hanyima mukuhita kwamafuku? Komana hichikuyineñeshaku? (1 Kor. 3:1-4) Ntañishi wukukuhwelela nindi kumbidi iwu kambanji wamuha niyena wakekala ntañishi.

Kuzatisha wuswa wutukweti wakwiluka yuma, chakeñekaña kutoñojoka chikupu nawa chakeñekaña kuzata nañovu. (Mas. 1:1-3) Bayi twiteja yuma yikwawu yitwambulaña kutoñojokahu nankashi kutuhuwañesha nakutukañesha kutoñojoka hayuma yalemaku, yuma yidi neyi kutala chisanji chanyevulu hela yisela. Hakwila nawu tuwejeluhu hayitoñojoka yetu, chikuwaha neyi tukwikala nampwila yakudiza Bayibolu ninyikanda ‘yanduñu wamaana niKashinshi.’ (Mat. 24:45-47) Kuwejela handandanda yitukweti yakutaña Bayibolu, chikuwaha neyi tukwambulaku mpinji yaKudifukula kwaChisaka nikudiza chikupu hanyitu yansañu yamuBayibolu.

Jerónimo, nkoñi wendaña mwituña daMexico nindi, chatambwilayi Kaposhi Kakutalila wakitañaña kejima. Wekalaña cheñi nampinji yakudizila hamu nañodindi. Jerónimo nindi, “Ami niñodami twekala nachaaku chakutañaña Bayibolu hefuku hefuku, nawa twazatishaña buloshuwa ‘[ya]Good Land.’” MukwaKristu wejina daRonald wahosheli nindi wendelaña hamu nandandanda yachipompelu yakutaña Bayibolu. Wukweti cheñi chikonkwanyi chimu hela yiyedi yayilehi yatela kumanishayi kudiza. Ronard nindi, “Iyi yikonkwanyi yankwashañaku kukeña kudiza cheñi ifuku dikwawu.”

Ndochu etu? Komana twekalaña nampinji yeneni yakudiza Bayibolu nikutoñojoka chikupu Hezu daNzambi? Komana twazatishaña yitoñojoka yetu nakwikala nakashinshi neyi hitukufuukula kuzatisha nshimbi jamuNsona? (Yish. 2:1-7) Dichi tufwilenu kwikala antu apama kuspiritu, enkawu maana nikwiluka kwekalaña nawantu afumba dehi yitoñojoka yawu yakwambula yayiwahi nayatama.

[Mwevulu wudi hefu 23]

Twafumbaña Yitoñojoka yetu kuhitila ‘mukuyijilisha’